کیم سوسما حاقین آلیر دوداقلارین جان چکیشمه‌سیندن؟
معصوم جبارپور

کیریمیشم آی داراشلیق دونیا
کیم دئییر دونیا فیرلانیر ؟
ایللردی تانرینین قاشقاباغی –
جیزیلیب یاشام تابلوسیندا
بوراخمایین منی اؤزگورلویومه
وجودومون شهریندن قوغا سسی گلیر
ایچیمده کی اوتوز نئچه ایللیک حسرت
بیر دئپرمه قارشی
داغیلیر
گؤزلریم جومور
گؤزلرینین مئیخاناسینا
سوچ مو؟
بوللو “سئویرم” سؤیله‌ییشینله سوسما حاققی آلمیشسان-
گؤزلریمدن
سئوگی تمللریمیز
یئنیدن دوغولور
بو گئجه
یاساق اؤپوشلرله اؤزونو –
اوتانج اپیگینده گیزله‌دی!
گوزگونون دوداغی قاچدی
اؤپوشلر گوزگوده چوخالدی
بیر قهقهه سسی
دوداق زالیندا مینلر اؤپوش دوغولدو
بو گئجه بیر سن سن
سنسیزلیگین داشین آتمیشام
بیر قهقهه سسی
تانری قیسقاندی بونجا اؤپوشه
ایچینه سیغماییر
دوداقلار شیللاق آتیر
بیر چاخیر دوداغا
دوداقلار تانرینین اوپوجوکلری آلتیندا جان وئریر
باداقلار توکه‌نیر
میزیلدایان شارکی‌لار سوسور
زامان ساعاتی توپراقلارینی –
سپه‌له‌ییر گلینلر باشینا
دونیا
دونیا سوسور
کیم سوسما حاقی آلیر دوداقلارین جان چکیشمه‌سیندن؟
و بیریسی-
یالنیز انسانلیق یاساسینی بیلیردی
بو گئجه بیریسی یالقیز یاتاغیندا یاتیر!!!