کهلیک‌لر
رقیه علیقُلیان (لاله)

سیزی گؤردوم چیچکلندی اوره‌گیم
داغ‌لارین سوناسی گؤزل کهلیک‌لر!
شـوقا گلدی منیـم آرزی دیلگیـم
داغلارین سوناسی گؤزل کهلیک‌لر!

آمـاندیر قویماییـن باشیـزی قـارا
قـوزقون گلیر باشیز اوستـه دولانا
او دولانیر توتوب بیر-بیـر جـان آلا
داغلارین سوناسی گؤزل کهلیک‌لر!

هــادیر اولــون پرده آچیبلار سیـزه
چیچکلیک سانمایین قونماییـن دوزه
رحم قیلماز توتسـا هـئچ بیرینیــزه
داغلارین سوناسی گؤزل کهلیک‌لر!

زیروه‌لردیر سنین یئریـن اوجـالان
گئریده قوی قالسین ظالیم جان آلان
یـاماجلاردا اولار عؤمرونــوز تــالان
داغلارین سوناسی گؤزل کهلیک‌لر!

قاققیلدایین اوجا داغ‌لار باشیندا
نغمه‌لر یارانسین داغین داشیندا
فرَه‌لر اویناسین کؤرپه یاشینـدا
داغلارین سوناسی گؤزل کهلیک‌لر!

«لاله» آچار کهلیک‌لرین ایزینده
شنلیک یاشار دوداغیندا سؤزونده
چیچکلنر یاشیللیق‌لار دوزونده
داغلارین سوناسی گؤزل کهلیک‌لر!
۱/۳/۹۸