بارانتای
سحر خیاوی
گؤزونو سیلیب بیر ده باخدی. جان دوستو «یاشار» ایدی. باخیشی، ترپَنیشیی، یئریشی قیرخ مئتیرلیکدن دئییردی یاشاردیر. آمما بوردا؟! بو قریب چؤللوکده؟! جیبهه‌ده اؤزوده دوشمان صفینده؟! نئجه مومکون اولا بیلردی؟!
بونلاردان کئچدی مگر یاشار بیر ایل اؤنجه ماشین قضاسیندا رحمته گئتمه‌میشدی؟!
یاشار قاپی بیر قونشو، شهرداش دوستو ایدی؛ یاشید‌ایدی‌لار؛ بیرگه بویا-باشا چاتیب بیرگه مکتبه گئتمیشدیلر؛ اونیورسیته ریشته‌لری اونلاری آییرسا دا هئچ واخت بیربیرلریندن آیریلمامیشدیلار؛ بیربیرلری ایله آرزولاریندان چوخ دانیشمیشدیلار؛ قیز یولداشلارینین شکیلین بیربیرلرینه گؤستریب گوله-گوله بیربیرلرینه ساغدوش-سولدوش اولماق قولو وئرمیشدیلر.
تاسوفلر فلک دوز دئمه‌ییب بیر پاییز گونونده یاشارین کال آرزیلاری داشا یازیلدی. او حوزونلو آخشام چاغیندان بئله هئچ بیر دوست یاشارین یئرین آرازین اوره‌یینده دولدورا بیلمه‌دی.
اوره‌یی دؤزمه‌ییب دوشمان سربازینا ال قووزاییب، اؤپوش گؤندردی. او دا ال قووزاییب اؤپوش گوندردی. آراز سول دؤشونون اوستونده اولان جیبیندن قیز دوستونون شکیلینی اونا گوستردی، او دا سول جیبیندن بیر شکیل آرازا گوستردی. بئله ایکی مخالیف جبهه‌ده گوله‌شَن سربازلارین آراسیندا گیزلی بیر دوستلوق یاراندی. باشچیل‌لاری سَزسه‌یدیلر ایکیسینین ده دریسینه سامان تَپَردیلر.
گونلر سووشوردو. اونلارین یاساق دوستلوقلاری گون به گون چوخالیردی. ایشاره دیلی ایله اوزاقدان اوزاغا عائیله‌لرینه، آنا-باجیلارینا، سئوگیلیلرینه داریخماقلارینی بیربیری ایله دانیشیردیلار.
اونلاری بو ایسته‌نیلمز ساواشا چکن و قارشی-قارشییا قویان هانسی قارا اللر ایدی؟! اونلار کی بیربیرلرینی هئچ تانیمیردیلار و آرالاریندا هئچ بیر دوشمانلیق یوخ ایدی!!
نه گنج‌لر اسماعیل،
نه گنج‌لر
گورورسن؟!
چوخوسو هله
سئوگینین اوزونو کؤکسولرینه سیخماییبلار!!(۱)
هله حمله یوخ ایدی، آمما آرا-بیر آتیشمالار ایکی جیبهه‌نین آراسیندا اوز وئریردی.
سربازین اوره‌ییندن خبری یوخ ایدی، آمما آراز حمله اولسا دوستونون بارانتایی ایله نئجه ساواشماسینی دوشونوردو. اؤلدورسه‌لر ده اونونلا اوز-اوزه دوروب ساواشمایاجاقدی. آرزو دولو گنج اوره‌یینی مَرمی آماجی ائتمیه‌جکدی.
نئچه گون ایدی قوشون آراسیندا سیرلی سوزلر کئچیردی. سانکی قاباقدا حمله واریدی. آرازین اوره‌یینه قارا-قورخو دولموشدو.
او آخشام آراز اولان جبهه، جهنم دره‌سی اولموشدو. یئردن گویدن آمانسیز اود یاغیردی.
آراز کؤبرین دالیندا الینده سیلاح اوزانمیشدی.او آندا اطرافیندا برک سسلی بیر شئی پارتلادی.اودلو توستو هر یئری بوردو.تورپاق-قوم قاریشیغی بیر پارچا اود آرازا چیرپیلیب اونو نئچه مئتیر آرخایا توللادی.وای ننه چیغیریب اوره‌کدن سیزیلدادی.سیلاحی الیندن دوشدو. سول قیچی برک سانجیب ایستی-ایستی قیچیندان بیر شئی سوزولدو.الینی قیچینا آتارکن سول قیچینین دیزدن یوخلوغونو حیس ائتدی.دوشمن ایره‌لی‌له ییب قاباغا گلدی.لاپدان باشینین اوستونده الی سیلاحلی گیزلی دوستونو گؤردو. یاخیندان گؤروشده لاپ باییلدی. اونون اوخشارلیغی یاشار دوستونا، فیکر ائتدیگیندن داها چوخ ایدی.
باشچیل سربازا خلِّص…خلِّص… دئدی.
آراز یارالانمیشدی. اونو اؤزلرینه یوک ائله‌مک ایسته‌میردیلر.
سرباز آرازین گوزلرینه باخیب گوْزلری یاشاردی.
باشچیل داها حیرصله آتش فرمانی وئردی.
سرباز آنسیزین سیلاحی فرماندهه طرفه چئویریب گولله‌لرین بوتونونو قارنینا بوشالتدی.
بو حادیثه‌نی گوره‌ن گئنده کی عسکرلر، سربازین اوستونه آمانسیز گولله یاغدیریب آرازین گوزلرینین قاباغیندا دوستونو قورا پالان کیمی دلیک-دئشیک ائله‌دیلر. سربازین سیلاحی الیندن دوشوب آغزی اوستونده یئره چیرپیلدی.
بو آغریلی صحنه‌نی گؤره‌ن آرازین گوزلریندن بولاق کیمی یاش سوزولدو. سانکی یاشار دوستونو یئنی‌دن الدن وئردی. دیزدن کسیلن قیچینین آغریسینی دا اونوتدو.
سونرا قیچیندان چوخ قان گئتمک تاثیرینده هوشدان گئتدی.
هوشا گلنده اوزونو یاد بیر چوللوک خسته‌خاناسیندا یاد دیلده دانیشان دوختورلار و طب باجیلاریلا گوردو. او اسیر توتولموشدو، آمما هئچ کیمسه او ایکی سربازین آراسیندا کئچن یاساق دوستلوغون سببینی بیلمه‌دی. نه بیلمک، بلکه او سربازین کونلونده ده آرازا اوخشار بیر ایتگین عزیزی وار ایدی.
(۱)دکتر براهنی‌نین اسماعیل شعریندن گوتورولوب.
یک پاسخ
سایین سحر خانیم ان گؤزل و چکیجی بو اؤیکونوزو اوخودوغومدا اورکدن سئودیییمی حسس ائله‌دیم. آنجاق گاهدان بعضی بیر‌له‌شیملرین اوره‌ییمه یاتمادیقلارینی دا دویدوم! اؤرنک اوچون آشاغی‌دان دؤردونجو سطیرده « وطب باجیلاریلا گؤردو » هر حالدا سیزین اوچون یئنی اوغورلار دیله‌ییرم. ساغ قالین ساغلام یاشایین عزیز.