آنا!
سرینلیک باغیشلیر بو کلمه جانا،
قارا گئجه‌لرده قارا گؤیلرده
بنزه‌ییر ایشیقلی بیر کهکشانا.
آنا!
وطن دئدیم یادیما دوشدو
وطنی آنادان آییرماق اولماز؛
آنا جواهرات، وطن گوموشدو
اونسوز بخت اوزویو قاییرماق اولماز.
آنا
بو دوزلرین قیز گوزللیگی،
آنا
بو داغلارین شاه غرورودور؛
آنادان دویولور جنتین عطری
آنا آی‌دان آری، سودان دورودور.
آنا، اللرینین حرارتیله
ده‌یسه هر کیمسه‌نی بیر اوشاق ائیلر؛
عؤمور یوللارینین- اؤز بالاسینا-
سرت قایالارینی یوموشاق ائیلر.
آنا….
نئجه سرین سسله‌نیر بو سؤز!
باهار کولگی‌دیر سانکی بیر اسیم؛
نسیم‌لر اسنده سانیرام کی اؤز-
آنامین لایلاسین اوخویور نسیم.
گونوزو، گئجه‌نی ایشیقلاندیران
بیر گونش‌دیر آنا، بیر آی‌دیر آنا؛
بو یئر کوره‌سینده تؤکولمزدی قان
دونیانین حاکیمی اولسایدی آنا.
یک پاسخ
چوخ گؤزه ل شعردیر