ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

ديلده يـئني‎چيليک
بهزاد بهزادي

ديل اجتماعی حياتـين اوست قورومو اولاراق اقتصادی, سیاسی, اجتماعی ده‎ييشيک‎لرله بيرليکده ده‎ييشير و انکشاف تاپير؛ علم و تئخنيکانـين ايره‎لي‎‎ييشي‎ايله زنگين‎لشير؛ قونشو خالق‎لار و دونيا خالق‎لاريله ايلگي‎لر واسطه‎سيله يـئني سؤزلر و ايفاده‎لری منيمسه‎يير.
ديل دورغون بير وارليق دئـييل, بلکه آرديجيل و قانونا اويغون انکشاف ائـتمکده‎دير. اونا گؤره‎ده موجود ديل‎لرين تملي اولان اسکي، کؤهنه و قديمي لغت و ديل‎لر اؤزونه مخصوص بير بحث ديرکي, اونلاري اؤيرنمک و آراشديرماق متخصص ديلچي‌لرين ايشي‎دير.
بيز بورادا ديلين عمومی انکشاف خطيني ايضاح ائـتمک ايسته‎ييريک.
انسانلارين اجتماعی قورولوشو يارانان زامانلاردان ديل اونسيت واسطه‎سي کيمي مئـيدانا گلير. هر کيچيک انسان گروپلاري, توپلوملاشماق اوچون ديل عنصرلريني ياراتماغا باشلايـير. گئـتديکجه کيچيک توپلوملار قونشولارلا قاريشيب سیاسی- اجتماعی قورولوشلار ياراديرلار؛ بو توپلوم‎دا اشتراک ائدن گروپلارين ديل‎لري بير- بيرينه قايـنايـيب- قاريـشـير و آنا ديل‎لرين اساسي تشکيل تاپير. کؤچري‎ليک, سیاسی حاکمیت بيرلييي, اقتصادی ايلگي‎لر, ديل‎لرين بير- بيرينه قارشيليقلي تأثيريني گوجلنديرير, عموم خالق شفاهی ديلی وجودا گلير.
هر ديلده اولان چئـشيدلي لهجه‎ و شيوه‎لر کئچميش انکشاف يوللاريـندان قالان آبيده‎لردير. معین سیاسی- اقتصادی شرايطدن آسيـلي اولاراق لهجه‎لردن بيريسي, ديلده اوستونلوک قازانـير, عموم خالق شفاهی ادبي ديل تشکل تاپير. ايلکين يازيلي ادبي ديل عموم خالق و شفاهی ادبي ديلي اساسيـندا قورولور.
ادبي ديل گئـتديکجه اؤزونه مخصوص انکشاف يولو ايله ايره‎لي‎له‎يير و ساراي و رسمي ديل سويه‎سينه يوکسه‎لرک, دانـيـشـيق ديل ايله باشقا‎لاشير. شفاهی ديل و ادبي يازيلي ديل, هر بيري اؤز انکشاف يوللاريـنـي داوام ائديرلر. بئله‎ليکله ادبي يازيلي ديل, خالق ديليندن ائله اوزاقلاشـير کي, خالق اوچون اونو دوشونمک چتين و حتّا غیر ممکن اولور. بئله بير دورومدا ادبي يازيلي ديلده بير دؤنوشلوک اوز وئرير. گئرييه قايـيديش, ساده ديلده يازماق و خالق ديلينه اويغونلاشماق گئديشي باشلانـير.
مکتب‎لرين گئـنيشلنمه‎سي, يازماق و اوخوماغـين کوتله‎وي‎لشمه‎سي, کيتاب و مطبوعاتـين چوخ سايلي يايـيلماسي… ادبي يازيلي ديلين يـئني انکشاف دؤورونه سبب اولور. ادبي ديل خالق ديليندن ايلهام آلاراق ساده‎لشير و بديعي ايفاده‎لرين يارانـيلماسيـنا دوغرو ايره‎لي‎له‎يير. بو مرحله‎ده يـئني‎چيليك ديلده گوجله‎نير.
قـيساجا دئديگميز ديلين انکشاف مرحله‎لريني، فارس و آذربايجان ديل‎لرينده، اؤتري بير باخـيـشلا، تطبيق ائدك:
اسكي فارسي ديل‎لري باره‎سينده آرتـيق دانـيشماق لازيم گلمير. بو ديل‎لر عربلر استيلاسيـندان سونرا تاريخه قوووشدو. ايلك فارسجا ادبي ديل، ساماني‎لر مستقل حاکمیت قوردوقدان سونرا ديرچه‎ليشه باشلايـير. خراسانـين شيمالي بولگه‎لرينده ياشايان فارس ديللي طایفالار آراسيندا «دري» لهجه‎سي اوستونلوك قازانـير، ساماني‎لر سارايـيندا ايلك فارسي شعرلر و نثر يازيلار «دري» لهجه‎سينده يارانـير و گئـنيشله‎نير. گئـتديكجه دري لهجه‎سي ادبي و رسمي ديل سويه‎سينه یوکسلیر، بو ديل ايندي‎ده ياشاماقدادير.
رودكي-دن باشلاياراق فارس شعري ساده و خالق ديلينه ياخين، يابانچي لغت و ايفاده‎لردن اولدوقجا آري‎دير. لاكين زامان كئچديكجه يازيلي ادبي ديل‎لرده حددن آرتـيق عربي و تورک سؤزلرین ايشلتمک, ادبي اثرلريني دولاشيق و آنلاشيلماز بير طرزده بيان ائـتمك, طنطنه‎لي ادبيات ياراتماغا سبب اولاراق، اونلاري دوشونمك خالق اوچون غیر ممکن اولدو. شعرده هندی سبك نثرده «تاريخ وصاف»، «دره نادري» كيمي كيتابلار، دولتي فرمانلار و مكاتبه‎لر بئله بير دورومون نمونه‎سي‎دير.
قاجارلار دؤوروندن، گئرييه قاييديـش، ساده ديلده يازماق باشلانـير. مشروطيت انقلابيندان سونرا يـئـني ديرچه‎ليش دؤورونده ادبي ديل كوتله‎وي‎لشمك, ساده‎لشمك يولي‌ ایله ايره‎لي‎له‎يير.
آذربايجاندا اسكي زامانلاردا ياشايان التصاقي ديل‎لر كوهنه‎لير، ايلك تورك طایفالارينـين آذربايجاندا تشكولو و سونراكي زامانلاردا مختلف تورك طایفالارينـين (خزرلر، قـيپچاق‎لار، اوغوزلار و…) آذربايجانا كؤچمه‎سيله، مختلف لهجه‎لي تورك و التصاقی ديل طایفالارين بيرگه ياشامالاري سبب اولوركي، عموم خالق آراسيندا ايلگي و اونسيت يارانماق گركلي‎يي نتيجه‎سينده، عموم خالق ديلي بوتون بو ديل و لهجه‎لرين قايـنايـيب- قاريشماسيـندان، آنا تورك ديلي اساسيـندا، اوغوز- قـيپچاق لهجه‎سينين اوستونلويو اوزره‎ تشكول تاپسين. شفاهی ادبي آذربايجان توركجه‎سي مئـيدانا گلير. يازيلي ادبي ديل بئله بير تمل اوزره عموم خالق ديلينه ياخـين يارانـير. «ده‎ده قورقود کيتابي» و حسن اوغلو شعري بو مرحله‎ده ادبي ديلين ساده‎ليگينه نمونه‎دير. بو زامان عرب و فارس ديل‎لريندن گلمه سؤزلر اولدوقجا آزدير.
لاكين يازيلي ادبي ديل اوز انکشافـيندا، عربجه‎دن (ديني ديل اولدوغونا گؤره) و فارسجا‎دان (رسمي ديل اولدوغونا گؤره) آشـيري اولاراق سؤزلر و ايفاده‎لردن فايدالانـير, بيان دولاشـيـق و دوشونولمز اولور. شاه اسماعيل ختايي و فضولي شعرلرينده عرب و فارسي سوزلرينين چوخلو ايشلنمه‎سي بئله دوورو سجيه‎لنديرير. البته ختايي و فضولي شعرلرينده ائله مصراع‎لار و  بيت‎لرده وارديركي, اونلاردا بير كلمه‎ده فارسجا و عربجه سؤز ايشلنمه‎ميشدير.
صفوي‎لر دؤورونده اوز وئرن اوچ حادثه‎ و اونلارين ديل انکشافـيندا بوراخديـغـي ايزلري بئله سيرالاماق اولار:
ايراندا گئـنيش اؤلكه‎نين يارانماسي، مركزي‎لشميش حكومتين قورولماسي؛ شيمالي و جنوبي آذربايجان ديل بيرلييي‎نين آرتـيق ياخـين‎لاشماسيـنا سبب اولور.
عثمانلي خلافتي‎نين، ايران اؤلكه‎سيني‎ده باشقا قونشو مسلمان اؤلکه‎لري كيمي اوزلرينه تابع ائـتمك سياستي و شاه اسماعيل و باشقا صفوي‎ شاه لارينـين بو سياسته قارشي چيخيش و محاربه‎لري، خصوصيله شيعه مذهبي‎نين ايراندا رسمي اولاراق گئنيش يايـيلماسي ايكي اؤلکه و خالق‎لاري آراسيندا اولان ايلگيلرين قـيريلماسيـنا سبب اولدو. آنادولو و ‎آذربايجان تورکجه‎سي هر بيري مستقل ديل كيمي انکشاف يولونا يونلديلر، نهايت هر بيري 28 تورك ديل‎لر گروپونون بير قولونو تشكيل ائتديلر. آذربايجان ديلي سارايـين قونوشما ديلينه، حربي ايشلر ديلينه، ياري‎ رسمي ديل سويه‎سينه يوكسلدي.
18- نجي عصيردن ديل ساده‎لشمه‎يه دوغرو گئرييه دونوش حركتينی باشلايـير و ايگيرمينجي عصيرلرده يـئني‎چيليك گوجله‎نير.
ديلده يـئني‎چيليك مرحله‎سي خصوصياتـي ديلين ساده‎لشمه‎سي، خالق ديلينه ياخـين‎لاشماسي، يابانچي ديل‎لردن آلينما سؤزلرين و ايفاده‎لرين اولدوقجا آزالماسي، ديلين اؤزل سؤز خزينه‎سينين گوجلنديريلمه‎سي، ديلين قورولوش قانونلارينـين اؤيره‎نيب، آراشديريلماسي و ادبياتدا تطبيق ائديلمه‎سيندن عبارت اولدوغونو قــيد ائـتمك اولار. ديل علمي اساسلار اوزره آرديجـيل و قانونا اويغون صاف‎لاشـير. لاكين بو او دئمك دئـييل كي، يابانچي سؤزلر و ايفاده‎لر بوتونلوكله ديلدن چـيخاريلير. گركلي آلـينما سؤزلر ديلي زنگين‎لشديرمه‎يه يارديم ائدير, اونونلا دوغما‎لاشـير، آلان ديلين عضوو كيمي ياشايـير. بوندان باشقا علمي و تـئخنيكي اختراع‌لار نتيجه‎سينده يـئـني يابانچي سؤزلر ديلده قبول اولونور.
ديلده يـئـني‎چيليك ملی اويانـيش حركاتي ايله گوجله‎نير. لاكين بو دؤورده بير پارا آشـيري حركات‎دا ديلين دوزگون ايره‎‎لي‎له‎ييشينه منفي تأثير بوراخا بيلر. اؤرنك اولاراق رضاخان، ارباب‎لارينـين امريني اجرا ائـتمك مقصديله، «فرهنگستان» واسطه‎سيله فارسي ديليني عربي، توركو  لغت‎لردن تميزلمک تشبوثونو آد آپارماق اولار. «فرهنگستان» خالقا تانـيش اولمايان اسکي و کؤهنلميش فارسي لغت‎لريني يـئـني‎دن ديريلتمک, قوندارما «دساتير» لغت‎لردن فايدالاناراق اويدورما و کؤکسوز سؤز‎لر و ايفاده‎لري فارس ديلينه سوخوردولار. کسروي «زبان پاک» کيمي عـيبه‎جر بير ديل يارادير, «پان آريائيست»لر هله‎ده فارسي‎دا ايشله‎نن عربي و تورکو سؤزلرينه قارشي دوشمن‎جه خور باخـيرلار. بئله بير تشبوث‎لر ديلين يـئـني‎چيليک گئديشينده زيان يـئـتيرن «آزار, آفت»-لر دير. بونلارين حاقـيندا آذربايجانلي بير مثلي دئمک يـئرينه دوشر. (کنديميزه تزه دللک گليب, ککولو ياندان قويور).
آذربايجان ديلي‎نين بو گونکو ديرچه‎ليش مرحله‎سينده, ملی حرکاتـين‎دا گوجلنمه‎سي نتيجه‎سينده بير پارا آشـيري حرکتلر باش وئره بيلر. اوميد ائديريک يازيچـيلاريمـيز و شاعرلريميز، بو گونکو شرايط و طلباتي نظره آلاراق ديليميزين منليگیني و کيمليگيني قوروماقلا, تلسمه‎دن, بيلرکدن, گؤزو آچـيـق‎لـيـقلا حرکت ائـتسينلر.
يـئري گلميشکن نئچه تاپشيريغـي خاطـيرلاماق ايسته‎ييريک:
– خالق‎دان آيريلمايـين. سيز خالق اوچون يازيرسيز. خالقا تانـيش اولمايان لغت‎لري ايشلتمکدن چکينمک لازيمدير. اگر يازي‎لاردا ائله لغت‎لر ايشلنه‎کي, اونو اوخويان کوتله‎لر, باشا دوشمه‎يه‎لر, سيزين پيام‎لاريزي منيمسه‎يه بيلمه‎يه‎جکلر. بودا دوشمن‎لري سئوينديره‎جک.
– متروک تورکو لغت‎لري, يـئرسيز اولاراق, يازي و شعرده گتيرمک گرک‎سيزدير.
– ادبي شعر و يازيدا يـئرلي سؤزلري ايشلتمکده گرک دقت ائديلسين.
– شيمالي آذربايجان عاليم‎ و يازيچـيلارينـين اثرلريني اليفبامـيـزا کؤچورنده, شيمالي آذربايجاندا ايشلک اولان روسجا و آوروپا کؤکلو سؤزلر و‎ ايفاده‎لر عـيني‎ ايله کؤچورولمه‎مليدير. اونلارين فارسجا و يا عربجه تانـيش اولان قارشي‎لـيقلارين ايشلتمک يارارلي اولار. (پوئما, ليريکا… يوخ, شعر غزل يازيلماليدير.)
– تورکيه تورکجه‎سينده ايشله‎نن لغت و اک‎لري ادبياتـيميزدا يايماق, خالقـيميزا تانـيش اولمايان و ديليميزين قانونلاريله اويوشمايان سؤزلري ايشلتمک دوزگون دئـييل.
– بو گونکو شرايطي نظره آلاراق لغت و‎ايفاده‎لر دوزلتمه‎يه تلسمه‎ملي‎ييک. واختيله صلاحيتدار عاليم ديلچي‎لر, قورولوشلار, ديليميزين قانونلارين گؤزلمکله برابر بو ايشه ساهمان وئره‎جکلر.
– عربجه و فارسجا لغت‎ و ايفاد‎لرين ديليمیزده قبول اولونان دوغمالاشميش, کوتله‎لره تانـيش اولانلارا قارشي کينه‎ ايله ياناشمامالي‎يـيق.
– «مدني, سیاسی…» کيمي ايفاده‎لرين يـئرينه «کولتورول, پوليتيکال…» ايشلتمه‎يي ديلده يـئـني‎چيليک آدلانديرماق اولماز.
ديلده يـئـني‎چيليک حرکاتي تاريخي بير ضرورت دير. ديل ساده‎لشيب, گره‎ک‎سيز يابانچي سؤز و‎ايفاد‎ه‎لردن اؤزونو تميزله‎يه‎جک. ادبي يازيلي ديل خالق ديلينه ياخـين‎لاشماق اوغروندا ايره‎لي‎يه‎جک. مکتب‎لر و عالي مکتب‎لر لازيمي و صلاحيـتدار کادر حاضيرلاياراق آکادمي قورولماغـينا امکان ياراداجاق و عاليم‎ ديلچي‎لريميز علمي اساسلار اوزره ديليميزين قانونلارينا اويغون بئله بير حرکتين اوغورلو ايره‎لي‎ييشينه يارديم ائده‎جکلر.

منبع: آذری درگیسی – نومره 3

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *