چئویرن: حمید احمدزاده (تیلیم‌خانلی)
ترجمه: حمید احمدزاده (تیلیم‌خانلی)
حمید احمدزاده (تیلیم‌خانلی)

رحمتلیک «صمد بهرنگی» ۱۳۴۴ ده کی «آدینه مهدآزادی» درگیسی‌نین ادبی و فلسفی مطلب‌لرینی مطبعه «مهدآزادی»ده یاییردی، بیزلر ده او زامان او مطبعه‌نین ایشچیلری‌ایدیک. باشدا «عباد احمدزاده»(مسئول شعبه ایدی)، «نوروز احمدزاده»، «مسعود آخوندی»، «سعید آخوندی»، «مقصود راپل»، «یحیی بخشایشی»، «رضا رشیدی»، «اکبر صبوری» بیر ده من، درگی‌نین مطلب‌لرینی قورقوشون حروف‌لاری ایله «گارسالاردان» «وئرساتلارا» دوزردیک. «احمد حیدریان»، «میرباقر و میرقادر هاشمی» بیز دوزدوغوموز حروفلاری کی عباد احمدزاده صفحه‌بندلیک ائله‌میشدی، چاپ ائلردیلر. «یعقوب اسدزاده» و «غیبعلی علیزاده اورنجقی» روزنامه‌لری صحافی ائدیب، ترتیب ائدندن سونرا، «داود ایران‌نژاد» روزنامه‌لری بوتکالارا پایلاردی.
اصلینده رحمتلیک صمد بهرنگی ده بو ایش ده تک دگیلدی. صمد بهرنگی‌نی مطبعه و روزنامه مهدآزادی‌یه گتیرن، «رحیم رئیس‌نیا» و «غلامحسین فرنود» و «عبدالحسین ناهیدی آذر» اولموشدولار. البته صمد ایله بیز بیر محله‌دن اولماغیمیز اوچون اؤنجه‌دن تانیش ایدیق. اونا علاوه، بیزیم عباد، مرند شهرینده ایلک چاپخانانی غیرقانونی آچماغی ندنی ایله ساواکا احضار اولموشدو. او زامان، صمد بهرنگی ده، «پاره پاره »کیتابینی غیرقانونی چاپ ائله‌دیغی اوچون ساواکا احضار اولموش، اورادا عباد و صمد گؤروشوب، داها آرتیق یاخینلاشمیشدی‌لار.
آنجاق نه باشیزی آغریدیم؛ صمد مطبعه‌یه گلرکن بوتون ایشچی‌لر کئف ائلردیلر؛ چونکی صمد هئچوقت مطبعه‌یه الی بوش گلمز‌ایدی، هئچ اولماسایدی «لب لبی» و یا «پخله» بولوم- سولوم اولاردی. آدینه هر ۱۵ گوندن بیر یاییلاردی. او اوزدن فوق‌العاده ایش آپاراردی و اکثر گئجه‌لر آخیر وقته قدر ایشلردیک.
شام زامانی مرحوم «ابراهیم عظیم پور» کارگرلره چلوکباب آلیب گتیرردی. او زامانلار مرحوم «غلامحسین ساعدی»، «توپ» کیتابینی یازیردی و آدینه‌نین بیر چوخ نومره‌سینده او کیتاب تبلیغات اولاردی. بعضی گئجه‌لر، آقای ابراهیم عظیمپور، آقای ساعدی و مفتون امینی ایله گلردیلر. او گئجه‌لر داها بیزیم طوی- بایرامیمیز اولاردی؛ چونکی مرحوم ساعدی اوشاقلارا نوشابه و سوسیس آلیب گتیرردی (من عؤمرومده ایلک اولاراق سوسیسی اورادا گؤردوم). ساعدی اولان گئجه‌لر اؤزه‌ل گئجه اولاردی. او گئجه‌لر (الله گناها یازماسین) استکانلار دولو- دولو بیر- بیرینه ده‌ییب، گؤیده چاخناشیب، آذربایجان ساغلیغینا فیریلداردی‌لار. مرحوم «مناف فلکی تبریزی» و «کاظیم سعادتی» شوخلوقدا و ایچمکده هئچ کسه ماجال وئرمزدیلر. «بهروز دهقانی» و «مجید تبریزی‌وند» جمعه‌نین داغ برنامه‌سی‌نین تداروکونو گؤرردیلر. رحمتلیک علیرضا نابدل(اوختای) زندگانلیغی کیمی چوخ مرتب، ادبلی و درین آدام ایدی؛ هئچ کس اونون کئفلنمه‌سینی و پیس سؤز ایشلتمه‌سینی گؤرمه‌دی، اما او رحمتلیک او گئجه‌لر حزین سسی ایله کی حالا دا قولاغیمدا جینگیلده‌ییر، «عاشیق حسین جوان»ین «نرگیز» ماهنیسینی «ایروان چوخورو» هاواسیندا اوخویاردی:
آلا گؤز اوستوندن گلن قاشلارین…… جانان
نه گؤزه‌ل چاتیلیب آراسی نرگیز.
اونون رنگی طبیعتدن قاریشیب……. جانان
وسمه‌سی، سورمه‌سی قاراسی نرگیز.
آنجاق بو ماهنینی علیرضا اوخویارکن «نوروز»دان دا یاردیم ایستردی؛ آخی نوروزوندا سسی چوخ گؤزه‌ل و خوش‌الحان ایدی. بئله‌لیک‌له ۱۷ نومره «آدینه مهدآزادی» بیر ایل یاریم مدتینده یاییلدی، اما او ادبی فعالیتین عؤمرو آز اولسا بئله، تاثیری دونیالار قدری اولدو. بیر چوخ آدام پهلوی رژیمی‌نین دئوریلمه‌سینی آدینه مهدآزادی‌نین حرکتی ایله باغلی بیلیرلر.
اؤیله او چئوره‌ده اولان انسان‌لار ۱۳۴۷ انقلابی حرکت‌لره ال قاتیب و ۱۳۵۰ده بیر چوخ عزیز‌لریمیز مبارزه مسلحانه‌ده جانلارینا قییدیلار؛ بیر چوخو دا توتوخلانیب، آغیر شکنجه‌لردن سونرا اوزون مدت زاندانلارا معروض قالدیلار.
استانبول ۱۴۰۱ بایرام آیی

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

صمد بهرنگی و یولداشلاریندان بیر خاطیره (شفاهی تاریخ)

حمید احمدزاده (تیلیم‌خانلی)
www.ishiq.net

آذربایجان ادبیات و اینجه‌صنعت سایتی

صمد بهرنگی و یولداشلاریندان بیر خاطیره (شفاهی تاریخ)

حمید احمدزاده (تیلیم‌خانلی)
www.ishiq.net

آذربایجان ادبیات و اینجه‌صنعت سایتی

صمد بهرنگی و یولداشلاریندان بیر خاطیره (شفاهی تاریخ)

حمید احمدزاده (تیلیم‌خانلی)
www.ishiq.net

آذربایجان ادبیات و اینجه‌صنعت سایتی