تک، تنها اوتورما
علیرضا میانالی
تک، تنها اوتورما، بیردن یاز گلر؛
بیردن باهار گلر، بیلمزسن گولوم!
ائشیکدن سس- صدا گلیر، اوتورما؛
گولر اوز گؤرمه‌سن، گولمزسن، گولوم!
قاچ، قوتار تنهالیق، تکلیک الیندن،
گوزگوده گؤردویون سنه‌دی مخصوص.
تنهاسان، آما کی سن تک دئییلسن،
تنهالیق یولونی سئچمیسن افسوس.
گل گولوم، بیر چیخاق اینسان سئیرینه؛
شه‌هر باشدان- باشا اینسانلا دولوب.
ان اوجقار او داغین قار ذیروه‌سینه،
یول سالان ائله بو اینسانلار اولوب.
نه اصلی، نه کرم گؤیدن دوشمه‌ییب،
لئیلی ده، مجنون دا اینساندی، اینسان.
سن قورتارانماسان تکلیک الیندن
علوی حیسس‌لره یول آلانماسان.
تک، تنها اوتورما، بیردن یاز گلر؛
بیردن باهار گلر، بیلمزسن گولوم!
ائشیکدن سس- صدا گلیر، اوتورما؛
گولر اوز گؤرمه سن گولمزسن، گولوم!
