چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح

شکیلینه باخاندا، بئلی ایستر- ایسته‌مز اییلیردی، گوزگویه باخاندا، چییین‌لرینی دالییا چکیب، شست‌لی دوروردو.‌ بونلارین بیری اونون‌لا اویناییردی.‌ باشا دوشموردو.‌ بلکه ده تزه اویونلاردانیدی، باشارمیردی.‌
بیری اوزاق‌دان باخیردی، بیری یاخیندان.‌ اوزاق‌دان باخانین آدی ائله اوستونده‌ایدی.‌ اوزاق‌دان باخان، بالاجا نسنه‌لری گؤره بیلردی‌می؟ نه اوچون اوزاق‌دان باخانا قاش‌سیز، کیرپیک‌سیز، اوزـ گؤزو شیشمیش، قیریشیق‌لی بیریسی‌ایدی، یاخیندان باخانا هله ده گنج.‌ بلکه ده اوزاق‌لارا باخیب نئچه ایل سونراسین گؤستریردی.‌ بلکه ده اؤزو دوربین‌ایدی، یاخینی یاخشی سئچه بیلمیردی.‌
بلکه ده بونلارین بیری یا دا هر ایکیسی، بلکه ده اؤزو جیغاللیق ائیله‌ییردی.‌ هر حال‌دا شکیل‌له، گوزگونون آراسیندا آسیلی قالمیشدی.‌ بلکه ده دوربینده گؤز، گؤزو اوزاق‌دا گؤروردو، آمما گؤز، گؤزدن اوتانیردی گوزگوده؟
اؤزونو ایکی جور ـ بیر جور گؤروردو.‌ بیلمیردی شکیلین چکدیرسین یا دا گوزگونون قاباغیندان دالی چکیلمه‌سین.‌ بیری شکیل ایسته‌ینده اؤزونو گوزگو قاباغیندا گوستره بیلردی‌می؟ شکیل وئرمه‌لی اولسایدی دا، بیر گوزگو یانیندا آپاریب، بیر دؤنه ده گوزگوده اؤزونو گوسترمه‌لی‌ایدی.‌
دوز اولسایدی «گؤزلین شکیلی یاخشی چیخماز.‌» اوره‌یی بیر آز ساکین‌له‌شردی، بلکه ده بو جور دئییب‌لر، هئچ کیمین اوره‌یینه دیمه‌سینلر؟ اؤزـ اؤزونه دوشوندو.‌ یادینا دوشدو اونا دوزلی دئینده ده اؤزونه دَیَردی.‌ هر دن ده فیکیرله‌شیر اصلن گؤزل نه جور اولار، دوزلی نه جور؟ کیم دئیه بیلر گؤزل کیمدی، دوزلی کیم؟ بعضی یئرلرده بورداکی اؤلچولرده بیریسی تاپیلماز، اونلارین ایچینده یانی گؤزل‌دن، دوزلودان یوخدی دیبیندن؟ اولا کی اونلارین دا اؤز اؤلچولری وار؟ بو اؤلچولری کیم قویوب؟ اصلن بو اؤلچولر دوزدی؟
بیر کارانداش‌لا کاغیذ گؤتوردو، نئچه جور آدام چکدی.‌ آدام‌لارین هر یئرلرینی (قاش، گؤز، کیرپیک، بورون، آغیز، باش، توک، ال، آیاق، گؤوده و .‌.‌.‌) بیر دؤنه اوچ بوجاقلی، بیر دؤنه دؤرد بوجاقلی، بیر دؤنه گیرده، بیر دؤنه.‌.‌.‌، هر بویادا چکدی.‌ هره‌سی بیر جور اولسایدی‌دا هاممیسی اونا باخیردی، هاممیسی اونون‌لا دانیشیردی.‌ هاممیسی‌نی هر دوروم‌دا چکدی، گولومسر، هیرسلی، شاشقین.‌.‌.‌ بیلمیردی گؤزلدیلر یوخسا دوزلی؟ بیری اوچ بوجاقلی باخیردی، بیری دؤرد بوجاقلی، بیری گیرده.‌.‌.‌ باخیش‌لاریندان اوتاناراق، اؤز عالمینده، خواهیش ائلیرم اوچ بوجاقلی، دؤرد بوجاقلی، گیرده .‌.‌.‌ گؤزلرینیزله باخیرسینیز دئیه گولومسه‌دی.‌ سونرا بونلاری بیرـ بیرینه قاریشدیردی.‌ اوچ بوجاقلی‌نین گؤزلرینی چکدی دؤرد بوجاقلی‌یا، گیرده‌نین آغیزینی چکدی اوچ بوجاقلی‌یا.‌.‌.‌ بیرینی آغلاتدی، بیرینی یوخلاتدی، هر نه اویونو وارایدی چیخارتدی، بونلارین هاممیسیندا، هاممیسی یئنه اونا باخیردیلار، اونون‌لا دانیشیردیلار.‌
بونلاری نه جور آییرا بیلردی.‌ آییرا بیلسئیدی ده او دئودی بو ملک، یا عکسینه اولان زامانینا قاییتماق ایسته‌میردی.‌ مه‌یه‌ر ایکیسی‌ ده بیر یئرده اولا بیلمزدی؟ هم دئولیک، هم ملک‌لیک، هابئله هم دوزلولوق، هم گؤزللیک، هم قوجالیق، هم گنج‌لیک، هم.‌.‌.‌ هم.‌.‌.‌؟ بلکه ده خط‌کش‌له آییرماق اولموردی بونلاری داها.‌ ائله سیخ بیرـ بیرینه ایلیشمیشدیلر کی، آیریلسایدی‌لار دا اوندان بونا یاپیشاردی، بوندان اونا.‌ هر دن بیر ده یئرلرینی دییشیردیلر، یئرلرینی دییشنده آرا بیر بیر بیرینین اوستونو توتوردولار، بیری گؤرسه‌نیردی.‌ اوندا اونا دئو دئمه‌لی‌ایدی یا ملک، دوزلی یا گؤزل، قوجا یا گنج؟

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آسیلی

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی

آسیلی

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی

آسیلی

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی