چئویرن: سحر خیاوی
ترجمه: سحر خیاوی
سحر خیاوی

گؤزلویونو گؤزوندن گؤتوروب، گؤزلرینی قیییب یئنی‌دن متهمه باخدی، تار گؤرسه‌ ده، ایکی مامور آراسیندا اوتورموش، گنج اوغلو ایدی؛ اللرینی دیزلرینین اوستونه قویوب ملولجا اونا ساری باخیردی. او قاضی‌نین اونا کسدییی سون حؤکمونو گوزله‌ییردی!!
یوخ، بو موطلق دوغرو اولا بیلمزدی. اونون تزه درسینی بیتیرمیش اوغلو، کیلومترلر بوردان اوزاقدا، یاد اؤلکه‌ده، پرفئشنال طب اوزه‌ره تحصیل آلیردی!!
قاضی گؤزلوگونو ماسانین اوستونده اولان کاغیذ دستمال ایله سیلیب یئنی‌دن گؤزونه ووردو. قارشیسیندا کی اوغلو یوخ، تقریبن اوغلو یاشدا گنج متهم ایدی، بوینونو چیگنینه قویوب حزینجه اونا ساری باخیردی!!
قاضی‌نین جانینا اوشوتمه گلیب، سویوق تر بورودو. جلسه‌نین سونونو اعلان ائدیب، یئنه سون حؤکمو تاخیره سالدی.
نه منصفه هئیئته، نه ده خانیمینا گؤردویو عجاییب منظره‌دن سؤز آچا بیلمزدی. دادگاه بونو سزسه‌یدی، یقین کی عاغلینین زاوالینا حؤکوم وئریب، اونون قاضی‌لیک صلاحیتینی باطیل ائدردی.
اود ایله سو آراسیندا قالمیشدی. نه‌دن بئله بیر اولای باش وئردیگینی دوشونموردو. کیمسه‌یه ده اونا نه کئچدیگینی سؤیله‌یه بیلمیردی.
نهایت کی منصفه هئیئتی‌نین فیشاری آلتیندا و جلسه‌لرین چوخ اوزاندیغینا اعتیراضلارینا خاطیر، سون امضاءنی ووروب اوغلانین اعدام اولماسینا حؤکوم وئردی.

صاباحیسی گون، آلا- تورانلیقدا، آذان واختی، مامورلار دوستاقین قاپیسینی آچدیلار. قاپینین سسی دوستاقخانانین سحر سسسیزلیگینده بومبا کیمی پارتلادی. اوغلانین اوره‌یینه قان دامدی. اونو آدی ایله سسله‌دیلر. دوستاقخانانین زالیندا کی بیر تالا ایشیق مامورلاردان قاباق ایچری جومدو. گونش و سحر عاشیقی اولان اوغلانین، ایشیغی گؤردوکده، اوره‌یینده عبث بیر اومود فیدانی دیرچلدی. اوزونه بلکه بیر «قورتولوش یولو اولاجاق» اومودو وئردی.
گوزلری قاماشدی. اللرینی گوزلرینه کولگه‌لیک توتدو.  مامورلار اونو ایکی طرفدن حصره سالدیلار. بیری قارا اؤرتوکله گؤزلرینی باغلادی. قوللارینی قانداللادی.
اونو سورویوب ائشیگه چیخارتدیلار. سحرین سویوق یئلی نازیک زیندان پالتاریندان ایلیکلرینه‌دک یئریدی. برک تیتره‌دی. آمما بیر هفته حسرت قالدیغی آزاد هاوانی دویا- سییا ایچینه چکدی.
آااخ.‌.. یاشام نئجه ده دادلی، آزادلیق نئجه ده تورشا- شیرین ایمیش!!
ایندی دار آغاجینین نئچه قدملیگینده نئجه‌ ده یاشامین دادلی اولدوغونو آرتیق  دوشونوردو.
قوللارینی آزاد قوشلار کیمی آچیب، درین بیر گرنشمک کونلوندن کئچدی، قوللارینی دارتاندا، قانداللی اولدوغونو دوشونرکن، حقیقتین نه اولدوغو، آوار کیمی باشینا اوچدو، سان کی بیر قازان قاینار سو باشیندان تؤکولدو. ناچار آیاقلارینی سوروتله‌یه- سوروتله‌یه زیندان حیه‌طینین قومساللیغیندا آددیملادی. آددیملایارکن یاشلی آتا- آناسی، باجیلاری، بیر ده پلان قوردوغو سایسیز آرزولاری، دوستلاری، خاطیره‌لری، بیر سینما پرده‌سی کیمی تئز- تئز گوزلرینین اؤنوندن کئچدی. بلکه دینی درسینده اوخودوغو «تجسّم اعمال» بو ایمیش!!
درین بیر آه چکدی. مامورلار اوزلرینی بیلمه‌مزلیگه وورسالاردا متهمین بو سون آهی، گوزلریندن یایینمادی. تاسوفله باشلارینی بوللادیلار.
متهم آچیق- آیدین اؤلومدن قورخوردو. بونو آلا قارانلیقدا آی کیمی پاریلدایان بنیزیندن، وحشتدن آچیلمیش گوزلریندن سزمک اولاردی. او دار آغاجینا چاتینجا بلکه ده مین دفعه اؤلموشدو، یالنیز کؤلگه‌سی سورونوردو. کیم شیرین جانی‌نین تهلوکه‌یه دوشمه‌سیندن قورخمازدی کی؟!
آرتیق مقصده چاتمیشدیلار. اونو زورولا نئچه پیلله یوخاری بیر سکی‌یه چیخاردیلار. چیخا بیلمیردی. قیچلاری طوفاندا کی فیدانلار کیمی اَسیم- اَسیم اَسیردی.  بیر مامور قولاغینا سون وصیتینی دئه سویله‌دی. تیتره‌ک سس ایله:– منیم سون سوزوم یوخدو، یالنیز تانری وارسا اؤزو سیز ایله منیم آرامدا دوزگون قضاوت ائتسین،– دئدی.
ایپی بوینونا سالدیلار. مامور چارپایینی آیاغینین آلتیندان چکمک اوچون قاضی‌نین سون حؤکمونو گودوردو.
او ساعاتاجا گؤزونه یوخو گئتمه‌ین قاضی اوزو یوخاری متهمه ساری باخدی. داها شوبهه یئری یوخ ایدی، متهم اوغلو ایدی، او گنج اوغلونون اؤلومونه فرمان وئره بیلمزدی. هم ده ها چک- چئویر ائله‌دی، اونون سوچو اعداملیق حددینده دئییلدی.
نه اولور اولسون اؤز- اؤزونه دئدی. بیر ایش گؤرملی‌یم.
سونرا مامورا زنگ ائتدی:
– اعدام حؤکمو لغو اولدو، متهمی آزاد بوراخین…یئنی‌دن محاکمه ائتمک گره‌کیر…
سونرا کائیناتین شاشقین گوزلری قارشیسیندا هؤنکورتو ایله آغلادی.
ائوینه قاییدارکن صینیف یولداشی‌ علی‌نین سؤزو یادینا دوشدو: «سن اینسانی رشته‌سینی یالنیز حقوق رشته‌سینه عاشیق اولدوغونا سبب سئچسن ده، بو اوره‌یی کؤوره‌کلیک الینه ایش وئره‌جک. سن یاخشی قاضی اولا بیلمزسن، قاضی‌نین عاغیلی اوره‌یینه حاکیم اولمالی دیر، سن بیر پارچا اوره‌کسن، عزیز دوستوم»، — دئمیشدی.
آخشام ماذونلوق پالتاریندا،  هله‌لیک  سون شکیلی اولان اوغلو راضلیقلا رمکه‌دن اونا گولومسونوردو.
صاباحیسی نه اولاجاغینی بیلمیردی، بلکه ده اونو ایشدن چیخاراجاقدیلار، اؤنملیسی بو ایدی کی، بیر لَلَک کیمی یونگوله‌میشدی، نئچه آیلاردان سونرا، راحات ویجدانلا، آنادان یئنی دوغولموش اوشاقلار کیمی، دینج باش یاستیغا قویدو و میشیل- میشیل یوخولادی.
او بو ویجدان راحاتلیغینی دونیادا هئچ نه‌ییله دییشمزدی…

*ماذونلوق: فارغ التحصیلی

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ویجدان

سحر خیاوی
www.ishiq.net

آذربایجان ادبیات و اینجه‌صنعت سایتی

ویجدان

سحر خیاوی
www.ishiq.net

آذربایجان ادبیات و اینجه‌صنعت سایتی

ویجدان

سحر خیاوی
www.ishiq.net

آذربایجان ادبیات و اینجه‌صنعت سایتی