چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی

هر گون سیننیم یو خاری گئدیردی. یاواش- یاواش اللینی رد ائلیردیم. ننه باجیمین هفته ده اوچ دؤنه ائلچی گئتمک‌لرینین هئچ ثمری یوخودو. هارا گئدیردیک منی گؤرجک بیری دئیردی: منیم قیزیم درس اوخویاجاق، هله اره گئتمک ایسته‌میر. او بیری دئیردی: سن چوخ یاخچی اوغلانسان؛ دوزدو بیر آز سیننین یوخاریدی، اؤز آرامیزدی بیر آزدا قیافه‌دن دالیسان؛ امما منیم باجیم خارجی اؤلکه‌یه گئتمک خیالیندادیر. باشقاسی دئیردی: قیزیم جوان خوشتیپ باربی، پوللو اوغلان آختاریر؛ سنین نه قیافن وار نه پولون. آخیردا باجیم مسجیددن چئری چپ انداز بیر دول آرواد تاپمیشدی اودا دئیردی: بیر آیاجا اون بئش کیلو وزنینی آزات. گئت او فیل بورنونا اوخشار بورنوی وئر عمل ائله‌سینلر. ۱۳۹۶ سکه، ۱۵۰ متر آپارتمان ولیعصرده، بیردانا باغ باسمینجدا و بالاجا بیر اللی آتمیش میلیونلوق ماشین کبینیمه سال، توی خرجین اون قلم بؤیوک وسیله‌لر قبول ائله، اوندا گله‌رم.
بو احوالاتی ائشیدندن سونرا ائولنمه‌گین خئیریندن گئچدیم. بیر داش آتدان، بیر داش اوستن قویوب، تاماه دیشیمی چکدیم. بیر ایکی ایلده بوجور گئچدی. بیر گون مترودا گئدیردیم، گؤردوم باشی‌فئر جوان بیر اوغلان چینینده کوله، بتر زیلله‌نیب منه. گؤزون گؤزومدن گؤتورمور. آز قالیردیم یاپیشام یاخاسیندان دییم: هن بالا اوزومده آی بیتیب؟ بو حالدا جوان اوغلان ال تلفونون جیبیندن چیخارتدی. بیر نفره زنگ ائله دی. دئدی: سیا! سن دیین آدامی تاپمیشام، سن اؤله‌سن یئر اوزون دولانسایدین بئله‌سین تاپانمازدین. دوز ائله بیل آران قوتان میمونودو. باور ائله اؤتورسن میمونلارین ایچینه چتین آییرا بیلرسن. من بتر قیزاردیم، بوزاردیم اؤزو- اؤزومه دئیردیم: اللهُ اکبر! گؤره‌سن بو نه ایشدی من راست گلدیم؟ سونرا اؤز-اؤزومه تسکین‌لیک وئردیم، بیه منی دئمیر. بیر آز دؤز گؤره‌ک نجور اولور. والاهی اگر منی دئسه دوروب انگین قیزدیراجاغام. دئیردیم به مترونون مسافرلری هامیسی منه باخیر. جوان اوغلان صؤحبتین قورتاردی، تلفونو بوکوب قویدو جیبینه. کوله‌نی چینینده یئربه یئر ائله‌دی, بیر آز منه یاخینلاشدی دئدی: باغیشلاین بیر دیقه خدمتیزده اولابیلم. نه آلدیم نه ساتدیم دئدیم: میمون دده‌ندی.
جوان اوغلان بیر آز ال ایاغین ییغیشدیردی دئدی: والله اصلن سیزه توهین ائله‌میردیم. اجازه وئرین ماجرانی دئییم. منیم تلویزیوندا بیر دوستوم وار اوردا برنامه دوزلدر. برنامه‌سینه آپاریجی آختاریر. سن اگردانیشا بیلسن لاپ او آختاران آدامسان. تلوزیونون آدین ائشیتمک همین؛ بیردن گؤزلریم ایشیقلاندی. فوری یوموشالدیم. دئدیم: منیم ایشیم ائله دانیشماقدی. به میمون ندیر؟ اوغلان دئدی: سیا، ایکی مجری‌دن استفاده ائلییاجاق: بیری گرک میمون نقشینده دانیشسین. اول ایستیردی بیر نفره میمون پالتاری گئیدیرسین، امما سنه پالتار زاد لازیم دئییل. بتردن حالیم توتولدو. اوغلان منیم وضعیتمی گؤرمک همن دئدی: امما هم یاخچی پولو وار، همده فوری معروف اولارسان. اؤزومو سایمامازلیغا ووردوم؛ بتر پول لازمیمدیر. گؤزیومولو قبول ائله‌دیم. مترودان یئندیک، جوان اوغلان منی آپاردی سیانین دفترینه. سیا منی گؤرجک آزقالدی گولمکدن غش ائله‌سین. دوستونا دئدی: چوخ عجیب‌دی. گده! بو آران قوتانی هاردان تاپیبسان؟ اشی دوز ائله بیل اصیل میموندو. اوزون توتدو منه دئدی: باغیشلایین ها! برنامه‌نین نقشین دئییرم. نه باشیزی آغریدیم، منله قرارداد باغلادیلار. بیر ایکی آیدا منه ایشین یول- یؤندمین اؤیرتدیلر. ایکی آیدان سونرا منی آپاردیلار ائفر قاباغینا. من آپاریجی میمون اولدوم. برنامه توپ کیمی آچیلدی شهرده. هر یئرده هامی آپاریجی میمونون سؤزلرینه هرزادان چوخ قیافسینه گولوردولر. دای من کوچه باجایا چیخاممیردیم، باشیمی گؤرن مندن امضا آلیردی، شکیل چکدیریردیلر، شاما چاغیریردیلار، هاردا بیر یغینجاق اولوردو گلیردیلر دالیمجا آپاریردیلار، گتیریردیلر، قوهوم اقربا منه بتر فحر ائلیردیلر. هرکسین هر هاردا ایشی واریدی بیر تلفونلا ایشین آشیریردیم. لاپ بئله گؤتوم اوسته دوشموشدوم قویماق قازانینا. هرگون ایش یئرینده منه بیر تلیس مکتوب گلیردی. مکتوبلارین یوزه دوخسانی خانیملاردان اولوردو. بیری یازیردی: ایرمی بئش یاشیندا قیزام، فوق لیسانسیمی تازا آلمیشام، آتامین دونیامالیندان هئچ نه کم کسری یوخدو. من سنین فیکیریندن گئجه‌لر سحره‌جه یاتانمیرام. گئجه گوندوز آغلاماق پئشم اولوب. او بیرسی یازیردی: سنی منه الله یئتیریب، فقط سن هن دئسن هم اؤزونو هم منی ابدی خوشبخت ائلرسن. باشقاسی یازیردی: هرگون گلیرم تلویزیونون اداره‌سینین قاباغیندا ساعاتلار دورورام هئچ اولماسا سنی بیر دؤنه گؤرم, من باربی‌داندا باربی‌یام. مندن گؤزلین، پوللوسون تاپانماسان. جوانلار مندن اؤتور اؤزلرین اؤلدورللر, امما من سندن اؤتور اؤلورم. بیرخانیم دا یازمیشدی: والاهی منی آلماسان اؤزومه اوت ووراجاغام.ایندی منیم مشغولیتلریمدن بیری گونده ایکی ساعات خانمیلارین شکیل‌لرینه باخیب, مکتوبلارین اوخوماقدی. دوغروسو اؤزومده مات قالمیشام گؤره‌سن بو قوطونون ایچینده نه وار؟ آران قوتان میمونوندا بئله خوشبخت ائلیر.
.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

گؤره‌سن بو قوطونون ایچینده نه وار؟

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

گؤره‌سن بو قوطونون ایچینده نه وار؟

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

گؤره‌سن بو قوطونون ایچینده نه وار؟

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی