چئویرن: ایشیق
ترجمه: ایشیق
ایشیق

کؤلگه‌لر
جعفر تانیش
jafar tanish


دونموش بیر هئیکلم قارشیمدا دومان
آرخامدا پوزولموش جومموش گئچمیشیم.
گله‌جک مئشه مین بیر-بیر آغاجین
گئچمیش بالتاسینا وئرمکدیر ایشیم.

کؤلگم ده منه تای سؤیکه‌نیب یئره
من اونون ماتییام، اودا منه مات.
کیمسه یوخ من ایله اونا سؤیله‌یه
حئیرتسیز ماتلیقدیر بوتون بو حیات.

هر سحر اؤلو تک گوروندان قالخیر
یقینم اونا دا نیفرت بورجوم وار.
گرکدیر تیکرارلی دویغوسوز یولو
یوللاشا نه قده‌ر قیچدا گوجوم وار.

بعضا ده بیر غریب فیکره جومورام
دئییرم کؤلگه‌لر اینسانلار کیمین.
بو حقسیز پای بؤلوش دونیالاریندا
خوشبختی، بدبختی وارلاری یقین.

کؤلگه وار دنیزه یاناش اولالی
جوشغونلو دالغانین دوستو ساییلیر.
اوفوقله قایانین زیروه‌سی اولور
ایشیقلا قوووشور سویا یاییلیر.

کؤلگه وار سویوق بیر مزار داشینین
آرخاسیندا دوروب داشا دؤنوبدور.
یونولموش او داشا باغلانان کیمی
سحر دیرچه‌لنیب آخشام سؤنوبدور.

کؤلگه وار بوداقلی تک چینار کیمی
چؤل آرا یولچویا غنیمت اولوب.
گونشین آلووو قیزدیران زامان
آنا تک قوجاغی محبت اولوب.

کؤلگه وار بیر گئجه آی ایشیغیندا
ایگیت بیر قوچاقلا گولله‌لنیبدیر
ییخیلان چاغیندا آچیب قوجاغین
آلووولو بیر قانلا جیلوه‌لنیبدیر

کؤلگه وار کیریمیش غریب محبوسلا
ایللردیر دوواردا یوماقلانیبدیر.
بلکه ده ترپه‌نیش گؤرمه‌ییب اوندان
دوستاق تک غریبی اولدو سانیبدیر.

یوخ- یوخ یاشاییرام کؤلگم ده گره‌ک
فیکریم تک گوللره سئوینج بسله‌سین.
حیاتین یولوندا یورولانلاری
چینارین باغری تک گل- گل سسله‌سین.

یاراماز دیری‌کن منه بو سوکوت
دنیزم دالغام وار جوشغونام یئنه.
دوستاغین قارانلیق داراش بوجاغی
فیکریمله دونیاجا بؤیوکدور منه.

دویغوسوز یاشاماق عادت اولموش‌سا
عشقیمله یاساغین پوزمالییام من.
قانیملا کؤلگه‌مه بیر حیات وئریب
عدالت ناغیلین یازمالییام من.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

کؤلگه‌لر / جعفر تانیش

ایشیق
www.ishiq.net

آذربایجان ادبیات و اینجه‌صنعت سایتی

کؤلگه‌لر / جعفر تانیش

ایشیق
www.ishiq.net

آذربایجان ادبیات و اینجه‌صنعت سایتی

کؤلگه‌لر / جعفر تانیش

ایشیق
www.ishiq.net

آذربایجان ادبیات و اینجه‌صنعت سایتی