چئویرن: ایشیق
ترجمه: ایشیق
ایشیق

MASOOD AZER
ببو ببو
مسعود آذر

هاوا چوخ سویوق‌ایدی، یئنه گئجیکمیشدیم. قاپینی دؤیدوم، خیردا قارداشیم قاپینی آچدی. تله‌سیک گیردیم حیطه دئدیم: -«آرش قاچ ایچری دوندوق!» ایکیمیز بیردن سوخولاراق ائوه، قاپیدا گیر ائله‌دیک، بیر آز دارتینیب قاپیدان کئچیب تئز باغلادیق. پالتوومو چیخاردیردیم کی آتام یئتیشدی.
-گینه هاردایدین؟
-گئتمیشدیق توپا.
-منی سرییبسن اولان. بو سویوقدا ایتی وورسان ائشیگه چیخماز. سیز بیر یول بو شخته ده توپ اوینوردوز؟
ائله بو آندا ننه‌لییم اوتاقدان چیخیب، دده‌مه هیرسلندی؛
-آ کیشی، نه وئریبسن آلانمیرسان بو اوشاقدان؟ قوی هله بیر یئتیشسین، پالتارین چیخارتمامیش قاباریرسان اوشاقا. گل ایچری گئجه اوزوندو نه قده‌ر ایسترسن دئیینمه‌یه واخت وار.
دوغروسو من ننه‌لییم‌دن بیر پیسلیک گؤرمه‌میشدیم، آمما نه ایسه هئچ واخت اونون محبتین اینانمادیم. همیشه ائوه گیریب، باشیمی آشاغا سالیب، گئتمیشم اوتاغیما. بو اوتاقدا قردشیمله من قالیردیق. او بیریسی اوتاقدا دا آتام، ننه‌لییم و تازا دوغولان باجیم. بو اؤگئی باجیم “لیلا” اولاندان هرگون اؤز باجیم “فیروزه” گؤزومه تیکیلیردی.
آنام اؤلندن بیر ایل سونرا، آتام فامئل‌لرینین بیریسی ایله ائولندی. منصوره خانیم اره گئدیب بوشانمیش بیر معلیم ایدی، بونا باخمییاراق بوشاندیغینا گورا راضیلشدی منیم آتامیننان کی دؤرد اوشاقی واریدی ائولنسین. آتام ائولنندن سونرا، عمه‌م گلیب باجیم فیروزه‌نی آپاردی اؤزوینن ساخلاسین. گؤیلوم ایستیردی کی بیز ایکیمیزی ده آپارسین، آمما بیلیردیم کی بو مومکون دئییل.
نئچه ایل قاباق آنامین دونونون اتگی پیله‌ته‌یه ایلیشیب، پیله‌ته‌نی چئویردی؛ ائوی اود آلدی؛ آنام دا کی ایستیردی اودو سؤندوره، اؤزو اود توتوب یاندی. بو ایش منی چوخ عصبلشدیرمیشدی؛ نییه کی اوشاق ایکن آنامین یانیق جنازه‌سینین اوستونه گلیب چیخدیم و بو منده چوخ پیس تأثیر قویدو. آتام ائوله‌نندن سونرا عصبی‌لییم داها آرتدی. ننه‌لییم بونو یاخشی باشا دوشوردو. اونا گورادا منیم شیلتاقلیغیمی تحمل ائدیردی. هئچ واخت اولمادی کی منی آتاما چوغوللاسین. بونونلا آتام منیم حؤرمتسیزلییمی آنالیغیما گؤروردی و بو ادبسیزلیگی چکنمیردی. آتام منی چوخ نصیحت ائله‌دی، آمما دوغروسو یورولدو. تکی مندن یوخ، اؤزوندن‌ده یورولموشدو، ائله‌جه یاشاییشیندان دویموشدو. همیشه ائوه کئفلی گلیب، دونیانین آجیغین مندن آچیردی. آخی بیر باشقاسی یوخویدو کی اونونلا بیتده‌شه:
-دی سؤیون گل سوفره باشینا.
بو آتامین سسی دی کی منی اؤزومه گتیردی. اعتراض لا دئدیم؛
-من یئمیرم، سیز یئیین.
-نه یئمیسن؟
-هئچ نه، آج دئییلم.
-اولان سن منی لاپ جانا گتیرمیسن. بو ائوه گلماغین، بودا جاواب وئرماغین.
-زوردی یئمیره‌م دا.
-غلط ائلیسن یئمیرسن. ایکی ساعاتدی سوفرانی سالیب سنی گؤزلیریک، قارداشین شام یئمه‌ییب کی سن ویرغین ویرمیش گله‌سن سنینله یئیه. باشا دوشورسن بو آروات سیزه گورا شام قویوب.
-منه نه، من دئمیشم شام قویسون. قویماسین. سیز یئیین دا، منیمله نه ایشیز وار؟
آتام حیرصله‌نیب بیردن جومدو منیم اوستومه؛
-کوپک اوغلو هله چوخ اوجا سیچیبسان، باشیندان دا دیشلییرسن.
گؤردوم هاوا یامان پیسدی، ال آتدیم پالتووما، بؤرکومو گؤتوروب باشماقلاریمی آلیب الیمه، بیلمیرم نه واخت آیاق یالین حیط‌دن ائشیگه قاچدیم. باشماقلاریمی گئییب، بؤرکو کئچیتدیم خیتده‌ییمه، پالتووین یه‌خه‌سین چکدیم قولاقلاریما، دویمه‌لریمی باغلاییب، باشیمی سالدیم آشاغا، یورودوم، آمما هئچ بیلمیردیم هارا. یئرده کی داش قومی شوتدویه‌رک، ایچیمده برک قئینیب، اؤز- اؤزومه دانیشیردیم؛
-قوییب گئده‌جاغام ، … اوندا بس قارداشیم منسیز نئیله‌سین.
-من ننه‌لییکله یاشیان دئییلم،  … آخی او یازیق منه نه پیس‌لیک ائلییب کی، …
اوره‌ییم برک سیخیلیردی، ایستیردیم باش قویوب بیرینین چیینینه آغلییام. آخی بو نه یازیدی بیزیم آنلیمیزا یازیلدی؟ کوچه‌نین ایچیندن گلن سس صدا منی اؤزونه طرف یؤنتدی. نه زامان ائودن چیخمیشدیم بیلمیرم. چوستدوزلاردان گلیب چاتمیشدیم چهارراه شهنازا، پاساژ قاباغیندا باشیمی قوزادیم اوسته. بیر مئیخانلار آچیقیدیر، بیرده آتدا – بوتدا یئمک توکانلاری. ائله بیل کی بیریسی منی چاغیریردی کوچه‌یه، مئیخانادا کی چیراقلار سانکی کؤزه‌ریردیلر، بو ضعیف ایشیقدا اوردا اوتوران سرخوش اینسانلارین سیماسینی گؤرمک اولوردوسا، آمما سئچمک اولموردو. سیگارت توستوسو، اوجا اوجا دانیشیقلار، شاقیلتیلی گولوشلر، ساغلیق‌لار، … سانکی او ایچدیک‌لری بیر ایکی آجی ایستکان آراغ، او یورقون اینسانلارین سیماسیندا حیاتین بوتون چتینلیک‌لرین و آجیلیق‌لارین نئچه آنلیق اولورسادا پوزوب آپاریردی.
هوسلندیم ایچری گیریب بیر ایکی ایستکان وورام. بیر نئچه مئیخانین قاباغیندان کئچدیم؛ هر نه اوزومه جرعت وئردیم باجارمادیم. بیر آیاغیم ایره‌لیردیسه او بیریسی گئری قایدیردی، دوغروسی جانیمدا بیر قورخو واریدی. بعضاً ایچریده کی لرده منه باخیب بو یاشدا بو ساعاتدا اوردا دالاشدیغیما تعجبله نیردیلر. بیر باشقا مئیخانانین قاباغیندان کئچنده گوزوم دوشدو بارین دالیسندا دوران شسلی شقاوتلی بیر قادینا. باخیشلاریمیز بیربیرینه توققوشدو، او تعجبلی من ایسه اختیارسیز، دئدیم بس کی بیریسی پئیسریمدن یاپیشیب ایته‌له‌دی ایچری. قادینین دوداقلاری قاچدی. ایره‌لی گئتدیم. او گؤزلرین قییدی، باشینی ترپتدی کی، نه؟ دئدیم؛
– بیر ایستکان توک ایچیم.
قادین منی آشاغدان یوخاری وراندازلادی. آرخادان بیریسی دیلی توتار توتماز باغیردی؛ ماتی سوتول بالا گیریوه کئچیب، حؤرمت ائله یاز منیم حسابیما.
– آرتیق دانیشما گئده، سن اؤزون نئچه ایلدیر اونون بونون حسابینا ایچیرسن؟
اوردا اوتورانلارین بیر نئچه‌سی شاققا چکیب گولدولر، آردینجا ایستکانلاری ماتی‌نین ساغلیغینا قالدیریلار.
قادین اوزونو دؤنده‌ریب منه سوردو:
– نه ایچیرسن اوغول؟
– هر نه اولورسا اولسون.
– شراب، یوخسا وودکا؟ دئییرسن سنه آبجو وئریم؟
– یوخ وودکا، وودکا وئر.
بیر ایستکان گؤز یاشیندان دورو ماراغا وودکاسی تؤکوب قویدو قاباغیما. بونو من شوشه‌نین اوستونده اولان یازی‌دان اوخودوم.
– مزه وئریم؟
– وئر.
بیر بالا بوشقابدا، مئیوه قویوب ایته‌له‌دی منیم قاباغیما. من ده ایستکانی بیر باشا گئتدیم اوسته، بیر دیلیم میوه یئییب، سونرا بوش ایستکانی قویدوم پئشخانین اوستونه، یاواشجا دئدیم:
– بیرینده سوز.
– ماشاا… ، بیر ماجال وئر ایستکانین گؤتو یئره ده‌یسین، سونرا.
آرخادان او سس یئنه باغیردی؛ منده بونو ایچیرم جاوان دوستوموزون ساغلیغینا. ساغ اول، ساغ اول سسی اوردان بوردان ائشیدیلدی.
بیرینده ایچدیم، سونرا داها بیریسین، … ، نئچه سین ایچمیشدیم بیلمه‌دیم. گوزلریم آخیردی، “بار”ین دالیندا کی رف‌ده آراغ شوشه‌لری ساندیم یئرییب اوستومه شیغیرلار، قادین باشین گتیردی منه ساری، دئدی:
– بسیندیر.
دیلیم توتار توتماز دئدیم:
– بیرینده ایچه جاغام.
– یوخ داها بسیندیر، کورلانارسان.
بونو گؤزونو گؤزومه تیکه‌رک، لاپ قولاغیمین ایچینه دئدی. بیر آن گؤزلریم گؤزلرینده سانکی اووسونلادی، خوش بیر قوخو اوزومه توخوندو، دوداقی قاچدی، اختیارسیز الیمی اوزالتدیم سینه‌سینه طرف، دؤشونو سیخدیم. شاققیلداییب دئدی:
– ببو ببو،
بو منیم ائله خوشوما گلدی کی، تازاشدان الیمی اوزالتدیم دؤشونه ساری، او یئنه دئدی:
– ببو ببو،
بیرداها بو ایشی تکرار ائله‌مک ایستیردیم کی دالدان بیریسی یاپیشیب پئیسریمدن چکدی دالی، قودوخ ائله بیل اوزون آچیلدی. ماجال وئرمه‌ییب، تاررررراق بیر شاپالاق اوزومدن. بورنومون قانی قاتیشدی آغزیما. یئدیغیم کؤتگه باخمییاراق، من ائله اؤز حالیمدا‌ایدیم، سرخوشلیغیمدا ائله سانیردیم کی من اونون سینه‌سینه ال اوزاتدیقجا او دئییر؛ ببو ببو، ببو ببو.
ایشله‌ینلرین بیری دئیینه دئیینه، یاپیشیب الیمدن چیخارتدی چؤله، دولو بیر گویوم سو گتیریب تؤکدی ال اوزومو یودوم. ال اوزومو یووارکن، هله رؤیالاریمدا سئیر ائدیردیم. قدیم محله‌میزده اسداله سوتچو گؤزومون اؤنونده ایدی. چرخ اوسته سوت ساتیردی. آرا وئرمه‌دن فیتی‌نین بالونونی سیخیردی، ببو ببو – ببو ببو، آی ی ی … سوت آلان …

بهمن ۱۳۹۳

چاپ

یک پاسخ

  1. سالاملار حورمتلی مسعودآذر جنابلاری.
    دوغروسی هرگون وایبرده زاددا حال حیاتین قدرینی بیلمک ، کئچمیشده ایلیشب قالماماق وبونلارا بنزر مطلب قویوللار کی گوجلی منطیقی آدامین دوشونجه سینه اثر قویور. آنجاق شرقی اینسان اولماقدان یا یاشادولماقداندی ،ندیر کی، بو لامصب نوستالژی نین خصوصی دادیندان واز گئچمک اولمور!!. البته کی قلمیزین قودرتی نئچه قات ائدیب بو دادی. عومروز برکتلی اولسون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ببو ببو / مسعود آذر

ایشیق
www.ishiq.net

آذربایجان ادبیات و اینجه‌صنعت سایتی

ببو ببو / مسعود آذر

ایشیق
www.ishiq.net

آذربایجان ادبیات و اینجه‌صنعت سایتی

ببو ببو / مسعود آذر

ایشیق
www.ishiq.net

آذربایجان ادبیات و اینجه‌صنعت سایتی