اوتورموشدوم شیرین- شیرین اومبرتو اوکونون « نام گل سرخ» کیتابین اوخویوردوم. لاپ حساس یئرینه یئتیشمیشدیم. کور بیر راهیب ارسطونون کیتابین- صرف گولوش و انسانلارین حیاتینا بوراخدیغی تاثیرلردن یازدیغینا گؤره- ایللرجه کیتابی گیزله‌دیب، ائله کی کیتاب بیر نئچه جوان و علمه راغیب راهیبین الینه چاتیر، کیتابین صحیفه‌لرین زهرله‌ییر. اومبرتو اکونون راویسی اوچ راهیبین جانینی آلمیشدی کی ائو تلفونوموز زنگ چالدی.
-الو… بالا نئجه سن؟
سسینین تیتره‌ییشیندن تانیدیم. سلطان باجی‌ایدی. رحمت‌لیک قاین آنامین آناسی.
-بالا تحنیفه باخیسان؟
اؤز- اؤزومه دئدیم بلکه فارسی وان یا باشقا کانالین یئنی سریالینین آدی دی.
– نه دئییرسن؟ آنلامیرام، تحنیف ندی؟
-بَه خود اولمادیم بالا… اوجادان دانیش.
سلطان باجینین قولاغی آغیر ائشیتدیغنه گؤره سسیمی اوجالتدیم. تلفونون آغیزلیغینا قیشقیردیم.
-سلطان باجی! نه دئییرسن؟ آنلامیرام کی؟
-پَهوووووو….به نئییه؟
-سلطان باجی! واللاه بیلمیرم نه دئییرسن.
-به سن باخمیاجایدین من باخاجایدیم؟ بویون قونشوموز کلبه فاطمانی دا چاغیرمیشدیم ، ایکیمز باخدیخ. آلـلاه کسسین بئساواددیغی. آخی اونون نوه‌له‌ری تهرانی دی. او گئنه منن یاخجی دیل بیلیر.
-نه‌یه باخدیز سلطان باجی؟ کلبه فاطما خالا نه‌یی یاخجی دوشونَر؟
-بالا هئش بیری گلمه‌میشدی. هئش او گولَش قاباخ سیّد ده گلمه‌میشدی تحنیفه.
-هه….سلطان باجی! ایندی بیلدیم نه دئییرسن .
-بالا کلبه فاطما دئییردی کی تحنیف‌ده دئدیلر دای بیز هئش کسینن ساواشماریخ. صاباحدان هَر شئی بالا- بالا اوجوزلاشار. کلبه فاطما دِئییردی کی آمرلیکا دا تحنیمین سیندیراجاخ قوی آی باشی رحمتدیح کیشینین آیلیغین آلیم، گلیب منی آپارارسان دندانسازا. دندانساز دا اوجوزلاشار. آغزیم شیل- کوت دی. آریخلامیشام دیشلَریم آغزیمدا لاقا- لاق ائلیر.
سونوندا سلطان باجینین نه دئدیغینی آنلامیشدیم. اونونلا ساغ اوللاشدیقدان سونرا، تلویزیونا دوغرو گئتدیم. دوغروسو سلطان باجینین سؤزلری منی اوتاندیردی. یازیق آرواد حاقلی دی. دوز دئییر دااااا…. بس من تحلیف مراسیمینه باخمایاجاغام کیم باخاجاق؟… کلبه فاطما خالا؟
کنترولو گؤتوردویومده پئشمان اولوب، یئرینه قایتاردیم. فیکریم قالمیشدی اوخودوغوم رماندا. تله‌سیردیم گؤروم بو دونه امبرتو اکونون راویسی هانسی راهیبی ارسطونون کیتابینین اوخوماغینا گؤره جزالاندیراجاق. اؤز- اؤزومه دئدیم کی بو اؤلکه‌ده ممه یئییندن پَپه یئییه‌نه جان هامی سیاستچی دیر. من کی نه کؤرپه‌یم، نه ده سلطان باجینین یاشیندا. ائله یاخجیسی بودور کی نام گل سرخ کیتابینین آردین آوخویوم. بلکه امبرتو اکودان بئش اون کلمه اؤیرندیم دااااا….
۹۱.۵.۱۳
