سنسیزلیک‌لر(۷)
مجتبی نهانی

(۱)
یاغیش ووروب باشیما
گؤزلریمده قارلار دولوسو
اوره‌ییمده بیر یول قالمامیش-
گلمکده اولان آیاقلارا
باخسام
گؤرولمه‌ینلرده سن
باخماسام
ایکی تئلین الیمده آغلاییر
کؤلگم بیله دانیشمیر منیمله
چیخمازلار اؤلکه‌سینده‌یم
سونو اولمایان بیر باخیشین کئفلیسی.

(۲)
یاریدان یاریمچیلیق-
بیر سئوگی‌یه دادانمیشدیلار،
اوره‌ییمین آریلاری
اود وورما گولوم-
بو اونودولموش پته‌یی!

(۳)
قوجاغیمدا سسین واردی
اؤپورم یاناقلارینی
قیرمیزین یادیما دوشور
آمان، قوخون بوراخمیر منی
کئفلنمیشم بیلمه‌دن
آشا-آشا گئدیرم
سنسیزلیک یوخوشوندا…

(۴)
بئله گلیب
بئله گئتمه‌مه‌لی آخی
قادینیم آمان وئر-
دئییم نه قده‌ر چوخ سئویرم سنی.

(۵)
بو سون قورشون،
-سنسیزلیک قوخولو-
یئر آچیر اوره‌ییمده
یوخلوغوندان داها چوخ اینجیدمیر منی.