(۱): ایت گئدیر، دونقوز گلیر
میلّتی درده سالان ایل، بای بای
ایشی بایقوش کیمی نیسگیل، بای بای
گئجه گوندوز باشووا سانکی یاغیش
داشی یاغدیرسین ابابیل، بای بای
گئتگینن دایمی سن ایت قالاسان
اولاسان قارقا کیمین شیل، بای بای
سنی بیر دریایا آتسین بو فلک
اولماسین هئچ اونا ساحیل، بای بای
بیزی تاخدون گئنه ارزاق صفینه
سنی اؤلدورسون اراذیل، بای بای
سنه قابیل یئکه بیر داش ویرسین
سنی سوخسون یئره هابیل، بای بای
کاسیبین جور جوجوغون آغلاتدون
آهیم اولسون سنه قاتیل، بای بای
تزه پالتارلارا حسرتدی بالام
ساراطان یا توتاسان سیل، بای بای
کوسدوروبسن منی سن آروادینان
سنی بوغسون آجی فیلفیل، بای بای
من کیمی سنده بو بایرام قاباغی
یئیه‌سن گونده فلافیل، بای بای
موتورون ایلمیزاییم ریپ ویرسین
ویراسان من کیمی هندیل، بای بای
آغزووا دورته‌لییم یئرکؤکونو
دولدوروم انگووه ازگیل، بای بای
سنده ساتدون وطنی اوغرولارا
کاش سوخولسون گؤزووه میل، بای بای
منلیک اولسایدی چاتاردیم بئلووه
گونده اون یئددی سبد زیل، بای بای
یوخسولون گؤزلری قالمیش قاپیدا
گله‌جک خونچادا آجیل، بای بای
قوی توپورسون اوزووه حشره قدر
ایچی بوش ائوده کی زنبیل، بای بای
سن ده گئتسون بیزه دونقوز گله‌جک
سولدو گولداندا قرنفیل، بای بای
آی «نیراوغلو» بیزه خوش گون یوخوموش
بایرام اولموش بیزه تعطیل، بای بای
۲۶/اسفند/۹۷
(۲): سئل گلدی
جنگلی دوغرادیلار سئل گلدی
او قدَر آغلادیلار سئل گلدی
سپدیلر گؤیلره قوندارما یاغیش
حق یولون باغلادیلار سئل گلدی
وارلی‌نین پوشکونه ایران چیخدی
یوخسولو یاغلادیلار سئل گلدی
ایلی باشدان باشا ساققال یئرینه
میللتی تیغلادیلار سئل گلدی
نمازین عرشه چیخان گوزگولرین
گؤتوروب زیغلادیلار سئل گلدی
آیدان آیدین اوره‌یه قیر دئدیلر
قیرلاری آغلادیلار سئل گلدی
داغ‌لاری باغلادیلار چور دوشدو
باغ‌لاری داغ‌لادیلار سئل گلدی
خان یئدی رعیته چارپاز دَیدی
یئدیلر قیغلادیلار سئل گلدی
گئنه خان دارتدی کاسیب چکدی بلا
ایچدیلر بوغلادیلار سئل گلدی
آی«نیراوغلو» بیزه خوش گون یوخوموش
جنگلی دوغرادیلار سئل گلدی
۶/فروردین/۹۸
