ائوینیز قارانلیق ایدی…
سحرخیاوی
گئجه یاریسی ایدی. دیشاریدا برک کولَک اَسیردی. پنجره‌لر خارت-خارت لاخلاییردیلار. اونلار یاتمیشدیلار. بیر اوندا بیر آدامین هالین ایچینده الینده یانان بیر کیبریت چوپو ایله، تَرپَنمه‌سینی دوشوندو. دیققتیله باخدی. آتاسی ایدی. قادینین اویاندیغینی گؤروب گولومسونَرکن: «آنان خالان گیله گئدیب»- دئدی. قادین شاشیریب: «آنام نه دن گئجه یاریسی خالام گیله گئدیب گؤره‌سن؟!» اؤز-اؤزونه دئدی.
آتانین الینده‌کی کیبریت چؤپو سؤندو. باشقا بیر کیبریت چکدی. چؤپون کوکورده چکیلمه‌سی گئجه‌نین سسسیزلیگینده فیشیلداییب، قورخونج و بؤیوک بیر سس تؤره‌تدی. آتا الینده کیبریت مطبخه کئچیب لامپا چیراغی اَلده قاییتدی. چیراغین شیشه‌سینی سلیقه ایله گوتوروب،پیلته‌سینی تمیزله‌ییب، باشقا بیر کیبریت چکیب یاندیردی.
لاپدان قادینین یادینا آتاسی‌نین، آناسی‌نین، خالاسی‌نین اؤلدویو دوشدو!! اَتی اؤرپندی. سویوق بیر گیزیلتی بوتون اعضاسیندا گَزدی. بَرَلمیش گوزلری ایله آتاسینا باخدی، امما دیلی توتولوب هئچ نمنه دئیه بیلمه‌دی. آتاسی‌نین او بیری بؤیرونده یئنی یئتمه بیر قیز یاتمیشدی. بیر گؤزونه بالاجا باجیسی، بیر گؤزونه ده بالاجا قیزی گورسَنیردی. قیز چیراغین ایشیغینا آییلدی. گؤزو قاماشیب،ساغ الینی گؤزلرینه گولگه‌لیک توتوب، قالخیب یئرینده اوتوردو. آتا،محبتیله اوزونو تومارلاییب: «ناز بالام باغیشلا، سنی اویاتدیم. ائوینیز چوخ قارانلیق ایدی،دؤزه بیلمه‌دیم»-دئدی.
قادین«اونا اَل وورما،سن اؤلوبسن» دئمک ایسته‌دی، امما سسی بوغازیندا قورویوب دیلینه گلمه‌دی.
سونرا آتا قادینا ساری یؤنه‌لیب: «سن ده باغیشلا قیزیم، سنی ده اویاتدیم، ائوینیز چوخ قارانلیق ایدی دؤزه بیلمه‌دیم.»-دئییب، نازلاما الینی قادینین اوزونه گزدیررکن، قادین یوخودان دیک آتیلدی.
اوره‌یی قفسده کی بیر قوش سایاقی چیرپینیردی. بوتون بدنینی سویوق تر بوروموشدو. کولک دیشاریدا هله ده وحشیجه هر یئری جیرماقلاییردی. قادین بو آیدینلیقدا بیر گؤرونتونون هله ده یوخو یوْخسا اویاقلیق اولماسیندا قالمیشدی.
یادینا دوشدو او کولکلی آخشامدا، بلکه ده کولَکین زهمیندن برق گئتدی. شانسدان گاز چیراقلارینین تورو تؤکولموشدو. هره ائله اولدوغو یئرینده یاتدی. راحاتسیز یاتدیغیندان بئل-بوخونو قوروموشدو. هم ده بو وحشتلی کابوس چورتونو بوتون پوزموشدو. یوخوسونو دیدَرگین سالمیشدی. قارانلیق تاوانا زیلله‌نیب، یوخوسونا فیکیرلشیب، «آللاه خئیره یوزسون»- دئدی. حیات یولداشی‌نین نازلاما اَلی اوزونده گزیردی. هؤوللو دوداقلارینی یولداشی‌نین الینه یاپیشدیردی. بیرآز دینجلدی.
دان یئری بالا-بالا سؤکولوردو. آلا تورانلیق ایدی. قادین یولداشی‌نین الینی اوزوندن چکیب سول دؤشونون اوستونه قویدو بلکه آرتیق دینجلیک تاپسین. امما یولداشی‌نین اَلی یوخ دؤشونون بوشلوغونا گئدرکن داها اوشَندی.
کولک دیشاریدا هله ده کوشولده‌ییردی.
