چئویرن: سولماز جمالی
ترجمه: سولماز جمالی
سولماز جمالی

هاچاندیر میغ‌میغالارین سانجدیغی یئری اه‌یری-اویرو دیرناقلاری‌لا دیدیب تؤکور؛ دیددیکجه یاراسی قاناییر، قانادیقجا دا یئری بؤیویور. دیزی اوسته سورونوب اونا یاخینلاشیرام. یاراسینی آرتیق دیدمه‌سین دئیه دستمال‌لا ساریییرام. بیر جوت لال گؤزدن آخان یاش دامجیلاری قولومون دریسیندن کئچیر سومویومه دامیر.
ایشیم بیتدیکدن سونرا باشیمی قالدیریر اونا باخیرام. اورککجه گؤزلرینی منه دیکیر؛ یورغون گؤوده‌سی منه ساری دارتینیر.
-دانیش
گؤز یاشلاری دونونون اوزه‌رینده‌کی چیچکلره دامیر. چیچکلر آستا-آستا سولور.
-دانیش … آغلاما …
سایمیر، بو دفعه لاپ هؤنکورور …
دیزیمه دیره‌نیب آیاغا قالخماق ایسته‌ییرم. الیمدن توتور، اؤله‌زیمیش سسینی گوجله ائشیدیرم: سنه آغلاییرام.
سسی ده گؤزلری کیمی نملیدی.
یئنه اوتوروب اوزونه باخیرام. آریقلاییب باپ-بالاجا اولموش اوزونو، ایسلاق باخیشینی منه دیکیر؛ یارامی جیرمالاییر …
پنجره‌نین ائن‌سیز تاقچاسی‌نین اوزه‌رینده یان-یانا دوزولموش نارین گوللر لئچک‌لرینی آشاغی سالدی‌لار. پنجره‌نین سینیق شوشه‌سینه بالاجا بیر قوش قونوب قیشقیریر.
دؤندوم
گؤزلرینی بوینوما زیلله‌دی. ایچین چکه-چکه: “بارماق‌لاری‌نین یئری بوغازیندا قالیب … قاییشین ایزی قوللاریندا قالیب … چوخ کوْرلوق چکیرسن …”
دراوئرین اوزه‌رینده‌کی شکیله باخیرام: “من اونون دئدییینه اینانمیرام … سن دلی جیننی دئییلسن.”
شکیلده‌کی کیشی گؤزونو آغاردیر.
تئز چؤنوب شکیله باخیر. کیشی‌نین گؤزلری گئن-گئن آچیلیب آدامین باغرینی یاریردی. اونون قارا- قورخوسو قادینین اؤدونو پارتلادیردی. سانکی ایچینده جوجه‌رن حیس‌لرینی ده باخیشی‌لا دوغراییب تؤکوردو.
شکیله باخا-باخا آیاغیندان باشینا کیمی تیتره‌دییی دویولوردو. قادینین گؤزلری، اللری، آیاقلاری جان وئریردی.
پیچیلتی سسی گلیر؛ رفده‌کی کیتابلار پیچیلداشیب آغلاشیرلار.
پنجره‌لردن یاواش-یاواش قارانلیق تؤکولور …

ایشیق ییغیلیب-ییغیلیب بیر دامجی اولموشدو.
هردن یادداشیندا بیتن کؤهنه خاطیره‌لرین، اولوب-کئچن‌لرین کؤکو چاتلاییردی؛ سونرا گؤزلری‌نین او تاییندا بیر قبیر دورولوب آیدینلاشیردی؛ همیشه کیرپیکلری‌نین آرخاسیندا ایدی.
ایسته‌دی گولومسه‌سین، باجارمادی. ایسته‌دی ترپنسین، ترپنه بیلمه‌دی. اؤزوندن گئتمیش کیمی‌ایدی. هر یاتدیغیندا کیمین‌سه گؤزلری دونیانین هاراسیندان‌سا اونون ایچینه زیلله‌نیردی سونرا یوخوسونا قان دامیردی.

یئل نازیک مانتوسونو بدنینه یاپیشدیرمیشدی. یئر دمیرکیمی‌ایدی. اوتلار اؤلو گؤرونوردو. قبیرلر اوسته تک-توک گؤزه ده‌‌ین تر بیتکی‌لردن باشقا هئچ بیر یاشیللیق گؤزه ده‌یمیردی‌. اللری سویوقدان دونارکن گؤزلریندن ایستی یاش بوم-بوز یاناغینا سوزولدو. باشماغی‌لا آیاغی‌نین آلتینداکی قورو اوتلاری ازدی. اوتلار آغریدان خیرچیلدادی.
اوزبه‌اوزونده‌ قویروغو کسیلمیش بیر ایت، قولاقلاری کسیلمیش بالاسی‌نین اویان-بویانینا کئچیردی. آنالیق ایسته‌ییندن ده قاتی، گوجلو بیر حیس‌له، ایستک‌له آغلایاراق بالاسینی یالاییردی. باشینی قالدیریب قادینا باخدی:
-بیر هفته ایدی گؤینه‌یه-گؤینه‌یه بالامی آختاریردیم. آختاریب-آختاریب ایندی‌جه تاپمیشام. قولاقلارینی کسیب‌لر.
گؤزلرینی قادیندان آلیب قبیره باخیر:
-بیر یئره، بئش گؤیه باخیب اؤزونه گله‌سن کئشگه.
قادین گؤزلرینی بیر آنلیق یوموب آچدی. کئچمیشدن بری روحوندا قالان یارالار سئوگی‌نین معناسینی اونون اوچون قارانلیق ائتمیشدی.
قبیر داشی‌نین اوستونه قازیلان شعیری هؤججه‌لدی:
“دئییرم قبری قازان کاش یورولوب بیر دایانایدی
کفنیم گئج یئتیشیردی جسدیم بیر یوبانایدی”
گله‌جه‌یی می آختاریردی، کئچمیشی می، اؤزو ده بیلمیردی. کئچمیش نه قدر اوزاق ایدی‌سا ، گله‌جک ده او قدر اوزاق ایدی.
یاغیش یاغماغا باشلاییر. ایلک داملالار مزارین اوزه‌رینه دامجیلاییر. «گئج» سؤزونون «گ» حرفی ایسلانیر. «دئییرم» سؤزونون «ئ» حرفی ایسلانیر. «یئتیشیردی» سؤزونون «ت» حرفی ایسلانیر.
“گئت”
آیاغا قالخیر؛ آرخاسینی چئویریر: گلمییه‌جم.
ترپنمه‌سه‌ایدی، ساغلیغینا اینانماق مومکون دئییلدی. اولان-قالان جانی گؤزلرینده ایدی. ائله بیل قادین اؤز ایچیندن چیخیب، کئچمیشلرده قالمیشدی.
الیمی ائهمالجا قارنیندا گزدیریرم: او، آلابزه‌ک ایشیغین ایچینده‌دی. او، آنادان بیر ده اولاجاق. دونیا اونو تزه‌دن دوغور.
قادینین باشی اییلدی، اوزو ساچلاری‌نین ایچینده گؤرونمز اولدو. سونرا باشینی قالدیردی؛ ساچلاری‌نین آراسیندان بیر اوووج ایشیق کیمی گؤرونن اوزو گؤیه چالدی:” من اوشاق ایسته‌میرم.”
آلنیندان تر دامجیلاری تؤکولوب گئدیردی. ائله بیل، اریییب سویا دؤنوردو. قادینین جانی سوزوله-سوزوله یوخاری قالخیردی. روحو جان وئریردی.
-اؤزونو اؤلدورمه‌یی دوشونمه.
الی‌له دونونون اوزه‌رینده‌کی سولموش چیچکلری توپلاییر. گؤزونون اوجوایله شکیله باخیر: سانکی دریسی‌نین آلتیندا یوز-یوز آدام دیشلرینی آغاردیر.
الیمی یاخینلادیب ساردیغیم الینی توتورام … دستمالی قالدیریب یاراسینا باخیرام؛ گئت-گئده بؤیویور. میلچک‌لرین ویزیلتی‌سینی ائشیدیرم …
میلچک قولونا قوندوغو آن الینی قالدیریب چیرپیر یاراسی‌نین اوستونه؛ اوستومه قان سیچراییر. میلچک‌لر دونومون اوزه‌رینده‌کی قانا داراشیرلار. منه ساری اییلیب الینی قالدیرماق ایسته‌دیینده «ایشین اولماسین» دئییرم.
-اؤنجه‌لر هر گئجه‌ یاتماقدان قاباق اؤز-اؤزومه دانیشیب خئیلک آغلاردیم. منی قویمور‌‌ بوردان چیخام آما نه یاخجی کی سن گلیرسن یوخسا باغریم چاتلاردی.
الینی قارنی‌نین اوزه‌رینده ائهمالجا گزدیریر:
-من ایسته‌میردیم، هئچ بیرینی. سنه دئمیشم کی. زورلادی منی …یئنه زورلاییر، چوخ گئجه‌لر.
بارماقلاری قاریشقا کیمی قارنینین اوزه‌رینده دولاشدی. گؤزلری ایچینه هوپدو؛ قارنی‌نین ایچینی گؤردو. کؤرپه سسی ائشیتدی. ایچینده ائله بیل، نئچه اوشاق آغلاشیردی. بو سسی چوخدان ایچینده ائشیدیردی. اوشاق ترپه‌نیردی.
-کئشکه بو میلچک‌لر ایچیمه داراشیردیلار.
سسی بوتؤو دئییلدی، دئشیلمیش کیمی ایدی. جان‌سیز قوللاری دیزلرینی قوجاقلادی.
قاپی آچیلدی. بیر اوشاق آیاقلاری‌نین اوجوندا ایچه‌ری گیردی. گؤزو پیچیلتی‌یا بنزر بیر تیتره‌ییشله تیتره‌شیردی. بیر-ایکی سئری چییین‌لری سیخیلیب آچیلدی. قاپی‌نین آغزیندا دیرناقلاریناجاق تیتره‌یه-تیتره‌یه آغلاییردی. اییلیب ایکیمیزی ده اؤپدو:” آنا …‌ سن هئچ منیم‌له اوینامیرسان …”
اوشاق زاغ-زاغ اسیردی. ایچینه قورخو دومان کیمی چؤکموشدو. گؤزلری‌نین ایچینه‌دک گؤینه‌ییردی.
قادین چؤنوب منه زیلله‌نیر. گؤزلرینده گیله‌لنمیش گؤز یاشی قیرمیزییا چالیر:
-بوندا چوخ آغلامیشدیم. یادیندا؟؟ گئتمیشدیم سالدیرماغا … بونو دا دوغراتدیریردیم آز قالسین. بولارین هئچ بیرینی ایسته‌میردیم ایسته‌میرم ده.
قادینین نفسی قان قوخویوردو.
یوز-یوز ایللر قاباق می یارانمالی ایدی، یوز-یوز ایللر سونرا می؟!تئز می گلمیشدی دونیایا، گئج می؟!
اوشاق اوتاقلارین، پنجره‌لرین، قاپی‌لارین آراسیندا گؤزدن ایتمیشدی.
بارماغینی اوزه‌ریمه سیچرادیغی قانا باتیریب دوداغینا سورتور.
اییلیب اوزومدن اؤپور.
روژی‌نین ایزی گوزگوده قالیر.
میلچکلر گوزگوده‌کی قادینین اوزه‌رینه داراشیرلار.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اونون سسی یوخوسونا دامجیلاییر

سولماز جمالی
www.ishiq.net

آذربایجان ادبیات و اینجه‌صنعت سایتی

اونون سسی یوخوسونا دامجیلاییر

سولماز جمالی
www.ishiq.net

آذربایجان ادبیات و اینجه‌صنعت سایتی

اونون سسی یوخوسونا دامجیلاییر

سولماز جمالی
www.ishiq.net

آذربایجان ادبیات و اینجه‌صنعت سایتی