اوستاد گنجعلي صباحي
(1368 – 1285)
معاصر گونئيي آذربايجان ادبياتي‌نين نثر قولو، قوجامان يازيچيميز گنجعلي صباحي‌نين آدي‌لا باغلي‌دير. آذربايجان ديلي و ادبياتي اوزره آکادئميک تحصيل آلديغي اوچون، ديل و ادبياتين اينجه‌ليک‌لريني و بديعي خصوصيت‌لريني دريندن بيلن، دوغما خالقين معنوياتيني ياخشي تانييان، جمعيتين داخيلينده‌کي قايدا- قانونلاري اجتماعي و سياسي موباريزه‌ده اؤيره‌نن قوجامان اديب، اؤز دؤورو شرايطيني گؤسترن پارلاق نثر اثرلري‌نين مؤلليفي اولموشدور. بو اثرلر، اجتماعي قورولوشون گئرچکليک‌لري‌نين شفاف بير بديعي گوزگوسو اولماقلا برابر، اجتماعي طلباتین جاوابي کيمي، اديبين صنعت يؤنونو قاباريق شکيلده نوماييش ائتديره بيلميشدير.
گنجعلی صباحی 1285- ينجي گونش ايلي‌نين بهمن آييندا، “مرند” شهري‌نين ياخينليغيندا يئرلشن “مياب” کندينده دونيايا گؤز آچميشدير. يئددي ياشيندا، آتاسينا قوووشماق اوچون، عائيله‌سي‌ايله بيرليکده آرازين او تايينا کؤچور و “گده‌بي”ناحيه‌سينده ساکين اولورلار.
1914- ينجي ايلده بيرينجي دونيا ساواشي‌نين باشلانماسي‌لا، عائيله‌سي بیرلیکده “شامخور”ا کؤچور و چؤره‌کچي‌ليک ايشي‌ایله مشغول اولور.
1917- ينجي ايل تحصيليني داوام ائتمک اوچون بئشينجي صينيفده اوخوماغا باشلايير و تحصيل‌له برابر، صحنه ايشلرينه‌ده داخل اولور.
1920- ينجي ايلده، قونشولاري‌نين 15 ياشلي قيزي “حبيبه” ايله ائوله‌نير.
1924- ينجي ايل، يئددينجي صينيفي قورتارديقدان سونرا، اورتا و عالي تحصيليني داوام ائتديرمک اوچون گنجه شهرينده يئني آچيلميش عمله فاکولته‌سينه داخيل اولور.
1929- ينجي ايلده اورتا مکتبي قورتاريب، باکي‌دا پئداگوژي انيستوتونون ديل و ادبييات شعبه‌سينه داخيل اولور. 1932- ينجي ايلده گده‌بي و بیر ایلدن سونرا شامخور اورتا مکتب‌لرینین موديري وظیفه‌سینده چالیشیر.
1937-ينجي ايل سووئت وطنداشليق پاسپورتو اولمادیغی اوچون آتاسي‌لا بيرليکده ياخالانير، 22 آي زينداندا قالدیغدان سونرا، سونرا، عائله‌سيله بيرليکده 5 ايل شيمالي قازاخستانا سورگون ائدیلیر.
1941- ينجي ايل، ايکينجي دونيا ساواشي باشلانیر و گنجعلي‌نين جزا حؤکمونو 5 ايل‌دن 8 ايله قده‌ر اوزادير.
1946- ينجي ايل سورگوندن قاییدیر و جنوبي آذربايجاندا انقلاب اولوب- خبرینی ائشیدیر.
1325- ينجي شمسی ايل، 40 ياشيندا ايکن، آنا وطنه دوغرو گئري دونور و تبريز راديوسونون ادبي بوراخيليش شعبه‌سينده خالق شاعيري بالاش آذراوغلو ايله امکداشليق ائدير و تبريز دانشگاهي‌نين ديل و ادبيات شعبه‌سينده‌ده تدريس ائتمه‌يه باشلايير.
1325- ينجي ايل آذر آيي‌نين 20- سينده، آذربايجانین ملی حؤکومتي آمريکا سيلاحلاري‌نين گوجویله شاه قوشونو و یئرلی فئودال‌لار و اوباش‌لاری الی‌له دئوریلیر.
1325- ينجي ايل آذرين 23- ينده گنجعلي توتولور و مينلر آذربايجانلي کيمي ايشکنجه آلتينا آلينير. نهايت “مهاجر” و “متجاسر” آدي‌لا نئچه آي زينداندا قالديقدان سونرا، لورستانين بدرآباد منطقه‌سينده يئرلشن “قلعه مظفر”ه سورگون ائديلير.
1327- ينجي ايل سورگوندن يئنه‌ده باشي بلالي تبريزه، عائيله‌سي‌نين يانينا قاييدير.
1329- ينجي ايلين باهاريندا عائيله‌سي‌له بيرگه، تئهرانا کؤچور و قارداشي – گؤرکملي رئژيسور – صمد صباحي- نين يارديمي ايله ايشه باشلايير و ادبي فعالييت‌لرينه‌ده داوام وئرير.
1330-1331- ينجي ايللرده يولداشلاري‌لا بيرليکده “آذربايجانلي‌لارجمعييتي” و بو جمعييتين نزدينده ” آذربايجان يازيچيلار و شاعيرلر مجليسي”ني يارادير و تهراندا نشر اولان “بشريت” و “بشير آينده” گونده‌ليک‌لري و چوخ تيراژلي “چلنگر” درگيسينده اؤز اثرلريني يايماغا باشلايير.
1332- ينجي ايلين 28 مرداد کودتاسیدان سونرا يئني‌دن تعقيبه، آزار – اذيت‌لره معروض قالير و اجتماعي حاق‌لاردان محروم کيمي، آغير ايللري باشدان کئچيرير.
1344- ينجي ايلده “قارتال” آدلي حيکايه‌لر مجموعه‌سي ايشيق اوزو گؤرمه‌دن، چاپخانادا خمير اولوب و آرادان آپاريلير.
1350- ينجي ايللرين اوللريندن انقلابا قده‌ر، تهراندا فعاليت گؤسترن “دوستلار گؤروشو” عنوانلي ادبي- مدني درنک‌له جيددي امکداشليق ائدير.
1357- ينجي ايل بهمن انقلابي‌نین غلبه‌سیندن سونرا “قارتال” آدلي حيکايه‌لر مجموعه‌سي چاپدان چيخير. تهراندا “آذربايجان يازيچيلار و شاعرلر جمعييتي و ” آذربايجان انجومني” نين يارانماسيندا جيدي اشتراک ائدير، “يولداش”، “وارليق”، “انقلاب يولوندا”، “اولکر” و … مجله‌لرينده اؤز حيکايه و ادبي- تنقيدي يازيلاري‌لا چيخيش ائدير، ادبي محفيل‌لرده بير آق‌ساققال کيمي حضور تاپير، شاعيرلر و يازيچيلار جمعيتي‌نين صدري و بو جمعيتين اورگاني “گونش” مجله‌سي‌نين بانيسي اولور.
1359- ينجي ايلده “حيات فاجعه‌لريندن” آدلي ايکينجي حيکايه‌لر مجموعه‌سي‌ده ياييلير.
1360- ينجي ايلده اوزون ايللر ادبيات‌شوناسليقا داير يازديغي “شعريميز زامانلا آدديملايير” مقاله‌لر توپلوسو چاپدان چيخير.
1368- ينجي ايل شهريور آيي‌نين 15- ينده، 83 ياشيندايکن دونياسيني ده‌ييشير و ابديته قوووشور.
1372- ينجي ايل، “اؤتن گونلريم” آدلي اوتوبيوگرافياسي کيتاب شکلينده ياييلير. بو کيتاب 1383- ينجي ايلده فارس ديلينه‌ده ترجومه اولور.
یک پاسخ
ساغ اولسون ایشیق چی لار. یاشاسینلار وئریلن بیلیم لره گؤره