وارلیق یاسینداییق
رضا سلطانوند

اؤنومده‌ یئتن «یئنی عهد»،
بیرده اوره‌ک داریخدیران
تعطیل گونو.
پاییز ناخیش‌لاری
ایندی
ساری، شه‌وه؛
جانسیز
آخیر گونش
گوندوز.

گاه نغمه‌لر
یادا آغی‌لار
سیغیرچین‌لارین سسینده،
بیردن بیر خوش نوا
یاغیشین شیر ها شیری؛
دامدان
چالینیب صور،
بئله‌لیکله عهده قیلین وفا
گلیبدیر گؤیدن آیه‌لر.
گاهدان دا بیر سیزاق،
سونرا
بیر ایتی گؤز پیشیک
اوو دالیسیجا.

تلفن‌دا سس قویا، دئیه‌جک:
«یئنی اؤزللیک‌لره
آیاق قویوب باش گیجلتیسی
اؤتن گونلرده بیر داها،
خبرین وارمی هئچ؟
شی‌زاد، نه گونده‌دیر؟»

اینام یوخدور داها قارغالاردا دا،
قار
قار دا گلمیر هئچ.
ائله بیل، آیری بیر سبب‌دن‌دیر،
یارپاق‌لارین
خیشیل- خیشیل خیشیلتی حوزنو!
ائله بیل پاییز، یایین دالیسیجا گلن دئییل.
چوخدان سولوب
سویوغون کسدییی سؤزلر؛
قار
قار
هم ده
سیغیرچین‌لار…
بیزی سوراغلایان دا دئییل‌لر.

بیلیرم ایل‌لر بویو
صبیرلی اولوب یئر.
ژوراسیک عهدیندن بری
تنهالیق اونونلادیر.
«عهد عتیق»ده یازیلیبدیر
بو ناغیل‌لار،
بو ملال‌لار.
تاریخ بویو بئله اولموش
قیل و قال‌لار.
آنجاق یئنه
بیزلر ده
جان اسکیلدن غم‌لرله ال به یاخا،
وارلیق یاسینداییق.