انقلابین اوللرینده بیر چوخ نشریه ائله ایرانین باشا – باشی ایله برابر آذربایجاندا، اؤزللیکله تبریزده ده نشر اولماغا باشلادی‌لار. خوشبختلیک‌له بونلارین بیر سیراسینا مطبوعات تاریخیمیزده اشاره اولونموشدور، اما مع‌الاسف بیر چوخونا دا یا اشاره اولونماییب، یادا چوخ آز. بو چوخ آز اشاره اولونان هفته‌لیک‌لرین بیریسی ائله «ملانصرالدین» ایدی. بو هفته‌لیکین بیرینجی ساییسی۱۲/۳/۱۳۵۸ ده اوجا تبریزده نشر اولماغا باشلامیشدیر. ماراقلی‌دیر کی بو هفته‌لیکین نه عنوانی هفته‌نامه‌ده قید اولونموشدور، نه چیخاردانلاری! بیر اونا گؤره هفته‌لیک آدلاندیردیق کی بیر نئچه ساییسی الیمیزده اولوب و سیرا ایله چیخمیشدیر.
ملانصرالدین تورکجه – فارسجا نشر اولونوب، «یورقانسیزلار ارگانی» دا لوگونون آشاغی حیصه‌سینده قیده آلینمیشدیر. ماراقلی‌دیر کی بو ملانصرالدین بلکه، جلیل محمد قلی زاده‌نین ملانصرالدین درگیسین ذهن‌لره سالیرمیش. نییه کی بو دا ائله طنز ایدی؛ بوندا دا کاریکاتورلار وار، اما بو هفته‌لیک تورکجه – فارسجا ایدی. ظاهرده یازیچی و شاعرلری تانیماق اولمور. نییه کی او دؤرون مطبوعاتیندان اولان امضالاردان بورادا گؤرمک اولمور. ملانصرالدینده گئدن امضالاردان بونلاری گؤسترمک مومکوندور: سیسقا، پولاد، حاج اوغلی، ح – روشن، موسورمان بالاسی، ستاره، محمد علی، ف.م.رجا، مراغالی، جعفر قلی و… بونلار دورسونلار بیر طرفده، تانینمیش شاعر و یازیچی‌لارین دا یازی و شعرلریندن گاهدان گؤرمک اولوردو. مثلاً احمد شفائی‌نین صابردن فارسجایا ترجمه لری، عزیزنسینین یازی‌لاری و… کیمی‌لر.
چوخ آراییب، آختاراندان سونرا، دوشوندوک کی بو ملانصرالدینی گویا تانینمیش ادیب اوستاد محمد پیفون نشر ائدرمیش. ۵۸نجی ایل اوستاد پیفونون هله ۳۳ یاشی وار ایدی، اما بونا باخمایاراق یاخشی مدیریتی اولموشدور. او بو هفتهلیکدن سونرا بیر سؤزلوک و بیر سیرا کیچیک – بؤیوک ایشلر ده گؤروب، اما مع‌الاسف سونرالار ظاهراً قلمین غلاف ائیله‌میشدیر! هر حالدا بو آتدیم‌لار ده‌یرلی و فایدالی بیر ایشلر کیمی تاریخده قالاسی‌دیر. یازیق‌لار اولسون جناب پیفونی تاپا بیلمه‌دیک کی، بو هفته‌لیکین باشقا یازیچیلاریندان، شاعرلریندن، رسام لاریندان و… سوروشاق. اوستاد پیفونا هارادا اولسالار جان ساغلیغی ایله کؤنول خوشلوغو دیله‌ییرک.
ملانصرالدینین ایکینجی سایی۱۹/۳/۱۳۵۸ ده نشر اولور.
اوچونجو سایی سی۲۶/۳/۱۳۵۸ده
دؤردونجو نومره۲/۴/۱۳۵۸ده.
قایناقلار، ایضاحلار :
نشریات تبریز (۱۲۳۷-۱۳۹۳): مهدی قنبروند، فرهاد دیرنگ. نشر- مهد آزادی – تبریز ۱۳۹۳. تاسفله بو کتابدا ان آز بیلگی بو هفتهلیکدن وئریلمیشدیر.
حؤرمتلی عرفان احمدی جنابلاریندان ملانصرالدینین الده اولان نومره‌لرین تمناسیز بیر نئچه گون بیزیم اختیاریمیزدا قویدوقلارینا گؤره، بو نوع ایله اؤز منتدارلیغیمیزی بیلدیرمک ایستردیک.
