اورمو گؤلو ….
فاطمه زلفی

 بیرگؤلوموز واریدی
ائومیزینن یاریدی
آرخاسی داغلار کیمی
اؤلکه‌میزه ساریدی
در- دوواری داغ قایا
دؤرت بیر یانی باغ‌ایدی
دوزلو گؤلون دؤورسی
شیرین چای بولاغ‌ایدی
بیرگؤلوموز واریدی
جانی سولو ساغیدی
قیشدا سازاخ سیندیران
یایلاری خوش چاغیدی
آدالاری بیر باشا
قارتال لار اویلاغیدی
یولدان کئچن دورنالار
گؤل اوسته قوناغیدی
داغ، دره‌لر دوزلری
اودولو یایلاغیدی
هاببان هوببان قاچاردیخ
یاریل ییرتیل اوچاردیخ
ایگیدلرین الیله
حاق قاپیسین آچاردیخ
ایگیدلر اویدو یاتدی
یاغی آرزییا چاتدی
بوللو سوللو وارلیغا
دار گؤزونو داراتدی
میدانی بوش گؤرنده
هریانی چالدی چاپدی
چایلاری بنده چکدی
بندی دمن ده چکدی
باغرینی یارا یارا
گؤلو کمنده چکدی
سولغون گؤلو گؤرنده
قوشلار دوشوب اؤلنده
قیسیر یئل‌لر اسنده
دوز قالخدی باسدی کنده
هارای گلدی اویاندیخ
سوتک گؤله جالاندیق
ایگیدلرین الیله
گله‌جه‌یی قازاندیخ
ایگیدلر سینه قالخان
اوزاق دور قوجا شیطان
بوردا یووا سالدیریب
قوچاق ، ار، ایگید آسلان
هارای هارای آییلدیخ
دؤرت بیر یانا یاییلدیخ
دؤرت بیر یان بیزیم اورمو
بیزیم گؤل بیزیم اورمو
یاغی‌لاری هایلادیخ
باشیمیز اوجا دوردو
هاببان هوببان اورمو گؤل
یاریل ییرتیل اورمو گؤل
بند، بره‌نی بیر- بیر آچ
سو ایش قورتول اورمو گؤل.
۱۵/۱۱/۹۲