اوخوماق زامانی: 16 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

kiyaan
بیز ایتیگی ایتن آداملار
کیان خیاو

 ایکیندی چاغی نین ساعات آلتیسیدیر. سسسیز-سمیرسیز اوتورموشام اوتاقدا. کامپییوتئر ماساسی نین قاباغیندا باشیمی دایاییب صندلییه، اللریمی ده قویموشام شالواریمین جیبینه. ناهار چاغی ایکی یاریمدا ائوه گیرسم ده نه بیر تیکه چؤرک یئمشم، نه ده پالتاریمی سویونموشام. نئچه گوندور ائله بیل ایتیگیم ایتیب. هئچ نه یه حال- هؤوسلم یوخدور. باشیمدا بیر سن وارسان، بیر ده مهندیسین های- هارایی. سانکی باشیمدا بیر خیل دمیری بیر- بیرینه سورتوشدورورلر…

  هاوا پیس دئییل. اینجه- اوخشار بیر یئل اسیر. پنجره نی آچان کیمی یئل اوتاغین هاواسینی آز دا اولسا دییشدیریر. سحر تئزدن ایچیمده بیر آلوو وار. بو یئل منی بیر آز سرینله ده بیلیر. پنجره نین قاباغیندا دریندن بیر نفس آلیب وئریرم. بیردن اوتاغین اورتاسینا قاییدیب قوللاریمی آچیب یومورام. یئنه ده ماسا اؤنونده کی  صندلیده اوتورورام. یئل پنجره دن اوتاغا گلینجه لاپدان ائله بیل سن گلیرسن. حالین قاپیسینی آچیب بیر باشا تله سیک اوتاغا گیریرسن. یئل بو دؤنه سنله بیرگه قاپیدان دا اوتاغین ایچینه تپیلیر. اؤزونو اوتاغین بور- بوجاغینا سوخور. ایلک اؤنجه ده کیتابخانایا یاییلیر. سانکی بیرر کیتابلارین توزونو آلیر. سن پار- پار پاریلداییرسان. یئلین ده بیر چیمدیک بئله توز- تورپاغی یوخدور. یئریمدن دوروب سنی قوجاقلایینجا یئلی قوجاقلاییرام. یئل ایکیندی یئلی اولسا دا، سنین اَیین- باشیندان، پال- پالتاریندان، دان یئلی اسیر بورنومون اوجونا…

  مهندیسین سسی قویمور کی. آرد- آردینا اوشاغینی چاغیریر کوچه ده: سوپاااا، سوپاااا! بیلینمیر اوشاغی نین آدی ندیر!…

  مهندیس یئنیجه گلیب بو کوچه یه. هئچ ایکی ایل اولماز. منیم ده کی باشقا ائو آلیب کؤچمه یه یئترینجه پولوم یوخدور. اوسته لیک مین بیر چتینلیکله تیکدیگیم ائودن ده چیخماق ایسته‌میرم. آنجاق مهندیسین سسیندن اؤز ائویمده بیر اوزانیب دینجله ده بیلمیرم. دینجلمک جهننم، یاریم ساعات سنی اؤز ایسته دیگیم کیمی دوشونه ده بیلمیرم. دوشونوب داشینمالارین شیرین یئرینده بیر ده گؤرورسن مهندیس اوشاغینی چاغیریر: سوپاااا، سوپاااا! آرد- آراسی کسیلمه دن چاغیریر. مهندیسین کوچه دن گلن سسی لاپ ائویمین ایچینده باشیما دوشور. رحمتلیک اوغلو گئجه- گوندوز تانیمیر. یا گونون گون اورتا چاغی های- کویله ماشینینی یویور، یا دا گئجه یاریسی اوشاغینا چرخ سوردورور کوچه ده. خیلاصه بئچه بانیندان ایت بانینا کیمی باش آغریسیدیر. بیلینمیر هانکی داغین دؤشوندن گلیب بورایا چیخیب. آی اونو ایلک دؤنه شهره گتیریب چیخاران سوروجونو گؤروم نه اولسون! آغا پیس- پیس شهرین سویونو بینمیر، گئدیب کتدن بولاق سویو گتیریب ماشینینی یویور! بئش دقیقه  کوچه ده بیر یئرده اولورسان، سسییله بوتون سینیرلری نین اوستونده ریژه گئدیر!رهبردن، جومهور باشقانیندان توتدو، چؤرک قیرینتیسی آلیب ساتانا کیمی، هامییلا باغلی بیر باخیش بیلدیریر. سسی آدامین اؤز بئینی بیر یانا، بوتون اورقانلاری نین دا بئینینی اویوب تؤکور. بیر سؤز ده دئمه لی دئییل. اؤزونو هامیدان اوستون بیلیر. بونو هر جومله سی نین باشیندا  ” من- ائ مهندیس ”  دئمه سیندن آیدین آنلاماق اولور. هله آشقالی نئجه اوچونجو قاتدان هر گئجه آشاغی توللاماسی اؤزونه باشقا بیر ماجرادیر. هر سحر کوچه دن کروان کئچیب دئییرسن!…

  یئنه ده بو یئلین باشینا دؤنوم. گلنده چوخ شئیی اونوتدورور منه. یئل مهندیس دئییل کی! اوتاغیما گیرنده ده سسسیز- سمیرسیز گیریر. بئله دورورام آیاغینا، سانکی سنین آیاغینا دورورام. گؤزلریمله گوله- گوله سنه سالام دئییرم. هله آغزیم سالاما آچیلمادان قوللاریم قوجاقلاشماغا آچیلیر. ساچلارین بیردن شلاله آخیر اوستومه. بئلین الیمده سانکی انجیر آغاجی یئرینی سئویر. قاشلارین هانکیسا بیر شاعیر دیلیندن  بیر قزل بئیتی سؤیله نیر سانکی. سیخ- سیخ باغریما باسیرام.انجاق سنی قوجاقلایینجا یئلی قوجاقلاییرام. دیپ- دیری بیر یئل اولسا دا، ایچیمده آلیشان اودو سؤندوره بیلمیر…

  هاوا گئت- گئده قارانلیقلاشیر. اوتاغین بیر چیراغینی یاندیریرام. ایشیقلار سنین اوزونو داها دا ایشیقلاندیریر. هر شئیی اونودوب کیمی تک سنی دوشونورم. آنجاق بونون نه فایداسی؟…

  اه، یئنه ده بو مهندیس! آی گؤروم بونون تیفاغی…، یوخ، داغیلماسین، یازیقدیر! رحمتلیگین نوه سی رادیودور دئییرسن. دایانماسی یوخدور. دال- دالا بیر سؤز تاپیب باغیریر کوچه اوزونو. دئییرسن بورا هئچ شهر دئییل، اوبادیر. کسین اوبادا دا بو سس اولماز. سس دئییل کی، اوزدن ایراق …، هئچ دئمه سک یاخشیدیر! سسی کوچه ده دئییل، ائویمده دیر، ائویمده ده دئییل، لاپ بئله قولاغیمین ایچینده دیر. گؤر سس بونجا دا گور اولا بیلر؟ هر حالدا قالمیشام بونلا نئیلییم من! اینان، ایکیندی چاغلاری، اؤزو ده سنی دوشوندویوم چاغلاردا، اوتاغیمدا سس اولاندا، آز قالیر دوروم اؤزومو ایپدن آسیم! کاش علاجسیز بیر خسته لیگه دوشوب سنی اونودا بیلیم. میثال اوچون کاش دیشیم آغریسین. اؤزو ده بیری یوخ، نم نئچه سی. اوندا سنی اونوتماسام، اینان، آدیمی دییشرم!…

  کاش آدیم رحمان اولایدی؛ قابا رحمان! بدنیمده ایرمی بالتا، قیرخ پیچاق یئری اولایدی! جانیم نئجه برک اولسا دا، دیشلریم دورمادان زوققولدایایدیلار! بیر ایپین بیر اوجونو بیر دیشیمه باغلایاردیم، بیر اوجونو دا آدامجیل ایتیمین خالتاسینا. سونرا ایتیمی کوچه یه چیخاریب، فیشقیرداردیم مهندیسین اوستونه. ایت جومان کیمی دیشیم چکیلردی. بیر دیشیمی ده گؤتوروب گئدردیم توکانیما. یئنه ده باشقا بیر ایپین بیر اوجونو دیشیمه، بیر اوجونو دا سیندانا باغلاییب، سیندانی اوجا بیر یئردن یئره آتاردیم. بو دؤنه ایپ دیشیمی دئییل، انگیمی ده اؤزویله آپارمیش اولاردی. ان آزیندان بونون آجی- آغریسیندان سنی نئچه آن دا اولموش اولسا اونوداردیم کی. اینان، من ده قابا رحمان اولسایدیم، دیشلریمی بو سایاق چکردیم ده، سسیمی بئله چیخارمازدیم…

  سس گلمه سین دئیه دوروب بوتون قاپ- باجانی باغلاییرام. آنجاق یئنه ده ائشیگین سسی ائوین ایچینده دیر. یئنه قدیم ائویمیز اولسایدی، درد یارییدی. قدیم ائویمیزین حَیَط- باجاسی ائله بؤیوک ایدی، حَیَطده کی  سس چتین ائوه گلردی، هله قالسین کوچه نین سسی. او زامان سنی تانیمیر، دوشونموردوم. اولا بیلسین تانیییب دوشونورموشم ده. ایندی اولا بیلسین یانیمدایدین. اولا بیلسین داها سنی دوشونموردوم. هئچ ایتیگیم ده ائله بیل ایتمه میشدی. آنجاق هاچانسا او حَیَطین اورتاسیندان کئچن چای کیمی من ده آخیب گلدیم بو گونه. ایندی او حَیَطین بوتون دووارلاری ییخیلیب، یئرینه باشقاسی تیکیلیب. داها اورتاسیندان نه چای آخیر، نه چایین قیراغیندا بیر بیتگی گؤیریر. داها قاپیسی  گئجه یاتانا کیمی آچیق قالمیر. بونلا بئله منیم اوره‌گیم او زامانین اوره‌گی دئییل. او زامان بئله چیرپینمیردی ائله بیل. ایندی دؤیون- دؤیون دؤیونور. سنی وورور، سنی دؤیونور، سنی ده دوروب دایانماسا یاخشیدیر…

  قدیم ائویمیزین حَیَط قاپیسی گئجه یاتانا کیمی آچیق قالاردی. حَیَطیمیزه آیاق قویان ایلک اؤنجه بوداقلاری خئیمه کیمی یاییلان قارا توت آغاجیمیزی گؤرردی. سونرا دا سیخ- سیخ کونجود سیرالارینی، آلما، هئیوا، گیلاس، گیلنار، آرمود، قلمه و بول- بول گئجه یاغیشیندا یویولموش گؤپ- گؤزل پارلاق گول- چیچک، تر نانا، خانیم ساللاندی گولو. حَیَطیمیزه گیرن کیمسه ایلک اؤنجه اوردا هانکیسا بیر اینسان یاشادیغینی بئله دویمازدی.  سانکی هامیمیز قوش کیمی آغاجلارین  بوداغیندا یاشاییردیق. بؤیوک بیر داییره حووضوموز دا وار ایدی. حووضون آینا  سویونون اوزئیینده داییروی ختلر کیمی هئی بیر- بیریمیزدن آیریلیب یئنه بیر یئره توپلاشیردیق. حَیَط دئییل، باغ ایدی. بوتؤو بیر شهری ایچینده گؤرمک اولاردی. دؤرد دوواری نین ایکیسی نین دیبینده اوزون- اوزادی سکیلرده اوتوراردیق. من تک اوتوردوغوم چاغلار ایتیگیم ایتردی سانکی. کیمسه نی دوشوندویوم یادیما گلمیر آنجاق دوشونه ده بیلرمیشم کسین. ائله ایندی سنی دوشوندویوم کیمی. گون اولاردی هامیلیغا سکیلر اوستونه دوزولردیک. بیریمیز بوی- بوخونلو هئرکول کیمی، بیریمیزین قاش- قاباغیندان آسلانان شئیتان داغارجیغی، بیریمیزین ساچیندا آچان بنؤوشه دویمه سی، بیریمیزین گؤزونده شیشمیش سینیر داماری. دانیشیردیق، اویناییردیق، گولوردوک ده سسیمیزی بیر قونشو بئله ائشیتمیردی. او زامان منیم باخیشیمدا هر زامان گؤزه گؤرونمه‌ین بیریسی ده وار ایدی. آدی یوخ، اؤزو یوخ، گؤزه گؤرونمز بیریسی. او کسین سن ایمیشسن. سن اولمایا دا بیلردین. بیر- بیر اؤزونه ائو اولوب ائویمیزدن آیریلان اینسانلاریمی او گیزلی، گؤزه گؤرونمز بیریسی نین شکیلینده تاپیردیم. اینسانلاریم کی بامباشقا بیر اینسان ایدیلار. بیر- بیرلری نین آتاسی، بیر- بیرلری نین آناسی، گؤزل، گؤیچک باجی- قارداش اینسانلار! بونلا بئله منیم اونلارین ایچینده بیر ایتیگیم ده وار ایدی. یادیمدا دئییل، آنجاق کسین کیمیسه اؤز یانیمدا دویور، دوشونورموشم. دئدیم کی او کسین سن ایمیشسن. بوتون زامانلاردان چوخ، ایکیندی چاغلاری گلیب حَیَطیمیزه، یوخسا دا اوتاقلارین بیرینه گیرردین. ایکیندی اولسا دا دان یئلی کیمی گلردین. من سنی قوجاقلایینجا یئلی قوجاقلایاردیم. بونو هئچ کس بیلمزدی. سنی هامیدان گیزلیجه دویوب دوشونردیم. یالنیز رحیم توده دن گیزلتمه میشدیم. اونا نئجه ایتیگی ایتمیش کیمی اولدوغومو اؤزوم دئمیشدیم…

  رحیم توده تویلاردا قارمون چالاردی. سونرالار بیلدیم رحیمه نییه توده دئییرلر. او دئمه بیر تهر کومونیست ایمیش. کومونیست ده دئییلدی هااا، اؤزونو کومونیستلییه وورموش ایمیش. او زامان تویدا، ماغاردا چالیب اوخویان کیمسه یه کومونیست کیمی بیر قارا دا یاخاردیلار آخی. بونلا بئله او اؤزوده بو آددان خوشلاناردی. منه رحیم توده دئیین دئیردی. او ائله بیل سنی مندن یاخشی تانیییردی. منی گئندن گؤرنده گولومسیردی. یئتیشن کیمی، او ایتیک قیزدان نه خبر ، دئیه سوروشاردی. سنین آدینی دا ایتیک قیز قویموشدو. دئییردی هامی نین ایچینده بیر ایتیک قیز یاشاییر. هردن ده بیزه سیاسی دانیشاردی مثلن. چوخ سادیدی، آنجاق هردن دانیشیقلاری شاعیرانه اولاردی. او دئیردی: بعضی تویدا بعضی هاوالاری چالاندا، اوتورانلارین چوخو قورخور. بیلیرلر بیزی گودن وار. هامی نین اوره‌گی باشلاییر یوز هشتاد دؤیونمه یه. آللاه بیلیر، کیمیسی نین اوره‌گی بسطه نیگار هاواسییلا، کیمیسی نین ده اوره‌گی اؤلوم مارشییلا. بیلیرلر آداما پرونده اولور. یازیقلار نئیله سین، دوز بیلیرلر دااا! پروندنی دوزلدیب ده، اوستونه بؤیوک حرفله یازیرلار: عاشیق! مثلن من قارمونو ماهور تصنیفی اوستونه کؤکله ینده، بعضیلری ده اوتوروب توفکلرینی اؤلوم اوستونه کؤکله ییرلر. دوغوردان دا بعضیلری آدامی تویدا، ماغاردا، داغدا، داشدا، شهرین ایچینده، لاپ بئله اؤز قاپی نین قاباغیندا تکله یه بیلرلر. رحیم توده دئییب- دئییب سونرا باشینی توولاییب گولومسیردی. دئیردی بیلمیرم نییه بعضیلری دونیانی اؤزونه گولدورمگی یاخشی باشاریرلار. او زامان من اونون چوخ سؤزلریندن باش آچمیردیم. آنجاق گؤرونوردو بیر آز ساوادلییدی. سووئت رئژیمیندن دانیشاندا، دئییردین دوخسان یاشی وار. آنجاق اؤزو جاوان ایدی. گرک فلک اونا بو تئزلییه قییمایایدی. چوخ تیپلی- میپلی دئییلدی، آنجاق یازیغین بوی- بوخونو ان آزیندان تورپاق آلتینا یاراشمیردی. خوصوصییله اونون دا ایچینده یاشایان بیر ایتیک قیز وار ایدی. دؤولتدن چوخ گیلئیلی ایدی. دئییردی بیلمیرم نییه بعضیلری سووئت رئژیمینی تئز- تئز یادلاریندان چیخاریرلار. یوخسا بو بئله پرونده دوزلتمگی اؤزلرینه بوش- بوش ایش ائتمزدیلر. باشقا- باشقا سؤزلر ده دئییردی کی من باش آچمیردیم. او قارمون چالیردی، هردن ده ایکی قوشما اوخویوردو. یاریم ساعات قاپی دالیندا دم آلیب دوروردوق. روحو شاد اولسون. شهریمیز اونو اولدوغو کیمی درک ائده بیلمه دی. ساده- ساده دئییب اونو سارییان دا آز اولموردو. بونلا بئله اونون قبری ان آزیندان منیم بو ائو- ائشیگیمدن یاخشیدیر. هئچ اولماسا او اؤز قبری نین ایچینده سسسیز- سمیرسیز اوزانیب اؤز ایتیگینی راحاتجا دوشونه بیلر. کسین اونون قبری بئهئشته گئدیب چیخیر. منیم ده ائویم هله کی بو مهندیسین سسیندن جهننمدیر. آخی دئین اولا، آی بالا، بو اوشاق اونسوز دا چرخینی سورور دااا، داها بونجا های- کویونله نییه بیر کوچه نی دنگسر ائدیرسن؟ هئچ قابا رحمانین آیاغینا پولاد میخی باتیر، جینقیریغینی بئله چیخارمیر!…

  توفان ووروب باغینداکی قلمه لری سیندیریب بیر- بیری نین اوستونه اَییر. صاباحیسی اونلارین بیری نین اوستونه چیخیب بالتایلا داللاییب یئرینه قایتارماق ایسته ییر. بیردن آغاج ایلیشدیگی یئردن قوپوب، قابا رحمانی ریزین داشین توماجینا قویولان داش کیمی توللاییر گؤیه. گئدیب باغین قیراغیندا اولان دامین شیروانیسی نین اوستونده کی  کؤهنه تهرین اوستونه گوپبولتویله دوشور. تهرله بیرگه دیغیرلانیب یئره گلیر. دوشن کیمی بیر پولاد میخ آیاغی نین آلتیندان گیریب اوستوندن چیخیر. ائله او آن جیبینده تئلفونو زیل چالیر. گل گئدک سئیله مه یه دئییر اوس جفر. گئدک بئچه دؤیوشدورمگیمیزه. بو دا اوس جفره دئییر کی، دایان آیاغیم میخدادیر، قوی بونو چیخاریم گلیم. سسسیز- سمیرسیز اوتوروب چیخاریر دا، گئدیر ده. ایندی اونون یئرینه بو مهندیسیمیز اولسایدی، نئیله یردی گؤره سن! وای، آللاه ائلمه سین! یئددی قونشونون بیر تکی دلی اولمامیش اولماز!…

  ظالیم اوغلو آدامین دوز سینیرلری اوستونده یئریییر. ماشینی دا کی وااااوئیلا! نم نه تهر اونو تنظیمه سالیب کی یاریم ساعاتدان یاریم ساعاتا بئش دؤنه دال- دالا اولاییب دایانیر. داها ایشدن- گوجدن دوشموشوک. گئجه- گوندوزوموز یوخدور. نه آییق کیمی آییغیق، نه یوخولو کیمی یوخولو. بو ماشینین اولارتیسیندان لاپ زارا گلمیشم. دئییرسن اوغرو گلیب، قاپیسی دالدان سالینیب قیفیللانمیش پارکینگدن ماشینی اوغورلاییب گئده جک. عاغلینا کئچه یاماییم بئله مهندیس!…

  اینان، اوره‌گیمدن گلمیر، یوخسا پله قولاق یونسورا دئسم، بو ماشینین باشینا بیر اویون آچار، اولمایان کیمی. سن پله قولاق یونسورو تانیمیرسان کی! چوخلاری بوتؤو بو شهری اونون آدییلا تانیییر. لاتلیغینا دئسن لاتدیر، لوتلوگونه دئسن لوتدور، لوتولوغونا دئسن لوتودور. آنجاق بونلارین هامیسی بیر یانا، اونون دا ایچینده ایتیک بیر قیز یاشادیغی بیر یانا. البتته اونونکو چوخ دا ایتیک دئییل. اونو آخشام باشیلاری موتورونون ترکینده دولاندیریر. قیز پرستاردیر. اون‌بئش- اون‌التی دؤنه پله نین یارالارینی پانسومان ائله یندن سونرا پله یه وورولوب. پله قولاغین تورموزو اولماسا دا اونون ترکینه مینمکدن چکینمیر. قیزلیغینا باخمایاراق، اوره‌گی قورد اوره‌گیدیر. پله نین اؤزوندن ده اوره‌کلیدیر. هئچ ندن قورخوسو یوخدور…

  پله تئهراندا کارتوندا یاتانلارداندیر. اوردا بوتون اویدوروجو مادده لری چکیر، بورا گلنده هامیسینی ترگیدیر. بیر ده گؤرورسن اوتوز سککیز میلیون تومنلیک شکرله اونو شوشه- هیرویین یئرینه بیر قوملو یوخسا آموللویا سیریییب، اؤزوندن بیر دیرناق اوجو بئله ایز بوراخمادان گلیر. کیمسه اونا گؤزونون اوستونده قاشین وار دئیه بیلمیر. اؤز- اؤزونو بیر دؤولت، بیر مملکت کیمی دیرلندیریر. آنجاق قیر- قییافه سینده باخمالی یئر یوخدور.دیش تؤکولوب، قاش- گؤز آیدان چیخیب. گونباشی ساواشماسا اولماز. اؤزو ده پرستار قیز اونا عاشیق اولاندان، خستخانادا بیر قیران بئله بخییه پولو وئرمیر. سئودیگی پرستار دا اؤزونه تایدیر. لاتین، لوتونون بیری. ائله پله قولاغا دا بئله سی لازیمدیر. یوخسا اونلا بیر تاوانین آلتیندا یاشاماغا بو شهرده بیر قیز بئله تاپیلماز. پله قولاق عاشیق اولاندان بری، شهر اونون دا کؤکسونده بیر اوره‌گی وارمیش دئیه اینانا بیلمیردی. پرستار قیز، قیز دئییل کی، بیر پارچا اوددور دئییرسن. دئییرلر جیبینده پیچاق، پنجبوکس، قمه، زنجیر، و باشقا ایستی- سویوق قتل آلتلری دولاندیریر. پله قولاغین موتورونون دالینا مینیر، پولیسین قاباغیندا، پله نین بیر ایشاره سییله مأمورلاری یامانلاییب سؤیوشه باسیر. پولیسی ائلئقانسلا اؤز داللارینا سالیر. ائلئقانس اونلارین آردینا دوشور، آنجاق گل ایندی تورموزو گؤتورولموش موتورون توزونا یئتیش گؤرک! موتورون نه دال تورموزو وار، نه قاباق. پله موتورو آلان کیمی، توکاندان چیخار- چیخماز ایکی تورموزون ایکیسینی ده اؤز الییله چکیب قیریب آتیر آرخا. ایندی دئنن اونو نئجه ساخلاییر؟ بیر گؤز قیرپیمیندا قاباق تکری قووزاییب، آیاقلارین تؤوله میخی کیمی یئره سانجیب دایانیر. شهری بیر دؤور ووراندان سونرا، بوروق- بوروق کوچه لرده مأمورلار اونلاری ایتیریر. موتور اوستوندن پرستاری آتیر ائولری قاباغینا. سونرا دا یوز اوسته گلیب ائل سئون قفه سی اؤنونده دایانیر. قفه یه یئتیشن کیمی سحر تئزدن پینجین اوستونده قالیب یئکه کؤز کیمی قیزاران کرپیجی الینده گؤتوروب یاریم ساعات آتیب- توتوب اوینادیر. گوله- گوله، ائلئقانس دا بو موتورون توزونا چاتمیر دئییر. الی نین حیسسی یوخدور کی. بیر گون باغدا، پرستارین گؤزونون قاباغیندا، بوتؤو بیر پولیکا چسبینی الیندن دیرسه یه کیمی ساغ قولونا سورتور. سونرا دا بیر کیبریت! پله قولاق یانیرمیش، سئوگیلیسی اؤزوندن بئتر، اوستونده اوتوروب گولورموش. قولو جیززا- جیز یانیرمیش. او زاماندان ساغ قولونون حیسسی اؤلور. اود یاندیراندا بئله، اوجاغین کؤز- کؤمورونو بارماقلارییلا قاریشدیریر. بارماقلاری نین هره سی بیر ماشادیر، ماشاللاه! بایرامدا کپسولی بومبالارینی دا بارماقلاری نین آراسیندا پارتلادیر. قولو دا کی لوم کیمیدیر. بئل کیمی تورپاغا سانجیر، چکیش کیمی میخا، میخ کیمی دووارا چالیر. ائله بو قول، پرستارین جانینی ایتدن قورتاریر. قولو بئله اولماسایدی، حتم مئشه سینده قیزی ایکی ایت پارچالایاردی. ایتلر جومان کیمی، بیری نین اجلگاهینا بیر دیرسک ووروب اویدورور. بیرینی ده ایکی قیچیندان یاپیشیب، او آغاجا، بو داشا چیرپیب اؤلدورور. سونرا دا او اویدوردوغو ایتی کندیرله باغلاییب، آغاجدان آسیر. بونلا بئله ایت ماشیندان یاخشییمیش! کاش بو مهندیسین ده ماشین یئرینه بیر ایتی اولایدی. ایت هوروشو بو ماشینین سسیندن دؤزوله سی اولار سانیرام. اینان، بو ماشینین سسی گئجه یاریسی آرالیق ایتلری نین هوروشوندن ده پیسدیر. آدامی دنگ ائله ییر. واختلی- واختسیز سوپا اوتورور فرمانی نین دالیندا، الین ده قویور دیدیدین اوستونه. گل ایندی بو آردیجیل وور ها وورلاری دؤز دااا! اؤزوملوک دئییل، سنی دوشوندویوم چاغلاردا، چئورمده بیر جینقیریق بئله چیخماسین دئییرم. بئله گئتسه، پله قولاق یونسورا پناه گتیره جگم دئیه سن! آنجاق ائله بیل او دا زینداندادیر. یئنی جورمو ندیر بیلمیرم. دئییرلر بو اون ایکینجی سابیقه سیدیر. البتته ایکی آی بوندان قاباق چیخیرمیش. آنجاق اؤزو چیخماق ایستمه ییب. دوستلاری نین بیر- ایکیسی ایچریدیمیش، اونا گؤره ده من چیخمیرام دئییرمیش. مأمورلار زورلا ائشییه سالاندا، بیردن بیره شالواری نین زیپینی آچیب زیندانین سالونونا ایشه ییر. بو، ائله بیل اونیکینجی سابیقه سینه دؤنور. زیندان آدامی دئییلم، یوخسا گئدیب بو مهندیس باره سینده پله قولاقلا موطلق دانیشاردیم. من دؤزه بیلمیرم کیمسه سنی منیم فیکیرلریمدن آییرسین! ایستمیرم روحومون سنینله سسسیز دانیشیغینی کیمسه پوزسون!…

  ایندی سنه نسه یازماغیم گلیر. آنجاق کلمه لر بیر- بیرلری نین یانیندا یئرلشمیرلر. یازمامیش هئیدن دوشورم ندنسه. بئینیمده قارماقاریشیق جومله لرین آنلامسیزلیغیندان زارا گلیرم. گونده سنه نئچه کاغیذ یازیرام دا قورتارمادان جیریب آتیرام اویانا. جومله لرین بیری سن اولورسان، بیری من؛ بیر- بیرلرییله بیر یئرده اوتورمورلار. من نئجه چالیشسام دا بو جومله لر بیر- بیرلری نین یانیندا اوتورمور. باشارمیرام، اینان، باشارا بیلمیرم. باشارا بیلسیدیم، گؤر سنه نه لر یازمازدیم، نه لر دئمزدیم. آنجاق من بو مهندیسین تایی دئییلم کی. آز دانیشانام اصلینده. او قدر دئیه بیلمه دیگیم دئمه لی سؤزوم وار سنه، گل گؤره سن! یانیمدا دئییلسن کی دئییم. نم هاردا ایتیب باتیبسان، بیلینمیر. من ده سنسیز اؤز- اؤزومه دانیشیرام هردن. روحوم سسسیزجه دانیشیر سنینله. دانیشدیقجا بوغازیمی خینوو توتور. لاپدان سؤزلر بیرر- بیرر دویونله نیب قالیر بوغازیمدا. گؤزلریمده حالقالانان یاشلار اوزومه دوشمه سین دئیه اؤزومو بیر تهر ساخلاماغا چالیشیرام. مین بیر فیکیر گلیب دولور باشیما. بیلمیرم نئیله‌ییم. اؤزوم اؤز ایچیمده دولاشیب قالیرام. بیلمیرم نیی هارا قویمالییام. بیلمیرم کیمه کیمدن دئمه لییم. بیلمیرم اؤز یالنیزلیغیملا نئیله‌ییم. بیلمیرم بو شهرین آداملارییلا نئجه داورانیم. ائوده قالسام بوغولورام. ائشییه چیخسام باتیرام. دوستلار بئله منی ماراقلاندیرمیرلار. اونلارلا آتدیغیم آتدیملار آیاقلاریمین آلتیندا اوچوروما دؤنورلر. بیلمیرم نه لر دیله ییب، نه لر دیله ممه لییم. نه لر سئویب، نه لر سئوممه لییم. ال چاتماز سئویلمه لیلردن لاپ بئله یورولموشام. هردن سندن ده بئله یورولورام. سنی دوشونمکدن بئینیم قارالیر. آخی هئچ زامان تاپیلمایاجاق ایتیگی دوشونمک نه یه یارار، بیلمیرم. بیلمیرم سنسیز نه یئییم، نه گئییم، نه یازیم، نه دئییم. بیلمیرم، بیلمیرم نئیله‌ییم. اینان، بو سایاق یاشامی یاشاماغا دیمز دئسم یانیلمیرام…

  نیسه من حیاتین قاچ ها قاچیندا بئله سنی دوشونورم. آنجاق ائوده، خوصوصییله ده بیر ایکیندی چاغی نین ساعات آلتیسیندا سنی دوشونمگین آیری دادی وار. مهندیسین های- هارایی بو دادی مندن آلیر. اونا دا بیر سؤز دئمه لی دئییل کی. آز قالیر دوروم اؤزومو ایپدن آسیم!…

  هئچ اولماسا یونسورون موتورو منده اولسایدی، دوروب گئدیب بیر آز شهردن اوزاقدا گزیب دولانیب گلردیم. موتور دئییل کی، اوچاقدیر. آدام کیمی ائله بیل جانی دا واردیر بو موتورون. بو شهرین بوتون کوچه لرینده دلیقانلی بیر جاوان کیمی دولانیر. دابانی یئره گلمیر. یئرله گؤیون آراسیندا یوز اوسته اوچور. سانکی قوش قانادی وار. تام دلیقان بیر یگید کیمی یازدا یئلدن اسره ییر، قیشدا قاردان. بو شهرین توز- تورپاغی بئله اونون بزگیدیر. هله هاوا خوش اولاندا موتورون لاپ داها چوخ بئینی قیزیشیر. هم ده کی بو شهرین هر زامان سئوگی آردینجا گئتمه یه بیر کوچه سی وار. هئچ ائله بیل بو موتورو پله قولاق یونسور سورمور. موتور اؤز باشینا گؤتورولوب گئدیر. شهرین بوتون کوچه لرینی تانیییر. دلی کیمی یولو یوخ، مقصدی یوخ. هاردا کیمی اؤز ترکینه آلاجاق بیری وارسا، اونون اؤنونده دایانیب، میندیریب یولا دوشور. کوچه لری بیر- بیر یوز اوسته گزیر…

  بو شهرین کوچه لری قیشدا بئله اود وئریرلر. قدیم زامان داها چوخ اود وئرردیلر. گؤزل- گؤزل قوخویاردیلار یازدا. حَیَط باغلاریندان گلن قوخولار بوتون بیر شهری اسره‌د‌ردیلر. گؤزل گون دوغوشلاری، خوش هاوالی ائرته چاغلاری، روح وئرن آخشام چاغلاری نین گؤیده کی  قیزیل بویاسی! کاش بونلاری بیر ده گؤره بیلیدیم! کاش سن بورالی اولایدین! کاش ائوینیز بیزیم قونشولوغوموزدا اولایدی! کاش دوز قاپینیزین قاباغیندا بیرخانیم ساللاندی گولو بیتیدی! سن گون ها گون بوی آتدیقجا او دا ائنلی ائنچه لرییله بوی آتایدی! خانیم ساللاندی نین هؤروکلرینی سنین هؤروکلریندن باشقا هئچ بیر شئیه اوخشادا بیلمیرم کی. ساچیندا بیر قارا گونش پاریلداییر ائله بیل. ائله بیل حَیَط قاپینیزا یئتیشمه میش، کوچه دن سیزه آیریلان بیر دالان دا وار. او دالاندا هر زامان بیر قارا ایشیق وار. هر زامان بیر قارا ایشیق گؤزلرینی آغارداردی اوستومه. او زامان گئجه لری یاتا بیلمزدیم. خییاوانلار آیاقلاریمین آلتیندا اوزاندیقجا اوزاناردی. و گئجه یاریلاری نین کوچه لری کی مندن باشقا بیر لول کئفلی تاپیلمازدی اورالاردا. ایندی سنی دوشونوب دوشونمه دیگیمه باخما!سنسیز اولدوغوم چاغلاردا داش کیمی یاتیرام. خانیم ساللاندی گوللری اوزومو بئله گؤرمور. آنجاق سن هله ده اؤز یئرینده سن. ائله بیل بورالیسان. بیزیم قونشولوغوموزدا اولورسان. حَیَطینیزدن قاباق بیر دالان وار. دالاندا بیر قارا ایشیق پاریلداییر ساچلارین. کیم نه بیلیر؟ بلکه ده بو شهرین گؤزللیگی اونداندیر. هئچ ائله بیل اینتئرنئت چاغلاری دا دئییل. ایرمی بیرینجی قرنه ده آیاق قویمامیش کیمیگیک. نئچه دؤنه کاغیذ یازیب خانیم ساللاندی اوستونه قویماق ایستسم ده قویا بیلمیرم. دار کوچنیزین دالانیندان بیر آز دا ایره لیله یه بیلسم، پنجرنیزین دالینداکی پرده نین اوستونده اؤپوشن بی- گلینی گؤره بیلرم. من بونلاری بورا کیمی نییه گؤرمه میشدیم گؤره سن؟! آخی منیم گؤزوم هر گولدن یایینسا دا خانیم ساللاندی گولوندن یایینمازدی. گؤره سن او پرده نین اوستونده او بی- گلین، او بی- گلی نین گولوشلو اؤپوشلری ائله قاباقلار دا وار ایدی یوخسا من گؤرمه میشم بورا کیمی؟ سن دئمه بو شهرین اینجه- اوخشار قوخولاری نین بیر قایناغی دا وار ایمیش!…

  سن هله ده بیر هفته، گونون گونورتا چاغیندا، بیر هفته ده ایکیندی نین ساعات بئش یاریمیندا مدرسه نین چیرکین خاطیره لرینی گتیریب، گیلاسلا آرمود آغاجیندان آسلاییرسان. یا مثلن آغاجلارین آراسیندا کوف اوچورورسان. یا بیر گونش اولوب قیزیل- گوموش مئیوه لرین اوستونه شاخیرسان. هردن ده ایسلانیرسان. حَیَط یوخسا کوچه نین بیر بوجاغیندا بیر یئریندن ایسلانیب دورورسان. ایسلانیب هوشدان گئدیرسن بیر دووارین دیبینده. سنده هئچ گوناه یوخدور. بو موتور هاردان کئچسه اورا کئفلندیریجی بیر قوخو بوراخار. هانکی حَیَط- باجا قاباغیندا دایانسا، اورانین مئیوه لری پار- پار پاریلدایار. گیلاس، گیلنار بیلمزسن. هامیسی عقیقدن اولان بیر اوزوک کیمی گه لر گؤزلرینه…

  سن موسلومون عقیقدن اولان اوزویونو گؤروبسنمی؟ بو اوزوک بلکه اون ایلدیر اوندادیر. اونو دونیایلا دییشمز. دئییر بو اوزوک منیم معشوقمدیر. اوزویون حالقاسی دار اولدوغونا گؤره اونو جینی بارماغینا سالیر. گؤم- گؤی بیر فیروزه سی ده وار. اونو سالمیر کی سالمیر. دئییر گؤی منیم رنگیم دئییل. نه یاشیلی بیه نیر، نه قیرمیزینی. ائله عقیقیم یاخشیدیر دئییر. عقیق اونا یاراشماسا دا اونو اؤزونه یاراشدیریر. یانیندا هانکی بویادان دانیشسان، سؤز گئدیب سونوندا خاریجه لی بیر یؤنتمه نین اوچ قالارقی فیلمینه چیخیر. موسلوم چوخ سئویلمه لیدیر، فیلمدن دانیشاندا، اونون دا بیر ایتیگی وار دئیه دوشونورم. گؤرورسن کی، سن بیر تک منیم ایتیگیم دئییلسن. دئییرم حئییف عقیقلر داها قدیمکیلر کیمی پاریلدامیر. مئیوه لر داها قدیمکیلر کیمی یئمه لی دئییل. پله نین ده کی موتورو میکانیک توکانیندا جرجنک قالیب. سانکی شهرین او دلیقان یگیدی اؤلوب. اؤزو ده کی ایندی زینداندا نه لر دوشونور، نه لر دوشونمور، بیلینمیر. پرستار قیز اونو آتاندان سونرا، باشینی بئچه دؤیوشدورمکله قال ائدیردی یازیق. اولا بیلسین ایندی ده زینداندا ائله او جرجنک موتورونا مینیب گئدیب سئیله مه ده بئچه دؤیوشدورمه یه باخیر. بیر ده گؤرورسن اوس جفرین بئچه سی ووردو گیلان بئچه سی نین گؤزو چاناق گئتدی! سن گؤرمه ییب بیلمیرسن کی! گؤز لاپدان اووولوب تؤکولور یئره. اصلینده ده بئچه نین گؤزو تویوقدان چوخ تؤکولر. آخی بئچه لرتویوقلاردان چوخ دؤیوشورلر. تویوقلار اوتوروب دردلرینی چالخالایاندا، بئچه لر اؤز باشلاریندا دؤیوش پلانینی تؤکمسه لر، اولا بیلسین دونیادا هئچ کسین بورنو بئله قاناماز. دؤیوشن بئچه لری یوخسا بئچه دؤیوشدورنلری گؤرسن سؤزلریمه اینانمایا بیلمزسن. میثال اوچون میر صمد ین بیر بئچه سی وار، جان وئریر دؤیوشمه یه یا دا دؤیوشدورمه یه. قویسالار اوچ باش ممد گلیب اونون مامیزینی چکیب اؤز بئچه سی نین مامیزینا باغلار. قاباقجا میر صمدین بئچه سی نین مامیزی نین قابیغینی چکر. قابیق الینه گلندن سونرا، بئچه نین مامیزی قانایار. اونا دا بیر آز ایسپرئی ووروب کئییدر. مامیزین قانی قورویار. سونرا اوچ باش ممد قابیغی گؤتوروب آپاریب بیر آز یونتالایاندان سونرا سورنگی ایکی سیسییه دک کسیب ایچینه بیر آز قیر اریدیب تؤکر. داها سونرا اونو بئچه سی نین مامیزینا قالیب ائدیب کئچیرر. اوندا بئچه سی قاباقکیندان دا بتر دؤیوشر. بوتون دؤیوش بئچه لری نین گؤزونو اووجونا تؤکر. ائله بو گونلرده بئچه سی دؤیوشه جک. دؤیوش مئیدانی شهرین آشاغی باشیندا بیر سئیله مه ده اولاجاق. بئچه سینی چوخداندیر کالبای ماحمیدین بئچه لرینه قاتیب. ایکی هفته دیر پوسته- بادام یئییر بئچه. مرجلری ده ایکی یوز مین تومندیر. حریف گیلاندان گله جک. اوچ باش ممد ایندیدن گیله کی  اؤلدویه قویوب. اؤلدوره بیلسه ایکی یوز مین آلاجاق. دئییر ایکی یوز مین بیر شئی دئییل کی. هئچ بئچه نین پوسته- بادامی نین پولو دئییل. دؤیوشچو بئچه ده دئدین، باخ، بو بئچه یه دئیه سن. یوخسا بئچه نین بیری من، بیر ایله یاخیندیر پوسته- بادام اوزو گؤرمه میشم! سونونجو دؤنه تبریزده کیلووسونو اوتوز بئش مین تومن دئدیلر، آلمادیم. من مهندیس دئییلم کی گونده بیر اتک آلیب جیبلریمه تؤکم، آشاغی- یوخاری یئییب دانیشام. یا میر صمد دئییلم کی! او گونده اوچ قوتو وینیستون چکیر. پئیسری پئرشییا دالیندا گؤرمه لیدیر. پئیسرینی بالتا وورماز. ایکی قولو ایکی باتوم کیمیدیر نامردین. ایندی اوچ باش ممد گلیب اونون بئچه سینی گؤتورسون گؤرک! بئچه سی ده اؤزو کیمی جللادلارا اوخشاییر. ائله بیل یئدیگی- ایچدیگی گولله- باریتدیر بئچه نین. هله اوس جفرین بیر لار بئچه سی وار، اونا جییر یئدیردیر. اونون خرجی لاپ باهادیر. منه باخما کی، سنه بیر هدیه آلماغا پولوم چاتمیر. آنجاق یوخ، سنه پولوم چاتار. تکجه اوزونو گؤرست منه، جان ایسته! منیم جان گودنیم یوخدور کی. دؤیوشکن بئچه لردن ده دئییلم، منه پوسته- بادام یئدیره لر! آنجاق دئییرم کاش من ده او آلا پرلردن اولایدیم! نئچه ایل قاباق اوس جفرین بیر نسلی وار ایدی، اونا آلا پر دئییردی. بئچه نی ووروب یئره یاتیراندان سونرا، اوستوندن اوچ دؤنه آتیلیردی. اوس جفرین اؤزو ده شاشیب قالیردی. اوندا آغزی نین آچیق قالماسی دا لاپ چوخ گؤرمه لی اولوردو. بئچه سی وورولاندا دا، آلت دوداغی انایین بیر وضعیتده آسلانیردی. آلت دوداغینی یوخارییا چکیب بورنونون اوستونه دایاییب دوروردو. هئچ سن گؤر بورا کیمی، آلت دوداغینی بورنونون بوتؤوونه گئیدیرن آدام گؤروبسن؟ کئچن هفته بیر جوجه گتیرمیشدی کی دؤیوشنده، دئییردین بومب آچیلیب. ایکی اؤزو بویدا بئچه نی، سئیله مه اوزو آشاغی قاتدی قاباغینا قوودو. سئیله مه دن قاییداندا، اوس جفر چؤللوگون هاراسیندا یونجا گؤروردو، ماشینی ساخلاتدیریب دوشوردو. سلقه- سهمانلا یونجادان ییغیب، ماشیندا اؤز قوجاغیندا او جوجه یه یئدیردیردی. قاباقجا دا یوخلاییردی کی یونجا قورتلامیش اولماسین! جوجه دئییل، بو بئچه منیم سسسیز طیاره‌م اولاجاق دئییردی. البتته بو بئچه لردن بیری ده بیزده وار ایدی قاباقلار. آنجاق پوسته- بادام ندیر، بیلمزدی. بونجا یونجا تانیمازدی…

  آنام گون اورتایا یاخین تویوق- جوجه یه دن تؤکنده، بئچه میز گؤیه باخاردی. ائله بیل هئچ آج اولمازدی. بیر آز گؤیه زیللنندن سونرا دنه باخیب یاواش- یاواش دنلردی. گئجه لر ده گؤزو گؤیده اولاردی. گؤیده اولدوز زمیسینه دالاردی. دیمدیگی دن یئییر کیمی ترپنردی. گئجه لر جواهیر خالا گیلین قلمه لری قارقایلا دولان کیمی بیزیم ده مئیوه آغاجلاریمیز سئرچه ایچینده ایتردی. بئچه میز جواهیر خالا گیلین قلمه لری نین لاپ باش بوداغینا قونان قارقانی ایزله یردی. قلمه لر یئکه- یئکه قارقا یووالارییلا دولویدو. یووالار خول- بوداقلاری اَیردی. لاپ باش بوداقدا قورولان یووا آستا- آستا ترپنردی. یووانین ایچینده نسه اولاردی. هارداسا دپرم وار کیمی گلردی آداما. یوخسا یووا بو ساده لیگه تیتره مز کی. بیردن بیره قارقالار توزاناق سالیب اوچاردیلار. بیزده کی  سئرچه لر ده پیر- پیر پیرلایاردیلار. جیویلتیلری قوپاندا گون چیخاردی بیردن بیره. کاییناتین ان درین قاتیندان بیر دان یئلی اثردی. دان یئلی اسن کیمی بئچه میز قانادلارینی آچیب یوماردی. ائله بیل بئچه میزین ده بیر ایتیگی وار ایدی. نییسه، کیمیسه دوشونوب بیردن بیره قانادلارینی آچیب یئلی قوجاقلایاردی. گئجه لر حَیَطیمیزین سکیسینده اوتوراردی. اویونجاغینی ایتیرمیش بیر اوشاق کیمی وورنوخاردی. بانلامازدی آنجاق ایندی بانلایاجاق کیمی دیمدیکلرییله بوغازینی ترپه‌دردی. بوغازی نین ترپنمه سی کاغیذ اوستونه دوزوله جک کلمه لر کیمی گؤرونردی. ائله گؤیه دونوخاردی، دئیردین نییسه اولدوزلارین میخیندان آسلاماق ایسته ییر. دئسم اینانمازسان، بئچه میزین گؤزلری ماوییه چالیردی. اونون گؤزلرینده کرتی نین قیزیل گوللری ده ماوی آچیردی. قولاغیندا سئرچه لر ماوی جیویلدشیردیلر. قارقالار بئله ماوی قاریلداییردیلار. آی ایشیغی گؤی اوزونده ماوی یاییلیردی. اوندا سن ده هاردانسا ماوی بولوزونو گئییب گلردین. حَیَطیمیزده بیر ماوی دنیز آیاق توتوب یئرییردی. ائوین ایچینده بئله گولدانلاریمیزداکی گول یارپاقلاری ماویلنردی. بیر ده گؤز آچیب یوماردیم، پاییز اولاردی. حووضوموزا ماوی- ماوی یارپاقلار النردی. سونرا بیردن بیره هاوا بوزاراردی. کول بویاسیندا بیر شئی هاوانین اوزونه سپیلردی. یئل اثردی؛ پاییز یئلی. ایکیندی چاغی یئنه ده باشلاردی. گؤیه داغیلمیش بولودلار نقاشی کیمی باشیمین اوستونده چکیلردی. ائوه دؤنوب اوتاغیما سیغیناردیم. سنی دوشونردیم کسین. او زامان هئچ بیر مهندیسین سسی کوچه میزی باشینا گؤتورمزدی. هئچ بیر پله قولاغین موتورو شهرده جؤولان وئرمزدی. اوزون بیر یاستیغیم وار ایدی. سول طرفین هر زامان بوش گؤرردیم. سنی عؤمروم وارکن تاپمایاجاغام دئیه دوشونردیم. بعضی آنلار سنی باشیمدان آتیم دئیه تئلویزییونو آچاردیم. نئچه اؤلکه نین پریزیدئنتی آغیزلاریندا ایت بوغوشدوراردیلار. بلکه ده بئچه دؤیوشدورردیلر. ائله بیل بوتون بو دونیانین پریزیدئنتلری سنی دویوب دوشونمگین قنیمیدیرلر. آخیر کی بونلاردان بیر تمه سیک آنلامادیم من. ائله بیل تئلویزییوندا ممه یئیندن پپه یئینه، هره نین بیر تریبونو وار. گونباشی تئلویزییوندا یئددی دره نین سویو قاریشیر بیر- بیرینه. او زامان بیر کانالدان آرتیق توتمازدی. هم ده اینتئرنئت زاد دا یوخ ایدی کی. موبایل، ائس ائم ائس فیلان دا یوخ ایدی. بیردن بیره بیر اؤلو خبرینی دئیردیلر، سونرا تئلویزییونون صفحه سی قاریشاردی. داها سونرا دا چیراقلار سؤنردی. یاتماق واختی گلردی. ائله بیل مهندیسین ده چیراقلاری سؤنوکدور. آرتیق اونون یاتماغی یاخشیدیر. آنجاق موسلوم، من بیله نی ایندی یاتماز، فیلمه باخار. کسین ایندی سوپا دا یاتیب، قابا رحمان دا، اوس جفر ده، اوس جفرین بئچه لری ده. رحیم توده، اوچ باش ممد، خانیم ساللاندی گولو بئله. پله قولاق یونسور دا کی، یا زینداندا، یا دا تئهراندا، کارتوندا. باخ، گؤر ایکیندی چاغی نین ساعات آلتیسی هارا، گئجه نین بو واختی هارا؟ غریبه  یاتماق واختیدیر. یوخوم گلیر. داها گئدیب یاتمالییام، باغیشلا! بوندان آرتیق سنی دوشونه بیلمرم!…

آبان آیی 1391 (2012)

اشتراک گذاری در print
چاپ

2 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *