جغرافیادا بوغولان تاریخ!!
کریم گول‌اندام

پایلارا باخ پایلارا
قارا ایللر ،آیلارا
قارا اللر اوزاندی
سد باغلادی چایلارا
اورمو گؤلو قورودو
ملت قالدی وایلارا!
***
هرگلنه حیکایت
هر بیله‌نه شیکایت
کیمسه چاره قیلمادی
بو موشکوله نهایت
اورمو گولو سؤیله‌دیک
آد قویدولار سیاست!!
قییدیلار جاوانلارا
سالدیلار زیندانلارا
***
هر دولت بو ملته
بیر جور ناغیل سؤیله‌دی
دئدی دارقورساق اولما !
دؤنوب عاغیل سؤیله‌دی
هرکیم آغزینی آچدی
سن بیر بوغول سؤیله‌دی!
بو ایشی تاپشیر بیزه
نه داخلی واردیر سیزه
بو موشکول حل اولاندی!
اورمو گؤلو دولاندی!
***
دولاندی آیلار، ایللر
اؤتدو بیر-بیر فصیللر
توپلانتی‌لار باشلادی
ییغیشدی باش بیلنلر !
بو ملتین دالدادا
ساققالینا گولنلر !
اورمو گؤلو آدینی
خریطه‌دن سیلنلر !
یئییبب، ایچیب یازدیلار
یازدیقلارین پوزدولار!
اورمو گؤلو قویوسون
داها درین قازدیلار !
آییردیلار بودجانی
آییردیلار؟ بس هانی؟
مجلیس دئدی نئجه اولدو؟
دولت دئدی گئج اولدو!
***
میلیارد- میلیارد پوللاری
قارا اللر آلدیلار
عوضینده بیزلری
یامان درده سالدیلار
مافیالار جیبلری
دولارلارا دولدولار
اونلار سوقات گتیردی
بیر بئله سددی ، بندی
هم قویولار باتدیلار
هم ده چایلار توکندی
هم گؤلو قوروتدولار
هم نئچه پارا کندی
هر شئی دوزا بلندی !
طبیعت دیله گلدی:
دور بوردان کؤچ افندی !!!
***
اورمو گؤلو باتاندان
نه قدر باغ سؤکولدو
بنده چکیلمیش سولار
گلیب چاتدی باخچایا
باخچاداکی آلمایا
آلما پولا گئتمه دی
قوخوب ،چؤله تؤکولدو!
اکینچینین، باغدارین
بئلی سینیب، بوکولدو!
اوزون یاخشی بیلیرسن ،
کیم آغلادی ،کیم گولدو!!!
اورمو گؤلو یوخ داها
خریطه‌دن سیلیندی !
جغرافیا دئییل کی!
سیلینن تاریخیندی
تورک ائولادی بیل ایندی
بو درد آرتیق سنیندی
چاره وارسا قیل ایندی!!
اورمو-۱۳۹۶