ایکی پرده‌ده بیر پییئس
چئویرن: کیان خیاو
ترجمه: کیان خیاو
کیان خیاو

 بیرینجی پرده:

کاراکتئرلر:
بیر ائرکک (حافتال) و بیر قادین (مریم)
صحنه: ایکی پنجره‌لی بیر اوتاق. ایکی صندلی. بیر ماسا اوستونه قویولموش بیر تابوت. تابوتون ایچینده اوستونه آغ چکیلمیش بیر کیشی اوزانیب. مریم تابوتون باشیندا و حافتال تابوتون آیاغیندا دایانیب اؤلویه باخیرلار.
مریم: ایندی نئینیاخ؟
حافتال: بیلیسن گره‌ی نئینیی؟
مریم: نئینیاخ؟
حافتال: بی هئچ اؤزی ده بیلمیر بینین باشینا نه اوین آچاجییام؟
مریم: نه اویونو آچاجاخسان؟
حافتال: سن هئش یاتیب یوخوندا دا گؤره بیلمزسن.
مریم: نه‌یی؟
حافتال: کی من بینین باشینا نه اوین آچاجییام.
مریم: نه اویونو آچاجاخسان؟
حافتال: بلکه دئدیم گلیب آپاردیلار اوزاغ بیر درییه آتدیلار.
مریم: یوووو. (صندلی‌نین اوستونه اوتورور)
حافتال: دییه‌جییم دیبی گؤرینمیین بیر اوچیریما آتسیننار.
مریم: یوووو. (صندلی‌نین اوستون‌دن دورور. )
حافتال: دییه‌جییم ال- قولین تیکه‌لئییب آتسیننار ایته.
مریم: (آغلاییر) سن نییه بئلئیلیسن باااا؟
حافتال: اده بی منه بیر عؤمیر قان اوتدیریب.
مریم: بو سنه نئینیییب باااا؟
حافتال: دای نئینییه‌جه‌یدی؟ نامه یادوندا دییل؟
مریم: آی بالا، او بی سؤز دییلدی کی آخی. (بیر آز دایانیر) آللادیب اؤلدیردوخ بس دییل؟ (صندلییه اوتورور)
حافتال: کیم اؤلدیردی؟
مریم: (بیر آز دایانیر) بیز داااا.
حافتال: بیز یوخ، سن.
مریم: نه؟ (صندلی‌دن دورور) بو دا آخیر پئشه‌ندی داااا.
حافتال: سن اؤلدیردون.
مریم: من نییه باااا؟ (دایانیر) کیم شربتینه سیچان دااواسی قاتدی؟ (دایانیر) کیم لیوانین ایچینه سورنگله نم نه تؤهدو؟ (دایانیر) کیم آخیرده چکیشینن باشیننان ووردو؟ (آغلاییر)
حافتال: سن، سن، سن. اؤزوو چهمه قیراغا هاااا. ایندی کی هئلییه قالدی، بینی کیم آللادیب ائوه گتدی؟
مریم: من. هه، من گتیردیم باااا. من بی ایشتیباه ائله‌دیم داااا. سنین سؤزیوه ایناندیم. (بیر آز دایانیر) ایندی ده پئشمانام. هر شئیه پئشمان. (آغلاییر)
(بیر آز سس‌سیزلیک!)
حافتال: دئمه‌لی بئله‌دی دااای. ایندی کی بئله اولدی، سن اؤلدیریبسن. زهری ده سن وئریبسن، باشیننان دا سن ویریبسان.
مریم: آی بالا، نییه بئلئیلیسن باااا.
حافتال: هه، بیننان بئله گؤر نئینییه‌جییم؟
مریم: نئینییه‌جاخسان؟
حافتال: سیزون باشوزا بیر اوین آچیم کی.
مریم: نه اویونو آچاجاخسان؟ (بیر آز دایانیر) فایداسی یوخدی.
حافتال: سفئیله‌مه گؤریم. (بیر آز دایانیر. قاققیلتییلا گولور) بلکه وئردیم عمیم ایشین گؤردی. (قاققیلتییلا گولور)
مریم: نه ایشی؟ عمین کیمدی؟
حافتال: عمیمی سن تانیمازسان. (قاققیلتییلا گولور) او اؤلییه ده رحم ائلمز. (قاققیلتییلا گولور)
مریم: یانی نه؟ او اؤلویه نئینر کی؟
حافتال: (قاققیلتییلا گولور) اؤلینی قاباغینا اوزادیب سوورا دا … (قاققیلتییلا گولور) ائله او سؤز.
مریم: ال چح، بو سؤزلر نه‌دی آخی؟
حافتال: بی سؤزدر؟ (دایانیر) گؤره‌جه‌یسن بی سؤزدر نه‌دی؟
(بیر آز سس‌سیزلیک!)
حافتال: هه، ائله عمیم یاخچیدی.
مریم: من بیلمیرم. (بیر آز دایانیر) فایداسی یوخدی.
حافتال: دانیشما گؤریم. یوخسا دئییسن سنی ده…
مریم: منی ده نه؟
حافتال: دانیشما دئدیم، دانیشما. (تابوتون آیاغین‌دان گلیر باشینا ساری. اؤلویه ساری اییلیر) گؤریسن دااای، اؤلیبسن. بئله اؤلیبسن، هئچ ائله بیل اوولیننن یوخیمیشسان. بیلمیسن ده کی…
مریم: او چوخ شئی بیلیر. (آغلایا‌راق) او هئش ده اؤلمویوب.
حافتال: (گولور) هه، ائله بی او چوخ شئی بیلیر، بی ده سن. (گولور)
مریم: من بیلمیرم.
حافتال: (الینی مریمه قالدیرا‌راق) دئدیم دانیشما. (اؤلویه ساری اییلیر) هه، سن دانیش. دانیش گؤره‌ی سن نه دئیرسن؟ نظرووه سننن نه ایش گؤریم؟ (تابوتون باشین‌دان گلیر آیاغینا ساری) من دئیرم بئلئیلییی داااای. (بیر آز دایانیر. دوشونور) هه، ائله ده‌رییه آتسوغ یاخچیدی.
مریم: فایداسی یوخدی. (بیر آز دایانیر) خانیمیسینا نه جواب وئره‌جییوخ؟
حافتال: سنه ربطی یوخدی. او بیلر من بیله‌رم.
مریم: هه، اؤزیز بیلرسیز. هر حالدا باجی- قارداشسیز.
حافتال: بلی، آنجاغ سن سیس یئرونده دانیشما.
مریم: (بیر آز دایانیر) او دا نامه‌نی اوخویوب؟
حافتال: کیم؟
مریم: باجین.
حافتال: بیلمیرم. آنجاغ دییه‌سن اوخییب. (بیر آز دایانیر) البته او نامه‌دن قاباغ دا منی سایمازدی.
مریم: حققی وار.
حافتال: فئمینیستلییون توتماسین گؤریم. (حققیدی- حققیدی دئیه‌رک، تابوتون آیاغین‌دان گلیر باشینا ساری. اؤلویه باخیر) من ده اونین عوضینه بینین حققین قویدیم اووجینا.
مریم: اما بونون حققی دییلدی.
حافتال: (حققیدی- حققیدی دئیه‌رک، تابوتون باشین‌دان گلیر آیاغینا ساری) او ائله بیل نامه‌دن قاباغ منیم ده یازدیغیمی اوخیمیشدی.
مریم: حتمن داااا.
حافتال: اوخییاندا چوخ نایراحات اولمیشدی.
مریم: حتمن داااا.
حافتال: آنجاغ من او یازینی اونا وئرمه‌میشدیم، بی وئرمیشدی.
مریم: یوووو، بو وئرمه‌میشدی. دوسلاریزین بیری اونا دئمیشدی.
حافتال: (صندلی‌نین اوستونده اوتورور) البته او قاباغ‌دان منی سایماز.
مریم: حققیدی.
حافتال: اوننان دا دئیرسن کی فئمینیست دییلسن. (بیر آز دایانیر) گؤره‌سن کیم وئرمیشدی؟
مریم: مشترک دوسلاریزین بیری.
حافتال: وای دده، یانی او؟ (صندلی‌نین اوستون‌دن دورور)
مریم: او کیمدی؟
حافتال: احتیمالن… (بیر آز دایانیر) سنه ربطی یوخدی. سن دانیشما.
مریم: هر حالدا گوناه سنده‌دی.
حافتال: سن دانیشما دئدیم.
(بیر آز سس‌سیزلیک!
حافتال: دوغیردان آاا.
مریم: اصلن بونون گوناهی نه ایدی باااا؟ (بیر آز دایانیر) ساده‌جه یازیردی داااا.
حافتال: یازی‌لاری هیرسیمی چیخاردیردی.
مریم: (صندلییه اوتورور) نییه آخی؟ هر شئیین بیر دلیلی اولما‌لیدی آخی.
حافتال: بیلمیرم. ائله بئله. (بیر آز دایانیر) اصلن سنه نه وار بااااخ؟
مریم: (بیر آز دایانیر) اما چوخ گؤزل یازیردی. (بیر آز دایانیر) بعضی یازی‌لاری…
حافتال: سن دانیشما دئدیم بااااخ.
مریم: (بیر آز دایانیر) ائله یازی‌لارینا گؤره…
حافتال: دئدیم دانیشما. (بیر آز دایانیر) بی هئش نه بیلمیردی. هئش نه.
مریم: اما بیلیردی.
حافتال: یوخ، بیلمیردی.
مریم: بیلیردی، چوخ دا بیلیردی.
حافتال: (صندلییه اوتورور) بیلمیردی دئدیم، بیلمیردی. سن دانیشما!
(بیر آز سس‌سیزلیک!)
حافتال: گئدیم عمیمی چاغیریم. بینی بی تهر بی یئرده ایتیرمه‌لییوو.
مریم: نه جور؟ هاردا؟
حافتال: بیلمیرم. عمیم بیلر. دره‌ده، اوچیریمدا، قوییدا، نه بیلیم.
(صحنه‌یه یاغیش سسی یاییلیر. حافتال و مریم صندلی‌دن دوروب، پنجره اؤنونده دایانیرلار. پنجره‌نین دالیندان اوزو تاماشا‌خانایا باخیرلار.)
(بیر آز یاغیش سسی!)
(بیردن ایکی‌سی ده یاغیش سسی‌نین ایچین‌دن گلن سس‌دن دیسکینیب، کوره‌ک‌لرینی پنجره شوشه‌سینه دایایا‌راق، آرخا‌لارینی تاماشا‌خانایا چئویریب، شاشقین بیر دورومدا اؤلویه باخیرلار.)
سس: به- به، نه گؤزل یاغیش یاغیر! حیات ایندی باش‌دان باشا دنیزدیر. باخ، مریم! سن ایندی ایشدن چیخیبسان. اییده بولواری قیراغییلا پییادا یاغیش آلتیندا گئدیرسن. آیاق ایزلرین خییابانا قویولمامیش سیلینیر یاغیش آلتیندا. چتیرسیز ایسلانیبسان. بولودلار منی سنه خاطیرلا‌دیر. بیر اییده آغاجینا سیغینیرسان. موبایلیندا “ک” حرفیله باشلانان آدلاری آختاریرسان. زنگ وورورسان. اوزاق‌دان آغلاماغیوی گؤرورم. بولودلار بو دؤنه گؤزلریوه چؤکور. بو دؤنه بوتون شهره سنین گؤزلرین‌دن یاغیش یاغیر. بؤیرون‌دن بیر- بیر سوووشان ماشین‌لارا باخیرسان. سن یاشادیغین شهرده ماشین‌لارین قاباغینی کسیب شوشه‌سینی سیلن یوخ‌دور. اولسایدی دا بو یاغیشدا اونلارا ایش تاپیلمازدی. یادیندامی؟ بیز آغ یاغیش دئییردیک بئله یاغیشا. ایندی بو آغ یاغیشین آلتیندا نئجه ماشین شوشه‌سی سیلمک اولار کی؟ گؤرورسن داااا، شوشه سیلن قیزجیغازلارا نئجه ده اوره‌ییمیز یانیر. نه اولسون کی بیزیم ماشینیمیز یوخ‌دور؟ بیز اونلارین اللرینی ده اؤپمک ایسته‌ییریک. هله سن بولوار بویونجا حرکت‌سیز سئرچه‌لری ده گؤرورسن. اؤزون کیمی آغ یاغیش آلتیندا جوم- جولوق ایسلانمیش سئرچه‌لرین ده، یووا‌لارینا اوچماغا قانادلاری یوخ‌دور. (سس بیر آز دایانیر)
مریم: (آغلاییر) …
سس: آغلاما مریم، آغلاما! باخ، یاغیش سسی قاریشیب آغلاییشیوین سسینه. سن هله ده چتیریوی آچماییبسان. اونسوز دا گؤتورمه‌دییین چتیری نئجه آچا‌جاقسان کی؟! بو نه سیردیر؟ من ده تئلئفون دالیندا ایسلانمیشام. سنه دئمیشدیم، من اؤلندن سونرا بئله، سن یاغیشدان ایسلانا‌جاقسان، من سندن. یاغیش‌دان قاچما مریم! آغ یاغیشدا دویونجا ایسلانماق‌دان گؤزل نه وار کی؟ باخ، ایندی سن ائویزه یئتیشینجه من ستلجم اولاجاغام، بیلیرم. بوندان بئله چتیریوی گؤتور آنجاق. بیر آز دا اؤزیوی توت! بونجا آغلاماغین خوشوما گئتمیر. بیر آز گؤزلریوی یوموب اوزانما‌لیسان. بیر آز سس‌سیز- سوراق‌سیز دوشونمه‌لیسن منی. من ایندی او بولوارداکی سئرچه‌لره بنزه‌ییرم. آغ یاغیش آلتیندا قالان سئرچه‌لره. سن ائویزه یئتیشن کیمی من ده یوواما گیره‌جه‌یم. سون یوواما! سن‌سیز یووام سویوق اولا‌جاق. چوخ سویوق، بیلیرم. یووام دره‌ده اولور اولسون، اوچورومدا اولور اولسون، نه فرقی وار؟ اینسان تکی دیریلییینده بیر آز فرقلی یاشاسا یاخشی اولار. یاخشی آدام اولماق قولای دئییل گولوم! کیمی‌سی تورپاق آلتیندا، کیمی‌سی تورپاق اوستونده، نه فرقی وار؟ حقیقت هر زامان اؤزونو گیزلی ساخلاییب. اونو کشف ائتمه‌یه چوخ دا چالیشماق لازیم دئییل. اینسان‌لار یاشاماق اوچون شهرلر، کندلر، داغ‌لار، دره‌لرده آرد- آراسی کسیلمه‌دن اوزون- اوزادی قویروق‌لار اولوشدورورکن، هامی‌سی بیر- بیرینه اؤزگه‌دیر. کیمسه کیمسه‌یه اولدوغو کیمی قارشیلانمیر. اینسان اینسانی سئومیر کی، سؤمورور. من آنجاق سنی سئودیم مریم! سنی سئودیم، بیر بالیقدا بیر دنیز تجروبه‌سی الده ائتمک اوچون. حال بو کی دنیز بالیق‌دان بوم- بوش ایمیش. بالیق‌لار چؤپلوکده چابالاییردی. (سس بیر آز دایانیر. یاغیش سسی ده کسیلیر.)
سس: منیم سیزدن نفرت ائتدیییم یوخ، دوست‌لار! سیزین منی اؤلدورمه‌ییز منی گوناهلاندیرمیر. منی اؤلدوردویوزون سببی‌سه حیاتیزدا ایلک دؤنه بیر ایسته‌یین، سیزین گؤزله‌دیییز کیمی نتیجه‌لنمه‌مه‌سعیدیر. من چالیشقان بیریسعیدیم. اؤز بیلدیییم، اؤز باشاریمجا یازیردیم، یارادیردیم. کیمسیله ایشیم یوخ ایدی. سیزسه منی اؤلدورمکله بیر چوخ شئی‌لری یوخ ائتدیز. اما مریم، من سنی تورپاق آلتیندا دا سئومه‌سم اولمایا‌جاق. هر گون تئلئفونلاریوی گؤزله‌یه‌جه‌یم. هر گون مساژلاریوی آچیب اوخویاجاغام. کیمسه سئومه‌دییی کیمی سنی سئوه‌جه‌یم یئنه. هردن منه باش وور لوطفن. سنه داریخاجاغام. و سن، حافتال! سن مریمی اولدوقجا آشاغیلادین. اولدوقجا ایهانت یاغدیردین اونا. اونون آدی‌یلا اوینادین. و ده حئیثیتی‌یله. مریم‌دن ایسته کی سنی باغیشلاسین. اینان، منیم سنه نفرت ائتدیییم یوخ. تکی ایسته، سنی باغیشلاسین مریم. آرتیق سنه دئمه‌یه بیر سؤزوم یوخ. هامی‌سی بو قدر ساده. تامام. کئفیزده اولون!
(بیر آز سس‌سیزلیک!)
حافتال: من بیردا قالا بیلمه‌رم. گئدیرم عمیمی گتیرم. (صحنه‌دن چیخیر.)
مریم: (صحنه‌نین چیخاجاغینا باش چکیب یئرینه قاییدیر. ال- آیاغینی ایتیریب. یان جیب‌لرینی آختاریر. موبایلی چیخاریب قولاغینا دایاییر. بیر آز دایانیر) الو! پولیس؟!
بیرینجی پرده‌نین سونو.►

ایکینجی پرده:

کاراکتئرلر:
مریم- حافتال- رضا- سعید- شهروز- عادیل- نادیر- عسگر- دومان- سولماز- قارداش ۱- قارداش ۲- بیر قادین- ۹ یاشلی بیر قیز- فرهاد- ماحمید- اقدس- مهسا- رحمت- شاهروخ- قارداش ۳- قارداش ۴- فریبا- سوسن- افلاتون- ارسطو- باجی ۱- باجی ۲
⌡صحنه: اورتادا بیر تابوت. نئچه نفر ایکی- ایکی، بیر- بیر داغینیق شکیلده دایانیب‌لار. هامی تابوتا باخا‌راق بیر- بیریله دانیشیرلار.⌠
رضا: (سعیده) اصلن اینانا بیلمیرم. دونن ماشیندا باهم ایدو. گولیشی جانیمی آلیردی.
سعید: (رضایا) من دئیردیم به اونی سیقار اؤلدیرر.
شهروز: (عادیله) یاخچییام. مدره‌سه‌نین مودیری اولمیشام.
عادیل: (شهروزا کوتونون قول دویمه‌سینی گؤسته‌ریر) جانی اوچین، تح یوز مین تومن بی ایکی صدف دویمییه وئرمیشم.
نادیر: (عسگره) بیردان هارا گئده‌جیسن؟ تزه بی شعر دئمیشم.
عسگر: (نادیره) سن دای پیللی اولاننان بیزی سایمیسان.
دومان: (سولمازا) به او بها‌دور هاردادی؟ قرار ایدی بیردا بیر آز دانیشسین آخی.
سولماز: (دومانا) باکی‌دان هئش خوشیم گلمیر ائئئ، گئتسم آنکارییا گئده‌جییم.
قارداش ۱: (قارداش ۲ نین یانیندا باشی قینیندا، الی قوینوندا دایانیب آغلاییر) …
قارداش ۲: (بیر قادین و ۹ یاشلی بیر قیزین آراسیندا دایانیب، قیزی قوینونا آلیب بیرلیکده آغلاییرلار) …
فرهاد: (ماحمیدا) بابام، بی گولی نئینیر آخی؟ قارداشیم ایچه بیلسئیدی، دوریب گئدردوو ییلاغا.
ماحمید: (فرهادا) آمما بی منیم اوستده تیحدیییم اوتاغی ییلاغدان دا چوخ ایستیردی.
اقدس: (مهسایا) بئش میلیون حسابینا تؤکوردوم قبول ائله‌مه‌دی.
مهسا: (اقدسه) مارلین مونروئنی بتر سئویردی.
رحمت: (شاهروخا) چارراهداکی ساختومانی سؤکنده چوخ اینجیمیشدی.
شاهروخ: (رحمته) همشه ده آناسی‌نین دورنالاریننان دئییردی.
قارداش ۳: (قارداش ۴ ون بوینونا ساریلیب آغلاییر) …
قارداش ۴: (قارداش ۳ ون بئلینی قوجاقلاییب آغلاییر) …
فریبا: (سوسنه) سن نه دئدین؟ ویرجینیا وولف؟
سوسن: (فریبایا) هن، بی ده نوام چامئسکی.
افلاتون: (ارسطویا) موسیقی تحلیییندی، یوخسا درده چاره ائله‌میر.
ارسطو: (افلاتونا) نیچه‌نین ده کی بیغ‌لاری هیتلئرده اولمالیدی.
باجی ۱: (باشینی باجی ۲ نین چیینینه قویوب آغلاییر) …
باجی ۲: (ساغ الیله باجی ۱ ین دالدان ساغ قولوندان یاپیشیب آغلاییر) …
ارسطو: (افلاتونا) او یازینی سایی اوزینن اون ایکی دفعه اوخیمیشام.
افلاتون: (ارسطویا) سسی، گولیش‌لری، اؤزی، حئییف اولدی.
سوسن: (فریبایا) یوخ، او اوپوزیسیوندی، بونا پوزیشین دییر.
فریبا: (سوسنه) دوغوردان؟ بس اوندا… هن.
شاهروخ: (رحمته) بایئر مونیخ بی گئجه رئال مادریدی سؤکه‌جی.
رحمت: (شاهروخا) بی قبریستانی دا یوخاری باشا کؤچیتسئیدوو، یامان اولاردی.
مهسا: (اقدسه) نئینییه‌جی؟ میر- مینجیغ دا اولسا اولار.
اقدس: (مهسایا) اما من قیزیلی چوخ ایستیرم داااا.
ماحمید: (فرهادا) من بیلیردیم، لا مصصبین گؤزدریننن قم یاغیردی.
فرهاد: (ماحمیدا) بابام، گولنده ده هئچ اوره‌یدن گولمیردی.
سولماز: (دومانا) شعرلریمی اوول اونا آپاریردیم دوزه‌لدیردی.
دومان: (سولمازا) هئئئئی، فانی دونیا کیمه قالدی؟
عسگر: (نادیره) بی توپ کالباس، بی بسته چؤره‌ی، دای نه دئییسن؟
نادیر: (عسگره) من آمما پوسته یئییب شعر اوخییاجییام هاااا.
عادیل: (شهروزا) من باشی داشدی هئش باش آچیرام کی.
شهروز: (عادیله) سن ده مودیر اولسون اولاری بیلرسن.
سعید: (رضایا) دای منه بی شهرین داد- دوزی یوخدی.
رضا: (سعیده) کاش او مریمه بی زه‌ی ویرا بیلئیدوو.
(بیر آز سس‌سیزلیک!)
(قارداش‌لار، باجی‌لار، بیر قادین و ۹ یاشلی قیز آغلاشیرلار. مریم صحنه‌یه گیریر. آدام‌لارین آراسیندا دولانماغا باشلاییر. سونوندا تابوتون باشیندا اوتورور. چایکووسکی‌نین “بؤیوک صنعتکارلار اوچون آغیت” سمفونی‌سی صحنه‌یه یاییلیر.)
مریم: (ایچین- ایچین آغلایا‌راق) آه، هر شئیین نتیجه‌سی دئماخ بویوموش! اولسون، گئت، سن ده او بیرلری کیمی گئت! گئت اومید ایشیغیم، گئت! اوش گئت اولدوزلارا ساری! نئچه گوندو گؤی اوزونه یالواریرام سنه ایستی بیر قوجاق وئرسین! اولدوزلارا دئمیشم، بو گون‌لر سیزه تازا بیر اولدوز قوناخ گله‌جاخ. اونو قورویون لوطفن! بیلیرم اویانمییاجاخسان، اما نه اولور اویان! اویان اومید ایشیغیم! اویان، گینه منی سئو، منی قورو! بلکه دؤنه بیلدین هله، گئرییه دؤن، نه اولور؟! لعنت اولسون بو اؤلومه! لعنت اولسون بو یاشاما! سن کی بئله گئتمزدین آخی! دور بی باخ گؤر نه حالدیام! بونجا زامان سنله بیرلیخدا اولدوغوما دیمیره‌ممی؟ لوطفن قوی بیر داها سنین پاریلتیوی قبول ائدیم! لوطفن، بیر دفعه، نه اولور؟! چوخ‌دان قارانلیغام، اومید ایشیغیم! لعنت اولسون قارانلیغا! لعنت اولسون حافتالا دا، منه ده! لعنت اولسون سنه ده، دور ایاغا! لوطفن اومید ایشیغینلا بیر داها منی آیدینلات، بیر داها منی ایسیندیر! (تیتره‌مه‌یه دوشور) باخ گؤر نئجه اوشویورم! او آغ یاغیشین آلتیندا قالاننان بری بئله‌یم. دور بو قارانلیغی یوخ ائله جانیمدان. یوخ ائله بو اوشوتمه‌نی بدنیمدن. اصلن یوخ ائله منی! بوراخ گئدیم جهنمه، قیزیشیم! من سن‌سیز دااا هئش کیمه ایذین وئرمییه‌جاغام. سن‌سیز ایذین وئرمییه‌جاغام بو حیاتا بئله. بیلیرم اینانمییاجاخسان، اما نه اولور بو دفعه اینان! سؤز وئریرم. دا قویمییاجاغام بیزه انگل اولسون‌لار. لعنت اولسون بو یاشاما، بو اؤلومه! (جیبیندن بیر میداد، بیر دفتر چیخاریر) باخ، او گون سنه بیر دانا گونلوک دفتری، بیر دانا دا میداد آلمیشام. دور بو میدادین گوجیله گینه ده منی سئو، منی قورو! قویما بوننان آرتیخ سنه داریخیم! جیسمیم، جانیم سنه عایید، دور، نه اولور؟! (بیر آز دایانیر. اؤزونو توختا‌دیر. داها آغلاماقلی دئییل. تابوتون باشیندا اوتوردوغو یئرده، آیاغا قالخیر. دفتر‌له میدادی تابوتون اوستونه قویور) اولسون، بولار مننن سنه سون هدیه. منه نه دئماخ ایسته‌سن بونا یازارسان. بو تئزلیغا گلیب سننن آلاجاغام. گئتدیم، داها قالماخ اوچون هئش بیر سبب یوخ. سننن آیریلمیرام دا هاااا، فقط گئدیرم. (گئدیب ۹ یاشلی قیزین یانیندا دایانیر. سمفونی سسی کسیلیر.)
(حافتال صحنه‌یه گیریر.)
حافتال: (قاهقاهایلا گولور) اؤلی باغیشدادی منی. او مؤلیف منی باغیشدادی دای. (بیر آز دایانیر. شاشا‌راق صحنه‌ده‌کیلره باخیر. آغلاییر) او یئددی نفرین یوخیسینا گیرمیشدی. (بیر آز دایانیر. قاهقاهایلا گولور) او منی دای باغیشدئییب. (بیر آز دایانیر. آغلاییر) آنجاغ من اونی اؤلدیردیم. (بیر آز دایانیر. قاهقاهایلا گولور) آنجاغ او منی باغیشدادی. اؤلی منی باغیشدادی. (دوردوغو یئرده اوتوروب صحنه‌ده‌کیلره باخیر.)
صحنه‌ده‌کیلر: (صحنه‌نین اوجونا گلیرلر. بیرلیکده) بیز قاتیلی باغیشلادیق. سیز ده اونو باغیشلایین!
(سون)
بهمن آیی ۱۳۹۲ (۲۰۱۴)

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایکی پرده‌ده بیر پییئس

مؤلیفین اؤلومو

کیان خیاو
www.ishiq.net

آذربایجان ادبیات و اینجه‌صنعت سایتی

ایکی پرده‌ده بیر پییئس

مؤلیفین اؤلومو

کیان خیاو
www.ishiq.net

آذربایجان ادبیات و اینجه‌صنعت سایتی

ایکی پرده‌ده بیر پییئس

مؤلیفین اؤلومو

کیان خیاو
www.ishiq.net

آذربایجان ادبیات و اینجه‌صنعت سایتی