سونوندا واکسن سایتی‌نین پنجره‌سی منیم یاشیدلاریمین دا اوزونه آچیلدی. خبری ائشیتمکده سایتدا آد یازدیریب، مدنیت‌لی بیر وطنداش کیمی واکسن ویردیرماغا مراجعه ائده‌جه‌ییم گونو اعلان ائده‌جک‌لرینی گؤزلرکن، آنباشی موبایلیمی کنترل ائدیب، حتی دیابت سایه‌سینده گئجه یاریسی ایکی سفر توالته گئتدییمده بئله سلامت سایتیندان اس. ام. اس گلیب- گلمه‌دیینه باخدیم. صاباحیسی گون خبر گلمه‌یینجه یئنه بیر مدنیت‌لی وطنداش کیمی واکسن ویرماق اوچون سایتدا سئچدیییم بهداشت مرکزینه تلفن آچیب، اس. ام. اس گلمه‌دیینی سؤیله‌دیم. تئلفونا جواب وئرن خانیم، او مرکزده واکسن ویریلمادیغینی، اوسته‌لیک منطقه‌نین بهداشت مرکزلریندن ایکیسینی آد آپاریب، او مرکزلرده واکسن ویردیرا بیله‌جه‌ییمی دئدی. من ایسه یئنه مدنیت‌لی بیر وطنداش کیمی یول- یؤندم گؤرستدییی اوچون خانیمدان تشکر ائدیب، دانیشغی باشا چاتدیردیغیم آن اؤز- اؤزومه دئدیم: «آخی بو قویون صفت‌لیک نه زامان باشیندان چیخاجاق؟ بو مرکزده واکسن ویریلمایان حالدا، سایتدا آدی واکسن ویران مرکزلرین ایچینده اعلان اولدوغو باره‌ده ندن خانیمی سورغو- سوالا چکیب، اوندان جواب ایسته‌مه‌دین!»
آنجاق بئله پئشمانلیق‌لار تویدان سونرا حنا ماجراسینا بنزه‌ر. سلامت سایتیندان گؤندریله‌جک اس. ام. اسی گؤزلمکدن باشقا چاره اولمادیغینی دوشونوب، یئنه بیر مدت اؤز ایشمه مشغول اولوب، آنجاق دفعه‌لرجه موبایلیمی کنترل ائتدیم. سلامت سایتی‌نین اس. ام. اسی خان گلدیدن ده اویانا کئچمیشدی.[بو سؤزون دوغروسونو یازسایدیم گرک یازایدیم شاه گلدیدن ده اویانا گئچمیشدی، سلطنت‌چی ائتیکتینی ده پان‌تورک ائتیکی‌نین یانینا یاپیشدیرماسینلار دئیه، بیلرک خان گلدی یازدیم.]
سایتدا آد یازدیراندا واکسن ویریلمایان بیر مرکزی سئچدیییم اوچون بلکه هئچ اس. ام. اس گلمییه‌جک دئیه دوشوندوم. بلکه ده سلامت مرکزی کهف یوخوسوندان آییلاندان سونرا اس. ام. اس یوللاماق باره‌ده دوشونه‌جک! او زامان یئنه ده تویدان سونراکی حنا ماجراسی و…
سونرا اؤزلویومده دئدیم بوشلا بو مدنی داورانماق اویون بازلیق‌لارینی، در حال دور آیاغا، گئت خانیم آدلارینی دئدییی بهداشت مرکزلرینین بیرینه.
بهداشت مرکزینه یئتیشدییمده حیطه توپلانمیش جماعتی گؤرونجه اومودوموم کسیلیب، آز قالدی گلدیییم یولو گئری دؤنوم. آنجاق نوبت اوچون نومره آلاجاغیمی باشا دوشوب، من ده باشقالاری کیمی نومره‌می آلیب، نوبتیم یئتیشسین دئیه حیطین بیر گوشه‌سینده دایاندیم.
حیط، نه حیط! آددیم باشی آغاج و گول کول‌لاری، آنجاق آغاج‌لارین دیبی ایله گول کول‌لارینین دیبی زیبیل ایله دولو ایدی، رنگ به رنگ نایلون‌لار ایله پلاستیک لیوان، نوشابه قابی، معدنی سو قاب‌لاری، پفک‌دن بوشالمیش پاکاتلار، سیگاردان بوشالمیش قوطولار و… اؤزلویومده دوشوندوم: مثلا کی بهداشت مرکزی دی!!!
کؤلگه‌ده بیر نیمکت بوشالینجا تله‌سیک گئدیب، اوردا أیلشیب، نوبتیمی گؤزله‌دیم. أیلشدیغیم نیمکتین آلتی دا آغاجلار و گول کول‌لارینین دیبیندن قالیجی دئیلدی، رنگ به رنگ نایلون و باشقا زیبیل‌لر دولموشدو نیمکت آلتینا.
بیراز سونرا زیبیل‌لری ییغماق عاغلیمدان کئچئدی. زیبیل‌لرین کرونا کیمی پیس ویروسا بولاشماق احتمالی اولدوغونا گؤره ألجک‌سیز زیبیل ییغماغین دوغرو بیر ایش اولمادیغینی دوشونوب، اؤزومو راضی ائله‌‌ییب، قویون صفت بیر وطنداش کیمی دینمز دانیشماز زیبیل‌لری گؤرمزدن گلدیم. آنجاق او آن ارادی قویون صفت‌لیک و غیرارادی قویون صفت‌لیک فرقلرینی بوتون ایلیک- سومویومله آنلاییب، اوتانجیمدان کیمسه‌نین اوزونه باخمادیم. باخسایدیم، بیلرکدن بیر قویون صفت انسانا چئوریلدییمی باشا دوشرلر دئیه، دوشوندوم.
بیر آن، قویون صفت‌لیکدن مسئولیت‌لی بیر وطن داشا چئوریلمک اوچون ساده بیر چیخیش یولو عاغلیما گلدی. در حال وطنداش- خبرنگار قیلیغینا گیریب، موبایلیم ایله گول کول‌لارینین دیبیندن، نارین داش دؤشه‌مه اوزره توکولموش زیبیل‌لردن عکس سالیب، خبر سایت‌لارینین بیرینه یوللاماغی دوشونورکن باشیمی قالدیریب، دیم- دیک آددیملارلا گئری دؤنوب، یئنه نیمکت اوزره أیلشیب، نوبتیمی گؤزله‌دیم.
دؤرد نفر ایله بیرلیکده منی ده ایچری چاغیردیلار. اوچ اتاقدا واکسن ویریلیردی، بیر اتاقدا وطن مالی دئییلن واکسن، اوبیری اتاقلاردا ایسه چین مالی دئییلن واکسن.
آتا- آنالاریمیز قونشونون تویوغو قاز اولار دئییب‌لر، آنجاق تحریم، کرونا و انسانلارین اینانجلاری یارالاندیغی گونلرده چین تویوغو قرقاوول دادی وئرر دئیینلر ده وار. ائشیتدییمه گؤره قرقاوول حافظه، جنسی گوج و فشاری یوخاری اولانلار اوچون فایدالی ایمیش. سیزجه دیابت و هیپیرتانسیونا مبتلا اولان، اوسته‌لیک یائسه‌لیک دؤورانینی یاشایان بیر یازیچی بو دورومدا نه ائتمه‌لیدیر؟
هانسی اوتاغین سمتینه گئتدییمی اؤزونوز تخمین ویرین. اتاغین قاپیسی آچیق ایدی، بیزلر ایسه نوبتیمیز یئتیشسین دئیه قاپی قاباغیندا صف چکدیک. منیم نوبتیمه بیر نفر قالیردی، بیردن بیره من یاشدا بیر جفت اؤسگورمه‌دن، آسقیرمادان گؤبلک کیمی اؤنومده گؤیردیلر. نوبت اوچون آرخامدا دورماقلارینی اونلارا دئدییمده، خانیم آستا سس ایله پیچیلدادی: «بو کیشی دلی‌سُوو بیریدی، بیراز قاریشیغی وار، گوج‌نن راضی ائله‌میشم واکسن ویرسین، نوبته دورسا پئشمانلار، بیردن گؤردون بورانی آلت- اوست ائله‌دی، سن بیزیم کیشی‌دن سورا واکسن ویرسان قیامت قوپار!»
خانیمین سؤزو منه آغیر گلدی. دئدیم: «تک سیزین کیشی دئییل، بیر ایکی کلمه اویان بویان اولاندا روزوسو کور ملک ألینه دوشموش جماعتین چوخونون دلی اولماق قابلیتی وار، من ده او جماعتدن بیری‌ام، کئچین دورون آرخادا، نوبتیز یئتیشنده ایچری گئدرسیز.»
خانیم داش کیمی دوشدویو یئرده قالسا دا دیلی ساکین قالمادی، دالبادال نوبت‌سیز ایچری کئچمک اوچون ماهانا گتیریب، اصرار ائدیردی. کیشی ایسه طوفان لاخلاتدیغی بیر آغاج کیمی گاه ساغا، گاه سولا مایل اولوب، گاه دا چیین‌لرینی آشاغی- یوخاری اوینادیردی، سانکی چیین‌لرینه ویبره سیستمی یئرلشدیرمیشدیلر. منه ائله گلدی کی کیشی‌نین ایچینده پوسگورمه‌یه حاضیر اولان بیر انرژی قاینایغی وار.
نئچه دقیقه اؤنجه قویون‌صفت بیر وطنداش قیلیغینا گیریب، زیبیل‌لری گؤرمزدن گلدیییم یادیما دوشدو. آنجاق کیشی‌نین احوالاتینی گؤرمزدن گله بیلمزدیم. مدنیت‌لی بیر وطنداش کیمی وجدان عذابی ایچینده بوغولماییم دئیه، خانیما دئدیم: «اؤزونوزو یوروب، رنگ به رنگ ماهانالار توخوماغا چالیشمایین، کیشی‌نیز مندن اؤنجه ایچری گئچیب، واکسن ویرا بیلر.»
کیشی صندل اوزره أیلشیب، کؤینه‌یینین قولونو چیرمالادی. کؤینک قولو دیرسه‌ییندن یوخاری قالخمایینجا پرستار کؤینه‌یین قولونو چیخارتماغی سؤیله‌دی. کیشی ایسه طوفاندا تیتره‌ین آغاجا تای ثابت دورماغا چالیشیرکن دویمه‌لرینی آچیب، کؤینه‌یینی بوتونلوکله چیخاریب، بئلدن یوخاری عریان، بوداق- یارپاغی تؤکولموش آغاج کیمی یئنه صندل اوزره أیلشدی. پرستارین قیافه‌سی پوزولسا دا بیر سؤز دئمه‌دی.
من ایسه در حال برابر وطن‌داشلیق حاقلاری طلب ائدن قیلیغا گیریب، ذهنیمده کیشی‌نین یئرینه بیر قادینی تصوور ائدیب، کیشی‌نین ناتاراز حرکتی قارشیسیندا ساکیت قالان همین بو پرستاری دوشوندوم. بیلمیرسیز بیر ثانیه ایچینده ذهنیمده نه قیامت‌لر قوپدو، پرستار قادینین ناتاراز حرکتینه حیرصله‌نیب، تحقیر دولو صفت‌لری ائتیکت کیمی اؤز جینسیندن اولان بیر انسانین وارلیغینا یاپیشدیردی. ذهنیمده پرستار ایله خیالیمدا یارانمیش خانیمین تارتیشمالارینی تصور ائتدیییم آن پرستار منی ایچری چاغیردی. کیشی صندلدن قالخیب، کؤینه‌یینی گئیینمه‌دن اتاغین گوشه‌سینده‌کی شیری آچیب، أللرینی یویاندان سونرا کؤینه‌یینی گئییب، دویمه‌لرینی دویمه‌لمه‌میش پرستارا ساری گلیب دئدی: «خانیم، من چکرم، ایندی کی واکسن ویردیردیم، بویون چکیم یا چکمه‌ییم؟!»
پرستار تعجب ایله بیر آددیم گئری چکیلیب، دئدی: «بیلمیرم، منیم باشیم چیخماز بئله ایشلردن.»
کیشی قاپییا ساری گئدیرکن آستاجا میزیلداندیم: «گئت چک بالا لای لای… یات قال دالا لای لای»
پرستار ایله کیشی بیر آندا منه ساری دؤنوب دئدیلر: «نمنه؟»
مدنیت‌لی بیر وطنداش قیلیغینا گیریب، دئدیم: «خانم پرستار منیم هم دیابتیم وار، هم ده هیپرتانسیونوم. واکسن ویراندان سونرا داوالاریمی همیشه‌کی کیمی آتیم یوخسا… » ایینه عضله‌مه تاخیلاندا سؤزوم یاریدا قالدی.
صابیرین شعریندن خاطیرلادیغیم مصراع‌لاری میزیلدارکن بهداشتین زیبیل دولو حیطیندن خیابانا چیخدیم.
آچسان گوزونو رنج، مشقت گوره‌جکسن
ملتده غم، امتده کدورت گوره‌جکسن
قیلدیقجا نظر ملته حیرت گوره‌جکسن
چک باشینا یورغانینی، نکبتدن آییلما!
لای لای، بالا، لای لای
یات، قال دالا، لای لای!
بیر لحظه آییلدینسا قوتار جانینی، یوخلا
آت تریاکینی، چک، بابا قلیانینی، یوخلا
اینجیسه ساغین، وئر یئره سول یانینی، یوخلا
ایللرجه شعار ائتدی‌یین عادتدن آییلما
لای لای، بالا، لای لای
یات، قال دالا، لای لای!
آچاری قاپییا سالیب، ائوه گیرنده اؤز- اؤزومه دئدیم: «گؤره‌سن بهداشت حیطی‌نین زیبیل‌لریندن سالدیغیم عکس‌لری خبر سایت‌لارینین بیرینه یوللاییم یوخسا یوللاماییم؟ بهداشت دا یاشادیغیم ماجرانی نئجه؟ یازیم یوخسا یازماییم؟»
۱۴۰۰.۵.۵
