سیاوش کسرایی
چئویرن: داوود اهری
ترجمه: داوود اهری
داوود اهری

بیر گون، گون‌باتان چاغـی، نوروز عمی ایش‌دن قایـیدیردی کی، کندین اوشاق‌لاری اونو دؤوره‌له‌ییب، دئدیلر:

– نوروز عمی، بیزه بیر ناغـیل سؤیله.

نوروز عمی کی، اوشاق‌لارین سؤزونو یـئره سالماغی سئومزدی بیر آغاج کؤتویونون اوستونده اوتوروب، دینجینی آلا- آلا دئدی:

– یادیما گلیر چوخ ایل‌لر بوندان قاباق، او زامان کی، سیزین آتا و آنالارینـیز اوشاق ایدیلر یاداکی دونیایا گلمه‌میشدیلر- بیر ایل بیر غریبه ایش اوز وئردی:

کندیمیزین قـیشی قورتاردی، آمما هر نه قده‌ر گؤزله‌دیک، یاز گلمه‌دی.

قـیزیل گول داریخـیردی، آمما قؤنچه‌سیندن چـیخا بیلمیردی تا اؤز گؤزه‌ل پالتارینـی هامی‌یا گؤستره.

بولاق دره‌لره تؤکولوب اوخویا بیلمه‌ییردی.

داغلار ایسته‌ییردیلر قارلـی بؤرک‌لرین گؤتورسونلر، آمما ائله‌یه بیلمه‌ییردیلر.

اینک‌لر بیزوولاری ایله، قویون‌لار قوزولاری ایله، و کئچی‌لر چپیش‌لری ایله دار- قارانلـیق تؤیله‌لرده یونجالارین گویرمه‎سینی و یاشیل چمن‌لیک‌لرده گزمه‌یی گؤزله‌ییردیلر. کند اهالی‌سی پنجره‌لردن گؤیه باخـیردیلار، آمما یاز موشتولوقچوسو گتیرن قارانقوش‌دان بیر خبر یوخ ایدی. هامی‌دان آرتـیق ناراحات چوبان اومودعلی ایدی.

اومود علی کند اهالی‌سیندن داها آرتـیق یازین یولونو گؤزله‌ییردی. آرزولایـیردی کی، سوروسونو داغـین یاشیل اتک‌لرینه یایا و توته‎یـی‎نین موسیقی‌سی ایله قـیرمیزی لاله‌لری داش‌لارین کناریندا بیتیره:

آخـیردا بیر گون اومودعلی قـیش‌دان بـئزدی. یـئریندن قالخـیب، پالتارلارینـی گئـییندی، تاخچادان گولاب شوشه‌سینی گؤتوردو و داغا ساری اوز قویدو…

گئـتدی، گئـتدی و گئـتدی… یـئـتیشدی داغـین دالـیـنا، او یـئره کی، یـئل لرین یوواسی ایدی. گولاب شوشه‌سینی ترپتدی، گولابی سپه‌له‌دی هاوایا و یـئل‌لره دئدی:

– گئدین داغا، چؤله باخـین گؤرون، بلکه یازین موشتولوغونو گتیرن قارانقوشو گؤره بیلدینیز. اونا دئـیین چوخ گئجیکیب.

یـئل‌لر کی، گولابین قوخوسوندان جانلانمیشدیلار، سئوینجک یولا دوشدولر. بولودلاری گؤیون اوزودن کنارا چکیب، گئـتدیلر، گئـتدیلر و بیر مدت اونلاردان بیر خبر اولمادی.

یـئنه هر بیر شئـی ترپنیش‌سیز قالدی‎لار. داغ‌لارین، آغاج‌لارین و آدام‌لارین قولاق‌لاری سس‌ده ایدی.

بیر گون سحر آلا توراندا، اومودعلی‌نین پنجره‌سی آچـیلدی. اومود علی یـئریندن سیچرادی، گؤردو سحر یـئلی یورغون و نفس تؤوشویه- تؤوشویه گلیب کی:

– نه اوتوروب‌سوز، یازین خبرینی گتیرن قارانقوش یولدا قالـیبدی.

– نه اولوبدور؟

– بیر نادینج اوشاق اوخونان ووروب اونون قانادینـی یارالایـیب‌دیر.

اومود علی دوردو، چانتاسینـی گؤتوروب. گئـتدی کند اهالی‌سی‌نین یانـینا و دئدی:

– گئده‌ک، گئـتمه‌سک نه قارانقوش گلر، نه ده یاز.

اومود علی قاباق‌دا و یولداش‌لاری اونون دالـیسیجا یولا دوشدولر.

آز گئـتدیلر، چوخ گئـتدیلر… یـئـتیشدیلر، سحر یـئلی دئـین یـئره گؤردولر قارانقوش بیر داشین اوستونده یاری جان، یورغون- آرغـین دوشوب و سویوق‌دان دونماق حالـیـندادیر. اومود علی قارانقوشو گؤتوردو، یارالارینـی چپیش‌لرین یارالارینـی باغلایان کیمی، اونون یارالانمیش قانادینـی باغلادی.

سونرا بویون شالـینـی قارانقوشا ساریدی و اونو قـیزدیردی.

گئجه‌دن سحره‌دک اومودعلی ایله دوست‌لاری اودون کناریندا نؤوبه ایله قارانقوش‌دان میغایات اولدولار. صاباح صوبح قارانقوشون یاراسی بیتیشدی و توختادی. قارانقوش قانادلارینـی آچدی و اوچدو:

بیر- ایکی دؤنه اونلارین باشی‌نـین اوستونده فیرلاندی.

آدام‎لار قـیشقـیرا- قـیشقـیرا دئـییردیلر:

– قارانقوش! داها گئـت یازی کندیمیزه آپار.

قارانقوش کنده ساری اوچدو. اومود علی ایله یولداش‌‌لاری کنده چاتاندا، قـیش‌دان داها بیر اثر یوخ ایدی. هامی سئوینیردی و هریان بهشت کیمی یام یاشیل ایدی. بولاق ماهنـی اوخویوردو. قـیزیل گول کؤینه‌یی‌نی گؤستریردی. آغاج‌لار اوینایـیردیلار. آیاق توتان قوزولار یاشیل دره‌لرده چمن‌لرده اوتلایـیردیلار.

کند اهالی‌سی قول‌لارینـی چـیرمالایـیب ایشله‌ییردیلر.

هامی چالـیشیردی. یاز ایدی و ایش فصلی ایدی.

اومود علی اؤز- اؤزونه دئدی:

– یاز گلدی، ایندی داها واختـی‌دی.

سورونو قاباغـینا قاتـیب و یوللاندی. بئل باغـیندان توته‎یینی چـیخاریب باشلادی یاز نغمه‌سینی چالماغا.

هر بیر داشین کناریندان بیر لاله، یاواش- یاواش باش قاوزایـیردی. ائله بیل چمن‌لر چـیراغان اولموشدو و هر لاله بیر چـیراق ایدی.

گون‌باتان چاغـئـیدی کی، او بیری قارانقوش‌لار دا یولدان یـئـتیشدیلر. جوت- جوت کندین ائولرینه ساری گئـتدیلر تا اؤزلرینه بیر یووا قورسونلار.

منیم اوشاق‌لاریم! اومودوم وار قارانقوشون قانادینـی سیندیران او نادینج اوشاغـین آدینـی مندن سوروشمایاسیز. نه ائله‌ییم من ده قوجالمیشام، یادیمدان چـیخـیب!

نوروز عمی‌نین ناغـیلـی باشا چاتدی.

اوشاق‌لار سئوینجک بیر به بیر نوروز عمی‌دن ویدالاشیب و مسافر قارانقوش‌لار کیمی کندین ائولرینه گئـتدیلر.

سیاوش کسرایی
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قـیش‌دان سونرا بیزیم کندده

داوود اهری
www.ishiq.net

آذربایجان ادبیات و اینجه‌صنعت سایتی

قـیش‌دان سونرا بیزیم کندده

داوود اهری
www.ishiq.net

آذربایجان ادبیات و اینجه‌صنعت سایتی

قـیش‌دان سونرا بیزیم کندده

داوود اهری
www.ishiq.net

آذربایجان ادبیات و اینجه‌صنعت سایتی