چئویرن: ایشیق
ترجمه: ایشیق
ایشیق

photo0428_001
شماره ۳۳۴
محمد سرافراز قراملکی

“شماره ۳۳۴ به باجه دو” به به ، نه سرین یئل اسیر. آتام همیشه دئیر: مئه یئلی آدامین جانینا تازا روح باغیشلار، مئه یئلی اسیرسه بوغدالار یوکه گئدیب ایچ باغلارلار، مئه یئلی سونبوللرین فراقدان سارالمیش دوداقلارینی بیری – بیرینه یئتیشدیردیگینده اوره‌یه یاتان بیر ماهنی اوخویارلار، منیم یاشاییشدا ان سئودیگیم ماهنی بو ماهنی‌دی.
“شماره ۳۳۴ به باجه سه ” آخی نه جور اولار هله تازا آیدان بئش گون گئچمه‌ییب آلدیغیم حقوقدان ایکی یوز مین قالیر. هله هانی آی سونو ؟ پول‌دا اصلا” برکت قالماییب.
“شماره ۳۳۴ به باجه چهار ” بو ماشینین دا قولون توتورسان قیچی آخساییر. یورولدوم داها خرج قویماقدان؛ دلی شیطان دئییر سات گئتسین؛ آما یوخ، چوخلاری هله بونوندا حسرتین چکیر. نوزوللو پول گؤتورمه‌لی اولسامدا اوستو – باشینا باخمالییام؛ هره آداما بیر سؤز دئییر.
“شماره ۳۳۴ به باجه چهار ” به به، ایندی بیر سرین گؤل اولا، ائله پالتارلی بیر شیرزه ووراسان؛ قوی گؤرک بوغدالاری ییغیشدیرا بیلسک باشیمیز آییلار؟
“شماره ۳۳۴ به باجه دو ” دده وای ننه وای ماشینین دا بیمه‌سی قورتولماق اوزره‌دیر، هله یئددی ایل تخفیف ایله گینه ان آزیندان دؤرد یوز مین ده اونا وئرمه‌لییم؛ دئییرم آخی مگر دوه‌نین بیری نئچه‌دی ؟ اوغلان من نه بیلیم نئچه‌دی، گینه قویون اولسایدی دئیردیم، دوه – قویون – آدام – بادام … .
“شماره ۳۳۴ به باجه سه”. “پیکان حرکت ائله”! وای دده ایندی پلیس جریمه‌نی یاپیشدیردی؛ یوخ بابا من نه کؤرپو قاباغیندا، نه ده “توقف ممنوع” دا ساخلامیشام، آمما یازدی – یازدی دا کیم – کیمه‌دی؟
“شماره ۳۳۴ به باجه چهار” مین دانا واسیطه ایله اوچ میلیون ازدواج وامی گؤتور، اونودا نه قده‌ر اؤده‌ییرم ائله ایکی میلیون ایکی یوزمین ده دایانیب کی دایانیب. ایت کیمی بالالاییر، هردن دئییرم کاش اصلا” وام آلتینا گیرمه‌ییدیم.
– یازیق یورولوب ها.
– یوخ بابا نه یورولوب، فیکری راحاتدی، سرین کولکرین آلتیندا یاتیب حال ائله‌ییر.
– پوللو فیکیرلی اولار، هر بیر فرصتدن ایستیفاده ائلر، باخما سنه – منه!
– ائله بیل داش‌دی دوشوب بئناوا، باخ گؤر الینده‌کی نومره نئچه‌دی؟
– قوی گؤروم اووووچ یووووز اوتوز یئددی‌دی.
– بوراخ بابا قوی یاتسین، اونون سیراسی چوخدان گئچیب. اوچ یوز اللی آلتی نومره‌نی ایندی سسله‌دی.
– آی قارداش، آی بالا، یوخ ائله بیل خالاسینین ائویدی، هله خورولداییر دا.
– آ(قا)ی نیازی گؤر بونو تانییرسان؟
– قوی گؤروم، یوخ تانیمیرام، اویاندیر دورسون گؤراخ.
– آی بالا نؤکرین اولوم، دور گؤراخ ساحات ایکی دیر ها. بانکی باغلاییروق.
بیر آغیر ال چینیمی سیخدی. دیک دوروب: هه؟ بلی؟ سن آللاه جناب سروان، یازما گلدیم –دئیه، قاپییا ساری قاچدیم. بانکین ایشچیسی”آی قارداش هارا گئدیرسن ؟ بو دا تازا مدل سریمک‌دی ؟ ” دئدی.
بیر آن اؤزومه گلیب یاری یولدان قاییدارکن : “شماره نئچه گئدیب”؟ سوروشدوم . بیر کوت – شالوارلی الینده بیر لیوان سوایله منه یاخینلاشیب، سو تعاریف ائلییندن سونرا “آغا سیز چوخدان یاتمیسیز بورا بانک دی، ایشینیز نه دیر؟ “سوروشدو، “هه ؛ بلی گلمیشم ازدواج وامی وئره‌م “- دئدیم. اولسون پولونو وئر آی نیازی پرداخت ائله‌سین. آی نیازی دا نئینمک آغانی یولا سال گئتسین.
– چشم آ(قا)ی رییس
– آ تئز اول پولونو وئر
او جیب – بو جیب پولدان خبر یوخدو
اوجا سسله باغیردیم: آی وای پوللاریمی ووروبلار.
بانک‌ین ایشچیسی “گؤردوز دئدیم بو دا تازا مدل‌دی؟ جماعت بئکاردی واللاه ” دئدی.
ساللان – بوللان یئرینه ایشیین اوشاغ کیمی باشیمی آشاغی سالیب بانک دان چیخدیم.
واه – واه هاوا نه ایستی دی. باشیمی قاوزایان لحظه “راهنمایی” نئیسانی دا ماشینیمین قاباغین قاوزایاراق سوروتلیه – سوروتلیه آپاریردی .
۳-۴-۹۳

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

شماره ۳۳۴ / محمد سرافراز قراملکی

ایشیق
www.ishiq.net

آذربایجان ادبیات و اینجه‌صنعت سایتی

شماره ۳۳۴ / محمد سرافراز قراملکی

ایشیق
www.ishiq.net

آذربایجان ادبیات و اینجه‌صنعت سایتی

شماره ۳۳۴ / محمد سرافراز قراملکی

ایشیق
www.ishiq.net

آذربایجان ادبیات و اینجه‌صنعت سایتی