ایچیمده چات سالدین،
سنه لعنت اولسون!
نئچه‌یه بؤلوندوم
نئچه من اولدوم-
بیریسینده شیطان آیاق اوستو ایشیر،
بیریسینده حوا…
بیریسینده آدم آخشام باشی یورغون گلیب
کؤهول بوجاغیندا سئوگسینی گزیر؛
او بیرینده عیسا دیسکینیبدیر،
قاچیر جوذامیدن؛
بیریسینده دده قورقوت جیریق لی شالوارلا رپ اوخویور،
گیتار چالیر دومرول کؤرپوسونده.
بیر ایچیمده سن گلیبسن شام اولوبسان مزاریم اوستونده؛
بولود اولوب ساچینا یاغیرام
ساچیندان کپنک گؤیرسین ایچینده کی شؤعله‌یه.
بیرینده بیر درویش گلیر قاپی چالیر،
بیر کشکول شعر توللاییر حیه‌طیمیزه.
بیریسینده سن لوت سویونوب اوزانیبسان اورمو دوزلوغوندا
بولوتلاری چاغیریرسان،
آی یئره انیر.

بیرینده اوزرلیک دومانیندا گلدی شامان،
قیرخ بالتا گتیردی قولومو کسمه‌یه
دیلیمی کسمه‌یه
شئییمی کسمه‌یه؛
سونرا سن یاتاغیما گیردین-
یورغانی چیرپدین،
قاپینی چیرپدین،
کوچه‌نی چیرپدین،
شهری چیرپدین
گئتدین.
بیرینده کابوس گؤیریر اللریمیزدن
هر بوداغیندا قیرخ یارپاق،
هر یارپاقدا قیرخ رویا،
هر رویادا قیرخ قیز؛
بوتون قیزلار یورغانی چیرپیپ،
قاپینی چیرپیب،
رویانی چیرپیب
باکیره‌لیکلرینی گؤتوروب گئده‌جکلر.
سن بیر گئجه
یوخودا سئویشه‌جکسن منیمله،
نئچه هفته سورا حالین بولاناجاق؛
او زامان قانادینی آچ
گل ایچیمده دوغ!
دوغولان بیر، ایکی، اوچ، دورد، بش، نم نئچه گؤز
ایچیمده کی پارچالاری بوتونلشدیرر،
شامان مندن کسدیکلرینی اونا باغیشلایار.
قاییت
قاپینی اؤرت!
یورغانی اؤرت!
رویانی اؤرت!
گؤزلریمی اؤرت!
منی اؤرت!
لعنت اولسون!