خوروزون ایلکین بانی‌یلا توی مجلیسی پوزولدو. چالقیچی‌لار، اوخویوب – اوینایانلار، گلن بوتون قوناق‌لار بیر آندا گؤز اؤنوندن یوخ اولدولار. سیاره‌نین دوداغیندا گولوش سولموشسا دا، هه‌له ده یئدی لئره بویون باغی‌نین ایکی باشیندان یاپیشیب الینده ساخلامیشدی. او شاشقین باخیشلاری‌یلا آغ گئییملی گلینینی آختاریردی. بو عبث چالیشیقدا خوروزون ایکینجی بانینی دا ائشیتدی. سسه دوغرو دؤندو. قارا بویالی هیبتلی بیر خوروز ایواندا دیک دایانمیشدی. دیکسیندی. یوخودان آییلدی. ندنسه اوره‌یی سیخیلدی: «خئیر‌دی اینشاالله!»- دئیه، آیاغا قالخدی. چادیراسین باشینا سالیب حیطه چیخدی. دان یئری یئنیجه قیزارمیشدی. خوروز ایواندا دایانمیشدی، آمما قارا خوروز دئییلدی؛ اؤز خوروزلاری‌ایدی. هامی‌دان تئز آییلماسیندان مغرور اولان کیمی، سینه گریب اوچونجو بانینا حاضیرلاشیردی. سیاره آجی باخیشی‌یلا خوروزو سوزدو: «لال اولاسان!»- دئیه، چادیراسی‌نین اوجویلا اونو کیشله‌دی. حووضون قیراغیندا دستماز آلماغا اوتوردو: « …. بئی‌لیک پالتاریندا نئجه ده یاراشیقلی‌دی! قارا کت – شالوار، آغ کؤینک؛ لاپ اعیان بالاسی کیمی! قادان اوره‌ییمه داوود! رحمتلیک دده‌سینه چکیل اویانا دئمه‌ییب. قارا بیغ، قارا قاش- گؤز. لاپ اؤزویدو. قوربان اولوم حمیده‌یه! لال اولموش خوروز قویمادی اقللیکم بویونباغینی بوینونا تاخام….» قاپی‌نین حزین ناله‌سیندن اوتاغا قاییتماسین دویوب ، اؤز – اؤزونه دؤشوندو: «گؤره‌سن مسح چکدیم؟! الله‌اکبر، به منیم هوشوم هاردادی؟»- دئیه، دستمازین تازالاماق اوچون حیطه قاییتدی. یازین سرین کوله‌یی سولغون یاناقلارین اوخشادی. خوروز گوناهکار کیمی حیطین کونجونده سوسوب دایانمیشدی. سیاره دستماز آلیب یئنی‌دن اوتاغا قاییتدی. جانامازین سردیکده قیزین سسله‌دی: «آی قیز نرگیز، دور بالا! بو گون جومه آخشامی‌دی، گؤروش گونودو. دور ال- آیاغ ائله. دور قوربان کسیم! دور ساماوارا اود سال!»
***
دونن ایکیندی چاغی، سیاره حیطده بئجرتدییی مؤوون یارپاقلاریندان بیر دولو سله درمیشدی. گئجه بویو دولمانین دن – دوشونو حاضیرلامیشدی. سونرا نرگیزله بیرلیکده دولمالاری دولدوروب، قات – قات قابلامایا ییغمیشدی؛ یالنیز دمله‌مه‌سی قالمیشدی.
ایل بایرامیندان بری اونون گؤزلری مؤو آغاجینا تیکیلمیشدی. «…هاچان یارپاق آچاجاق؟! هاچان یارپاقلار دولمالیق اولاجاق؟!…» هر گون یوخودان دورارکن اولجه مؤوو یوخلاردی. آنجاق بو گؤروش داوودا دولما پیشیریب آپارما واختی گلیب چاتمیشدی. اونون اوشاقلیغدان ان چوخ سئودییی یئمه‌یی. – «…لاپ بیر دولو قابلاما پیشیریب آپاراجام. داوود تک دئییل کی، یولداشلای دا وار. اونون اؤزونه ده قوربان اولوم، یولداشلارینا دا…» –
سیاره نامازین قورتاراندا نرگیز چاینیکه چای آتیب، ده‌مه قویوردو. یئنیجه اون دؤرد یاشینا دولموشدو. آتاسی سلیمان اؤلنده دؤرد یاشیندایدی. داوود ایسه او زامان اون ایکی یاشار ایدی. سیاره داوودو دوغاندان سونرا سکگیز ایل اوشاغا قالمامیشدی. «چیله باسیب»- دئمیشدیلر. قایین‌آناسی باشینا چیله سویو تؤکموشدو؛ دعا یازدیرمیشدی؛ نهایت نرگیز بویونا دوشموشدو. نرگیز آتاسی‌نین تکجه لاختا – لاختا قان قوسماسینی خاطیرلایاردی. بو آجی خاطیره همیشه اونون بئینینه کؤلکه سالاردی. سلیمانین خسته‌لییی هامیسی ایکی هفته چکمیشدی. اولجه یئدییینی قایتاریرمیش، سونرا قان قوسماغا باشلامیشدی. پاییزین ملول بیر ایکیندیسینده سلیمانین نگران گؤزلری سیاره‌نین اینجارسیز گؤزلرینه تیکیلی قالمیشدی؛ سیاره‌نین تیترک اللرینی سیخان اللری بوزا دؤنموشدو. او گوندن سیاره قالمیشدی، ایکی صاغیر اوشاق و بیر دونیا نیسگیل!
***
سیاره جانامازین ییغیشدیردی؛ دولما قابلاماسینا آزجا سو تؤکدو. آغیزین قویوب، داشلادی؛ سونرا ده‌مه قویدو. نرگیز سحر یئمه‌یی سوفره‌سینی سالمیشدی. سیاره سوفره‌نین قیراغیندا بارداشین قوردو. نرگیزین ساچلاری چیینلریندن آشیب، شلاله کیمی قول‌لاری اوستونه آخمیشدی. سیاره گؤزونون آلتی‌یلا قیزینی سوزدو. کئچن گؤروشده داوودون دئدییی سؤزو خاطیرلادی: «ننه، نرگیزه جئر – جئهیز حاضیرلاییرسان یا یوخ؟ بویون- صاباح قاپینی کسه‌جک‌لر ها!، ال- ایاغ ائله!» سونرا داوود گولومسه‌‌ییب محبتله نرگیزی سوزموشدو. نرگیز باشین آشاغی سالیب، یاناقلاری کؤز کیمی قیزارمیشدی. سیاره بالالارینا باخیب فرحلنمیشدی. بو گؤروشده داوود اؤزونه یئتیشمیشدی. تمیز پالتار گئیب، باشین سلقه‌ایله دارامیشدی. اونلاری مفتیل دالیندان یوخ، یان اوتاقدا گؤروشدورموشدولر. یالنیز بیر گنج گؤزتچی قاپی‌نین آغیزیندا دایانمیشدی. اون اوچ آیدان سونرا سیاره اوغلونون بوینونا قولونو سالماق امکانی تاپمیشدی. اوغلونو قوجاقلاییب، اونون چوخورا دوشموش گؤزلریندن اؤپموشدو. بو گؤروش سیاره‌نین اوره‌یینده یئنی اومودلر یاراتمیشدی: «یوخ، دئیه‌سن انشاالله بوشلویاجاقلار. کئچن گؤروشلره نیسبت بو یول چوخ یاخشی‌دی. داوودون اؤزو ده دیرچلمیشدی؛ رنگی روفو آچیلمیشدی. آخیرکی بیله‌جئیدیلر بئگوناه‌دی. آخی اوش ده‌نه کیتاب اوخوماغا گؤره کی بیرین ساخلامازلار….!»
قلیان‌آلتی یئییلمیشدی. سوفره‌نی ییغیشدیرمیشدی‌لار. ایندی ایسه ییر- ییغیشیق ائله‌ییردیلر. نرگیز حیطی سوپوروردو، سیاره ایسه اوتاغی.
***
گونش یاییلمیشدی. گؤی دوم – دورو گؤز یاشی کیمی آیدین بیر دنیزه بنزه‌ییردی. یالنیز گون‌باتاردا یئرلشن داغلارین دالیندان بوزلو، قارالی بولوت‌لار آرا – سیرا بویلانیردی. گؤروشه تله‌سن سیاره‌نین الی هئچ بیر ایشه قیزمیردی. ایستهدی بیر ایکی نفر تلسدیریجی مشتری‌لری‌نین پارچاسین بیچسین: «ایندی بیشسم آخشام تیکه‌رم. پیس زاددی. ایکی اوش ده‌فه قاپی‌یا گلیب، الی بوش قاییدیبلار…» دوشوندوکده، پارچالاری قاباغینا تؤکدو. اؤلچولر، یازدیغی ان- بوی‌لار گؤزونون اؤنونده قایناشدی. مئتیرین یئرینه صابینی گؤتوردو، صابین‌ین یئرینه قیچی‌نی. اؤلچوسونده ایسه بیر ایکی یول چاشدی. آنجاق هوشون بیر یئره ییغا بیلمه‌دی: «خلقین پارچاسین کورلارام، قاللام خاطی‌یا …»- دئیه، ییغیشدیردی. سونرا گتیریب بیر چادیرانین قیراغینی چرخله‌مه‌یه باشلادی. فیکری‌نین داغینیقلیغیندان اوچ- دؤرد دؤنه اه‌یری گئتدی. دال با دال خط‌دن چیخیردی. نهایت سارسیلدی؛ حؤصله‌سیزجهسینه چرخه سؤیکندی. ایللر بویو اونون سیرداشی، قولاق یولداشی اولان چرخه. بو چرخ اری‌نین یادیگاری ایدی. سلیمان اؤلندن سونرا اونو دوکاندان ائوه گتیرمیشدی. آیاق چرخی ایدی. سیاره اریندن درزیچیلییی اؤیرنمیشدیرسه ده، آیاق چرخی‌یله ایشله‌مه‌میشدی. آنجاق اونا عادت ائله‌مه‌یی چوخ چکمه‌میشدی. سلیمانا سینیشدییی کیمی اونا دا سینیشمیشدی.گئجه- گوندوزو اونونلا کئچمیشدی. ظارافاتجاسینا اونو «چؤره‌ک آغاجی» آدلاندیراردی. نرگیزین «ننه، بس داوود دادی‌یا مئیوه آلمییاجاقسان؟» سورغوسو اونو اؤزونه گتیردی. یئریندن قالخدی. چادیراسین باشینا سالیب، ائودن چیخدی.
مئیوه‌چی عسگر دایی مئیوه‌نین باهالی واختی سیاره‌نین مئیوه آلماسین گؤردوکده سوروشدو:
– اولمویا مولاقاتا گئده‌جکسن سیاره باجی؟ خیاردان آپار، اهواز خیاری‌دی!
سیاره خیارلاری یوخلادی. عسگر دایی پاکاتی سیاره‌یه طرف اوزاتدی:
– داووددان نه خبر؟
– هله کی بیر خبر یوخدو.
– داریخما! اولسون. الله قادیردی. ایگیدین باشی بلالی اولار.
– داریخمیش نئیلییه‌جئیم عسگر قارداش.
– دوزه‌لر. اوردان دا چیخاجاق. دانیشگاهین دا قورتاراجاق!
اؤزگه بیر مشتری‌نین دوکانا گیرمه‌سی عسگر دایی‌نین سؤزون ییغجاملاشدیردی:
– بعلی دئدیییم سؤز دو .داریخما! منیم دیلیمجهده حالین سوروشارسان.
یول اوستونده پارچا ساتان حاج ائلیاس دا داوودی بهانه ائله‌ییب سیاره‌نی دانیشیغا توتدو. حاج ائلیاس واختی‌یلا سیاره‌نین ایسته‌ین‌لریندن ایدی. تک او یوخ، سلیمان اؤلندن سونرا چوخلاری سیاره‌یه ائلچی یوللامیشدی، آمما سیاره هامیسینا بیر جاواب وئرمیشدی: «اوشاقلاریمی بؤیوده‌جم.» – نه‌یئنن بؤیوده‌جکسن؟» سورغوسونون جاوابیندا دا: «اریمین چرخی‌ایله، الیمین صنعتی‌له.» دئمیشدی. ائله ده اولموشدو. اؤتن اون ایلده سیاره‌نین تیکدییی پالتارلار کاسیبین، دؤلتلی‌نین یاراشیغی اولموشدو. او بو ایشده چوخ شؤهرت قازانمیشدی.
– «… منیم اله‌ییم اله‌نیب، قلبیریم گؤیده فیریلداییر، بو بی‌حیا کیشی هله ده مندن ال چکمیر! …» –
حمیده‌گیلین قاپیسینا گلیب یئتیشنده، یئنی‌دن اؤزونه گلدی. اوره‌یی دؤیونمه‌یه باشلادی. یوخوسو یادینا دوشدو. سیاره یوزلر قیز- گلینه پالتار تیکمیشدی، پالتاری گئیدیریب اونلاری دقتله سوزموشدو، آمما هئچ بیری حمیده کیمین اونون اوره‌یینه یاتمامیشدی. اؤز محله‌لری‌نین اوشاغی‌یدی. گؤزونون قاباغیندا بویا – باشا چاتمیشدی. بونونلا بئله کئچن ایله دک مشتری گؤزویله اونا باخمامیشدی. کئچن ایل حمیده‌یه تیکدییی بایرام دونون اونا گئیدیرنده، اونون گؤزللییی، یاراشیغی سیاره‌نی اووسونلامیشدی. او گوندن بری حمیده‌نی گلین ائله‌مک آرزوسو سیاره‌نین اوره‌یینده یووا سالمیشدی. حمیده ایسه بو حیسسی دویموشدو. اونلارین هر ایکیسی اؤرک‌لرینده درین و گیزلی محبت بسله‌ییردیلر. هاچان کی داوود سیاره‌نین یادینا دوشردی، بیر بهانه‌ایله حمیده‌گیله گئدردی. حمیدهنین آناسی دا قضیه‌دن هئچ بیر خبری اولمادیغی حالدا اونو حؤرمتله قارشیلایاردی. آنجاق ایندی ایسه بیر دویولماز قووه اونو حمیده‌گیلین ائوینه ساری چکمیشدی. قاپینی دؤیدو. حمیده اؤزو قاپی‌یا چیخدی. سیاره حمیدهنین آناسینی سوردو. حمیده «آنام گئدیب بازارا، بویورون ایچری، ایندی گلر!»- دئیه، سیاره‌یه یول آچدی. سیاره‌نین باخیشیندان ساچان سئوگی حمیدهنین قلبین تیترتدی. حیطه کئچدیلر. دایاندیلار. سیاره‌نین باخیشی حمیدهنین گؤزلرینه تیکیلدی. سونرا گؤزدن گیله‌له‌نن یاش کیمی یاناقلاریندان اؤتوب بوینوندا دایاندی. سحر گؤردویو رؤیا گؤزونون اؤنونده جانلاندی. بیر آن بوتون وارلیغی بیر آرزویا چئوریلدی: -«کئشگه یئددی لئره بویونباغی یانیمدا اولایدی!» غیر ارادی بیر حرکتله قوللارینی آچدی؛ حمیده‌نی باغیرینا باسدی. حمیده سیاره‌نین گؤزلریندن آخان یاشین ایستی‌لییین اؤز بوینوندا حیس ائله‌دی:
– نییه آغلاییرسان سیاره خالا؟ نه اولوب؟
– هئش اؤزوم ده بیلمیرم نییه، اوره‌ییم توتولوب.
– به بویون مولاقات گونو دئییل؟ سئوینمک عوضینه آغلاییرسان؟!
– حمیده…!
حمیده سؤزون دالین گؤزله‌‌یه‌رک سیاره‌نین آغلار گؤزونه باخدی.
– حمیده، گل سن ده بیزینن گئده‌ک!
– من ؟!
– هه !
– منی مولاقاتا قویمازلار کی سیاره خالا؛ اوننان کئچنده اوزاقدان باخان نه دئیر؟
یارانان سکوت ایچینده حمیده اؤز- اؤزونه فیکیرلشدی: «کئشگه گئده بیلئیدیم…!» سونرا اؤزون دانلادی: «هاردان معلوم کی داوود دا منی آناسی کیمی سئویر؟…»
سیاره ایسه دوشونوردو: «بوگون حتمن داوودونان حمیده‌یه راجع دانیشاجام. کئشگه او یول دانیشئیدیم. گؤره‌سن بیلیر حمیده نه قده‌ر ایسته‌ملی قیزدیر؟ اولماسا عکسین آپاررام گؤرسه‌ده‌رم.» بیر آن سیاره‌نین دیزلری تیتره‌دی: «اگر بینمه‌سه، اوندا من نئیله‌رم ؟!»
***
گؤروشه گلن‌لر سیرا ایلا دوستاقخانانین ائشیک حیطینده دایانمیشدیلار. کیمیسی قول‌لاری قوینوندا آیاق اوسته فیکره دالمیشدی؛ کیمیسی دیزلرین قوجاقلاییب یئره اوتورموشدو؛ بیریسی‌نین قولتوغوندا بیر بوقچا پالتار، او بیریسی‌نین الینده بیر یئمک باغلیسی، یا دا بیر پاکات مئیوه.
غم – کدر، نیگرانلیق ییغیناقدا دالغالانیردی. گؤزلرده انتظار چیرپینیردی. هاچاندان هاچانا پنجره آچیلدی. پنجره‌نین دالیندا بیر مامور دایانمیشدی. گؤزتچی‌نین اشاره‌سیله آد یازدیرما باشلاندی: گؤروشچولر بیر به بیر مامورین یانینا گئدیر، اؤز زندانی‌لری‌نین آدین آپاریردیلار. مامور دقتله اونلارین سجیللی‌لرین یوخلاییر، سونرا گتیردیک‌لری شئی‌لری آلیب یانیندا دایانان مامورا وئریردی. بوخچالار آچیلیردی. پالتارلار تؤکولوردو؛ قابلامالار، پاکات‌لار یوخلانیردی. سونرا گؤروشچی‌لره ایچری حیطه کئچمه‌یه اجازه وئریلیردی. سیاره ایسه باغلیسی قوجاغیندا دووار دیبینده اوتوروب، نؤبه‌سین گؤزله‌ییردی. دولما قابلاماسی‌نین ایستیسی اونون سانجیلی قیچلاریندا بیر نوع توختاقلیق یارادیردی.
بوگون سحر آچاندان قارا بولودلار داغین دالیندان آغناییر، ایره‌لی‌ییردیلر. گونش ایسه بولودلارین دالینا گیریب چیخیردی. گئتدیکجه هاوا توتولوردو. ندنسه سیاره‌نین اوره‌یی چیرپینیردی.گاهدان بالاسینی ایتیرمیش جئیران کیمی او تای بو تایا بویلانیردی. نهایت گؤزله‌مه سونا چاتدی. سیاره نرگیزله بیرلیکده پنجره‌یه یاناشدیلار: «داوود یونسی»- دئیه، سجیللی‌لرینی مامورا طرف اوزاتدی. مامور الین سجیللی‌لری آلماغا اوزاتدیقدا بیر لحظه دونوخدو: «داوود یونسی؟! ننه، اونو بوردان آپاریبلار.»- دئیه، سیاره‌نین الینده تیتره‌ین سجیللینی آلماقدان چکیندی.
– آپاریبلار؟! هارا، هارا آپاریبلار؟
– هاراسین بیلمیرم. آنجاق بوردان آپارمالارین بیلیرم.
– نئجه یانی بیلمیرسن. بس کیم بیلیر منیم اوشاغیمی هارا آپاریبلار؟
– اونو دا بیلمیرم.
– بیلمیرم ده اولدو سؤز؟ به من هارا گئتمه‌لی‌یم؟
«دئدیم کی بیلمیرم. منیم واختیمی آلما، قوی ایشیمه یئتیشیم!» – دئیه، گؤزتچی‌یه اشاره ائله‌دی:
– گل اوغلان، گل بونو سوووشدور گؤره‌ک!
گؤزتچی سیاره‌نین قولوندان یاپیشیب پنجره‌نین قاباغیندان رد ائله‌مک ایستهدی. سیاره قولونو چکدی.
– چک الیوی! گؤرمورسن مگر سؤز دانیشیرام؟!
گؤزتچی آجیدی: «دئدیم رد اول!» باغیرتیسی‌یلا، سیاره‌نی ایته‌له‌دی. سیاره ییخیلدی. نرگیز دالدان گؤزتچی‌نین پالتاریندان آسلاندی:
– نئیه ائله ائلیرسن اوتانماز؟
گؤزتچی توفنگ دورتمه‌سی‌له نرگیزین سینه‌سینه گوپسه‌دی. خیار پاکاتی نرگیزین الیندن قورتولدو. خیارلار حیطه سپه‌لندی. گؤروشچولر ایچینده همهمه قوزاندی. آلینلار قیریشدی؛ قاش‌لار چاتیلدی؛ گؤزلردن اود پارلادی‌سا، کیمسه‌ده دانیشماغا جسارت اولمادی. آنجاق بیر قوجا کیشی قاباغا گلیب گؤزتچی‌نین قولوندان یاپیشدی:
– اؤزوندن چیخما اوغول؛ کیشی آرواد اوستونه ال آچماز.
– لازیم دئییل منه کیشی‌لیک درسی وئره‌سن. جهنم اول گئت دایان یئرینده!
– مربوط دانیش اوغلان! سن منیم نوه‌م یئرینده‌سن. آغزیوین سؤزون بیل!
-«الله ائله‌مه‌سین من سنین نوه‌ن اولام. یوخسا منی ده او خائن کیمی قودوخلوغا باساردیلار.» – دئیه، گؤزتچی استهزایلا گولدو. قوجانین دیل – دوداغی اسدی، اؤزون ساخلییا بیلمه‌ییب دئدی:
– تلسمه! گئجی تئزی بللی اولار خائن کیمدیر، خادم کیم.
-«آغیزیندان بؤیوک دانیشیرسان قوجا!.» – دئیه، گؤزتچی قوجانی یاخالاییب ایچری آپارماق ایستهدی:
– گل ایچری، سنه دئییم خائن کیمدیر، آخماق کیشی!
قوجانین عائله‌سی بو صحنه‌نی گؤرجک قاباغا گلدی. قوجانی گؤزتچی‌نین الیندن قورتارماغا چالیشیردیلار. سس – سووون قووزانماسیندان ایچری‌دن یوکسک وظیفه‌لی بیر مامور چیخدی:
– نه اولوب، بوردا نه های – کوی‌دی؟
-«بو آغا بیزه خائن آدی قویور.» – دئیه، گؤزتچی جاواب وئردی. مامور قوجانین پاتلئتین سوزدو:
– کیمین مولاقاتینا گلیبسن؟
– نوه‌مین.
– نوه‌ن کیمدی؟
– سارا، سارا احمدی.
-«گئت قوربان اول او آغ سققلیوه! یوخسا وئرردیم آساردیلار سنی! آنجاق دای سنه مولاقات یوخدو!» دئییب، سونرا گؤزتچی‌یه خطابن: «سال ائشیگه بو قانمازی! قوی گئتسین آدام اولسون!» – دئدی.
قوجا -«ائشیگه سالماق لازیم دئییل. اؤزوم گئده‌رم. یوز ایل اونو گؤرمه‌سم ده دؤزه‌رم، آمما بونو بیل کی سیزه یالوارمام.» دئییب، قاپی‌یا ساری گئتدی. یوکسک وظیفه‌لی مامور گؤزتچی‌دن سوروشدو:
– داوود یونسی‌نین مولاقاتچیسی کیمدیر؟
سیاره قاباغا گلیب دئدی:
– منم آغا. آناسی‌یام.
– مگر سنه دئمه‌دیلر اونو بوردان آپاریبلار؟
– هارا آپاریبلار آغا ؟ آخی بس من هارا گئدیم؟ هئچ اولماسا یئرین منه دئیین!
– گئت اوتور گؤزله! دفتره باخیب دئیه‌رم. گئت اوتور!
– خئیر گؤره‌سن آغا. الله بالالاریوی ساخلاسین!
سیاره دووارین دیبینده اوتوردو. گؤزلری‌نین یاشین سیلدی. گؤزلری قیزارمیشدی. نرگیز ایسه خیارلاری ییغیشدیریب چادیراسی‌نین اته‌یینه ییغمیشدی؛ آیاق اوسته دایانیب، بوغازیندا دویونلنمیش قه‌هرله کینلی گؤزلرینی گؤزتچی‌یه تیکمیشدی.
***
قارا بولودلار آغناییب، گؤی اوزونو توتموشدولار. گؤروشچولر بیر به بیر گؤروشلرین بیتیریب، کیمیسی آغلار گؤزله، کیمیسی گولر اوزله قاپی‌دان چیخیب گئدیردیلر. سیاره‌نین حسرتلی گؤزلری اونلاری ایزله‌ییردی. اونجا زامان سانکی دایانیب، لحظه‌لر ایسه اونون اوره‌یین رحمسیزجه‌سینه آیاقلاییب کئچیردیلر. اوچ – دورد دؤنه پنجره‌نین قاباغینا گئدیب سوروشموشدو: «بس دفتره باخمادیلار؟ بس او آغا هارا گئتدی؟» مامور دا -«دؤز! قوی باشلاری آییلسین، باخارلار!» جاواب وئرمیشدی.
گون‌باتاردا هله ده ایلدیریم شاخیردی. قارا بولودلار قات – قات قاتلانیردیلار. ایندی ایسه سونونجو گؤروشچولر قاپی‌دان چیخیردیلار. گؤزتچی قاپینی باغلادی. سیاره‌نین گؤزلری ایچری حیطین قاپیسینا زیللنمیشدی. اوره‌یی اوخلانمیش قوش کیمی چیرپینیردی. نهایت قاپی آچیلدی. یوکسک وظیفه‌لی مامور حیطه چیخدی. سیاره یئریندن قالخیب قاباغا قاچدی. مامور سیاره‌نین قولوندان توتوب دانیشا – دانیشا اونو حیطین ان اوزاق گوشه‌سینه آپاردی. نرگیز اونلارین آردینجا گئتدی. مامور دایاندی. سیاره‌نین قولون بوشلادی. بیر آددیم‌جا اوندان آرا آچدی. اوز به اوز دایاندیلا. یالنیز اوچ – دؤرد کلمه سؤز دانیشیلدی. دولما قابلاماسی سیاره‌نین الیندن اوزولوب، گومبولتویله یئره دوشدو. دیزلری قاتلاندی، یئره چؤکدو. اونون «یا حسین» شئیهه‌سیندن مامورلارین دیزلری تیتره‌دی. گؤیون گورولتوسوندان دام -دووار ترپشدی. شیدیرغی یاغیش سیاره‌نین خرمن اولموش ساچلارین یئره یاپدی.
هله ده شیمشک قارا بولودلاری قیلینجلاییردی…
۱۳۶۴- قیش
نریمان ناظیم
چئویرن: نریمان ناظیم
ترجمه: نریمان ناظیم
سسلندیرن: نریمان ناظیم
- حئکایه
- اوخوماق زامانی: 7 دقیقه
- https://ishiq.net/?p=32817
چاپ
