نه اولور…؟
سوسن نواده رضی
ایشیقلار سؤنونجه
داها دا گیزملی گؤزوکور گئجه لر
اولورسا،
بئله اولسون دئییرم…
سندن هئچ نه اوممازدیم
سندن باشقاسی
باش قالدیرماسایدی ایچیمده
منده
سندن سووای هر نه وار ایندی
قانادلاریمین کؤکو جیجیشیر
اوچماغا یئریکله‌ییر
جان آتیر گؤیله‌شمه‌یه….
منه بیر آز آی یئدیزدیررمیسن؟؟؟
بیر داملا اولدوز ایسترسم
هوسلریمین سوسوزلوغونا دامیزدیرارمیسان؟……
منی گزدیررمیسن
منی آزدیرارمیسان
یوخولاری‌نین اوجقارلیغیندا
منی گیزله درمیسن جان ماغاراندااااااا……………….؟
من
سنده اؤلمک ایسترسم
منی دویونجا اؤلدوررمیسن؟
یا ایلاهلارا سیغینالیم
یا دا شیطانجیقلارا دخیل دوشه‌لیم
قانادلاریم برک جیجیشیر،
بوراخ دا تاخیلیم خیالیمین گؤیلرینه
اوچماسام
اینان اؤله رم بو گئجه……………….
نیسگبللرینه نیشانلاما منی
نیسگیللر قوینوندا
نیسگیللره نیشانلانمیشام دا
گلین اولموشام دا
بویلویام دا، گیله‌سی!
سن منی
نیسگیل‌سیز قوینوندا قوناقلاندیر نه اولور؟…
یک پاسخ
سلاملار
گونش گؤزلجه اورمو شهرينی بزه يه رك، قيزيل ساچلارينی پنجره دن ائويميزين ايچينه سپه له يركن، گؤزلريم بو گؤزلليگی سئير ائتمك اوچون شيرين يوخودان قاچدی! قئيقاناق لا آغزيمی شيرين ائديب، نئت باشينا گلديم، ايلك اؤنجه ايشيق سايتينا گليب، بو دويغوسال، دادلی و چوخ گؤزل شعردن لذت آلديم … و گونوم نه قدر گؤزل باشلاندی ….
… تشككورلر سوسن خانيم … تشككورلر ايشيق …