قارانقوش
ائلدار موغانلی
“دالغا” موسیقی گروهو و سئویملی صنعتکار اوستاد عاشیق “چنگیز مهدی‌پور”ون شرفینه
یووالانیب بیر سئودانین گؤزونده
ایلک باهارین سوراغیندا قارانقوش.
بولود- بولود نغمه‌لرین اویودور
گیله‌لرین یاتاغیندا قارانقوش.
تئللرینه یاشیللیقدان خال دوزور
نغمه‌لری ماویلیکدن سوزولور
قانادیندان ایشیق دامیر، نور سوزور
قیزیل گولون یاناغیندا قارانقوش.
بیر سئودانین اومیدینی بسله‌ین
سئوگیلی‌لر پیچیلتیسین سسله‌ین
باهارلانیر گلیشی‌له بو وطن
بزه‌ننده نووراغیندا قارانقوش.
دالغا- دالغا نغمه‌له‌نیر دیلله‌نیر
کؤنوللره نور چیله‌ییر، اله‌نیر
“موغانلی”نین گؤزلرینده گولله‌نیر
آذربایجان تورپاغیندا قارانقوش.
قیش ۱۳۹۲- تهران
یک پاسخ
بیر سئودانین اومیدینی بسله‌ین
سئوگیلی‌لر پیچیلتیسین سسله‌ین
اوغورلار.چوخ گوزل