سیزدن ساری داریخاجام
بختیار علیمرادی(موغان‌اوغلو)

دوستلار سیزدن آیری دوشدوم،
سیزدن ساری داریخاجام.
شیرین-شیرین محبتدن،
سؤزدن ساری داریخاجام.

نحس طالعیم سوردو باش‌دا،
درده دوشدوم من بو یاش‌دا،
عؤمروم بیتدی قارلی قیش‌دا،
یازدان ساری داریخاجام.

گؤزدن ایتیب اکیلمه‌ین،
چتینلیکده چکیلمه‌ین،
یاد اؤنونده بوکولمه‌ین-
دیزدن ساری داریخاجام.

وار -دؤولتیم اولوب تالان،
بو دردلردیر منه قالان.
طالعیمه داشی چالان-
قیزدان ساری داریخاجام.

«موغان اوغلو» ازدیردیگین،
مجلیسلرده سوزدوردوگون،
سینه‌ن اوسته گزدیردیگین-
سازدان ساری داریخاجام.

بیزده سنی داریخیریق
سحر خیاو
رحمتلیک «بختیار» موعللیمین شعرینه بیر بداهه جاواب

قلم- قلم، واراق- واراق
بیزده سنی داریخیریق.
هئی توتوروق سندن سوراق،
بیزده سنی داریخیریق.
نه امتحان بو نه سیناق؟!
بیزده سنی داریخیریق.

گل! قلمین باشین یولور،
دفترینین گؤزو دولور،
کیتابلارین یئتیم سولور،
بیزده سنی داریخیریق.

سن تانیردین شاعیرلری،
سینه‌لری غم دفتری،
اوونمورلار سندن بری،
بیزده سنی داریخیریق.

کیتابینی قوخلاییرلار،
دفترینی یوخلاییرلار،
بولاغ کیمین چاغلاییرلار،
بیزده سنی داریخیریق.

لفت وئردین آرامیزدان،
دوز سپیلیر یارامیزدان،
قان تؤکولور قارامیزدان،
بیزده سنی داریخیریق.

ایسته‌مزدین دوستو یاشلی،
نه دن اولدون قارا داشلی؟
دردیم اولدو مین بیر باشلی
بیزده سنی داریخیریق.

بو قیش سنسیز لاپ قوورور،
قارلار هیجراندیر سوورور،
اولو شهریار بویورور:
یالان دونیا- یالان دونیا!

ننه قبری ایلک بئشیگین،
قبریستانلیق سون دئشیگین،
نه ایچه‌رین، نه ائشیگین،
قارانلیق بیر دالان دونیا!
ایچی بوش‌لا دولان دونیا!