بو گئجه ایت‌لری گولله‌له‌دیلر…
سؤز: قشم نجف‌زاده – سس: کبری میرحسینی
باشچی کوچه‌ده کی ایت‌لره باخیب،
یانیندا دورانا نه ایسه دئدی.
هر شئیی بیرینجی دویان آلاباش،
بو گیزلی قورخونو حیس ائله‌مه‌دی،
بو گئجه ایت‌لری گولله‌له‌دیلر.
اوچ قورخاق بالایدی، بیری آنایدی،
اوچو دوم آغ‌ایدی، بیری قارایدی.
گؤتوردو کوچه‌نی های- هارای‌لاری،
قالدی کوچه‌لرده چؤرک پای‌لاری،
سولاری آغلایا آغلایا قالدی.
کوچه‌نی سوپورن قوجا قادین دا
بالاجا اوزونو اووجونا آلدی-
بو گئجه ایت‌لری گولله‌له‌دیلر.
سس‌لری پنجره شوشه‌سی کیمی،
آسفالت دؤشه‌مه‌یه سپه‌له‌نیردی.
اوشاق‌لار یوخودان اویانیردیلار،
ائله بیل آدام‌لار گولله‌له‌نیردی.
ایتین بوغازیندان کسیله‌ن چؤرک،
آسفالتین اوستونده جان وئرن اور‌ک.
آللاهی چاغیردی، آللاه باخیردی…
آللاه ائشیدیردی، آللاه بیلیردی…
چؤلده تاخیلیمیز گؤیرمه‌ییردی…
ایت‌لرین سس‌لری گؤیه چیخیردی،
روزوموز، سویوموز یوخا چیخیردی.
بالاجا آیاق‌لار، دوم- آغ آیاق‌لار،
سئودییی تورپاقدان قوپا بیلمیردی.
اویانا- بویانا قاچیردی ایت‌لر،
بیر انسان اوغلونو تاپا بیلمیردی.
بو گئجه ایت‌لری گولله‌له‌دیلر،
تورپاق ایندن بئله قان بیتیره‌جک.
آیاغیمیز آلتدا قالان چؤره‌یی،
گؤره‌‌سن کوچه‌دن کیم گؤتوره‌جک؟!
