«سَس‌لرین تراژئدی‌سی خسته‌خانا یاتاغیندا» رومانینا بیر باخیش!
بو اثر خیال و خاطیره، تبریز حسرتی و اینتیظار برزخی آراسیندا، آیهانین نیسگیل حیکایه‌سی‌دیر. حیس‌لری گوجلو و گرچک یاشایان و یاشادان آیهان، خسته‌خانا یاتاغیندا اؤزو، گودوکچوسو و کؤلگه‌سی و اطرافیندا اوتاق، دووارلار، پنجره، لامپا، پیلله‌لر، باشماق، تئلفون، تاوان و جانلی جان‌سیز اَشیاء هر نه وارسا روح‌لارینا توخونوب هر ذره‌لری ایله دانیشیب، اونلاری دیله گتیریر. وارلیغی ایله اوخشاییر و آنلام قاتیر هامیسی‌نین وارلیق‌لارینا و یوخلوغو ایله درین بوشلوق‌‌لاردان، داها درین آنلام‌لارا چاتدیریر: «وارلیغی و یوخلوغو، خیالی و خاطیره‌نی.»
خسته‌خانا یاتاغیندا هر آخشام ساعات ضربه‌لری ایله اوره‌ک دؤیونتوسو بیر-بیرینه قاریشیب باشی اوستونده اؤلومجول بیر حسرت مارشی چالارکن، او آیینجار-آیینجار سسله‌ین نفس‌لری‌نین ماهنی‌سی ایله جان‌سیز اَشیانی اؤزگورجه یاشام رقصینه آیاغا قالدیریب، درد هاواسینا آجی-آجی اوینادیب، ظالیم تقدیره گولومسه‌یه‌رک اَزَلیَّتـدن اَبدیَّته قده‌ر اؤزو اؤلسه بئله، هئچ اؤلمه‌ین عشقی ایله اؤلومه مئیدان اوخویور. و بئله‌جه اؤلومدن اؤنجه‌کی متنده سس‌لر چوخ قاپالی و حبس ائدیجی فورمادا گؤرونور، اَشیا و مکان‌لار بولانتی‌لی، آغیر یورقان، قالین پرده، دانیشمایان دووارلار، سؤنوک لامپا و دوققوز کی زامانین بیتمک اوزره اولدوغونون خبرینی وئریر، آما اؤلومدن سونرا هر نه ده‌ییشیر، یورقانین آغیرلیغی چکیلیر، پرده آچیلیر، پنجره‌دن ایشیق دوشور، دؤرد سایی‌سی، دؤرد یؤنون آزادلیغینی یادا سالیر و روح اوچور…
بو ایکی فاز آراسیندا متن هر زامان بوتون فورماسینی قورویور، آما آرایه‌لرین معناسی ده‌ییشیر، قاپالیقدان آچیلماغا، حبسدن آزادلیغا، وارلیقدان یوخلوغا و یوخلوقدا داها عئینی وار اولماغا کئچید وورور.
سورئالیست یاناشما، متنده تکرار اولان موتیف‌لرده، بورکولموش زامان-مکان گؤرونوش‌لرده و بیر داییمی نیگرانلیق اورتاسیندا گرچک‌لَشن حضور ایله آشکارلانیر. پیسکولوژی تفسیر اونو گؤرسه‌دیر کی اثرین بؤیوک قیسمی یاتاقدا کسیلن باخیش‌لاردان و یارالی بیلینجین گیزلی قات‌لاریندان قایناقلانیر. اؤلوم ماجراسی، یالقیزلیق حیسّی، کیم‌لیگین پارچالانما دوشونجه‌سی و سسین گلمه‌مک قورخوسو، یازارین جومله قورولوشو و دیالوق‌لاریندا بیر نئچه پارالل تاکتیک اولاراق گئت-گئده بؤیویور و اثری قانادلاندیریر.
بو اثر هر هانسی بیر لوژیک آنلامی حقیقته باغلاماقدان قاچیناراق، اوخوجونون اؤز شعورو ایله اثر دۆنیاسی آراسیندا کؤرپو قوروب آزادجا دویغولار و دوشونجه‌لرین حرکت ائتمه‌سینه ایمکان وئریر.
بئکئتین اثرلری کیمی، بو اثری داها یاخشی آنلاماق اوچون سورئالیست و پیسکولوژی، بلکه ده ابزورد اوخونوش متنده‌کی رمز و ایمالاری آچماق اوچون ان اویغون یاناشماق‌دیر.
عزیز قارداشیم آیهان میانالی‌یـا میننتدارام بیرینجی‌سی، خسته‌خانا دا هر اینسانین دینجَلمک اوچون یاتدیغیندا، بئله بیر اثری یازیب یارادیب، آجی‌لارینا یارادیش آجی‌لارینی قاتماق اوچون و ایکینجی‌سی هر زامان کیمی اثرینی الیمه چاتدیریب منه بو اوخونوش لذتینی یاشاتدیغی اوچون.
