۱. دومان
دومان پامبیق‌لیغیندا
یادلاشیر تو‌‌رپاق آیاقلارا.
گؤزلو
گوزله‌لرله بیرجه کلمه حسرتینده.
یارپاقلارین گؤز یاشلاری
جیلالانمیش گوموش کیمی پاریلداییر.
بیر قوشون یالقیزلیق نغمه‌سی
ده‌ییب قاییتماغا
تاپا بیلمه‌ییر سال قایالاری.
مئشه
قیپچینیر اؤز یاشیل‌لیغیندان.
تکجه قوردلار او‌‌یناشیر.
۲. سیناق
آچیلدی سوفره‌سی
یوخوسوز گئجه لرله
اضطرابلی گوندوزلر آراسیندا!
دؤشندی باشدان – باشا:
«الوداع» دئیه قووزانان آغی‌دان
اوره‌یه سانجیلان، آغری‌یا قده‌ر.
دوزولدو قوناقلار،
سانجیلدی گؤزلرینه ائیگین‌لیکده
«ساغلیق» اوچون گلن‌لرین بوش یئرلری؛
آغی دولو پیاله‌لر
ایلشن‌لر ساغلیغینا بوشالدی.
