يا ايّها‌المخبر
حمید آرش آزاد
“روز خبرنگار” موناسیبتیله
الا، يا، ايُّهاالمخبر! بوگون‌لر اولما غافل، ها…!
شيرين بير اتّفاق‌لار ايسته‌يير دوشسون، بونو بيل، ها…!
دولاندي هفته‌لر- آي‌لار، گئنه «مُرداد» گليب- چاتدي
بؤيوك باش‌لار ائدير سن‌دن بوگون بير بوللو تجليل، ها…!
قاريشقا تك، سني بير ايل ساليب- ازميش آياق آلتدا
يئكه‌لدير، هم شيشيردير بير بوگون، ايستير ائده فيل، ها…!
“نمونه” چيخسان البتّه، دئمه‌ك آلچي دوروب بختين
اولار بير لحظه‌ده، مين جايزه بير يئرده تحويل، ها…!
“مديرِ كل” بولوت تك ياغديرار سكّه باشين اوسته
دولار، جيب‌دن داشار بيردن، گتير بير چوخلو زنبيل، ها…!
جوايز لطف ائده‌رلر شهردار، فرماندار، اوستاندار
تاپانمازسان وانت حمل ائتمه‌يه، پس ائيله تعجيل، ها…!
نمونه چيخماغا، آنجاق بئش- اون مين شرط‌لر واردير
دئييم من، بير- به بير اؤيره‌ن، بولاردان اولماغا غافل، ها…!
شوفئرلر تك، بير آيين‌نامه آل، اوچ گونده ازبرله
اقلاً شكليني اؤيره‌ن، بو فرمان‌دير، او هنديل، ها…!
بير آزجا احتياط ائتسه‌ن، اولار “گردش به راست، آزاد”
ولي “گردش به چپ” ائتسه‌ن، سجلّين اولدو باطل، ها…!
“روابط” وار، “عمومي” آدلانيبلار سازمان‌لاردا
اولار “تكذيب”ده اوستاددير، ائده‌رلر ياخشي تحليل، ها…!
خصوصي بير روابط سال اولارلا، قوي ايشين آشسين
يئري دوشسه، خالاني عقد ائديب، اولسونلا فاميل، ها…!
خبر تاپماقدا چوخ اولما فضول، قوي اؤزلري وئرسين
اؤزون آيدين يازارسان، تئز دوشر ايش‌لرده ايشكيل، ها…!
قلم‌ده عقل يوخ‌دور، نوختا وور، ايپ باغلا، زنجيرله
آمان‌دير، اولما غافل، آلدادار بيردن عزازيل، ها…!
بيرين ووردون نالا، تئزجه بيرين‌ده وور ميخا، دورما
مقام‌لاردان اگر بير انتقاد يازدين، تئز اول، سيل، ها…!
گئدنده ارشادا، تعظيم ائله هر كيمسه راست گلدي
بويون توتسان، ياغار اخطارلا توبيخ، سان‌كي سجّيل، ها…!
خوش‌اخلاق اولسان اوردا، آگهي دايم اولار تأمين
گؤرورسن “ميم- الف” لي ياغديرير گؤي‌دن ابابيل، ها…!
بيرآز لطفي آزالسا ارشادين، قارداش! ايشين ياش‌دير
كاغيذ سهميّه‌سين، فوراً ائده‌رلر اوردا تعطيل، ها…!
گئنه چيخدين جيزيق‌دان، آغزين آچدين، گؤزلرين يومدون
سنه- «آرش»! – بؤيوك بير خصم‌دير آغزينداكي ديل، ها…!