آخشام چاغی گؤروشه گل غفیلدن
سحربارانی

آخشام چاغی گؤروشه گل غفیلدن،
باخیشینلا روحوما بیر شعر اوخو!
ایکی بارداق آجی چایا قوناق اول،
دویغولارا آل قیرمیزی دون توخو!

بیر پیالا ماهنی گتیر گلنده
سپ سسیمه دامجی- دامجی النسین!
نسیم کیمی ساچلاریمی تومارلا،
قوینوما گیر روحوم سنه بلنسین!

کال آغاجین تئز یئتیرمیش ناری اول
یاناقیمدان دریم سنی گولرکن!
موغایات اول کیمسه سنی گؤرمه‌سین،
گیزلین- گیزلین کوچه‌میزدن گلرکن!

داملا- داملا یاغیم سنه سئوگیمی،
یاز یاغیشی قیسیر قالسین اوتانسین!
ناغیل- ناغیل دولو کتاب سئو منی،
کلمه‌لر گؤزونده شعره بویانسین!

سئویشیرکن دوداغیمیز، کؤنلوموز
سنین اولدوغومو کیمسه گؤرمه‌سین!
تانرینی دا یوخویا وئر ائله گل
سئوگیمیزه قارا سحیر هؤرمه‌سین!

سحر- سحر یئنه سنه وورولدوم،
شعریمده تامسینیر سنی بیلیرسن!
کاغیذ اوسته باخیشلارین اویناییر،
سؤزلریمدن بویلانیرسان گولورسن!