کئفلی ایبیش
مسعود آذر
شافتالی‌لار جالاندی،
ملان منیم بالامدی.
هاممی قویوب گئدندی،
ملان منه قالاندی.
– ائله بیل، کئفلی ایبیش گلیر.
– هه، اؤزودور. چوسوسلارا گیرندن محله‌نی آلیر باشینا سسی بیر آغاجدان گلیر.
– قوی گلسین، بیرآز ایپ باغلییب گئدیب یاتاریق.
– نه ایپ باغلاماسی، اونو الله ویریب دا، سن نییه ساتاشیرسان.
– جوما آخشامی گئجه یاریسینا قده‌ر آییق قالمیشیق نییه؟
– آییق قالمیسان ایبیشه بند اولاسان؟
– هن بابا ایپیمیزی ائشیبدیر. هر گئجه کنسرتی واردی. بیزیم ائوده کی یول اوستونده‌دیر بو ماهنینی هر گئجه ائشیدیریق.
– یاخشی دا، موفته کنسرته قوناقسیز.
– بابا نه کنسرتی! ائله بو بندی باشاریر. ائله بیلیرم کی پاساژدان چیخاندان ائوینه تپیلینجاق بو تیکه‌نی اوخویور. ایکینجی بندیندن خبر یوخدور.
– ائله اودا غنیمتدیر.
– هله هاراسین گؤرموسن. ایندی عسگر باققال چیخاجاق معرکه قورسون.
– او نییه؟
– دایان گؤررسن.
ایبیش آشا – آشا گلیر. کوچه‌نین ائنینده گئدیر، بویوندا. خرزی باغینا یئتیشر، عسگر باققال تومان اینینده بودور چیخیر ائششیه.
– گئده بس سنین شرفین یوخدور؟ سنین ننه‌ن باجین یوخدور؟ گئده بس سن نه واخت آدام اولاجاقسان؟ من سنه نئچه یول دئییم بوردا اوخوما، بونو اوخوما؟
– آخی عسگر عمواوغلوووو … بس هاردا اوخویوم، بس نمنه اوخویوم؟
– هر نه اوخویورسان اوخو دا. بونو اوخوما.
– عسگر عمواوغلوووو … آخی من باشقا بیرزاد باشارمیرام کی.
– او … دا آتشپاره بونو اوخوماسیدی گؤره‌ن گؤی یئره گلردی، سن ده هر گئجه یاریسی گلیب منیم قاپیمدا اوخویاسان؟
– عسگر عمواوغلووو … انصاف ائله‌میرسن. باشینا دولانیم اونون. سس دئییل کی بهشت نغمه‌سی‌دیر.
– اولار بو بهشت نغمه‌سین ائویزده اوخویاسان.
– عسگر عمواوغلووو … آخی سنه نه ضرری وار؟
– آی یاریماز، منیم ائوده قیزیم وار، اونا سؤز ائلیرلر. ملان دئمه آیری آد دئه‌دا. آیری ماهنی اوخو دا. اصلاً نه لازیمدی اوخوما دا. او زهری ماری ایچیبسن، آدام بالاسی کیمین گئت ائوینده باشیوی قوی یات دا.
بو حالدا سوچو بابانین اوغلو رحمان تومان پاچا یوخولو- یوخولو ائشییه چیخیر.
– آی بالا گینه نه خبردیر؟ گئجه یاریسی بو نه فیلیم‌دیر؟ ایبیش الله سنه لعنت ائله‌سین! هر گئجه بو نمایشیوی گره‌ک وئره سن؟ بابا بیز ده آدامیق، سحر ایشه گئده‌جاغیق. آی عسگر عمواوغلو سنین ده ایشین قورتاریب هر گئجه بونونلا باش باشا قوشورسان. بابا قوی چیخسین گئتسین دا؟
– آی رحمان آخی بو بئنامیسا دیین یوخدور گئجه یاریسی بو نه اوخوماغیدی؟
– بابا اوخوماق اوخوماق دی دا، نه فرق ائلیر، بونو اوخوماسین اونو اوخوسون.
– یوخ چوخ فرق ائلیر، آیری بیرزاد اوخوسون. یادا اوخوماسین. منیم ائوده قیزیم وار. نییه اونون آدین گتیریر؟ صاباح ائل ایچینده منه مشکل اولاجاق.
– آی قردش، سن ده غریبه آدامسان ها. سنین قیزوین سککیز یاشی وار. نه خبردیر؟ گؤرنده دییر بس کی ارریق قیزدیر. گئد ایچری پیسدیر. اؤزووه سؤز دوزلتمه. کئچ ایچری اوتان، یاخشی!
– یوخ، منه دیینجاق بونا دیین بیرآز اوتانسین.
– یاخشی، پیسدیر یئکه آدامسان. کئچ ایچری. دییه‌ریق آیری بیرزاد اوخویار. آی ایبیش قارداش سنین ده قاشینمان وار؟ آیریسین اوخودا!
– رحمان قردش، جانیو ایچون آیری بیرزاد باشارمیرام کی.
بو حالدا رحمان بیزه باخیب دییر:
– سیز گئجه یاریسی بوردا نئیلیرسیز؟ ائویز یوخدور؟ گئدین باشیزی قویون یاتین دا؟ سحر ایشه گئتمییه‌جاقسیز؟
– آغا رحمان، صاباح جومادیر. کرخانالار باغلیدیلار. نه ایشی؟ بی هفته ایلمه دؤشه‌مه‌دن جیریغیمیز چیخیب. بیرآز الله قویسا استراحته چیخمیشیق.
– استراحته چیخیب سیز گئدین یاتین دا، گورورسیز کی فیلیم ده قورتاردی.
بو حالدا ایبیش یولون توتوب گئدیر، گئده- گئده اوخویور:
شافتالی‌لار جالاندی،
ملان منیم بالامدی.
هاممی قویوب گئدندی،
ملان منه قالاندی.
– گؤرورسن گئده نین هئچ شرف یوخدور. ایندی بیر قران سؤز دئدوخ ها.
– یاخشی گئت یات سحر توکان آچاجاقسان. یوبانارسان یورقان باسار، قهبه رضا ساتار، سن قالارسان. سیزده بالامسیز گئدین یاتین.
رحمان گئدیر ائوینه، عسگر باققال دا دئیینه- دئیینه قاپینی چیرپیب ایچری گئدیر. هله ده ایچریدن سسی گلیر.
رسول دئدی:
– گل گئداخ گوراخ هارا گئدیر، قاییداریق.
– بسدی دا.
– بابا بو سوچو بابانین اوغلو قویمادی کی گوراخ نئیلییروخ. گل گئداخ، قاییداریق.
ایبیش اوخویا- اوخویا گئتدی حاج حمید باغینا ساری. بیرآن گؤزو ساتاشدی گؤردی جمشید قفه‌سی آچیقدیر. گیردی ایچری. بیزده اون آردینجا.
– سالام
– سالام، سالام
– علیک‌السلام
جمشید قفه‌چی اوول اوز توتوب ایبیشه دئدی:
– هه ایبیش، بالا تکمیل دئییلسن؟ گئت ائویوه دا، او یازیق آروات بو واختاجان سنی گؤزلیر آخی؟ اونون دا سنده باشقا بیر کیمسه‌سی یوخ کی باشین اونونلا قاتسین.
– یوخ جمشید عمواوغلووو …، هله تکمیل دئییلم. ایکی چای وئرسن … دای تکمیل اولارام.
جمشید قفه چی اؤز توتوب بیزه دئدی:
– خئیر اولا بالا؟ سیز نه عجب؟ بو گئجه یاریسی هاردان گلیرسیز؟
– ایکی چای دا بیزه وئرسن زحمتی کم ائله‌روخ.
– هر گئجه بو واخت ائویزده چای ایچردیز… بالا؟
رسول دئدی:
– یوخ بو گئجه یوخوموز قاچمیشدی دئدوخ بیرفیرلاناق. گؤردوک قفه آچیقدیر. دئدوخ بیزده ایبیشین قوللوغوندا بیر چای ایچاخ.
ایبیش اوز توتوب جمشید قفه‌چی‌یه دئدی:
– جمشید عمواوغلووو … اؤزونو ناراحت ائله‌مه! جاواندیلار، جاهیل دیلار.
بو حالدا جمشید قفه‌چی ایکی چای گتیریب قویدو ایبیشین قاباغینا. بیزه ده دئدی:
– سیز ده صاباح گلرسیز تازا دم چای وئره‌رم.
بیزده بیر- بیریمیزه باخیب گولوشدوک. آتدان آتدان ایبیشه باخیب گولوردوک کی جمشید قفه‌چی گؤروب دئدی:
– هن اوغول، گولرسیز. گولرسیز. جاوانلیقدی دا. آللاها دا بنده‌لیک ائله‌میرسیز.
من دئدیم:
– یوخ، جمشید عمواوغلو، هئچ نه یوخدور، عسگر باققال بیرآز ایبیشه دالاشدی. دئدوخ ناراحات اولار ییخیلار ائلر. دالیسینجا گئداخ گیرسین ائوینه قاییداریق. اودا گلدی بورا. دئدوخ ایندی کی بئله گلیب، اوتوراق بیر چای ایچاق گؤراخ نه اولور. سنده کی بوش یولا سالدین.
جمشید قفه‌چی بیر باخیب بیزه گولومسندی. بوش ایستکانلاری ایبیشین قاباغیندان گؤتوره‌رک سوروشدو:
– ایبیش، تکمیل سن؟
– هه، جمشید عمواوغلووو …، دای تکمیل اولدوم. گئددد …یم ائووه. دای ب…سدی. جمشید عمواوغلووو … منیم بورجوم نئچه اولدو؟
– هئچ نه، سن منه قوناقسان. صاباح گل بیرآز دا شوشه ییغمیشام وئریم آپار پول ائله. بوردا قالسا سیناجاق. گئجن خئیرینن.
– گئجن خئیرینن، دای گئدیرم ائوه. جمشید عمواوغلووو … گئددد … یم ائوه. بالام روحی دای ائوه‌جاق اوخومویاجاغام. قوی عسگر عمواوغلووو … راضی اولسون. آخی او بیلمیر کی منیم ده ملانیم وار ایدی. قوی او راضی اولسون!
جمشید قفه‌چی گوزلرین سیخا- سیخا اؤز توتوب بیزه بوغونتو سسی ایله دئدی:
– دورون بالامسیز سیزده گئدین ائویزه، منده باغلییرام. گؤرورسیز هره‌نین ده اؤزونه گوره بیر دردی وار کی فقط اؤزو چکه بیلر. سیزین ده گئجه‌نیز خئیرینن.
گئجه‌نیز خئیرینن دئییب ائشیگه چیخدیق. رسولون بوغازی شیشمیشدی، دانیشانمیردی. باشینان خدافیظلشیب، قاچدی من گؤز یاشلارینی گؤرمییم.
۷ شهریور ۱۳۹۵
