بو نه سس دی، بو نه خبر؟
مقصود تقی‌زاده هریس(نیسگیل)
بو نه سس‌دی، بو نه خبر
دامارلاردا قان دایاندی.
بو نه درددی، بو نه کده‌ر
اوره‌ییمیز پارچالاندی!
بیتیشمه‌میش یارامیزا
هانسی ظالیم دوز باغلادی؟
دولوخسانمیش گؤزوموزده
گؤز یاشلاری بوز باغلادی.
بیر اووچو بیر گولله آتدی
هاوادا سوزدو قورغوشون
شعر- صنعت قاتاریندا
یئری بوشالدی بیر قوشون.
بیر بوداقدان بیر قوش اوچدو
مین بیر آغاج غمه دالدی.
دونیادان بیر شاعیر کؤچدو
داغلار، داشلار یئتیم قالدی.
عؤمرون چنلی دؤنگه‌سینده
ترلانی اوولادی اجل.
آذربایجان، قارا باغلا
گول اوغلووون یاسینا گل!
