مئشه، همیشه ده آغاجلار، یا ییرتیجی حیوانلارلا تانینمیر؛ بلکه ده آغاجلارین سیرایلا دوزولوب تاماشا ائتدییی یاخود وحشی حیوان‌لارین ندنسه آیاق باسا بیلمه‌دییی چئوره‌‌دیر اصیل مئشه!
کیمی‌لرینی دیزه چؤکدورور کیمی‌لرینه دیز چؤکور!
کیمی‌لرینی اژداها کیمی آغزینا آلیب اودور کیمی‌لری‌نین گؤزونده قاریشقا قدر ده دئییل!
دیز چؤکن‌لرله دیزه چؤکدورن‌لر، قاریشقا گؤرن‌لر ایله اژدها گؤرن‌لر بیر آرایا گلینجه فیرتینا یارانیر قاسیرغا قوپور; ایستی هاوانین سویوق هاوا ایله قاریشماسیندان یئل تؤره‌نن کیمی.
ایکی آی اولموشدو؛ هرگون ایکی دفعه معین ساعاتلاردا ائودن چیخیردی. کؤرپه‌سینی أمیزدیریب آلتین تمیزله‌ییردی. سونرا حزین بیر ایفا ایله:
“لای-لای بئشیییم لای-لای
ائویم ائشیییم لای-لای
سن یات یوخونو آل بالام
چکیم کئشییین لای-لای…”
اویودوب بئشییینه قویوردو. کاسئتی ضبطه یئرلشدیریب، موسایئودن چوخ سئودییی، مشهور “قرنفیل گول‌لر” آدلی ماهنینی کؤرپه‌سی اوچون سسلندیریب، آیاغا دوروردو …. هارداسا ساعات یاریم سونرا ائوه قاییدیردی.
أری همیشه او ساعاتلاردا ایش یئرینده اولسا دا ایشچی‌لرین، آروادی حاقدا پیچیلتی‌لاری ایله معنالی باخیش‌لاری، ایچینی سؤکموشدو.
او گونو میزیلدانا-میزیلدانا بیرآز ایشدن ائرته چیخدی.
– یوخ اینانمیرام او منی چوخ ایستیییر، هله اوغلوموزو…اوغلوموزون لاپ دلی‌سیدیر. یقین بولار منیم خوشبختلیییمی قیسقانیر. هه! هامیسی بیزیم عشقیمیزه حسدنن باخیر. سؤز باز شهردی دا ! پروین هارا او ایشلر هارا. دونیا ییغیشا منی بونا ایناندیرا بیلمز.
آناسی دا ایلک گوندن ایکی آیاغینی بیر باشماغا دیره‌میشدی کی: “بالا اوننان سنه آرواد اولماز، قیریق آدامدیلار. دده‌سی ننه‌سین بوشایان گوننن ایتکین گئتدی. عمیسی قیزی دا فیلان یئرده موطوروف‌لوک ائلیییر. خیردا عمیسی بیر بازارین قانین شیشه‌یه‌ توتوب، نزول پولدان وئریر چک‌دن سوفته‌دن آلیر، میللتین وار یوخون سومورور. بودا اولاردان آرتیق اولمایاجاق کی؟ ذات‌لاری خرابدی!”
او ایسه پروینی سئودییندن بئش ایل کئچمیشدی، ایکی آیاغینی بیر باشماغا باسیب “حخدی یوخدو من پروینی آلاجام کی آلاجام” دئمیشدی.
گئت-گئده آناسی دا فرقینی آواریب پروینی سئومه‌یه باشلامیشدی، آما هئچ واخت بونو ایقرار ائتمه‌یه غورورو ایذن وئرمه‌میشدی. بلکه ده پروین‌ین، عاییله‌سینه بنزه‌مه‌دییینی اینانماییب دونیادان شوبهه‌لی گئتمیشدی.
ایکی کوچه ائوه قالان ماشینی گؤرونمز بیر یئرده ساخلادی. اؤزونو کوچه‌لری‌نین باشینا یئتیردی. یازین بیرینجی آیی ایدی. گؤی نریلده‌ییر یاغیش وحشیجه یاغیردی؛ یئردن‌می گؤیه، گؤیدن‌می یئره، هئچ سئزیلمیردی. ائله بیلیردی یئر گؤی ده اونون پریشان حالینا زاریییر.
دیشی باغیرساغینی کسمیر، تینجیخدیریردی! یاغیشا، یامان-یووز قالمیردی یاغدیریردی.
دویدوغو پیچیلتیلار ایچیندن یادداشی‌نین قابیندا تورتالانان ساعات بئشی آییردی. ساعاتا باخدی. دؤردو قیرخ‌بئش دقیقه کئچیردی. بو ایشیندن اوتانج حیسی دویسا دا ائوه گئتمک ایسته‌مه‌دی.
بؤرکونو گؤزلری‌نین اوست قاپاغینا کیمی چکدی. کوچه باشینداکی چوخدان تنهالانمیش تلفن کابینینده دایانیب گؤزله‌دی.
کاپشنی‌نین یاخاسینی کوچه‌یه ساری اولان اوزونه قالدیردی. دیل آلتی: “چیخمییاجاق بیلیرم، هاممیسی بؤهتاندی” دئسه ده اوره‌یینده‌کی ایپک یولوندان “آی آللاه چیخماسین” کاروانی کئچیب، گئدیب آرزولارینا قاریشیردی. اؤزو اؤزونه:
“لاپ بوتون دئییلن‌لر دوز اولسا بئله ایندی، بو یاغیشدا ایتی ده وورسان چؤله چیخماز؛ هله قالا آدام!”دئییب، میزیلدانیردی.
اونونلا خوشبخت گون‌لری بوتون داغ-دره‌سی‌ ایله گؤز اؤنونده جانلانیر دوداغیندا چیچکله‌نیر بیردن سولوردو!
ایچینده چلیشیک حیس‌‌لر اویناشیردی. بیرینجیسی: دئییلن‌لره اینانیب ماراقلا اونو گؤزله‌ییب، ایزله‌ییب، بو ایشدن باش چیخارماق، او بیری‌ایسه: بیرینجی حیسدن اوتانماق!
آلنیندا سویوق تردن عمله گلن مونجوقلاری بارماقلاری‌ ایله سیلدی.
کابینین ساری رنگی‌نین شووقوندان گؤزلری‌نین بال رنگی توتقونلاشمیش آجی‌یا چالیردی!
چوخ آل-وئردن سونرا نهایت کی ایکینجی حیسی بیرینجی‌ حیسینه غالیب گلدی. “آللاه سنه توکل” دئییب ائوه گئتمک اوچون کابیندن چیخماق قرارینا گلدی.
چیخماغا دارتینیب قاپینی آچسا دا بیر الینی چرچیوه‌یه ائله دایامیشدی سانکی اؤزو اؤزونه چیخماق اوچون مانع اولوردو!
بلکه ده گؤرونمز بیر قوه اونو قالماغا زورلاییر ایچه‌ری ایته‌له‌ییردی، او ایسه،بو زوراکیلغین قارشیسیندا دایانیردی.. بونو، عکس حالدا دا دوشونمک اولوردو; هانسی‌سا بیر قوه اونو ایته‌له‌یه‌رک کابیندن چیخیب ائوه گئتمه‌یه زورلاییردی، آنجاق الینی چرچیوه‌یه دایایاراق بو گوجه قارشی، دیرنمک ایسته‌ییردی. آلت بیلینجینده نه‌لر اولدوغونو اؤزو بئله، بیله بیلمیردی. ایلک آددیمی دیشاری آتار_آتماز بیردن بیره یوز مرتبه‌لی غورور بینالاری ایچینه چؤکدو.
بیر آن سانکی روحو جیسمیندن آیریلدی.
یاغیشی اومورسامادان کابینین اؤنوندن کئچن قادینا دیققت‌ ایله باخدی.
قادین آددیملارینی مؤحکم آتسا دا اوره‌یینده دالغالانان تشویش شپه‌لری اوزونه کیمی قالخیردی.
گؤزلری دولوب تورلاندی.
میل توخونمادان چیخار کیمی جان ریشته‌سی قیریلیب، وجودونون ایلمک‌لری هر طرفه داغیلدی. سونرا بیر اوجو قادینا باغلی‌ایمیش کیمی اونون سایریشان اندامی‌نین هر حرکتینده سؤکولمه‌یه باشلادی.
زور اولسا دا اؤزونو توپلاییب کابیندن چیخمالی‌ایدی. بیر تهر چیخیب دالی سوره یوللاندی.
هر بیر خیابانی- کوچه‌‌نی آرخادا قویوب ائودن اوزاقلاشدیقجا داها راحات نفس آلیردی قادین، کیشی‌‌ ایسه بوغولماق اوزره‌ ایدی.سانکی یاغیش هاوانی دا یویوب آپاریردی!
بیردن ایلَج سسی گلدی. سیقنال سیقنالین آردیجا.
دؤنوب باخدی.آغیر ترافیک یارانمیشدی. سوروجولر ماشین‌لارینی بوراخیب هر طرفدن حادیثه یئرینه قاچیردی‌لار. ایکینی سایینجا میللت دولوشموشدو. نه باش وئردییینی گؤره بیلمیردی؛ ساده‌جه اینیلتی سسی دویوردو. بیرآز یاخینلاشیب آداملارین آراسیندان سوخولا-سوخولا بویلاندی. قیز اؤزونو ماشیندان آتمیشدی. اوغلان ایسه آیاغینداکی عسگر پوتونونا بنزر پوتونلاری ایله اونو تپیک آلتینا سالمیشدی.
– قانجیق! دئییرسن بس قویارام بئله راحات اؤله‌سن؟ سنین کیمی‌لری دوغراییب ایت‌لره آتاسان گرک. عیفریته!
کیمسه ایره‌لی گئتمیردی. ناموس مسئله‌سی‌دیر دئیه پیچیلداشیر یاخینلاشماقدان چکینیردی‌لر. قانینا بویانمیش قیزدان ایسه ایندی خیریلتی سسیندن باشقا هئچ بیر سس چیخمیردی.
اؤزونو قیزین اوستونه آتیب اونو ضربه‌لردن قوروماق گلیردی ایچیندن آمما گئتمه‌یه ده تله‌سیردی.
کلمه‌لرله ایفاده اولونمایاجاق قدر آغیر بیر بوغونتودا قاپسانیب قالمیشدی.
گیزلینجه، ایزدیحامین اوبیری باشیندان، بیر او جانسیز بدنه بیرده آروادی‌نین بره‌لمیش گؤزلری و سولموش سیماسینا باخیردی. هله ده اینانماق ایسته‌میردی.
استرسدن‌می، قورخودان‌می یوخسا عصب پوزقونلوغوندان‌می نه‌سه قارنینداکی تیکیش یئری سانجماغا باشلادی. بیر آن الینی قارنینا آتیب اؤزونه قیوریلدی. آغری، شیمشک کیمی قارنیندان باشلاییب قیچلاری آشاغی زوغ آتیردی. دوغومدان سونرا دوکتور “موطلق ایستیراحات ائلییه‌جکسن” دئمیشدی آما قولاق آردینا وورموشدو.
خسته‌خانادا دوغوم سیراسیندا اؤلن قادینی خاطیرلادی. آجیندان مله‌ین کؤرپه‌سینی ده.
بو کؤرپه ساغلام اولسا دا آرتیق آناسیز‌ ایدی و بو بیر اینسان اوچون چوخ قورخونج بیر باشلانیش‌ایدی.
دوشوندو کی آرتیق اؤزونه یاخشی باخمالی، جیسمینی، روحونو یاخشی بسله‌مه‌لی‌دیر. اوغلونون آناسیز بؤیومه‌یینی موطلق ایسته‌میردی.
یاغیشدان ایسلانان بویاسیز ساچلاری آخیب آلنیندا غریبه بیر تابلو یاراتمیشدی. عاجیز و اومودسوز گؤرونوردو. بیر ایکی آددیم آتیب سؤیکه‌نه‌جک بیر سکی تاپدی. گؤردویو صحنه‌دن سارسیلمیش، رنگی آتمیشدی. قادینین تاریخ بویو دوستاق اولماسینی دوشونوب ائرکک‌ توپلوما نفرت ائله‌ییردی. بیردن کوره‌یی بوشا گئتدی. اوتوردوغو سکی بیر گؤزللیک سالونونون قاپیسینا عاییدایدی. قاپینی آچمیشدیلار .اورادان چیخماق ایسته‌ین قادین “قیزیم بی شئی اولوب؟”دئیه سوروشدو. دانیشماغا هئیی قالمامیشدی. باشی‌ ایله یوخ دئیه‌رک قادینا یول وئرمک اوچون آیاغا دورماغا چالیشدی. بایقینلیق گؤزلرینی قادینین گؤزلریندن آلماغا ماجال وئرمه‌دی.اینجه گؤوده‌سی یئره سریلدی.
أری ال-آیاغینی ایتیریب میللتی ایته‌له‌یه- ایته‌له‌یه اونا ساری یوگوردو. بیر نئچه قادین اوندان اؤنجه اؤزونو یئتیریب یاریم‌جان بدنی سالونا گؤتوردولر.
ألی بوشا چیخدی. فیکری‌ ایسه مین یئری ایداره ائله‌ییردی. ائوده کؤرپه‌نی، محله‌ده قونشولاری، ایش یئرینده ایشچی‌لر ایله ایش صاحیبینی، بوردا ایسه آروادینی.
او قاپالی یاساق قاپینی دؤیه ده بیلمیردی. ایچی ایچینی یئییردی. یاغیش، یاغی بنزینی پالتارلاریندان یویوب آیاغی آلتینداکی چوخورا آخیدیردی. بو چیرکاب ایچینده بئله، طبیعتین سئحرلی رنگ‌لرینی گؤرمک اولوردو.
گؤزلرینی آچدی. ساری ساچلی یاریم چیپلاق بیر قادین باشی اوستونده دورموشدو.
سوروشدو: “یاخجیسان؟”
دوروخدو. پاراوان آرخاسیندان فیرلانا-فیرلانا گلین دونو گئیمیش بیر قیز چیخدی. قیرجانا-قیرجانا “نئجه‌دی؟” سوروشوب بیر-بیر ایله‌شن‌لرین اوز ایفاده‌لرینه باخدی. ذووقوندان هر آن اوچاجاقمیش کیمی‌ قول- قانادین گؤیده اوینادیردی. اوراداکی هر کس خوشاگلیم بیر جومله‌ ایله قیزی راضی سالدی. ائشیکده اولان‌لاری بیرده ذهنینه چکیب ساعاتینا باخدی. آلتی‌یا آز قالیردی. قارنی هله تام ساکینلشمه‌میشدی آنجاق، اؤزونو دیک توتدو، ساچینی، باشینی دوزلدیب آیاغا دوردو. گلینه خوشبختلیک آرزوسونو بیلدیریب ساری ساچلی قادیندان تشککور ائله‌دی. قاپیدان چیخاندا یاغیش هله تؤکوردو.
کیشی‌نین کدرلی گؤزلری ایشیلدادی. اوره‌یی بیر آن ساکینلشدی. بدنده میغمیغا چالان نقطه‌نی قاشیماق لذتی کیمی بیر حیس کئچیریردی. آجی آمما شیرین! شیرین آمما آجی!
نه او قالابالیقدان خبر وارایدی نه ده او قیزلا اوغلاندان. سس‌سیزلیک هر یئری چولغالامیشدی; قارشی کئچیتده گؤزله‌ین أری‌نین اوره‌ییندن باشقا. اوراسی سانکی مال میدانی‌ایدی آلان کیم، ساتان کیم،مه‌له‌ین کیم!
ایچینده سینسی بیر داریخما قیمیلداندی. بوغوق سس‌ ایله:
“اومورام اوغلوم بؤیویونجه منی باغیشلار!”دئدی.
بو سؤز بئینینده دئییل اوره‌یینده تومورجوقلاندی.
شهرین یوخسول شیریق کوچه‌لری‌نین بیرینده چیی کرپیجدن تیکیلمیش، یاریم سوواق کؤهنه بیر دامین اؤنونده دایانیب اطرافی یاخشیجا سئزدی.کوچه‌ده ایت اولاییردی! یاغیش دامجی‌لاری‌نین تنه‌که بورولارا چیرپیلیب شیریلتی‌لا آخماسی نوستالژیک بیر ملودی یاراتمیشدی. قاپی‌نین قاباغیندا پالچیق الیندن دورماق اولموردو. جانلی دیوارلاردان هاوایا باییلدیجی بیر تورپاق عطری یاییلیردی. بلکه ده دونیادا هئچ بیر عطر اونو بوقدر فرحلندیرمزدی. تمیز هاوادان جییر دولوسو ایچینه چکیب قاپی‌نین وورقوسون چالدی. چوخ گؤزله‌مه‌‌دی. اوجا بوی بیر گنج کؤینه‌یینی چلیم‌سیز أیینینه چکه‌-چکه قاپی‌نین چرچیوه‌سینده گؤروندو.‌ ألینی ایرادت نیشانه‌سی اولاراق کؤکسونه باسدی. باش أییب بویور دئدی.
کوچه‌نین تینین‌دن باخان، کیشی‌ دئییلن روحدان نه‌سه یئرلره جالاندی. هر آن دوشه‌جه‌یینی حیس ائدیردی. آیاقدا دورا بیلسین دئیه یاخینداکی الکتریک دیره‌یینه ال آتدی.
– ائله بو سوخولجان اوچون اؤزونو دیل‌لره سالمیسان؟ آی یازیق!
یقین او مننن چوخ محبت‌لیدی چوخ دیققتلی… یقین او اوزون قول‌لارین آراسیندا… شیطانا لعنت! یاناسان آرواد یییه‌سی!
یئنه یادداش آرشیوینه باش چکیب قاریشیق سس‌لر، قاریشیق تصویرلر چیخارتدی.
“گل عهدیمیز ابدی اولسون دئیه اوغلوموزون آدین ایلقار قویاق.اولار؟”
ایلقار…ابدی…عهدیمیز…اوغلوموز…
“بالا اوننان سنه آرواد اولماز…قیریق‌دیلار…ذات‌لاری خرابدی!”
“سنین کیمی‌لری دوغراییب ایت‌لره آتاسان گرک!”
_هیم! یازیق ایت‌لره
گؤیون کول رنگی بوتون یئر کوره‌سینه کؤلگه سالمیشدی. یاغیش سنگیمیشدی آما تام کسمک قصدی یوخودو دئیه‌سن.
بیردن بیر فیکیر خورا کیمی، ذکاسینی یئییب تؤکمه‌یه باشلادی
_اولمایا اوشاق…
یوخ! یوخ! بو اولا بیلمز! هامی منه بنزه‌دیینی دئییر. او منیم اوشاغیمدی، منیم اوشاغیم، اؤز اوغلوم. منیمدی منیم.
بو ایماژدان ممنون گؤرونموردو. باشینی جایناق‌لارینا آلیب وار گوجو ایله سیخدی; سانکی فیکیرلرین تؤرندییی یئری سؤکوب داغیتماق ایسته‌ییردی. پانیک کئچیریر اؤزونو هر آن بوغولاجاق سانیردی. باهارین او سرین هاواسیندا اوسته‌لیک یاغیش آلتیندا آلوولانیب یاندیغینی حیس ائدیردی. یاخاسینی بیرآز آچدی. ایچینده بوغولان نفسی یوخاری چکیب بوراخماغا چالیشدی. فلسفه دونیاسینا آتیلمیش کیمی اؤزونو جوابسیز سوال‌لارلا قارشی‌-قارشی‌یا گؤرن آدام آز قالا اؤله‌جه‌ییندن قورخوردو. تلفونونو جیبیندن چیخارتدی “سئوگین ده عهدین ده دیسین باشیوا قح…” سون کلمه‌نی اودوب بیر نومره ییغدی. سونرا کاپشنی‌نین چیرکلی قولو ایله بورنونون سویونو سیلیب، گؤزله‌دی.
یاریم ساعات سونرا پلیس‌له برابر ائوین ایچینده‌ایدی. قادینین یاریم آچیق دؤشونو تمنا‌ایله أمن کؤرپه‌یه باخیردی. یاغیش گؤزلرینه دولوب ائوه گلمیشدی…