قیسسا پیام زنگیندن یوخودان آییلدیم.چراغی یاندیردیم.پیام بو ایدی:آختارمیشام یوخ ایدی.سن داها آختارما ، یوخدور.
ائشیکده خیاواندا یاغیشین سسی گلیردی.دوواردا آسیلان تابلویا باخدیم.قوجا کیشی ساحلده ائله اوتورموشدی و آی ایشیغیندا، کؤزه‌رن سیگارئت بارماقلارینین آراسیندا دنیزه گؤز دیکمیشدی.شعریمین باشلانیشی ذهنیمده عکس صدا تاپدی: فنا دنیزی نین ساحلینده من هاچانا قدر؟
چوخدان ایدی کی یاغیش یاغمامیشدی و بو یاز یاغیشی دامین شیروانیسیندا بیر آهنگ چالیردی کی روحومو نوازش ائله ییردی.یورقان دؤشه‌گیمی ساهمانلادیم و باشلادیم یوگا ورزشی ائتمه‌یه.باشقا بیر آهنگه احتیاجیم یوخ ایدی.یاغیشین سسی ان گؤزه‌ل موسیقی ایدی.سونرا او قاچاغان دینجلیک سوراغیما گلدی.چراغی سؤندوردوم و یئریمده اوزاندیم.یاغیش ائله یاغیردی.سونرا قوجا کیشی گؤزلریمین اؤنونده جانلاندی.بؤرکی، پالتووی، کت شالواری و الینده کی عصا ایله.آریق، اورتا بوی، چئری گؤزلری ایله کی بیلمه ییردین سنه باخیر یا آیری بیر یئره.
بیر قفه‌ده کی معمولاً آخشام چاغلاری اورایا چای ایچمه‌یه گئده‌رم چوخ واخت اونو گؤره‌رم.دینج اوتوروب، عصا قیچلارینین آراسیندا، سیگارئت دوداغیندا و بیر استکان چای کی ایچیر. کیمسه ایله دانیشماز. یاواش گلیر و یاواش گئدیر. شهرده اونو بیر یئرده گؤرمه میشم. بیر ایکی دفعه دارایی اداره‌سینین قارشیسیندا اونو گؤرموشم کی دووارا سؤیکه‌نیب و سیگارئت چکیر. یئتمیش هشتاد یاشی اولار آمما ساغلامدی. ایلک دؤنه کی اونو گؤردوم اؤز-اؤزومه دئدیم:هیچستان مسافری. نییه اونو بو آد ایلا آدلادیم. مگر یاشادیر؟ بیز هامیمیز مسافریک. هئچ کیمسه‌نین خبری یوخدور، آمما هیچستان او یئرین آدی ایدی کی او انتحار گئجه سینده او باره ده یازیب قویموشدوم…
بیر ایکی دفعه یاخینلیغیمدا اوتوروب. چالیشمیشام اونونلا دانیشام آمما سونرا پئشمان اولموشام. نه باره ده گره‌ک اونونلا دانیشام. او کی اصلاً خیالی یوخدور بیری ایله دانیشا. اؤز دونیاسیندا دینج و آسوده دیر. بیر یونگول کؤلگه کیمی گلیر گئدیر. الینده یوخدور داشی او، کیمسه ایله یوخدور ساواشی او، قیسناماییر کیمسه نی او، سرخوشدور گلستان کیمی.
آخ، یاغیش. بو یاغیش قارا دوشونجه‌لریمی یویور. او سونوجسوز انتحاریمدان سونرا یئنیدن دوغولدوم. داها هیچستانا گئتمه‌یه عجله‌م یوخدور. آمما یوخو منی اورایا یاخینلادیر.ی اتماغا غریبه گؤیلوم واردی. فکر ائله‌ییرم یوخودا یالنیز بیر آددیم اورایا قالیر. یوخو اؤلومون باجیسی‌دیر. گئتمکدن هئچ بیر قورخو یوخومدور. او شئی کی فیکریمی قاتیر گله‌جه‌یین فکری بو گونده لیک یاشاییشدادیر و چتینلیک‌لر و خسته‌لیک‌لر دیر کی سوراغیما گله جکدیر و منی درده و کدره مبتلا ائده جکدیر. آمما اؤزومی راضی ائله‌میشم. بو یاشاییش بودور کی وار. بوتون دلخوشلوق و کدرلری ایله. یاغیش نه گؤزه ل یاغیر. گئت به گئت یوخو گؤزلریمی آلیر…
***
ناهاردان سونرا پارکا گئدیرم. منیم پیادا آددیملادیغیم یئر خلوتدیر. آشاغی-یوخاری گئدیرم. دونن گئجه کی دوشونجه لریمی یادیما سالیرام. قوجا کیشی یادیما دوشور. یوخ! او یالنیز سوژه دئییل. بیز هئچ بیریمیز یازماغا سوژه دئییلیک. بلکه هامیمیز سوژه ایک. من گره‌کمز اونون ایچری دینجلیگین بیر بیرینه وورام. اونون دا منیمله بیر ایشی یوخدور. بیز شهریمیزده و اؤلکه میزده غریبیک. بیز بو دونیادا غریبیک. هیچستاندان کیمسه قاییتماییر کی اؤزو ایله بیزه بیر پیام گتیرسین و اورادا بیر کس یوخدور کی بیز اونا بیر پیام یوللایاق. هر نه وار بورادادیر. دوستوما دونن گئجه کی قیسسا پیامین جوابینی گؤنده ریرم: اگر یورولوبسان قال و اگر ایسته‌سن بیل، بیزیم بوتون حیاتدان لذتیمیز آختاریشدادیر. آختارماق بوتون یاشاییشین معناسی دیر. هئچ زامان آختارما ، یوخدور ، کیشی یه یاراشان دئییل.(۱)
گره ک پارکی ترک ائله‌یم. بیر آزدان سونرا قارقالار پارکین خلوتین اؤز قاریلتیلاری ایلا بیر بیرینه ووراجاقلار. اونلار گلنده من گره ک کی گئده م.
***
آخشام چاغی قفه‌ده اوتورموشدوم. قفه‌چی‌نین حساب میزینین اوستونده داوودی گوللر قویموشدولار. ائله ایلک چاییمی ایچمیشدیم کی هیچستان مسافری گلدی و سس سیز یانیمدا اوتوردو و بیر سیگارئت آلیشدیردی. من ده بیر سیگارئت آلیشدیردیم. سیگارئت‌لریمیزین توستوسی ائله بیل هیچستاندا بیر بیرینه قوووشوردی، آمما بیز هله دیری ایدیک. نه قدر لذٌتلی دیر چای ایچمک.
بیر ژاپنی هایکو یادیما دوشدی:
هئچ بیری دانیشمادی.
نه قوناق و نه ائو صاحبی
و نه ده آغ داوودی لر. (ریوتا)
قالخدیم و قفه‌نی ترک ائله‌دیم.
اهر- ۱۹/۱/۸۸
(۱) گئجه گلن قیسسا پیام و اونون جوابی اصلینده بؤیوک شاعر , فریدون مشیری نین بیر شعرینین بیر بؤلوموندندیر.
