توپراق آنام!
سوسن نواده رضی
سایدام کؤنول‌لری‌نین اوزه‌رینده
ناماز قیلیناجاق قدر
سوچسوز ایدیلر،
توپراق آنام!
و مظلوم…
هانسی اؤلویه آغلاییم؟؟؟
هانسینا غسل وئریم؟؟؟
گئدین اویادین گوزگولری
منه
نفرتیمی باسدیرا بیله‌جه‌ییم خوشگؤرولوک گتیرین
اوره‌ییم کیمی
قبریستانلیغا چئوریلن یئتیم کندلریمیزه
توختاخلیق وئریم بیر آز…
آرزی-گورزولری یاریم قالمیش قیزلارا لای لای
نیسگیللری توزا تورپاغا بولانمیش اوغوللارا لای لای
آغاجلارا لای لای
داوارلارا لای لای
خوروز بانیسیز صبح اذانینا لای لای…
نولدو
ندن داریلدین توپراق آنا؟
ندن غضبی‌نین تکرلیکلری آلتیندا
لینج ائتدین
باغریندا سخاوتله بسله دیکلرینی؟!…..
داش چانقیللی آجیماسیز لیقلارا
توتولان آنالارا لای لای
گیزلی ظولوملره یئم اولان
سوده‌مر بالالارا لای لای…..
یک پاسخ
سلاملار ایله سایغیلار
دیرلی “رضی” خانیم، دویغوسال شعرینیز بیرداها بیزی قاراداغ دا طبیعت قهریندن جانلارین الدن وئرن وطنداشلاریمیزین یانینا آپاریب، اوره ییمیزین آجی سین یئنیله دی….
سویوق گونلر باشلاماق دادیر….آنجاق ایستی پالتارلاریمیزی اوراداکیلار ایله پایلاشساق، کولک ده بیرزاد ائده بیلمز…