چئویرن: ایشیق
ترجمه: ایشیق
ایشیق

قیسقانجلیق
ویلیام فاکنر
چئویرن: علی شرین

– یئنه ده توخویورسان؟
قادین باشینی قالدیردی, اونون هامار دییرمان صیفتی واردی.. ملایم قونور گؤزلری آنی اولاراق اری‎نین باخیشلاری ایله راستلاشدی. تئز ده گؤزلرینی اوندان چکدی و باشینی آشاغی سالیب اوز ایشی ایله مشغول اولماغا باشلادی.
– گؤردویون کیمی عزیزیم.
– ائله هئی توخویورسان! اؤزونه باشقا بیر مشغولیت تاپسان آ.
قادین کؤکسونو اؤتوردو. جاواب وئرمه‎دی.
– نییه دینمیرسن, هه؟ – اری ال چکمه‎دی-یوخسا دیلین- آغزین قورویوب.
– آخی سن اؤزون, تونیو تاپشیردین کی, یوخاری ‎دا اؤز اوتاغیم دئییل, بوردا اوتوروم- قادین باشینی قالدیرمادان جاواب وئردی.
– پاه! بوردا بیر آوارایا پول وئریب خانیم کیمی بوردا ایله‎شدیریم. اودا لاققیرتی وورسون, هه؟

یاغا بولانمیش اؤنلوک تافان اؤز ایشی‎نین ماهر اوستاسی اوجابویلو گنج اوفی‎سیبانت اونلارا یاناشیب حاق- حساب قبضینی و بئش دولارلیق کاغیذ پولو اوستولون اوستونه قویدو. قادین پولون اونا اوزاتدی و بیر آنلیغا باخیشلاری اونون اؤزونده ایلیشیب قالدی. اوفی‎سیانت ساکت باخیشلا اونون ارینی سوزدو. اونون باخیشیندا استهزالی بیر تبسّوم پارلاییب, تئزده یوخ اولدو. ارینین اوستول اوزه‎رینده اوزانیقلی الی بی‎اختیار دویونلندی. او نسه تعجّوب‎لو بیر شئیی ایلک دفعه گؤرورموش کیمی بارماقلاری‎نین گرگین‎لیکدن آغارمیش سوموک‎لرینه باخدی و دوداق آلتی سؤیوش سؤیدو. قادین باشینی قالدیردی و سویوق باخیشلارلا اونو سوزدو.

– آخماق اولما آنتونیو.
آنتونیو اؤزونو قیشقیرماقدان گوجله ساخلاییردی.
– بو هله چوخ داوام ائده‎جک؟
– بونو من سندن سوروشمالی‎یام. هله آجیغینی مندن چوخلو چیخاجاقسان؟
– سنین, سنین بو ریاکارلیغین … او, حددت‎له پیچیلدادی. اونون خیردا گؤزلری غضب‎دن آلیشیب یانیردی.  قادین سکسکه‎لی حالدا اطرافینا گؤز گزدیریردی.
– یاواش- دئدی- جاماعات باخیر. آخی مندن نه ایسته‎ییرسن؟ بلکه یوخاری قالخیم, هه؟
ارینین صیفتی واهیمه‎لی ایفاده آلمیشدی.
یوخ! – اودا اؤزونو ساخلایا بیلمه‎یرک قیشقیردی. درحال‌دا سسینی آلچالدیب داوام ائتدی.
– داها من دؤزه بیلمیرم, ائشیدیرسنمی؟
او سسینی بیرآزدا آلچالدیب پیچیلتی‎یا کئچدی. – واللاه اؤلدوره‎رم سنی.
قادین یئنه باشینی آشاغی سالیب توخوماغینا داوام ائتدی.
– حالین هئچ اؤزونده دئییل. گاه دانیشیر, گاه قیشقیریر, گاه‌دا سؤیوش سؤیورسن. آخی نییه؟
– نییه‎سینی سن چوخ گؤزل بیلیرسن.
– من؟ منیم هانسی حرکتیم سنی اؤزونو بئله آپارماغا وادار ائدیر؟
آخی منی سن ندن قیناییرسان؟ مگر من سنه یاخشی عؤمور- گون یولداشی اولمامیشام‎می؟ مگر من سنین بوتون ایستک‎لرینی یئرینه یئتیرمه‎میشم‎می؟ سن اؤزون یاخشی بیلیرسن کی, من هر آخشام بوردا هئچ‌ده اؤز خوشوم‎لا اوتورمورام. سنین بو قیسقانجلیغین آغلینی لاپ الیندن آلیب.
– یاخشی, یاخشی! من سنی خبردار ائله‎دیم. داها هئچ نه دئمه‎یه‎جه‎یم.- او گؤزلرینی اوستول‎دان- اوستولا گزدیردی. اوفی‎سیانت اوز چیرکلی اؤنلویونده قاش- قاباقلی حالدا کیچیک چللک‎لرده‎کی سولغون پالمالارین آراسیندا گؤرونوب یوخ اولدو, تانیش اولمایان تکبّورلو قوناقلار خدمت ائدیر, دایمی مشتری‎لرینین سالامینا قیساجا جاواب وئریردی. یاراشیقلی, اوجا بویلو اوفی‎سیانت اللی و چئویک ترپه‎نیردی. او, نزاکت‎لی و خوش‎رفتار ایدی. آنتونیو ایستر- ایسته‎مز بو گنجین قیوراق, اینجه حرکت‎لرینی اؤزونون یؤندم‎سیز یئریشی ایله مقایسه ائتدی و کینی قایناییب جوشدو. اوفی‎سیانت بیر ده اونلارین اوستولونا یاخین‎لاشدی. زالا گؤز گزدیردی. و آنتونیو هله آروادینا طرف اییلمه‎میش آنی اولاراق باخیشلاری قادینین صیفتینه زیللندی. ائله بو آن آنتونیو اوفی‎سیانتا طرف یئریدی. گؤزلرینه سانکی دومان چؤکموشدو. او اؤز آددیملارینی بئله ائشیتمیر، آیاقلاری دوشه‎مه‎لری حیس ائتمیردی. باشینی آشاغی دیکمیش آروادی ایسه اول‎کی  یئرینده اوتوراراق اوز مشغولیتینده‌ایدی. اوستولون اوستونده, ایچریسینده دیش قوردالایان اولان کیچیک بیر گولدان واردی. آنتونیو اوستولا طرف اییله‎رک- غیر-ی ارادی گولدانی الینه گؤتوردو و بارماقلارینی سیخدی. گولدان خیرچیلدایاراق  پارچا- پارچا اولدو, آغاج دیش قوردالایانلار اطرافا سپه‎لندی. اونون بارماقلاری آراسیندا نازیک- قیرمیزی خط عمله گلدی و بو قیرمیزی خط اوزاناراق الی‎نین آرخا طرفینه کئچدی.

– او سنه نه دئدی؟- سوروشدو.
قادین باشینی قالدیردی. باخیشلاری توققوشدو. قادینین گؤزلری بیردن بؤیودو, سانکی حدقه‎سیندن چیخاجاقدی.
– بورا باخ!- او ساکت طرزده دیللندی- دئیه‎سن سن لاپ آغلینی ایتیرمیسن. دی گؤروم مندن نه ایسته‎ییرسن؟ مگر سن اؤزون منی بوردا اوتورتمادین‎می؟ من کی, بونو سندن خواهش ائتمه‎میشم. من ده نه واخت‎سا بیر گون – دیرریک تاپمالی‎یام, یا یوخ؟ آلتی آی‎دیر کی, گونومو گؤی اسکی‎یه بوکموسن. گئجه- گوندوز زهله‎می تؤکورسن. بوتون بونلارا سون قویولمالی‎دیر, یا یوخ؟ اؤزونو ییغیشدیریب آدام کیمی آپارماسان مندن الینی, ایکی‎سیندن بیرینی سئچ. آنجاق یاددا ساخلا کی, بو آخیرینجی دفعه اولاجاق. من سنه یاخشی عؤمور- گون یولداشی اولموشام. اؤزونو اول‎کی تک آپارسان, بوندان سونرادا اولارام. آنجاق بو گونکو منظره بیر ده تکرار اولسا, داها منیم آدیمی توتما.

آنتونیو چئوریلدی سرخوش و یوخودا گزن آداملار سایاغی کنارا آددیم‎لادی. اوفی‎سیانتین یانیندان اؤترکن معصوم, هم‌ده معناسیز بیر تبسّوم یئنی‎دن اونون حیس‎لرینی جوشدوردو. او باشی‌ایله اوفی‎سیانتا قیساجا ایشاره ائتدی و مطبخ‎دن کئچه‎رک آرخا حیطه چیخدی. اورادا دایانیب گؤزلمه‎یه باشلادی. آرتیق تیتره‎مه‎یینین قارشی‎سینی آلماغا طاقتی چاتمیردی. اوفی‎سیانت اونون آردینجا چیخدی. و داریسقال قارانلیق حیه‎طده چکینمه‎دن اونونلا یاناشی دوردو. او, آنتونیودان هوندوردو. اونون سربست دوروشو دؤیوشوندن اول قیلینج اوینادانین وضعیتینی آندیریردی.
– بورا باخ- آنتونیو دیللندی. اونون سسی تیتره‎ییردی- من هر شئیی بیلیرم. اوردا سیزین آرانیزدا نه اولوب؟
– اونسوز دا هر شئیی بیلیرم. دی گوروم سیزین آرانیزدا نه اولوب؟
– بیزیم آرامیزدا هئچ نه اولماییب. آنجاق بیز ایکیمیز ده بئله حساب ائدیریک کی, سنین باشینا هاوا گلیب.
– چرن‎لمه.
– «چرن‎لمه» سن بونو منه دئییرسن؟ منه چرن‎چی دئییرسن؟
گنج اوفی‎سیانت ایره‎لی شیغیدی. آنتونیو اؤزوندن آسیلی اولمایاراق گئری چکیلدی. قورخاق‎لیغینا گؤره اوره‎یینده اوز- اؤزونه نیفرت اوخودو.
– آخی من بیلمه‎لی‎یم, یا یوخ؟ آز قالیر آغلیمی ایتیرم.
– اونسوزدا آغلینی ایتیرمیسن. بئله اولماسایدی سنین جانینی آلاردیم. بورا باخ ائی موردار دونوز, بیل کی, بیزیم آرامیزدا هئچ بیر شئی یوخدور. بونا آند ایچه بیله‎رم. آنجاق قادینا یازیغیم گلیر. من سنین باشینین اوستونده اونا نه دئدیم کی, سن ائشیتمه‎یه‎سن؟ اگر او قادین کیمیسه اؤزونه جلب ائدیرسه, هر حالدا او آدام من دئییلم. بونو اونا گؤره دئییرم کی, منیم اونا یازیغیم گلیر. هر گون سنین کیمی‎سینین شیلتاقلیغینا دؤز‎ن باشقا بیر قادینادا منیم یازیغیم گلردی.
– ائله ایندی‎جه سن اونا نه دئدین؟
گنج اوفی‎سیانت اونون صیفتینه بیر سیلله چکدی. آنتونیو دال- دالی چکیلدی.
– من سنی اؤلدوره‎رم!- دئیه باغیردی.
– باجارمازسان, – دئیه اوفی‎سیانت دیللندی. – سن منی یالنیز نامردجه‎سینه اؤلدوره بیلرسن. بس اوندا سنین باره‎نده نه دوشونرلر؟ آروادین سنی نامرد آدلاندیرسا خوشونا گلرمی؟ ایت اوغلو- ایت!

تک قالمیش آنتونیو اوره‎یینی سویوق دیوارا سؤیکه‎دی. او چتین نفس آلیردی. اؤز حیرص- حیلله‎سینه گؤره قورخاق‎لیغینا و کین- کودوره‎تینه گؤره اؤزونه نیفرت یاغدیریردی. بو حقیقت ایدی. اوفی‎سیانت اؤلدوره بیلمزدی. او باشینی قالدیردی و بو داریسقال حیط اوزه‎رینده سانکی محکم ایپک کیمی تاریم چکیلمیش اولدوزلو سمایا باخدی. اولدوزلار اوشاقلیغیندان اوزاق سیجیلی‎یادا گؤردویو همین اولدوزلاردی. اوندا او, بالاجا بیر اوغلان اوشاغی ایدی و حیات ساده, گؤزل و قایغی‎سیز ایدی.
اؤلدوره بیلمز! اولوم فیکری اونو هئچ راحات بوراخمیر. آنجاق او بیلیردی کی, داها اوندان سونرا آروادینین اوزونه باخا بیلمز. بیلیردی کی, آتا اوجاغیندان اونا یئنی‎جه پناه گتیرمیش اونون اوچون بوتون دونیادا حیاتین اؤزوندن بئله قیمت‎لی اولان بو قادین – اونون اوجباتیندان کی, بو حادثه باش وئره‎جکدی- اونو هئچ واخت باغیشلاماز. آنتونیو. آرتیق یاشا دولدوغو, کیفیرلشدییی و کؤکلدییی حالدا, او هله جاوان و خوشا گلیم‎لی ایدی.

آنتونیو کیمی باشقا کیشی‎لرین ده اونا مئیل گؤسترمه‎سی مگر تعجّوب‎لودورمو؟ مگر تعجّوب‎لودور کی, کیشی‎لر گؤزلرینی اونون اسمر صیفتینه قیرمیزی دوداقلارینا, شه‌وه کیمی قاپ- قارا ساچلارینا زیلله‎ییرلر؟ بس او؟ اونلارین دقتینی جلب ائتمک اوچون بیر شئی ائدیرمی؟ یوخ! اؤزونون دئدییی کیمی قادین اونا یاخشی عؤمور- گون یولداشی اولموشدو. کؤچوب گئتمک. یگانه چیخیش یولو بودور. اونو باشقا شهره آپارماق.  یئنی شرایطده تانیش اولمایان آداملار آراسیندا داها قایغی‎سیز یاشایا بیلیرلر. او بئله‌ده ائده‎جک. او  یئنی‎دن باشینی قالدیریب یوخاریدا سایریشان, اونون طالعی تک قارما- قاریشیقلی اولان اولدوزلارا باخدی. ترلی دری‎سینده سرین گئجه کوله‎یینین تماسینی حیس ائتدی و کؤکسونو اؤتوردو. آخیر کی, بیر قرارا گلمیشدی. آروادی دئمک اولار کی, راضی‎لاشدی. بو پلانی قادینین والدین‎لری مذاکره ائتدیلر و بئله بیر آددیمین ضروری‎لییینه اونلاری ایناندیردیلار. و یقین کی, قادین هردن بیر اؤز والدین‎لرینه ارینین گئت- گئده آرتان بو قیسقانجلیغی و حیرصی- حیگگه‎سی باره‎ده معلومات وئریرمیش. اودور کی, بو قرار او قد‎ر‌ده والدین‎لرینی تعجّوب‎لندیرمه‎دی. عمومیت‎له اونلار آنتونیونو آغیللی حساب ائدیردیلر. سارسیدیجی قیسقانجلیق خسته‎لییینه توتولانادک ایسه اونا حتّا خوش‎رفتار, سؤزله یاخشی ار کیمی کی, اونون هر بیر فیکرینه شریک اولور. دئدیکلری ایله راضیلاشدیلار. بو قرارا گلدیکدن سونرا آنتونیو اؤزونو یاخشی آپارماغا باشلادی. ایشلری او قد‎ر روان گئدیردی کی, او حتّا قرارینی دییشمه‎یه بئله حاضردی, لاکین آروادی فیکریندن دؤنمزدی. رئستورانی ساتماق فیکری اورتایا چیخدیقدا همین او اوجابویلو گنج اوفی‎سیانت اونو آلماغا حاضر اولدوغونو بیلدیردی. آنتونیو ایله اونون آراسیندا مناسبت هله‌ده گرگین ایدی. آنتونیو هر وجهله اوندان چکینیردی. اونلار قییمت مسله‎سینده راضیلاشما اوچون بیر- بیری ایله اونسیته گیرمک مجبوریتینده قالدیقدا. مشتری اؤزونو ائله آپاردی کی, سانکی هئچ نه اولمامیشدی. اونون آقایانا گولوشوم همین‎کی گولوشویدو. اونون بو گولوشو, توتغون صیفتینده دیش‎لرینین پاریلتیسی آنتونیونو تب‎دن چیخاردی. اؤزونون دوشوندویو کیمی, سؤنوب اؤله‎زیمیش کین و قورخو حیسّی یئنی‎دن آلوولانیردی.

بو دفعه اوفی‎سیانت اول‎کیندن ده ملایم و نزاکت‎لی ایدی. او سینیورا وداع هدیه‎سی باغیشلاماق فیکرینده اولدوغونو, بیلدیردی و بو فیکیرده ائله نزاکت‎له عنادکارلیق گؤستریردی کی, اونلار امتناع ائده‌ بیلمیردیلر. نهایت، گون‌اورتا آنتونیو ایله اوفی‎سیانت هدیه سئچیب آلماق اوچون شهره چیخدیلار. جاوان اوغلان بیر دوزوم بوللور مونجوق و یا مئدالیون هدیه ائتمک ایسته‌ییردی. بو جور شئی‌لر ساتیلان آنتیک‌وار ماغازاسینا داخیل اولدولار. پیش‌تاختا اوزه‌رینده اوست- اوسته قالاق- قالاق شکیل، گولدان، اویونجاق، قادین زینت شئی‌ٌلری، تونج اشیالار و قدیم سیلاحلار ییغیلمیشدی. اوفی‎سیانت نظرده توتدوغو شئی‌لری گؤتور- قوی ائدیب آلماق ایسته‌دییی مدتده آنتونیو ساکیت‌جه کناردا دورموشدو. آلیجی پنجره‌نین یانیندا دایانمیشدی. یوخاری قالخمیش الیندن مونجوغون ساپی ساللانیردی. باشی قاریشیق اولان اوفیسیانتین مدافعه‌سیز اولدوغونو آنتونیو ایندی درک ائتدی و ایلک دفعه ایکی‌لیکده بیر اوتاق‌دا اولدوقلاری بیر آندا اونو سانکی یوخودان آییلتدی. رقیبی‌نین حیاتی ایندی اونون الینده ایدی. همین آنداجا اونون الی بی‌اختیار پیش‌تاختا اوزه‌رینده اوست- اوسته ییغیلمیش جیر- جیندیر آراسیندا مناسب سیلاح آختارماغا باشلادی. لاکین داخیلینده هانسی بیر قووه‌سی اونون بئینینده‌کی بو آنی فیکیردن داشینماغا سؤوق ائدیردی. آخی هر شئی یولونا قویولموشدو. صاباح او بو شهردن کؤچوب گئده‌جک و بو آدامی بیر داها گؤرمه‌یه‌جکدی. یوخ، آشنا، دئمزسن‌می آلداتدیم؟

آنتونیو اله چوخ راحات یاتان بو قدیم تاپانچاسینین اصل اؤلوم ساچان بیر آلت اولدوغونو خیالیندان کئچیردی- باخ بئله- و آغیر- آغیر تاریخین پاسلی یادگارینی الینه آلدی. باش‌بارماغی ایله چاخماغی آیاغا چکدی و تاپانچاسی‎نین اوتوز ایلده ترپنمه‌ین یایی محکم سیخیلماغا باشلادی. «باخ بئله»! – دئیه آنتونیو اونون نییتیندن خبرسیز اولان، اول‌لر بیر دفعه اؤلدورمک ایسته‌دییی اوفی‎سیانتی نیشان آلاراق اؤز- اؤزونه پیچیلدادی. و تتییی چکدی. کیچیک اوتاغی گورولتو بورودو. لوله‌دن آلوو ایلدیریم کیمی باییرا شیغیدی. گنج اوفی‎سیانت اولجه شوشه وازلارلا و قدح‌لرله دولو اولان پیش‌تاختانین اوزه‌رینه سریلدی، سونرا ایسه سوروشوب دوشمه‌یه دوشدو. الینده داغیلمیش سیلاح اولان، دایانیب پولیس گلنه‌دک قیشقیران آنتونیونون سسی اوتاغی باشینا گؤتورموشدو.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قیسقانجلیق / ویلیام فاکنر

ایشیق
www.ishiq.net

آذربایجان ادبیات و اینجه‌صنعت سایتی

قیسقانجلیق / ویلیام فاکنر

ایشیق
www.ishiq.net

آذربایجان ادبیات و اینجه‌صنعت سایتی

قیسقانجلیق / ویلیام فاکنر

ایشیق
www.ishiq.net

آذربایجان ادبیات و اینجه‌صنعت سایتی