چئویرن: ایشیق
ترجمه: ایشیق
ایشیق

یاریم بیر حئکایه
طاهر میرابی

یورقانی اوستوندن آتیب تر ایچینده آیاغا قالخدی. بیرآز گیجلدیکدن سونرا تختین قیراغیندا اوتوروب ائشییه باخدی اون ایکینجی قاتداکی آپارتمانین پنجره‌‌سیندن. گؤردویو شئی اؤنونده اولان بیر سیرا پنجره‌ و دووار ایدی. تختده اوزانیب سقفه یاپیشدیردیغی ونگوگون «اولدوزلو گؤی اوزو» تابلوسونا گؤزونو تیکیب، بیر سیگار یاندیردی. اؤسگورمه سسی ایله یانیندا گئجه‌دن قالما بیر قادینین اولدوغونو حس ائتدی. سانکی گئجه‌نین یاریسی ایدی. ایکینجی اؤسگورمکده اؤزونو تخت‌دن یئره آتدی. یئره دوشمه‌سی‌نین سسینه قادین «نه اولدو؟ هله ‌ده کئفلی ‌سن؟» دئییب، بیرآز قیوریلدی. «یوخ. یاخچی‌یام. اؤزوم ائله ائله‌دیم یوخوم قاچا.» دئییب آیاغا قالخدی. پالتارلارینی گئییب ائودن چیخدی. یئریمک ایسته‌دییی اوچون یانیندا پول گؤتورمه‌دی. آپارتمانین اؤنونده بئش آلتی اوغلان اوشاغی توپ اویناییردیلار و بیر جوان اوغلان الینده سیگارلا دوروب گؤزونو تیکمیشدی اون ایکینجی قاتداکی آپارتمانین پنجره‌سینه. باشینی آشاغی سالیب یولونا دوام ائتدی. خیابانین دار قالدیریمیندا اوچ قیز یان-یانا گولوشه- گولوشه گئدیردیلر. چالیشیردی اونلاری آرخادا بوراخیب گئچسین، آما قیزلارین بیربیرلرینه دییب اویان بویانا آخمالاری ایذین وئرمیردی. سونوندا داریخیب اهمالجا سسلندی: «قیزیم! اجازه وئریسیز؟» قیزلارین بیری او بیریسینه دئدی: «قیزی ایجازه وئر عمی‌جان گئچسین!» سونرا اوجادان گولوب بیر کنارا چکیلدیلر. عمی جان یولونا دوام ائدیب رئوف گولچو‌نون توکانینا گیردی:
– یاللاه رئوف نئجه ‌سن؟
– سلام حاجی داش یاشا! یاشا! بیزلره باش وورمورسان ها چوخداندی!
– هن، بیرآز باشیم قاریشیقدی بو گون‌‌لر. ائله چوخ دولانا بیلمیرم. نه خبر؟ نجورسن؟
بیلیردی رئوف ‌دا هر زامان بیر خبرلر اولار.
– ائله بیر خبر یوخدو. بئکارچیلیق. بو گونلر ائله چوخ گول آلان اولمور.
– رئوف بو گونلر جماعات نییه گرح گول آلا آخی؟ خاص بیر مناسبت یوخدو کی.
– بیلیرسن؟ من ده ترحیم گولو ساتسایدیم یاخچی قازاناردیم، آما گولون ایشی سئویندیرمکدی. سئومیرم گول‌‌لریمین یانیندان اعتناسیز گئچسین‌‌لر. البته بو احوالدا دا منی سئویندیرن بیریسی تاپیلیب. بیر قیز وار. بترده دوزلودو. نئچه گوندن بیر گلر توکانا. آما گول آلماز!
(رئوف تعریفله‌دیگی شئی‌‌لری همیشه یاری‌دا بوراخاردی. ایستردی قولاق آسانین ناغیلین قالانینی ائشیتمه‌یه هیجانین گؤرسون. اگرسه قولاق آساندا او هیجانی گؤرمه‌‌سه‌ایدی «هن، بوجور دا» جمله‌سی ایله بوراخاردی ناغیلین قالانین، آما حاجی داش‌دا همیشه او هیجانی گؤرردی.)
– اول گون گلنده دئدیم بس منی سریییب. گلدی دئدی: «اولار گول‌لریزه باخام؟!» دئدیم: «نییه اولمور قیزیم، باخ!» دوردو توکانین اورتاسیندا باخدی گول‌لره. اوستده کی گول‌لره باخاندا گؤرمه‌‌لی ایدی حاجی داش. اونون اورداکی دوروشو و اورداکی باخیشی کیمی گؤزل بیر شئی اولا بیلمز حیاتدا حاجی داش. سونرا یاس گول‌لرین اییله‌دی. گؤزلرین یوموب اییله‌دی. یالان اولماسا یاریم ساعات اییله‌دی. سونرا دئدی: «ال‌لریز آغریماسین.» دئدیم: «به گول آلمیرسان؟» «پولوم یوخدو یانیمدا» دئدی و چیخدی. دئدیم رئوف بو یاشا گلیب چاتدین، آما دانیشماغیوی اؤرگشمه‌‌دین. بو قیز بیرده گلمز توکانا. آما نئچه گون سونراسی یئنه گلدی. توکانین اورتاسیندا دایانیب باخدی گؤزلریمه. «نییه منه باخیرسان قیزیم؟ اجازه لازیم دئییل» دئدیم. نه قدر سئوسن گول‌لره باخا بیلرسن. گؤزلری گولدو. یئنه همان حالدا تعجب‌‌له باخیردی گول‌لره. سونراسی یئنه یاس گول‌لرینه ساری گئتدی.
– بوردا ساخلا، چیخیم بیر سیگار چکیم، گلیم.
– تمام، گئت گل!
حاجی داش توکانین قاباغیندا دایانیب سیگارینی یاندیردی. ساغ طرفدن بیر قیز گلیردی اوزاخدان. ال قولون اؤلچه- اؤلچه یئریییردی. گلیب توکانین اؤنونه چاتدیقدا حاجی داشا سلام وئریب ایچری گئتدی. آرخاسینا سالدیغی بالاجا بیر کیف کی ایچینه هئچ نه یئرلشمزدی.
حاجی داش باشینی آشاغی سالیب قیزین گلدیگی یولو گئتدی. چالیشدی ال‌لرینی اونون کیمی ترپتسین یئرییه- یئرییه. بیرآز او حالدا یئریدی. گلیب گئدن آدام‌لارین ایری- ایری باخیشلارینا باخیردی. اوجادان گولوب اؤز یئریشینی یئریدی. خیاباندان آتلادیغیندا اویان بویانا باخمیردی. ماشیندان اوجالان سیگنال سسی ایله دؤنوب ماشین‌ین ایچینه باخدی. ماشین‌‌ین ایچینده ‌کی آدام باشینی اون ایکینجی قاتداکی آپارتمانین پنجره ‌سیندن چیخاردیب “ائششح! باخ دا به!” دئییب سوردو. ائششح خیابانین او تایینداکی پارکا گیریب چمن‌لرین اوستونده اوزاندی. بیرآز اویانلیقداکی نیمکت ‌ده اوتوران قیز اوغلان ائششه‌یین حالینا باخیب گولدولر. ائششح دؤنوب اوزو قویلو اوزانیب باشین سوخدو چمن‌‌لره. گؤزلرینی یوموب چمن‌لری اییله‌دی. چمن‌لری یئمه‌یه باشلادی یاس گولو یئین کیمی…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

یاریم بیر حئکایه / طاهر میرابی

ایشیق
www.ishiq.net

آذربایجان ادبیات و اینجه‌صنعت سایتی

یاریم بیر حئکایه / طاهر میرابی

ایشیق
www.ishiq.net

آذربایجان ادبیات و اینجه‌صنعت سایتی

یاریم بیر حئکایه / طاهر میرابی

ایشیق
www.ishiq.net

آذربایجان ادبیات و اینجه‌صنعت سایتی