دونیانین
لیلا ندایی
حئیرته دالمیشام اؤز ایچیمده من،
نه‌دنسه آزالمیر ناری دونیانین؟!
تؤکولور هر یئرده مظلومون قانی،
گون به گون چوخالیر هاری دونیانین.
توخلاری آزدیسا آجلاری سایسیز،
یوخسونلار ایچینده بیزیم کند تایسیز،
فیکیردن چییلپاقدیر دیله‌نیر وای‌سیز،
بورویوب هر یئری زاری دونیانین.
اولوس وار بارینیر دوغا باغیندان،
ذوق آلیر سایسیزجا یاشام چاغیندان،
سئودیگین گؤتورور دره‌ـ داغیندان،
بیزلره زای اولور باری دونیانین.
اوغول‌ـ قیز سیندیریر آنا حؤرمتین،
ده‌یردن سالیرلار آتا زحمتین،
هر لحظه داشلاشیر قلبی ملتین،
داها قالماییبدیر عاری دونیانین.
گولوستان تالانیر آغلاییر بولبول،
چمنده ساچینی یولورو سونبول،
کؤنلونو داغلاییر گؤزل قرنفیل،
بورویور باغلاری خاری دونیانین.
اوچونجو دونیادا ساواش دایانمیر،
اؤلوسو چوخالیب کیمسه سایانمیر،
بو قدر های ـ کویه یاتان اویانمیر،
ائله بیل چوخالیب کاری دونیانین.
نه اوچون ترس اولوب بیزیم ایشیمیز،
سوسوبدور دانیشمیر هئچ بیر کیشیمیز؟
یادلاشیر ائولرده ارلرـ ائشیمیز،
موخالیف چالینیر تاری دونیانین.
سئونلر رحم ائتمیر گؤزل یارا دا،
آتماییر اؤزونو چایا سارا دا،
فصبل‌لر دؤنوبدور قیشا بورادا،
کسیلمیر گؤیوندن قاری دونیانین.
«لیلا»نی یاندیریر‌ـ یاخیر بو گئدیش،
دوداقلار یاسلیدیر اؤلوبدور گولوش،
ایچینه شوملاییر بوشالیر هر ایش،
قیمتدن سالینیر واری دونیانین.
