afrasiabيئيه‌سيزلييميزين ماناسی
افراسياب نورالهي

(استاد ستار گولمحمدي‌نين ماناس پوئماسي اوز‌رينده)

صحبت يئنه يئيه‌سيزلييميزدن گئدير. “يئنه” دئدييمده، بوندان اؤنجه، “يئيه‌سيزلييميزين خودافريني” آدلي ايشله‌دييم مقاله‌يه و بو عنوانلادا، آرديجيل مقاله‌لر فيكرينده، مقاله‌لر دردينده اولدوغوما دؤنورم. ياديما گلير، او مقاله‌ني اولو ممدآرازين بئله بير بند ايله باشلاميشديم؛
خودافرين سؤيكندييي ساحيل‌لر قايا
ديكه‌لنه ديرك اولماز، آشانا چييين
گؤزلولرين گؤزلرينين قاباغينداجا
سؤالي يوخ، جاوابي يوخ يئيه‌سيزليين
“گؤزلولرين گؤزلرينين قاباغينداجا سؤالي يوخ، جاوابي يوخ يئيه‌سيزليين”.  دئيرديم؛ صيرف بو ايكي ميصراعنين اوزرينده، بير ايل دئييل، ايكي ايل دئييل، ايللرله دايانيب ايشله‌مه‌ييميزه يئر وار. بو كيمي ميصراعلاريميزدان قاچماق دئييل، بلكه آزاجيق يئيه‌لندييميز آيليق، اوچ آيليق آديني داشييان ايلليك درگي‌لريميزينده‌هامي صحيفه‌لرينده،‌هامي نؤمره‌لرينده  يئر وئردييميز گركير. و او قدر اؤنم وئرمه‌لييك، او قدر اؤنم داشيماليديرلار بو كيمي ميصراعلاريميز؛ آرتيق سؤالي يوخ، جاوابي يوخ دئييل، سؤالي چوخ، جاوابي چوخ اولماليدير يئيه‌سيزلييميزين و يئيه‌سيزليك‌لريميزين…
و بو كيمي ميصراعلار، بو كيمي تجربه لر بو گون بيزده يوخدودا دئييلدير، هله بلكه چوخدودا بو كيمي يئيه‌سيزليك‌لريميزده. و يئيه‌له‌نيلرسه، بؤيوك بير گليشمه‌سينه  و ايره‌ليله‌ييشينه سبب اولار  گونئي ادبياتيميزين. بو ايسه بيزده يوخدو. ياني باشاريلمير داحا دوغروسو. ياني هله كي، باشاريلمير…
“ماناس” پؤئماسي دا، بو كيمي قوربت‌لريميزين قريب‌لريندن دير. آدي، ساني ديللرده گزسه ده، هله كي؛ اؤزونون، سؤزونون يئري بوش گؤرونور او يوخاري دا توخوندوغوموز آزاجيق يئيه لندييميز درگي لريميزده. آما اوزرينده دايانيلارسا، بؤيوك بير سؤز قونوسونا دؤنه بيله جه يينه اينانماق و بير نئچه آچيدان دا ساوونماق اولار. آما ايسترديم هر شئي دن اؤنجه بير خلاصه وئريم. بيلديينيز كيمي؛
ماناس بير ائرمني فردي اولور. واختيلا مقصدلي اولاراق، داشناك لار ساريدان، آذربايجانين قاراداغ و قاراباغ ماحاللارينا يورودولن ائرمني لردن. و قاراداغين وينه كنديندن اولور. بير ايلي بد گلير، ائله كي؛ بوتؤو بير واردان، يالنيز بيرجه آتي قورتولوب قالير. و عائله سي ائله بير كؤكه قالير؛ بير قارين چؤره يه محتاج اولور. نئيليم نئجه ائلئييمه دوشور. بو واخت قاديني گؤستريش وئريركي؛ آتي آپاريب ساتيب چؤرك پولونا وئرسين. آما اوچ گون گزديكدن سونرا، هئچ يئرده مطلبي سهمانا دوشمور.و نهايت بئله بير قرارا گلير كي؛ بلكه موشكولونو دوست الي آچار. و ائله بو قرارلادا ، چوخ چتين اولسادا، بير آخشام چاغي، ياخين كندين بيرينده اولان دوستو قياس گيله گلير. خوش بئشدن سونرا، احوالاتيني دوستونا دانيشير و دوستودا اورك ديرك وئرمكله ايستير، ماناسي بيرآز بو وضعيتدن اوزاقلاشديرسين. گئجه دن بيرآز كئچميش، قونشوكنددن قياسين دوستو عاباس دا گلير. و شاعر دئميشكن؛ “سؤز سؤزو گتيرير، قيزيشير آرا / تزه دن تؤكولور اود سيماوارا”. و بو آرا، قياس عاباس دوستلارين آرالاريندا عيبادت و عدالت حاقدا مباحثه دوغور. و هر نه يي – اينصافي، ويجداني، عدلي – عيبادتده گؤره ن عاباس اينسانين شرفيني يالنيز عيبادتده گؤرور و طاعت سيز، عيبادت سيز كيمسه نين گؤردويو ايشي حقيقت ده اولسا، جنايت آدلانديرير. آما قياس ترسينه دوشونور و عيبادتين دوز يولا بير وسيله اولدوغونو وورغولايير.و عدالتي عيبادتدن قاباق دا گؤرور.
مباحثه نين توش دئمه دييي بو يئرده، قاپيدان گلن آت كيشنرتيسي، صحبتين دييشمه سينه بؤيوك بير بهانه اولور.و بير آزدان عاباس آتا مشتري چيخير. و قياس دا، ماناس دا آختارديقلاريني ائوده گؤرنده شاعر دئميشكن ريضاليق دوداقلاري گولومسه يير و او زامانكي پوللا، يوز اللي تومنه معامله ني ياپيرلار. و عاباس كيشي آتين جيلووونو گؤندرمه شرطي ايله معامله يه قول آتير. و قرار اولور او آتين جيلووونو گؤندرسين، بودا اونون پولونو.
سحر آچيلير و ماناس سئوينجك ائوينه دؤنور و ائوينه يئتيشينجه بير يولدان اؤتندن جيلووو گؤندرير. سن دئمه جيلووودا چوخ اسكيميش و كهنه ايميش. و عاباس دا ائله بوراسيني بهانه ائديب، جيلووو گئري دوندرير، هله اوسته ليك هده قورخودا گؤندريركي؛ اگر اوچ گونه دك آتين اؤز جيلووونو گؤندرمه سه، ژاندارمايا وئريله جك. ايش بو يئره چاتينجا، ماناسي قورخو بورويور و سيفارش ائدير؛ سن آللاه دئنن، ال ساخلاسين، اوچ گونه دك گليم قياس گيله، اورادا بو ايشه سون قوياق. اوچ گون تامام اولونجا، ماناس قياس گيله گلير و يئتيشينجه عاباسي دا اورايا گلميش گؤرور. عاباس ماناسي گؤرونجه ياخالايير و اوكي دئمه ليدي دئيير ماناسا. قياس ماناسي عاباسين اليندن آلير و نهايت خيلي چكيش بركيشدن سونرا، بؤيوك بير منتله ، بو آرادا آغساققالليغي اؤز اوزرينه گؤتورور. اؤنجه ايستير، بئش اون تومن ماناس دان آليب عاباسا وئرسين، آما ماناسين تعجب دولو كسين اعتراضني گورونجه، بير آز فيكيرلشيب، دايانير و گؤرور دوغورداندا “بيرده بير اوسته ليك”  بواينصاف دئييل و نهايت بئله قرارا گليركي؛ “اوسته ليك” آدي اولماسين و آت عاباسين، جيلووودا ماناسين اولسون.
آما سون سؤزومه ياخشي قولاق آس
بو دفعه سانماكي سؤزوم هئچه دير
قوي نه كاباب يانسين نه ده شيش ماناس
جيلو سنين آت عاباسين نئجه دير
ماناس بو آغساققالليغي گؤرونجه، بير آنليغا سانكي دونيا گؤزونده تيره و تار اولور و‌هامي ماجرا اؤزه لليكله عاباس قياس دوستلارين عدالت-عيبادت مباحثه لري بير آغ قارا انيميشن ساياغي، باياغي باياغي گؤزلرينين پرده سينده ابديليك يئر سالير.
يادينيزدا اولارسا، بو پوئمانين بؤيوك بير سؤز قونوسونا دؤنه بيله جه يينه اينانماق اولور دئديك و بير نئچه آچيدان دا ساوونماق …
بو پوئماني ايلك اوخودوقدا، البت دينلديكده – دينلديكده دئدييمده، پوئمانين ايندييه دك مكتوب شكيلده چاپ اولماديغينا و همشه  لئنت يازيلاريندان دينلديلديينه ايشاره دير- ياديما گلير؛ بير سيرا سورغو، سواللار آغليما گلميشدي وسونرالار او سورغو، سواللار مني دؤنه لرله دوشوندورموش و پوئماني دؤنه لرله  دينله مه يه و حتي مكتوب شكيليني تاپيب دؤنه لرله اوخوماغا يؤنتلميش ونهايت بئله بير قرارا، بئله بير يازغييا قول آتديغيما گتيريب چيخارتميشدي.
ايندي بورادا، او سورغو، سورونلاردان بير نئچه سيني گتيريب و اوزرينده اؤتري ده اولموش اولسا داياناجاغيق…
بيرينجي سورغو، ائله بيرآز اؤنجه ايشاره ائتدييميز، پوئمانين -عمومييتله شاعرين‌هامي اثرلرينين- مكتوب شكيلده واختيندا چاپ اولماديغينا عايددير. و ندن لرينه وارماق اوچون دؤنه لرله  شاعرين ياخيندان سؤز، صحبتينه دوشسك ده، جاوابلامالاريني دينله سك ده واوزه چيخارديغيميز نتيجه ده او جاوابلاملارين بيرآز فايزيني شاعرين اؤز كم محل ليينه ، اؤز قصورونا توجيه سايساق دا، بير سيرا واقعيت لردن ده واز كئچكمك اولمور اصلينده. آما بو او دئمك دئييل كي؛ بوگون بونو بهانه ائديب، اليميزي اليميزين اوستونه قويوب و هئچ ايشده گؤرمه يك، ائله اولارسا، بللي كي؛ سونرادان بيزده جاواب وئرمه لي اولاجاغيق. بورادا بير فاكتي اونوتمامالييق؛ اودا بوكي، شاعير اوخوجولاريلا تام قيرماييب دا؛ بوگون شاعرين اثرلرينين لئنت يازيلاري، كيتابدان داها فازلا دينله ييجي لرين اللرينده و بئله باخارساق داهادا ال وئريشلي دير.
ايكينجي سورو، پوئمانين عنواني چئوره سينده دير.البت بو حاقدا، شاعرين آلتميش بئش ايللييي مناسبتيله بوراخيلان گونش درگي سينين اؤزل سايسين دا، بير تنقيدي يازي دا وئريلميشدي و اورادا “ماناس”ين اصلينده بير تورك قهرماني آدي اولدوغو آچيقلانميش و پوئمادا بير ائرمني فردينين آديني داشيديغي تنقيد آتشينه توتولموشدور. بيزده ائله او يازغييا سؤيكنرك؛ “يئيه سيزلييميزين ماناسي” باشليغيني بو مقاله يه سئچديكده اونودا نظرده الميشديق بئله كي؛ بوراسي دا، ياني بو آدا بو قدر يادلاشديغيميزدا، واختيله بو قهرمانيميزا، بو تاريخيميزه يئيه لنه بيلمه دييميز اوجوندان چؤزولمورمو؟
بو يابانجيليق، بو گون بو اثرين يازاريني بو ساياق تنقيد لردن ساوونسادا، بو تنقيد بو اثره، عيني ايله بو يازارا داخيل دير و سوندا بيزيم ضرريميزه تامام اولور. اؤرنه يين؛ بئله بير آد يئني دن احيا اولارسا، يئني دن سئويلرسه، ان آزي اوشاقلارا قويولماق حاققيني قازانار، آما بو كيمي توتارلي و بؤيوك بير اثرلرده بئله سهولره يول وئريلرسه، او حاققيني دا ايتيرر و بير ايكراه حيسي ده دوغار يئرينه.
البت بير سؤزده وار بورادا، ياني اصلينده بير سورون دا وار داها. اودا، بو گونلر آرا سيرا گونده مه گتيريلن “ائرمني لرين، اصلينده خريستيان قالان توركلر اولدوغو” نظريه سي دي. و بو اوجدان، بو آدين ائرمني لرده اولدوغو و بيزلرده اولماديغي و بير سيرا بو كيمي تاريخي نظري سورغولارين و سواللارين دا اولدوغو واولماديغي شبهه لري ده دوغور شبه سيز…
اوچونجو سورون، پوئمادا اولان ائرمني و مسلمان (تورك) قارشيليغي و شاعرين اؤزونون مسلمان اولدوغونا باخماياراق، بو سورونا نئجه ياناشديغي دير. بيلديينيز كيمي، ماناس بيرگلمه ائرمني اولور و ايكي مسلمان ساريدان بير آت معامله سينده اؤزوده معاشينين نه دورومدا اولدوغو بير يئرده او ساياق حاقسيزليغا اوغرايير.  بو اولايي ياشايان شاعر و بو اثري ياراديركن، بئله بير دورومو اؤزونده ياشادان شاعر اينسانليغي، بو كيمي مفهوم لاردان اؤته ده توتور و تاريخي دوشمانچيليغا باخماياراق، چاليشير يالنيز و يالنيز حاققي ساووونسين و بو ساووونماق دا بو گون شاعرين اؤزونو بير جيليز ائرمنيچي اتهاميندان ساووونماغا بؤيوك بير برائت فاكتي و فاكتورو اولور.
دؤردونجو سورون، ماناسين گلمه اولدوغودور. بو تاريخي بير فاكت اولسادا، بو گئرچك اولايين و عيني ايله بو اولايين ترجماني اولان بو پوئمانين درين قاتلاريندان بو سورونو بير داهادا اوزه چيخارماق اولور. اوراداكي؛ ماناس حاقلي اولا اولا، حاققيني آلماقدان واز كئچير و ژاندارم آديني ائشيدينجه، او ساياق قورخويا دوشور. بو او دئمك ديركي؛ يالنيز بير گلمه دن بئله بير حال باش وئره بيلر. و يئرلي بير فردين، بئله بير قباحته،بئله بير قورخاقليغا اوغراديغيني هئچ اولماسا بو درجه ده، اينانماق بير آز زوردودا دئسك يانيلماميشيق دئيرديم.
بئشينجي سورون، ديل سورونودور. البت سورون دئديكده، آرديجيل “سورون”  دئدييميزدن دير. اصلينده بو سورون دئييل، بلكه ترسينه، پوئمانين ياخشي اولان يؤنلريندن بيريسي دير. و شاعرين بورادا شيفاهي خالق ديليندن او سوييه ده يارارلانديغي دير، اؤزوده، اؤز شعر كؤك لريميزين اوزرينده. باخسانيز، اون بير هيجادان و چارپارا قاليبيندن يارارلانميشدير. اؤزوده مشهور صمد وورغون چارپاراسيندان. ياني بيرينجي ميصراع ايله، اوچونجو و ايكينجي ميصراع ايله ده دؤردونجو ميصراعنين قافيه اولدوغو، بيلديينيز كيمي بو نوع شعر قاليبينين ان يوكسك يؤنلريندن ساييلير.
آلتينجي سورون چؤزولرسه، پوئمانين بير پتانسيلي ده اوزه چيخار منجه. اودا پوئمانين بؤيوك اثرلر سيراسينا داخيل اولا بيلمك زوورو و هله اوندان اؤته سي بير شاه اثر كيمي ده اؤزونو ساوونماق گوجونه ماليك اولدغودور. بيلديينيز كيمي، شاه اثرلر، بؤيوك اثرلردن بير باش يوخاري دا دورور و او سيرادان ساييليب، سئچيلميش اولور. ياني، بير اثر يالنيز اؤزلويونده دئييل، آز قالسين اؤزونه تاي اولا بيلن لرينده ايچريسينده سئچيلميش، سئويلميش اولونجا شاه اولا بيلير و بير اولاي دا ائله. اؤرنك اوچون؛ كندلي عصيانلاري چوخ اولوب،‌هاميسيندان باش گيزير اوغلو اولوبسا، اوندان دا باش كوراوغلو اولوب.و يا قاچاقلار حركتي آذربايجان دا چوخ اولوب بير واخت، آما قاچاق كرم‌هارا، اونلار‌هارا؟ آما قاچاق نبي‌هارا، اونلار‌هارا؟ و يا زامان زامان چوخ خانيملار اؤز نؤكرلرينه وورولا بيلير و حتي ايرضادا اولا بيليرديلر، آما ميصيرلي زليخانين – او درجه لي بير عائله نين خانيمي- وورغونلوغو و اوندان دا دوشوندوروجو يوسف امتناعسي ديركي؛ او اولايي او بيرلريندن فرقلنديرير و زامان زامان يازارلاري دا دوشوندوره بيلميشدير. و يا “love story” اثرينده، اينگيل تره لي چوخ وارلي “باررت”لر عائله سيندن اولان “اوليور” اوغلان،‌هاروارد يونيوئرسيته سينده چوخ شاشديريجي بير حالدا، اورانين او زامان كي سوسيال باخيشينين تام ترسينه اولاراق، چوخ يوخسول بير عائله دن اولان “جيمي كاويلري” قيزا وورولدوغو و بورادادا قيزين امتيناعسي عيني ماهييتين داشييجيسي دئييلمي؟ و عيني ايله چوخ چوخ…
دئمك ايسته ييرم؛ هر بير شاه اثر، اولدوقجا فرقلي و هر نه يي اوزونده جمع اولان، تاماملانان لاپ بئله يازارينا كيمي، لاپ بئله بازارينا ياني قاورامينا كيمي،‌هامي اولايلاردان فرقلنن اولايين ترجماني دير. و ائله بورادان ديركي؛ “شاه اثرلر ائله بئله يارانمير، بلكه اونلاري زامان يئتيرير” سؤزلري آرايا گلميش و دئييلميشدير.
اوزرينده دايانديغيميز بو اثرده ماهييتجه او سيرادان ساييلا بيلير. ياني، حقدن حقيقتدن دم وورانلار ساريدان چوخ حق لر يئييلير آما بو درجه لي اولونجا – ياني بيريسينين ماليني آليب پولونو وئرمكدن سه بيرده بير اوسته ليك ايسته مك- آرتيق اولمايانين  اولوشو كيمي بير شئي دير. و ائله او اوجدان دا اگر “فضولي يالنيز عراق قوربت لرينده يئتيشه بيلر” دئييريك سه، “پرافسسور ذهتابي يالنيز سيبرييادان اوزو بئله لرده” و “شهريار يالنيز تهران و شاهليق رژيمي تحقيرلرينده يئتيشه بيلر” دئييه بيليريك سه، “ستاردا يالنيز حقدن، حقيقتدن دم وورانلارين حقي اؤز اللري ايله بوغدوقلاريندا…” دئييه بيلريك…
بونلارين‌هاميسي ايلا بئله، اثرين بديعي گؤزه للييي، ديللي لييي، جمعييتين سايغيسي و قاورامي، اثرين‌هامي محيط لره وارينجا مباحثه لره سبب اولدوغو(بيلدينيز كيمي، بير اثرين ديريلييي و بؤيوكلويواوراداديركي؛ هر بيريئني محيطه وارينجا اورادا اونون مصداقلاري قابارسين و او مصداقلارينين عكس العمل لرينه سبب اولسون. و يئري گلميشكن دئييم، ماناس پوئماسي بوندان مستثني دئييلدير و دفعه لر بو خاراكتئرينين شاهيدي اولموشام) و بير چوخ بو كيمي فاكتورلارين اولدوغو بير يئرده، بس نه دير بو يئرسيزليك و بو چاتيشمازليق؟! داها دوغروسو بونجا وارلي اولا اولا بس نه دير بو يوخلوق و يوخسوللوق؟!
جاوابي منجه بيرجه كلمه دير و چؤزولمه سي اونو يالنيز ائشيتمكده، دينلمكده دئييل، اوزرينده دايانيب اوزون اوزون دوشونمكده دير؛ او كلمه، يئيه سيزليك دير. يئيه سيزليك، يئيه سيزليك و بيرده يئيه سيزليك !…
بوراسي بو قدر. ياني بواثري اوخوركن منيم ياشاديغيم حيس لر بو قدر. آما بير بو يازغييا گؤره، بيرده ايندييه دك بو اثرين مكتوب شكيلده چاپ اولماديغينا گؤره سيزي بو حيس لردن سونرا بو اثرله سربست بوراخيرام؛
“وينه‌لي ماناسين كئچن بير ايلده
فيرلانير ترسينه شن روزگاري
اله‌نير باشينا غمده، نيسگيلده
داغيلير اليندن دؤولتي، واري

فلاكتله كئچير گون گوذراني
هر ياندان باغلانير روزي دئشييي
حسرتلر الينده ديديلير جاني
جهنمه دؤنور ائوي، ائشيگي

اوميدي كسيلير هر بير خيالدان
بوغور طالعيني اوغورسوز حايات
بير ياتاق قويوندان بير آغيل مالدان
قورتولوب قالاني بير آت اولور آت

قادين اوز توتاراق بير گون كيشي يه
بير فيكير ائتميشم سؤيله يير اشي
كيمسه نين طالعي ايمه سين  -دييه
طالع كي گؤز ايدي، ايشده چلپه شي

نامرد اينسانلاردان ديله مه ديلك
نامرد اينسانلارين دوز اولماز ذاتي
اينسان اؤز گوجونه گووه نسين گرك
ديه رين ديمزه آپار سات آتي

هله ليك بئش اون گون آج بالالارين
آجيندان اؤلمه سين آماندير آمان
بير گون رحمه گلر امينم تارين
نئجه ائييبديرسه دوزلدر‌هامان

نه قوپوپ جانيندا يئرسيز ولوله
اينسانين طالعي هميشه ايمز
خيال دونياسيندان نه گلر اله
يوز فيكير بير قارين يئمه يه ديمز

ماناس قادينجاغين بو سؤزلريندن
بوتون وار گوجويله بير فيكره دالير
چيرپينان اوره يي سانكي يئنيدن
سعادت يولونا بير ايلهام آلير

روحونا نور ساچير اوميد گؤركمي
گؤزونون اؤنونده دئييشير حيات
اونودور بير آنليق كدري، غمي
سوزور دوداغينا ياريمچيق نيشاط

آتي نوختالاييب چكير ائشييه
چارپيشير باشيندا سئودالي خيال
قادينين سؤزونه راضييام -دييه
چاريغين، چوغاسين گئيينير درحال

ديلينده آختاريش، قلبينده اينام
گزير اوبا اوبا، دولاشير كت كت
سيخير قيسينتيلار كؤكسونو مدام
مين‌هاراي قوپارير ايچينده مؤحنت

هئچ كتده مطلبي سهمانا دوشمور
هامي اؤز گونونده گوذرانيندا
كيمين خياليندان بير آن اؤتوشمور
ماناس غرق اولوبدور غم وولكانيندا

نهايت آتيني قيديقلاياراق
بير كنده يئتيشير بير آخشام چاغي
كئچميشلر بو كنده گلنده هر واخت
يامان شن كئچيردي عؤمرونون چاغي

گونلرله آيلارلا يئييب، ياتاردي
بير قياس آديندا آشناسي گيلده
هر غمين، غصه نين داشين آتاردي
حؤرمتي آرتاردي بو ائوده ايلده

اونو دوشوندوردو بئله بير قرار
هر شئيين تزه سي، دوستون كؤهنه سي
يقين موشگولونو دوست الي آچار
بئله بير قراره آرتدي هوسي

قاييديب بير لحظه كئچميشلرينه
يؤنلدي قياسين ائوينه بير باش
ال چكيب اوزونده خفت ترينه
دوشدو آت اوستوندن چوخ ياواش ياواش

قياس محبتله، شيرين حؤرمتله
چيخير قاباغينا غملي ماناسين
ماناسين اليندن درين منتله
آلير اؤز الينه آتين نوختاسين

-اشي خوش گلميسن خوش گؤردوك سني
نه عجب سن‌هارا بو يئرلر‌هارا
كيروه ده يوخلارمي بئله كيروه ني
سن سيز لاپ اولموشدو اوره ييم پارا..!

ائليزده اوبازدا دئه نه وار نه يوخ
قادينين دونياسي نئجه حالدادير
داييم سوراغيزي توتوردوم آزچوخ
اوشاقلار نه كئفده نه احوالدادير

ماناسي سارسيدان بو يئرسيز گؤروش
اورك سئوينجيني ضربت لنديرير
دوداغيندان سوزن غملي بير گولوش
قياسيدا درين حئيرتلنديرير

-نييه دانيشميرسان دينميرسن ماناس
نه اولوب بير دانيش ديله گل ديله
ندنسه توتموسان اوره يينده ياس
سن بيزه گلردين هي گوله گوله

سوكوتلار ايچينده ماناسين بير آن
باشيني قالديرير یاريمچيق بير ال؟؟؟
بوتون وارليغيني لاخلادان طوفان
سپير دوداغينا كدري تل تل

-سوروشما حاليمي ياماندير حاليم
كيمسه دن گؤزونو ايمه سين فلك
پوزولدو گؤردويون او جاه جلاليم
الندي اوستومه غم اتك اتك

شيرين حياتيمي دييشدي زامان
گونلريم آجيدي آجيناجاقدا
اولمادي حاليما اوركدن يانان
سوسدو هيكل كيمي طالعده باخدا

بير گئجه ده باتدي قويونوم ماليم
داغ كيمي كنديمين تاخيلي هوپدو
موم اولدو پتكده نه وارسا باليم
ائليمده قيامت قوپدو نه قوپدو

كؤرپه بالالاريم هي آجام -دييه
نه گوندوز كيريدي نه كئجه ياتدي
كيمسه رحم ائتمه دي مؤحتاجام -دييه
گؤردوم كي لاپ پيچاق سومويه چاتدي

بير ائله ثروتدن قالان بو آتي
گتيرديم بئش گونلوك چؤره يه وئرم
اوچ گوندور گزيرم ائلي، ائلاتي
نه بير موشتري وار نه اهل كرم

ائله بو صؤحبتين شيرين يئرينده
قاپي جيريلتيسي گؤيه يوكسلير
قياسين لاپ ياخين  كندين بيرينده
اورك دوستو اولان عاباس دا گلير

صؤحبت عوض اولور سؤز دييشيلير
تازادان تؤكولور اود ساماوارا
قياس كئچميشيندن دانيشير بير بير
سؤز سؤزو گتديكجه قيزيشير آرا

-دئييرم دونيادا آي قياس كيشي
اينسانين شرفي عيبادت اولور
طاعت سيز كيمسه نين گؤردويو ايشي
حقيقت ده اولسا جنايت اولور

اينصافين، ويجدانين، عدلين، گئرچه يين
حقيقي معناسي نامازدير ناماز
نامازلا  سهمانلا اوره يينده كين
نامازسيز اينسانلار حققه ياراماز

قياس پاپريزيني آليشديراراق
يئرسيز احتياطلا بير فيكره دالير
عاباسين اينامسيز سؤزونه آنجاق
اوركدن آجيييب معترض قالير

-من سنين سؤزونله راضيلاشميرام
سؤزون وار سؤز دانيش بو سؤزلر ندير
مني دوشوندورن باشقادير مودام
عبادت دوز يولا بير وسيله دير

اؤزو اؤز وارليغين تانيمييان  كس
نئجه تانيييارمي يارادانيني
كور قوشا  باغ اولسون يا دمير قفس
قاپالي گؤره جك اؤز مكانيني

باخ! مودام حقدن دم وورانلارين
ازلد اينصافينا، صداقتينه
رحمي مرووتي اولمايانلارين
بير قپيك وئرمزلر عيبادتينه

اينامسيز، ويجدانسيز هر بير اينسانين
عملين سؤزوندن ياندا گؤرموشم
چوخ اوزن سجدلي ناماز قيلانين
الين ديرسه يه جك قاندا گؤرموشم

منده چوخ سئويرم حقي، دوز ايشي
دئميرم اولماسين عيبادت گرك
دئييرم اينساندا آي عاباس كيشي
عيبادتدن قاباق عدالت گرك

قارين كي ساز اولدو شاققيلدار داماخ
آجيليغين، قيجليغين آخ توخ اوزونه
بونلارين شن كئچن دونياسينا باخ
ماناسين تور ساليب اؤلوم گؤزونه

يوخسوللوق قارداشدير قارا اؤلومه
يوخسولون سؤزوده يوخسول اولارميش
پوللولار الينده هر زمان دئمه
بوينو توكدن نازيك بير قول اولارميش

بودمده قاپيدا كيشنه ين بير آت
قياسين آغزيدا ايتيرير سؤزون
عاباس احتياطلا يئرينده مات مات
قياسين گؤزونه تيكه رك گؤزون

-كيم اولا؟
-هئچ بير كيم، باشقا كس دئييل
آشناميز وينه لي ماناسيندير آت
ماناسا دييه سن پيس گليب بو ايل
گتيريب منه كي سن بو آتي سات
-جاواندير؟
-ياخشيدير، رنگي زغالي
آت دئمه دوغروسو كؤهلندي كؤهلن
-بيليرم پيس اولماز ماناسين مالي
سوروش مايل اولسا مشتري يم من

قياس آختارديغين ائوده گؤرنده
ريضاليق دوداغي بير گولومسه يير
آتين اختيياري منده دير منده
قيمتينه دوشسه ساتارام دئيير

قياسدا، عاباسدا اوره يي دولو
گؤتور قوي ائديرلر هر نه يين نه سين
يوز اللي تومن او زامان پولو
كؤهلنين ياپيرلار معاميله سين

آما بير شرطي وار سؤيله يير عاباس
جيلوسوز بو كؤهلن نه ييمه گرك
جيلووو‌هانسي گون گؤندرسه ماناس
من اونون پولونو وئره جم دئمك

قياس  بير اليني چكه رك اوزه
كيريخميش ماناسا سؤيله يير بو دم
بونون نه عيبي وار هر ايكينيزه
سؤز وئريب آرادا اؤزوم ضامينم

ماناس اؤز ائوينه قاييدير صاباح
خيالي قاريشيق، روحو نيگران
اوره ييندن قوپان نه سه گيزلي بيرآه
اونو دينجلمه يه بوراخمير بير آن

او طالعي زبون اوره يي كوسگون
قلبينده دوغسادا شوبهه لر، گومان
جيلووو يوللايير يئتيشدييي گون
دئيير قوي اولماسين ايشيمده نقصان

جيلوودا دئمه سن آغرييار باشين
مين يئردن جانينيا وورولوب ياماغ
ماناس تك اونوندا غم چاتيب قاشين
كئچميشدن سؤز آچير اوزونده كي داغ

گون گونه جالانير هفته هفته يه
اينتيظار ايچينده بوغولور ماناس
سوروشور اؤزوندن گؤره سن نييه
بس آتين پولونو يوللامير عاباس

اولمايا بو ايشده وارسا بير كلك
نه بيليم بلكه ده گليب گئدن يوخ
بعضنده بير آجي گولومسه يه رك
-آجلارين درديني نه دوشونر توخ

دييشير يئريني فيكري آن با آن
اومود گؤركمينه سوروندوكجه چن
خيال دونياسيندان ائله بو زامان
آييرير ماناسي آي مانس ديين

تله سيك جان آتير بو واخت سيز سسه
ديلينده ايضطيراب، كؤنلونده موهن
تانيشدا اولماسا گؤروركي نه سه
الده جيلوو دوروب بير يولدان اؤتن؛
-سنيندي بو جيلوو، سنه چاتاجاق
-كيميندير دئدينيز؟
– سنيندير دئديم
-اينانا بيلميرم بونا من آنجاق
سنه بو جيلووو دئه كيم وئردي كيم

-مني گؤردو دونن گلنده دئمك
سن او آت ساتديغين عاباس دي نه دي
مني ساده گؤروب گلمه سين كلك
آتين اؤز جيلووون يوللاسين دئدي

يابي جيلووودور بو گؤندرديگي
كؤهلنين جيلوووون دالدالاماسين
آييب دير اوبادا ائلده سؤيله كي؛
شرفينه توخونماسين عاباسين

مطلبي اوزالديب سالماسين كئشه
دئه حارام قاتماسين بو معاميلييه
عاباس دؤز مه يه جك بو ناحق ايشه
گؤر ماناس ،عاباسين ماليني يييه

بونودا بيلسين كي تك او جيلوووون
اوچ جه يوز تومن دير قدري قيمتي
جيلووو وئرمكدن قاچيرسا بويون
مندن اينجيمه سين لاپ حقيقتي

ايشيميز بيته جك باشقا يول ايله
اونو هر زحمته سالديراجاغام
عدالت خانادا ژاندارم اليله
بيره بئش او پولو آلديراجاغام

سؤز بورا چاتاندا سانكي ماناسي
تپه دن ديرناغا ايلديريم چالير
كؤكوندن لاخلاديب او باختي كاسي
حئيرتين دهشتي آياقدان سالير

شاخير گؤزلرينده پرده پرده غم
ظولمته بوغولور اوميد گؤركمي
اونو اختييارسيز آتديغي قدم
سؤيكويور ديوارا يورغون ال كيمي

ديلينده ايضطيراب، كؤنلونده طوفان
اؤزونو ايتيرير فيكري خييالي
تيترك دوداغيندا گيزلي بير آمان
سورغويا، سووالا چكير بو حالي

-نه لر ائشيديرم ايلاهي بو دم
يوخ بو اولا بيلمز، بو ممكون دئييل
بلكه ده يوخودور قره له نيرم
منله باشقالاشير دونيام ائله بيل

آتين اؤز جيلووون يوللاسين دئدي؟
مني دردسره سالماسين داها
وئرمه سه جيلووو بيلسين سؤيله دي
قيمتي كؤهلندن ايكي قات باها؟

من كي يوللاميشديم آتين جيلووون
ايندي نه اوچوندور بو يئرسيز طلب
هله اؤده مه ييب آتين اؤز پولون
بيرده بير اوسته ليك ايسته يير عجب!

حقدن، حقيقتدن دم ووران كيشي
حققي بوغور ايندي اؤز اللريله
ديلده دانيشيقدا گؤردويو ايشي
ندنسه دوز چيخمير عمللريله

بس اوگون هر شئيي دوزگون آنيردي
اينساندا عيبادت عدالت گرك
ويجدانسيزا قارشي سيلاحلانيردي
بس بوگون نه اولدو او تميز اورك

ايشيم يامان يئرده دوشدو انگله
نه الده مدركيم، نه جيبده پولوم
مني سارسيداجاق بو قورغو، تله
يقين باغلاناجاق بو يولدا قولوم

ژاندارمين الينه سالسا بو ايشي
مساله بير قاتدا چتينله شه جك
او پوللو، من پولسوز، يوخسول بير كيشي
اونون هر مطلبي يقينله شه جك

منيم اؤز پولومدان وئرسه اون تومن
ايشه باخانلاري اووسونلاياجاق
نه قدر حق دئييب دانيشسامدا من
منه اولموياجاق كيمسه بير داياق

دفعه لر گؤرموشم ايداره لرده
ناحق حققه دؤنوب حق ناحق اولوب
هر شرره، بؤهتانا پول چكير پرده
پولسوز حق دانيشان دونندن اؤلوب

باشقا جور بو ايشي بيتيرمك گرك
قوي ياخام اللرده تيكلنمه سين
آجليقدا، توخلوقدا اؤتوب كئچه جك
تكي قوي شرفيم لكه لنمه سين

بير لحظه اؤزونه قاييدير ماناس
قلبيني سيخسادا غم دؤنه دؤنه
ياريمچيق ياريمچيق او طالعي كاس
اوزونو توتاراق يولدان اؤتنه

-دئه گؤروم عاباسي گؤره جك مي سن؟
-نئجه مي اولمايا تاپشيرديغين وار؟
هر نه سؤزون اولسا آرخايين اول من
عاباسا يئتيررم دئديگين قرار

-سن آللاه عاباسدان اولسا منه سن
يالواريب ياخاريب اوچ گون مؤهلت آل
گليم قياس گيله اوچ گونه جن من
ژاندارسيز قورتولسون تا بو قالماقال

-اولسون نه عيبي وار عاباسدان سنه
اوچ گون مؤهلت آللام، آما بورا باخ
سنه تاپشيريرام من دؤنه دؤنه
وئردييين سؤز خيلاف اولماسين آنجاق

-اشي منده اولماز اينامسيز قرار
حقيقت سيز اولماز هر نه سؤز دئسم
وعده مين اوستونده صداقتيم وار
مذهبه ايمانه شرفه قسم

اير اوچ گونه جن گلنمه سم باخ
دينيمدن يولومدان دؤنوم يان اولوم
وئرديييم سؤزومدن قاچيرسام آياخ
منده عاباس كيمي موسلمان اولوم

سؤز بيتير قاييدير ائوينه ماناس
ياريسي ازيلميش بير ايلان كيمي
مؤحنت اوستن مؤحنت، ياس اوستوندن ياس
النير باشينا دونيانين غمي

گؤروم هئچ گولمه سين اوزو دونيانين
يوخسولو درد تاپار دوردوغو يئرده
حق سيزليك ماناسين چوروموش جانين
ايندي ده سوروسون ايداره لرده

اومودو تك بير آت اودا كي بئله
ني كيمي سيزلاشير بير چتن كولفت
ماناسين روحوندا قوپوپ هلهله
چاپير دونياسيني يئرسيز حقيقت

قلبي سكسه كلي، فيكري حاچالي
دؤيور وارليغيني ايضطيراب سسي
اوغورسوز كئچه جك بيلير بو حالي
پولسوزون پوللو ايله معاميله سي

عدالت اولمايان هر بير اؤلكه ده
هانسي حقيقتدن دانيشماق اولار
ايكي قات چورويوب عؤمرو كؤلگه ده
حقيقي حياتين باغچاسي سولار

ايكي گون وضعيت اؤتوشور بئله
ماناس غم اليندن باش آتيب ياتير
گليب اوچونجو گون چاتاندا اله
سفر شله سيني بئلينه چاتير

گؤتور قوي ائتديكجه گله جه ييني
يانير اود ايچينده قلبينين هيمي
سورونور سيخديقجا غم اوره ييني
آياقي دالينجا بير پالاز كيمي

ماناس يول اوزونو فيكيرله شه رك
ياخشي دير ايش بيتسين قوي قياس گيلده
منه ده‌ين ده‌ييب نئينه يك آنجاق
بير كيمسه بيلمه سين اوبادا، ائلده

اونسوزدا طالعيم، باختيم اولوب كاس
اوزومه باغلانيب حياتين يولو
منه كلك گلدي او نامرد عاباس
چتين اله گلر آتيمين پولو

ماناسين گلمه سين او گونو عاباس
كؤنول دفترينده نيشانلاميشدي
گليب قياس گيله گلمه ميش قياس
هر ايشي يئرينده سهمانلاميشدي

آچاراق قاپيني بو دمده ماناس
حئيرتدن آليشدي قلبينين سيمي
گؤردو قياس گيلده اوتورموش عاباس
سؤيكندي دووارا يورقون ال كيمي

ماناس يئره باخدي، عاباس ماناسا
اونو  غم بورودو، عاباسي غضب
اوتاغين شنليگي چئوريلدي ياسا
يئريندن توللانيب عاباس داوطلب؛
توتوب ياخاسيندان ماناسين -دييه
بونا باخ گؤر كيمه گلميسن كلك
گؤر ماناس عاباسين ماليني يييه
اوندا بو دونيادا گزمي‌يم گرك
يا آتين جيلوو، يا اونون پولو
يا سنين بوغازين ژاندارمين الي
ايندي توت توتورسان‌هانسي بير يولو
گؤرك زور گله جك كيمسه نين كلي

ژاندارمين آديني ائشيتجك ماناس
دهشت دن گؤزلري چيخدي كلله يه
بو آدي تانيردي او طالعي كاس
اوز توتوب قياسا آماندير -دييه

قويما اوزانسين بو ناحق ايشي
ياخامي ظاليمين گل اليندن آل
سن اؤزون بيليرسين ازلدن اشي
بو يئرسيز طلب دير، يئرسيز قال ما قال

وئرميشم جيلووو من بو آلچاغا
بو نه روزگاردي، نه زمانه دير
منيم اؤز آتيمين پولون وئرمه يه
جيلوودا اورتادا بير بهانه دير

سؤز بورا چاتاندا قياس قالخاراق
عاباسين اليندن آلدي ماناسي
ماناسدا بو ايشده حاقلي دير آنجاق
دانلاييب دانساييب بير آز عاباسي
سونرا اوز توتاراق ماناسا ساري
-قوي بو قالماقالي تاماملا ييم من
دونيادا قالاجاق دونيانين واري
سن گتير عاباسا وئر بئش اون تومن

عاباسي توولاييب دونيانين مالي
مثل وار بوشالان بير داها دولماز
هر ايشين اولارام من آغ ساققالي
عاباسدا بو ايشده اؤتوشسون بير آز

بو آغ ساققالليغي گؤرنده ماناس
چالديلار دونياني سانكي باشينا
بير قاتدا پاس آلدي قلبينده كي پاس
گؤردو كي دوست قاتيب زهر آشينا

اوركدن آجييب، كسيلدي يان يان
اوز توتوب قياسا تعجب له؛ – سيز
منيم اؤز آتيمين پولون وئرمكدن
بيرده بير اوسته ليك ايسته ييرسينيز؟

قياس فيكيرله شيب داياندي بير آز
گؤردو دوغورداندا بو اينصاف دئييل
بيرده بير اوسته ليك..!  بئله ده اولماز
بو بؤيوك بير درددي، بؤيوك بير نيسگيل

اوز توتوب ماناسا گولومسه يه رك
ظرافت ائيله ديم سؤيله يير اشي
حق سيز دانيشماغيم نه ييمه گرك
هر يئتن ساققالي آغ اولماز كيشي

آما سون سؤزومه ياخشي قولاق آس
بو دفعه سانماكي سؤزوم هئچه دير
قوي نه كاباب يانسين نه ده شيش ماناس
جيلو سنين آت عاباسين نئجه دير

يوزلرله هر گونده ايش كسيرم من
هئچ ايشده بير سؤزوم ايكي اولماييب
قوي سيزه گولمه سين هر يولدان اؤتن
سيزدن بو قالماقال عاييب دير عاييب

نه دييه بيلردي بيچاره ماناس
چونكي قالماميشدي بيرچيخيش يولو
هايانا دؤندوكجه او طالعي كاس
گؤروردو اوزانير قيچيندان قولو

اونو سارسيتميشدي قلبينده كي غم
بير ياشيل آلوولو حسرت چكه رك
اولسون علاجيم يوخ دييه راضي يام
سيزه حقه تاپشيريرام من آنجاق

آما بير مطلبه ياخشي اينانين
مذهبده، ايماندا حقيقتده دير
حقيقته اعتمادسيز اينسانين
گؤر اينسانيتي نه قيمتده دير؟

يامان يئرده منه كلك گلدينيز
پوچ اولدو ايمانيز، شرفيز، دينيز
سيز آللاه بير بئله معامله سيز،
بير ائلده، اوبادا هئچ گوروب سينيز؟

دينديم آتيم گئتدي، دينمه ديم پولوم
سن اي مظلوملارين مردي مرادي
باغلاندي هر ياندان ديريليك يولوم
چاره سيز درديمه درمان اولمادي

كؤكسونده مين يارا قلبينده مين غم
قاييتدي ائوينه الي بوش ماناس
عؤمورلوك سئل اولدو گؤزونده كي نم
حسرته قوووشدو او طالعي كاس   …!”