ازیلن‌لر ازیرلر! (بیرینجی بؤلوم)
سولماز جمالی
قوروموش قانین لکه‌سینی شالواریندا گؤردوکده دیزلری بوکولوب گؤزلری قارالدی. گؤزلری‌له داغینیق یاتاغا ساری باخدی. هر آی کیمی یئنه زهله‌سینی آپاران قانین اییرنج ایزینی حیاتی‌نین هر بوجاغیندا گؤروردو. اولجه قورخو سونرا اومیدسیزلیک حیسی بوتون وجودونو بورودو. ملفه‌نی بۆرگه‌له‌ییب حاماما ساری قاچدی.
دراوئرین دیواردان آسیلمیش گوزگوسونون اؤنونده اوتوراراق، ساچلارینی سئشوارلا قورودوردو.
او، گوزگو قاباغیندا اوتوروب، ماهنی اوخویا-اوخویا اوزون زامان توکلرینی دارار، سیغاللایاردی. ایندی ایسه همیشه‌کی قیسا ساچلاری‌نین یئرینی اوزون زیل قارا ساچلاری دولدورموشدو؛ گؤزونو گوزگوده‌کی اوزون ساچلی قادیندان آلا بیلمیردی. گوزگونون اؤنونده ساچلارینی او یان-بو یانا یئلله‌درک آلت پالتارینی دا گئییندی.
کیرپیکلرینه ریمل وورا-وورا گؤزاوجو، دیواردان آسیلمیش شکیله باخدی. اونون اۆزۆنۆن، گؤزلری‌نین اؤزونه ساری دارتیلدیغینی حیس ائتدی. روژونو وورا-وورا اونون باخیشیندان قاچینمادی. بو ایسه کیچیک بیر ایشیق کیمی اونا اومید وئردی. اونونلا گؤز-گؤزه گلمه‌یی بئله خوشلامیردی. زهله‌سینی آپاران شکیلی دیواردان قالدیریب ، گؤزلریندن ائتکیله‌نمه‌سینه ایذین وئرمهدی.
ائوده اولاندا سانکی اؤزو ایله بیرآغیرلیق، بیر گرگینلیک یارادیردی؛ اونا گؤره ده هئچ واخت ائوده اولماسینی ایسته‌میردی.
پنجره‌نی آچیب ائنسیز طاقچانین اوزه‌رینه تؤکدویو چؤرک قیرینتی‌لارینی گؤزدن کئچیردی.
ائوینده بسله‌دییی سئرچه‌لری تؤکدویو چؤره‌یی دنله‌ییب یئییر، بیری ایسه آرتیق دویموش قیراقدا دوراراق توکلرینی دیمدیکله‌ییب تمیزله‌ییردی. ائله اوردا پنجره‌نین ائنسیز طاقچاسیندا اونلار اوچون دمیردن قفس دوزه‌لتمیشدی.
آغاجلاردا یارپاقدان یارپاغا سوزولن یاغیش دامجیلاری بیر آنلیق دا اولسا توتقون هاوانی اونوتدوروب اونو کئفلندیریردی. پنجره‌لردن آغاجلارین اۆزه‌رینه ساچیلان گوجسوز ایشیق، سارالمیش یارپاقلارین اۆزه‌رینه چیله‌نمیش دامجیلاری اینجی کیمی پاریلدادیردی.
گؤزلرینی قارانلیق شه‌هره زیلله‌دییی اوچون اوزونه قونان سه‌رین چیسه‌یین بئله فرقینده دئییلدی. ساچلارینا، کیرپیکلرینه نارین شئه چیله‌نیردی.
یوخاری قاتداکی قونشونون دهشتلی قیشقیرتیسی‌لا دیکسینیب ایکی آددیم گئری سیچرادی. توکلرینی اورپه‌دن او غریبه قیشقیریق‌لار روحونو سیخدی.
سئرچه‌لر باشلارینی قفسین بارماقلیق‌لاری آراسیندان چیخاراراق بیر-بیری‌نین بؤیرونه قیسیلیب گؤی اۆزۆنده اوچوشان قوشلارا زیللنمیشدی‌لر.
بیر ایشیق یانیر. بیر سس ائشیدیلیر، بیریسی قاچیر، قیشقیریر، اومیدسیزله‌نیر.
قولاغینا گلن غریبه سسلردن اۆره‌یی دلیجه‌سینه چیرپینیردی؛ یوخودا بوغولوب نفسی تینجیخیردی. یوخودان آییلان کیمی اولدو. سس‌لری بیر-بیریندن آییرد ائده بیلمه‌دی. گاه بیری‌نین اینیلتیسینی ائشیتدی، گاه ایکی نفرین بیر-بیری‌له دالاشدیقلارینی ساندی، گاه دا بیری‌نین اؤگویوب قوسماغینی باشا دوشدو. بعضن ده بیر سیچانین نه‌یی ایسه چئینه‌دییینی ساندی. یوخوسو اوجسوز-بوجاقسیز قاراباسمالارلا دولو ایدی.
پیچیلتی‌لاری ائشیدیردی. اینسانلارین بارماقلاری اوزه‌رینده یئریمک‌لرینی حیس ائدیردی. گؤزونو ترپتمه‌یه چالیشدی. اونون گؤز قاپاقلاری یاواش-یاواش گاه آچیلیر، گاه یومولوردو. اطرافیندا باش وئره‌نلری دوغرو-دوزگون قاورایا بیلمیردی. اطرافی دومانلی گؤروردو.
پیچیلتی‌لار بیر-بیرینه قاریشمیشدی:
– یوووخ، توکومو کسمهه …آجاام … بولاری ساتاجاقسان … مجبورسان … من اوغرو دییرم … آیاخلاری‌نین سسی گلیر … گلیرلر …
یوخودامی، اویاقلیقدامی ائشیدیردی بو پیچیلتی‌لاری؟! باشقا سس‌لر ده قاریشیردی بو دانیشیقلارا. اینسانلارین زاریلتیسی، اینیلتیسی …
سانکی پیچیلداشانلار دیوارلاردیر، تاوان‌دیر، قاپی، دؤشه‌مه، پنجره‌دیر؛ ائله بیل شهر بوتونلوکله پیچیلداشیردی.
کولک آچیق قالمیش پنجره‌دن ایچری فیسقیریب تای‌لارینی چیرپدی. چاتلایان شوشه‌نین بئله سسینی دویدو.
پیچیلتی‌لار هر دفعه آیری یاندا گزیردی.
گؤزلرینی آچیب هنده‌ورینه باخدی. قارا گیله‌لرینی ساغ سولا ترپتدی.
قیشقیرتی سسی ائشیتدی: کسمهههه …
بیر آن اؤزونو اله آلا بیلمه‌دی. بیر اوشاغین سسی ایدی. گؤزلری هر یئری آختاردی. کاناپه‌لرین اۆستونو، اوتوراجاقلارین آراسینی، اوستونو، یئری، دیواری. آنجاق هئچ کس یوخ ایدی. قبریستان سکوتوْندان باشقا بیر شئی یوخ‌ایدی.
ائوده بیر چیلپاق دیوارلار، بیر ده اؤله‌زیین امما هله ده سؤنمه‌ین شمع ایدی. دیوارا دوشن تنبل پیشییی‌نین کؤلگه‌سینی گؤرر-گؤرمز راحاتلادی. شمعین ایشیغی دا تیتره‌ییب-تیتره‌ییب سؤندو.
بلکه ده پیچیلداشانلار قفسده‌کی سئرچه‌لری، پیشییی ایدی. دؤنوب بیر ده باشینی قیچینا سۆرتن پیشییینه باخدی.
گؤزلرینی یوموب یئنه یاتماق ایسته‌سه ده اوست قاتدان گلن تاپبیلتی، قیشقیرتی، سؤیوش‌لر بونا ایذین وئرمهدی. یوخو گؤزلریندن قاچدی.
یئنه بوتون گونو دالاشان، ووروب سیندیران، های باسیب آغلایان، قهقهه چکیب گولن زیرراما دلی قادین‌دیر دئیه دوشوندو.
قادین، سانکی گاه قیزیشیر، سؤیله‌نیر، دیدیشمه‌یه باشلاییر؛ گاه دا یورولوب ساعاتلارلا بیر کونجده دوشوب قالیردی.
اؤزو ده اونو گؤرمه‌میشدی، آنجاق حاققیندا سؤیله‌نن‌لری ائشیتمیشدی. بؤیرو اوسته اوزانیب یئنه گؤزلرینی یومدو؛ آمما او، کئچن گئجه‌کیندن ده پیس بیر قیزغینلیقلا دئیینمه‌یه، قیشقیرماغا، گاه هده‌له‌ییب، گاه دا یالواراراق دانیشماغا باشلامیشدی.
قولونو قالدیریب میس رنگلی ساعاتینا باخدی. گئجه یاریسینی کئچمیشدی.
– ساعات بیرده ده راحاتچیلیغیمیز یوخدو.
دوداق‌آلتی میزیلدانیب آیاغا قالخدی. ساچلارینی یئلله‌درک دئیینه-دئیینه ایشیق‌لاری یاندیردی. بوینونو اووخالایاراق فیکریندن راضی حالدا اتاقدان چیخدی. بیر گؤز قیرپیمیندا قاپی‌نین آغزینداکی ایشقافی آچیب پالتوسونو، شالینی گؤتوردو. آیاق‌قابی‌لارینی گئیینیب قاپیدان چیخدی. اینینی گئیینه-گئیینه آسانسورا کئچیب اوست قاتین دویمه‌سینی باسدی. روحو سیخیلیر، ایچینده بیر دارالما، گرگینلیک حیس ائله‌ییردی.
زیلی باسمامیشدان، بیرآز دا دیلی آلتدا دئییینیب قیمیلداندی.
قاپی‌نین زنگینی باسدی. بیر نئچه ثانیه گؤزله‌دی، قاپینی آچان اولمادی، دالبادال بارماغینی زنگین دویمه‌سینه باسیب دایاندی. قاپینی آچماغا نیت‌لری اولماسا دا ایچری‌دن گلن سس‌لری ائشیدیردی. قولاغینی قاپییا دایاییب دینله‌دی.
قادینین عارسیز سسینی قاپی‌نین آرخاسیندان دویدو: آچما، گئنه آشاغیداکی موتروفدو … قوی جهنم اولسون … سن ده گیج-گیج باخما صیفه‌تیمه، حئسابیما پول تؤک … دوداقلاریما “ژل” ووردوراجام.
سانکی قاپی‌نین گؤزلویوندن اونا باخاراق دانیشیردی.
آسانسورا کئچیب آلت قاتین دویمه‌سینی باسدی. آسانسورون ساری‌یا چالان گوزگوسونده دوداقلارینا زیلله‌ندی.
قاپی‌نین آچیلماسی‌لا اللرینی دوداقلاریندان چکدی.
اوپئنین اوستونده سپه‌له‌نمیش قوتولارین بیرینی اوزو آشاغی چئویریب ایچینده‌کینی بوشالتدی. “لورازپامی” آییریب ییرغالانا-ییرغالانا آشپازخانایا ساری گئتدی. داوانی آتیب حالداکی کاناپه‌ده اوزاندی. بئینینده‌کی پیچیلتی سسی بیر آن اولسون بئله سوسموردو. ائله بیل باشی‌نین ایچینده نئچه نفر عئینی آندا دانیشیردی.
اوست قاتداکی قادین هله ده نه‌یی ایسه ائوین بو باشیندان او باشینا سورویوردو. گؤزلری‌نین آغیرلیق چؤکموش قاپاقلاری قاپانماغا باشلامیشدی. کاناپه‌ده اوزانیب، هارا سا باخان گؤزلرینی بیر مدت قیرپمادی.
قاتی قارانلیقدا آغیر بیر سس‌سیزلیک شهره چؤکسه ده بو بینادا اینیلده‌مه سسی کسیلمیردی. واحید‌لری‌نین سایی الیندن چیخدیغی بینانین قالابالیغیندا اینسانلارین اینیلتی‌لرینی و چیلغین پیچیلتی‌لارینی ائشیدیردی.
یئنه آیاغا دوروب قاپینی آچدی. دار کوریدورا چیخدی. سالونون ایشیق‌لاری یاندی؛ گؤزلری قاماشدی. گؤزلرینی اوووشدورا-اوووشدورا باشینی آشاغی اییب آلت قاتا ساری باخدی.
سس‌لر ایندی آلت قاتلاردان گلیردی. قاتی قارانلیقدان باشقا هئچ بیر شئی گؤزونه دیمه‌دی.
آسانسورا کئچیب آلت قاتین دویمه‌سینی باسدی.
-اون دوققوزونجو قات
سالوندا گزینیب واحیدلرین قاباغیندا نئچه آنلیق دوردو.
بیر کیشی داواملی اولاراق اؤز باشینا فیرلانیردی. سانکی یئره جیزیلمیش یووارلاق جیزیغین اوزه‌رینده دوزه‌نلی آددیملارلا یئریییردی.
اونون قارا و اوزون کؤلگه‌سی آغ دووارین اوستونه یانسیمیشدی. او، اونا یاخینلاشان قادینا باخمیردی. آمما بیر آنلیغا دایانیب دیوارداکی شکیله باخیب دوروخدو. اوْن قات داها بؤیوموش کؤلگه‌یه دیقت‌له باخیردی. نه قدر باخیردیسا، بیر او قدر باشی قینینا گیریردی.
بیرآز کیشی‌یه باخیب دوردو. کیشی باشقا بیر کؤلگه‌نی اوزون کؤلگه‌‌نین یانیندا گؤردوکده یوماغا دؤندو.
باشینی یانا اییب چیینلرینی آزجا قالدیردی. اونون نه ائله‌دییینی آنلامادیغی اوچون چیینلری‌نین اوستوندن بویلانیب اؤنونده‌کی دیوارا باخدی.
بوردا باشقا سس‌لر ده ائشیدیردی.
ایکی نفر آباژورون ایشیغی آلتیندا سئویشیردی‌لر. پال-پالتارلاری داغینیق شکیلده ائوین هر طرفینده یئره سپه‌له‌نیب گؤزه گیریردی.
قاپی‌نین زیلی دالبادال چالینیردی. کاناپه اوزه‌رینده اوزانمیش چیلپاق قادین یئریندن سیچراییب تله‌سیک پالتارینی گئییندی. قابارلی اللر ائوین قاپیسینی آچان کیشی‌نین کؤکسوندن ایته‌له‌ییب قیپ-قیرمیزی قیزاران دیوارا چیرپدی.
اونون اوتاغا گیرمه‌یی‌له قادین قیشقیریغی عئینی آندا اولدو.
قادین بیر آن ایچینده برق توتموش کیمی یئره چؤکدو. آرخاسینی دیوارا سؤیکه‌ییب یاواش-یاواش دؤشه‌مه‌یه سوروشدو.
قابارلی اللر قادینی بوغماق ایستر کیمی، اوزونلاییب-اوزونلاییب اونون بوینونا دولاندی.
بوغولان آدام سامان چؤپونه ال آتان کیمی قادینین سسی توپوق وورا-وورا بوغازیندان چیخدی : فیکرینی یان یئره وئرمه، من پریودام.
دانیشارکن آغزیندان آغ قوردلار چیخیب گؤزلرینه ساری قیژیلداییردی.
یاناقلاری پؤرتموش، آلنیندا خیردا تر دامجیلاری یارانمیشدی. تله‌سدییی اوچون ترسه گئیدییی پالتاری جیم-جیلاق تر ایدی. جیسمی ساکینلشمک بیلمیردی. اوره‌ییندن نه‌لرین کئچدییینی، هانسی حس‌لرین یاشاندیغینی دیله گتیرمکدن قورخوردو. اونا گؤره ده ایچینده بیر وحشی اویانیردی.
کیشی‌نین اللری قابارلی، اوز-گؤزۆ یانمیش، اوست-باشی تؤکولموش ایدی. اللری ایله اوزونو اؤرتوب ایچین-ایچین آغلاییردی. نبضی او قدر سرعتله ووروردو کی، باخاندا بویون داماریندا نبضین وورماغینی گؤرمک اولوردو. بوتون وجودو سیزیلداییردی.
اییلیب کیشی‌نین گؤزلریندن تؤکولن دردی، کدری اووجونا ییغدی.
اونون دیزلری‌نین بوکولدویونو و یئره اوتوردوغونو گؤردو.
او، هئچ سسینی ده چیخارمادی. آغ-آپباق آغارمیش اوزو مئییت صیفتی ایدی. باشینی اوووجلاری آراسینا آلمیشدی. حیرص و کیندن پارتلاماق درجه‌سینه گلمیش اوره‌یی داش کیمی آغیرلاشاراق کؤکسونو یاریردی.
بیر آنلیغا بئینیندن سوووشدو: آدی منیمدی دادی اؤزگه‌نین.
بیردن ائوین اورتاسیندا اوزانیب دلی کیمی قهقهه چکرک گولمه‌یه باشلادی. بدنی اسیم-اسیم اسیردی.
گولمه‌یینی کسیب اوزاندیغی یئردن اؤزونو قالدیردی؛ آرخاسی ایله قاپییا طرف سوروندو، کوره‌یی دیوارا دینده بیر الی ایله قاپی‌نین توتاجاغیندان توتدو، او بیری الینی ایسه یئره دیره‌ییب قالخماغا چالیشدی.
دؤشه‌مه بیر آندا یاریلدی؛ کیشینی ایچینه سوموروب آلت قاتلارا چیرپدی.
-« دیرناقلا اتین آراسینا گیرن اییله‌نیب چیخار.»
چؤنوب قادینی باشدان آیاغا سوزدو. اۆزۆ قارا کاناپه‌ده ساغ آیاغینی سول آیاغی‌نین اوستونه آشیراراق اوتوروب ساچلاری‌نین اوجونو اوینادیردی. آغ قوردلار باشیندا قیژیلداییردی.
کوریدورا چیخدیغیندا بیری‌نین چارمیخا چکیلدییینی گؤردو. او، او قدر بؤیوک‌ایدی کی باشی تاوانا دییردی. اونون یومولو گؤزلریندن بئله اومیدسیز اولدوغو سئزیلیردی. ترپنمه‌ین دوداقلاری‌نین آراسیندان پیچیلتیسینی دویدو: منی اؤلدورمک ایسته‌ییرلر.
هنده‌ورینه ییغیلان جیرتدان بویدا اینسانلار شالوارلاری‌نین زیپینی آچیب اونون اوزه‌رینه سیدیک ائله‌ییردی‌لر.
اوره‌یی بولاندی. بیرآزدان اونلارین اوستونه قوساجاغینی حیس ائتدی.
بو اونا چوخ هورکودوجو و هم ده تعجب‌لو گلیردی. بارماقلاری‌نین اوزه‌رینده دیوارین دیبینه قیسیلا-قیسیلا اورادان اوزاقلاشدی.
آسانسورا گیریب اون‌سگگیزینجی مرتبه‌نین دویمه‌سینی باسدی.
آسانسوردان چیخدیغیندا هم دیشلرینی قیجییان، هم ده گولومسه‌ین آدامین گؤزلرینی دیوارین بو تاییندان گؤردو. او کاناپه‌ده قویلانیب قهوه ایچه-ایچه درگی اوخویوردو.
اوزوندن چکیلمه‌ین قاشقاباق قورخونج بیر قارا کؤلگه کیمی صیفتینه چؤکموشدو. باشی‌نین ایچینده بیر-بیرینه دولاشمیش زنجیرلر جینگیلده‌ییردی.
او، یاری اوزانمیش بیر حال آلیب، ساغ آیاغینی قالدیراراق میزین اوستونه اوزاتدی. بئله کی آیاق‌قابیسی‌نین اوزون دابانی آز قالدی قوللوقچونون بورنونو ازسین. گؤزلری شوشه کیمی ایفاده‌سیز ایدی.
بورنونو آراق اییی، بیر ده شیرین بیر قوخو چالدی. اوره‌یی بولاندی.
اوزون دیواری‌نین بیری تمامیله پنجره اولدوغو بیر سالوندا ایدی‌لار. قوللوقچو ال-ال اوسته قویوب ایکی قات اولموش، آیاقلارینی جوتله‌ییب، نفسینی ایچری چکمیشدی. قورخوسوندان سارالمیش و یئرینده دونوب قالمیشدی. گؤزو ایسه صاحیبی‌نین یئکه قاشلی قیزیل اوزوگونده ایدی.
اؤزونو اونون آیاقلارینا آتیب یالوارماغا باشلادی. بوینونداکی اوزون زنجیر دورمادان جینگیلده‌دی. یئرده اوزو اوسته یالواراراق قالدی. او، اؤزونو کیچیلتدیکجه، قادین داها سرتله‌شیردی. سویوق و روحسوز باخیشی‌لا ساکیتجه قوللوقچوسونا زیلله‌نیب باخیردی.
بو موددتده بیر تبسم بئله گؤزل قادینین دوداغینا قونمادی.
قادین بیردن-بیره پؤرتدو؛ آنی بیر حرکتله آیاغا قالخیب ماسانین اوزه‌رینده‌کی قاینار سویو قوللوقچونون باشینا اندردی.
آغلاماق هوسینی آرادان قالدیریب، آجی بیر گولوش قوندوردو دوداقلارینا؛ قوللوقچونون یالوارماق شکلینده گؤیده قالان اللرینه باخیردی.
اونون دهشتلی ناله‌سی آز قالا قولاقلاری دئشیردی. اونون اینیلتیسیندن بیر آندا دیوارلارا نارین چاتلاقلار دوشدو.
یئنه آلت قات و یئنه بیر باشقا واحیددن دویولان اینیلتی سسی.
اونو آیاقلاری آلتیندا تاپدالاییب ازیشدیردی. اوستونه آتیلیب یومروقلادی.
دیزینی اونون قارنینا باسیب دیرناقلارینی داها دا درینلره باتیردی. خیریلتیسی ائشیدیلدی. آغزی ایستی قانلا دولدو.
سوموکلری چیخمیش قوجا آروادین اوز-گؤزو دیدیک-دیدیک، چنه‌سی قان ایچینده‌یدی.
ندنسه قه‌هرلندی، گؤزلری یاشاردی. ایچیندن آغلاماق گلیردی. بوتون حسیاتی، بوتون وارلیغی، شعورو کئییمیشدی.
او، یانیندان کئچرکن گؤز ووروب الینده‌کی قیزیل دیشی گؤزونون اؤنونه توتدو.
بیرآز دا اییلیب قولاغینا پیچیلدادی: آج آدامین ایمانی اولماز.
چیمچه‌شر کیمی اؤزونو ییغیب، آزجا دیوارا ساری چکیلدی. پالاز قولاقلاری وار ایدی، اوردو-اوردونا یاپیشمیشدی. بوتون بدنینی ساران گؤزه گؤرونمز زنجیرلر جینگیلده‌ییردی.
او، بیردن-بیره گوده‌لیب-گوده‌لیب بالاجالاندی، خیردالیب-خیردالیب یوخ اولدو.
قاری چتینلیکله آیاغا دوردو؛ کونجده‌کی بئشییی سورویوب شومینه‌نین ایچینه آتدی.
بئشیک چیرتاچیرتلا یانماغا باشلادی.
-بوردا یاتانلار چوخدان منی یاددان چیخاریبلار.
اییلیب یئره تؤکولن دردی، کدری اوووجونا ییغدی.
آسانسورا کئچدی: اون یئددینجی قات.
سیگارین آغزینی کول‌قابی‌نین قیراغینا ووروب، کولونو بوشالتدی. عئینی حالدا گؤزلرینی موبایلدان چکمه‌دی. سیگاری-سیگارا جالایاراق چکیردی. یئنیدن سیگار اوچون الینی قوتویا آتاندا بوش اولدوغونو گؤردو. کول‌قابیندا قالانمیش سیگار کؤتوکلرینه باخاراق بوش قوتونو اووجوندا ازیب بیر بوجاغا آتدی. آلما گؤتوروب خیپپیلدادا-خیپپیلدادا یئمه‌یه باشلادی.
تلگرام کانالیندا قادینلارین اؤزللیکلرینه بیر-بیردقت‌له باخیردی. اونلارین ظاهیری گؤرونوشلری اینجه آیرینتی‌لارینا قدر یازیلمیشدی. بوی‌لاری، کیلولاری، … نئچه ساعاتلیق گؤروشلری‌نین خرجی.
بارماغی‌لا موبایلین صحیفه‌سینه توخونوب سیراداکی قادینین حاققیندا یازیلمیش دئتایلارا باخدی. گؤزلری ایری حرف‌لرله یازیلمیش “ایلک گئجه” سؤزونده قالدی.
قیزین ایلک گئجه‌سینی، قادین دللالی‌لا دانیشدی؛ اونلاری اۆستۆ‌اؤرتۆلۆ هده‌له‌یرک یارین گئجه اوچون قیزلا گؤروشمه‌سینی ایسته‌دی.
قیز اوشاغی‌نین شکیلینی گؤردوکده گؤزلرینده قیغیلجیملار اوینادی. حریص باخیشلاری‌لا اونون یام-یاشیل گؤزلرینی، قیزیلی ساچلارینی سیغاللادی و همن گؤزۆ‌دویماز باخیشلارینی اونون پامبیق کیمی آغ و اینجه بوینونا یؤنلتدی.
اوز-گؤزونو تر باسدیغی اوچون، پودراسی سیلیندییندن قوجالماغا باشلادیغی بیلینن قادینین اللری کیشی‌نین چیینینده گزیردی. اییلیب یاناغیندان اؤپرکن قولاغینا پیچیلدادی: گول آلماغی اونوتما …
سونرا باشینی ده‌ییرمی ماسانین اۆه‌رینده‌کی دوغال گۆللره ساری چئویردی. گوللرین سارالمیش اولدوغوندان، قادینین سون سؤزوندن، اۆزولوب دویغوسوز بیر شکیلده آلیندیقلاری گؤرسه‌نیردی.
قارا پیسپیسالار قادینین یاناغیندان چیخیب بیر-بیر یئره تؤکولوردو.
کیشی قیچلارینی اوزادیب، اوتوراجاغین درینلیینه یاییلدی، یئنه گؤزلرینی یوموب یارین گئجه‌نی دوشونرک قلیانی سوموردو.
قلیانی سومورور، اونون خورولتوسونا قولاق آسیردی. دوداقلارینا قونان شیت گولومسه‌مه آجی بیر گئرچه‌یی خاطیرلادیردی.
اونون کؤکسونده قارا پیسپیسالار قایناشیردی.
آلت قاتدا بیرآز گزیندی. گؤزلری، دلیکلردن کوریدورا سوزولن ایشیقلارا ساتاشدی. ایچری کئچدی. ائو باشدان باشا کتاب‌لا دولو ایدی. قارانلیق کونج-بوجاقلاری ایشیقلاندیران کتابلاری گؤردوکده مات قالدی. ائو بوتونلوکله کیتابدان تیکیلمیشدی. قاپی، پنجره، ماسا هامیسی کیتابدان دوزه‌‌لمیشدی. قوللارینی ماسانین اوستونده چارپازلایاراق، چنه‌سینی اونا سؤیکه‌ین و کیپریک چالمادان گؤزلرینی گؤزلرینه دیکه‌ن آدامی گؤردو. اوخودوغو کتابی کنارا قویوب قلمی الینده فیرلاتدی.
-گئجه‌لر راحات یاتا بیلیرسن؟! یاری‌یا قدر زیبیل‌قابی‌لارا گیرن قادین‌لاری، کیشی‌لری، اوشاقلاری گؤروب ساچینا، احتیاج اوجباتیننان بیر قادینین کسیلمیش دوغال ساچینی قوشدورا بیلیرسن؟
سؤزلری سویوق بیر یئل کیمی هاوادا اسدی.
آیاقلاری قورودو. باشینی ترپتدی. یئنه ده بیر سیرا جمله‌لرله کلمه‌لری دالبادال سؤیله‌ین همن سسی ائشیتدی: دوداقلاریوی بؤیوتمه‌یی دوشونه بیلیرسن؟ بئل‌لری اییلمیش، اللری قابارلی کیشی‌لری، قادین‌لاری گؤره بیلیرسن؟! اوزلری‌نین هر بیر درین جیزگیسینده هانسی غم‌لرین یئرلشدییینی آنلایا بیلیرسن؟! آج، چیلپاق اوشاقلاری گؤروب راحات یئمه‌یینی یییه بیلیرسن؟!
قاباغینا قویولموش استکانداکی چای سویوموشدو.
او، بوغازینی آریتدی، بیر آز دا قدینی دوزلتدی و داها جسارتله داوام ائله‌دی: نئچه‌نجی قاتدانسان؟
– دئدییین آجلاری گؤرمورم.
سانکی مین‌لرله اینسان قاشلارینی چاتیب حیرتله قادینا باخدی‌لار.
آغیللی و کسکین باخیشلاری ایله قادینی باشدان آیاغا سوزدو: دیلدن دوشن کلمه‌لر نئجه ده آسان اولور. الینی قالدیریب اوزون ساچینا توخونسان گؤررسن. منیم، هر یئرده و هر دیلده دئییلن بو یالان سؤزدن نیفرتیم وار.
آغیر ایشدن جیریق-جیریق اولموش کؤینه‌یینی، چیرکلنمیش شالوارینی، باش بارماغی بورنوندان چؤله چیخمیش جورابینی، دابانی یئییلیب یاتمیش آیاققابیسینی گؤردو.
اونون گؤزلرینده بیر چاغیریش گؤروردو: منیم رنگیم اولارین رنگیدی.
ماسانین سییرتمه‌سینی چکدی، بیر کتاب گؤتوردو. قادینا ساری اوزادیب گؤزلرینه زیلله‌ندی: کتاب آدی گلنده چوخلارینی ائله بیل ایلان چالیر.
– قاشینمایان یئردن قان چیخارتما.
قیناماق شکلینده باشینی ترپتدی:
-«اینسانین ان آغیر یوکو اولومسوز دوشونجه‌سی دیر»
آردینا باخمادان آسانسورا دوغرو گئتدی.
آسانسورا یاخینلاشاندا معده‌سی بورولدو. ساغ الینی قارنی‌نین اوستونه قویوب ایکی قات اییلدی. یاتمادان اؤنجه یئدییی بیر تیکه چؤرک گاه بوغازینا کیمی گلیر گاه دا معده‌سینه قاییدیردی. قوسماماق اوچون اؤزونو زورلا ساخلادی.
آسانسورون دویمه‌سینی باسیب آلت قاتا گئتمک ایسته‌سه ده خاراب اولدوغونو گؤردو. آسانسوردان چیخیب دار، کله کؤتور پیلله‌لرله یاواش-یاواش آلت قاتا ائندی. کوره‌یی‌نین، قوللاری‌نین، هر حوجئیره‌سینه ایینه-ایینه باتان سازاغی دویدو.
یئرینده بیرآز اوزانیب یاتماق ایسته‌سه ده باجارمادی. راحاتسیز اولدوغوندان باشینی هانسی سمته قویدوسا دا، بالینج اونا داش-کسک کیمی برک گلدی. جانینا اۆشوتمه دوشدو. الی‌له ساققالی‌نین قاباریق توکلرینی قاشیدی.
باشینی قالدیریب یورغون گؤزلری‌له اوشاقلارینا باخدی. اوشاقلار سیره‌مله دوزولوب خیردا تئلویزیوندا یاییملانان وئریلیشی ایزله‌ییردی‌لر. اوتاغا وئریلیشی آپاران کیشی‌نین سسی یاییلدی:
-ریضا؟ … آرزون ندی؟
اوشاقلار بو طرفده چیغیریشدی‌لار: پیتزااااا
-قولچااااق
-قیرمیزی دووون
-ماااشین
ریضا: دوشونمه‌یه واختیم اولمئییب.
قادین اوزونو اووجونا آلیب اکراندا گؤرونن اوغلانین کدر دولو گؤزلرینه زیللنمیشدی.
تئلویزیونون اؤنونده اوتورموش ایکی تومانچاق اوشاغی گؤردوکده باشینی یانا چئویردی.
ساپ-ساری سارالمیش و بوتون وجودو ایله گرگین بیر حال کئچیرن کیشی لال باخیشلارینی اونلارا دیکمیشدی. یالنیز اونون دوداقلاری‌نین تیتره‌دییینی و نه ایسه آنلامادیغی سؤزلر دانیشدیغینی گؤردو. او اؤزو ایله قیریق-قیریق دانیشیردی. زور ائتدییینه باخمایاراق، سسی بوغولوردو.
او، درینلره گئتمیش، تکجه گیله‌سی ایشیلدایان گؤزلرینی قیرپدی، بیر اوشاقلارینا، بیر ده اییلیب قاباغینا چای قویان آروادینا باخدی.
یومروغونو قاباغینداکی استکانا چیرپدی. چای داغیلیب، الینی یاندیردی، استکان دیوارا دیرک پارچا-پارچا اولدو. بو اونو داها دا آجیقلاندیردی. یانمیش الینی قالدیریب سولموش گؤزلرینی اونا زیلله‌ین خانیمی‌نین اوزونه ووردو.
آروادی هیچقیراق بوغدو. آمما گؤزلریندن یاش گلمه‌دی.
اوشاقلار بو دورومو گؤردوکده اؤنجه تئلویزیونو سؤندوروب سونرا بیر بوجاغدا بیر-بیرینه قیسیلیب قالدی‌لار.
حیرص کیشی‌نین بوغازینی کسیردی. آیاغا دوروب گزیندی. گاه بالاجا پنجره‌نین اؤنونده دوراراق غیرمعین بیر نقطه‌یه باخیر، گاه دا تیتره‌ین آیاقلاری‌لا کومه‌یه اوخشار ائوده گزینیر و دوشونوردو.
قادین، قولونو بالاجا اوشاغی‌نین بوینونا سالاراق قوجاقلامیش، اوزونو اوزونه سؤیکه‌یرک فیکره گئتمیشدی. بیر آندا سانکی پیس فیکیرلری اؤزوندن قووماق ایستگی ایله باشینی سیلکه‌له‌دی. آیاغا قالخیب قیزی‌نین قولوندان یاپیشدی. اونو یئره اوتوردوب آغلایا-آغلایا اوزون ساچلارینی هؤردو. قایچینی گتیریب ساچینی دیبدن کسدی.
هؤروگو اری‌نین قاباغینا قویوب پیچیلدادی: ساتیب دردیوین بیرینه وئررسن. بونون پولینان باشیمیزی نئچه واخت گیره‌له‌ریک.
اوشاق گوزگویه باخا-باخا قیشقیردی، هؤنکوررک یئره چؤمبلدی. او گؤزلرینی برک-برک یومموشدو: سااااچلارییییییم … ساچلارییییم …
قارشیسیندا بؤیوک درددن یوماغا دؤنموش اینسانلارین چاره‌سیزلیینی گؤردوکده، اییلیب یئره تؤکولن دردی، کدری اووجونا ییغارکن سس‌سیز-سس‌سیز آغلاماغا باشلادی. دلیک-دئشیک دیوارلاردان، تاواندان داملا-داملا چئوره‌سینه تؤکولن گؤز یاشلاری گؤروردو.
الینی قالدیریب شالی‌نین آلتیندان اوزون ساچلارینا اؤتری توخوندو. لئچه‌یی‌نین قیراقلارینی دوزه‌لدیب ساهمانا سالدی؛ چیینینه تؤکولموش توکلرینی گیزلتمه‌یه چالیشیردی.
کیشی رنگ وئریب-رنگ آلیردی. آزجا اول اوزونه قونموش ساریلیق یاواش-یاواش چکیلمکده، یئرینی بیر قطعیته وئرمکده‌ایدی. اونو حیاتا باغلایان سون تئل ده قیریلمیشدی. او، بیر کؤلگه کیمی اوتاغا چکیلدی. قاپینی باغلاییب قاپییا سؤیکندی.
اونون امیدسیزلیک و مایوسلوغا قاپیلدیغینی گؤردو.
قاپی‌نین تیققیلتیسی اونو قاپییا ساری دؤنوب باخماغا مجبور ائله‌دی. بوینونو اوزموش هؤروکله قادینا ساری یئریدی: آج منیم بالالاریمدی.
شهر سس‌سیز بیر حالدا مزار سکوتو ایچینده یاتیردی. پنجه‌لری اوسته قالخیب، گؤزونو بالاجا باجادان اوزاقلارا، قارانلیق بوشلوقلارا دیکدی. آغزینی خیردا باجایا طرف توتوب بوتون گوجو ایله چؤلدن گلن هاوانی سومورماق ایسته‌دی. آما چؤلدن گلن هاوا بئله آغیر ایدی.
گؤی اوزو هله ده توتقون‌ایدی. کولک گؤی اۆزۆنه سپه‌لنمیش قارامتیل بولودلاری قاباغینا قاتیب قوووردو، سانکی گؤی اوزونو آیدینلاتماغا چالیشیردی.
کیچیک میداندا سکی اوسته اوتورموش قوجا فهله‌نی گؤردو. او گؤزلرینی قادینین گؤزلرینه دیکدی. دوداقلاری ترپندی؛ اوزاق دا اولسا پیچیلتیسینی ائشیتدی: دای اومیدیم یوخدو آمما، ائوه قاییتماغا دا اوزوم یوخدو.
گئت-گئده آشاغی قاتلاردان گلن زاریلتی و اینیلتی سسی داها دا اوجالیردی. قارانلیقدا گؤزو هئچ نه‌یی سئچمیردی. هر بیر اینیلتی سسی‌له بینا تیتره‌مه‌یه، هله دئپرم اولمامیش دیوارلاری چات-چات اولماغا باشلاییردی.
آلت قاتلار قارانلیق و قورخولوایدی. امما اوردا قالماق ایسه اوندان دا قورخولو ایدی. داغیلیق، اوچوق پیلله‌لرله آلت قاتا ائندیکجه آج، چیلپاق اینسانلاری گؤردوکجه دورمادان قاییتماق ایسته‌دی.
اورا بیر-بیری‌نین قارنینا گیرمیش اوجا بینالاری‌لا، هاواسیز، رطوبتلی، کیف قوخویان دار کوچه‌لری ایله انسانی چاشدیران و داریخدیران شهرایدی. اورالاردا اوره‌ک بولاندیریجی بیر چیرک، دؤزولمز بیر عفونت حکم سورمکده‌ایدی.
ائو یییه‌سی‌نین اۆزۆ دؤنوب قانی قارالمیشدی. اؤده‌نمه‌میش کیرایه‌لر اوچون دئیینیردی: آنادان امدیییم سوتو بورنومنان گتیردیز. ایندی سیزین آللاهیزی تانیتدیرارام.
ور-وساییلین آز-چوخ تزه‌سینی آییریب اؤزو اوچون کنارا قویدو. قالان شئیلری اوستلرینه آتیب، قاپینی چیرپدی: ایندی کی قیزینی دا وئرمیرسن منه جهنم اول ائویمدن.
اونلار بیر مدت بیر-بیرینه ساریلیب تیتره‌یه-تیتره‌یه آغلاشدی‌لار. گؤز یاشلاری قورقوشوم کیمی بوتون بینایا یاغیب، دیوارلاری، تاوانی، ائولری دلیک-دئشیک ائله‌ییردی.
کناردا دوران کؤلگه، اؤنونو کسن آغاجی فیرلانیب اونلاری برک-برک قوجاقلادی. قادین، بیر آنلیغا باشی گیجه‌لمیش حالدا دیوارا سؤیکه‌نیب قالدی. باخیشلاریندا چیخیلماز بیر فلاکت قارشیسیندا قالمیش آدامین امیدسیزلییی گؤرۆنۆردۆ.
قادین، گؤزلرینی، دوروب اونلارا باخان جاوان قادینا توشلادی. او، درین بیر کدر ایچریسینده گؤزلری‌له آغاجا ایشاره ائله‌دی: آج، موبایل اوسته اؤزونو بو آغاجدان آسان بالامدی. هله ده گؤرمورسن؟!
اوووجلاریندا ساخلادیغی گؤز یاشلارینی اوغلونون آرخاسینجا یئره سپدی.
جاوان اوغلان چؤنوب آغاجدان آسیلمیش، اوزو، ساچی گؤز‌یاش‌لاریندان ایسلانمیش و گؤزلری آچیق قالمیش جسدینه باخدی.
یئر آغیز آچیب قادینی اوددو.
آجلیق آغیز آچیب اونلاری بیر-بیر یئییردی.
آلت قاتدان اویون هاوالاری، توی ماهنی‌لاری، فیت سسی گلیردی. باشینی آشاغی اییب یاشارمیش گؤزلرینی آلت قاتا دیکدی.
آردی وار …
