Home / یادداشت / ثقه‌الاسلام صاباح دارا چکیله‌جک!/ رقيه كبيري

ثقه‌الاسلام صاباح دارا چکیله‌جک!/ رقيه كبيري


ثقه‌الاسلام صاباح دارا چکیله‌جک!
رقيه كبيري

آذر آیینین دؤردونجو گونو، عادی بیر یاشامین اوچورومو…
(یازدیغیم آنی‌لار توپلوسوندان بیر یازی)

گؤزلرینی آچیرسان. شافاق گؤزلرینی قاماشدیریر. یومورسان. یوخویلا اویاقلیق آراسی بیر آنی دا یاشاییرسان. فیکیر هله بئینینین سللولارینی، عصب‌لرینی چالیشدیرماییب. یالنیزلیغینی یورقانینا بورگه‌له‌ییب، باغرینا باسیرسان، ساغینا دؤنورسن. شافاقین ایشیغی کیپریکلرینین اوجوندا دایانیب. گؤز قاپاقلارینی بیر- بیریندن آییرماق ایسته‌ییر. گؤز قاپاقلارین اوکیانلارین صدف‌لریدی، دونیانی بوروین ایشیغا آچیلیر. آرخان اوسته دؤنورسن. بورگه‌لنمیش یورقانی برک- برک باغرینا باسیرسان. هله ده گؤزلرین ایشیغا قاماشیر. پنجره‌نه آسیلمیش تور پرده‌نین آرخاسیندا دومانلی شافاقا زیلله‌نیرسن. شافاقی دؤوره‌له‌میش، گؤیومسوو بولودلاردان خوشلانسان دا، اوره‌یینی داریخدیریر. شافاقین آچیلیشیندان بللی‌دی؛ بو گون‌ ده گونش بولودلارین آرخاسیندا قالاجاق.

فیکیر بئینینین عصب سللولاریندا قیمیلداماغا باشلاییر. گؤز قاپاقلارین قاپانیر. ساعاتا باخماغین گلمیر. ندنسه قالخماق زامانی یئتیشدیینده، نه اولور، اولسون، ساعات دورمادان زیل چالاجاق. سن یئریندن قالخاجاقسان. ساعاتین زیل سسینی سؤندوره‌جکسن. ال- اوزونو یومامیش، آشپازخانایا گئده‌جکسن. اوجاغین اوچ شعله‌سینی ، یاندیراجاقسان. چایدانا سو دولدوراندا، هر گونکو کیمی، آبگرمکن دان غیرعادی فیسیلتی سسی قالخاجاق. هر گونکو کیمی‌فیکیرله‌شه‎جکسن:« یادیمدا اولسون تعمیرکارا زنگ ووروم» چایدان اوجاق اوستونده چیسیلدایاندا، سن ایکی قاشیق تورک قهوه‌سی، ایکی قاشیق شکر، قهوه جوشا بوشالدیب، قاشیغین دالیسیلا قهوه‌ایله شکری بیر- بیرینه قاتاجاقسان. شکرین خیرچیلتی سسی اوره‌یینی دیده‌جک. ایکی فینجان سو، قهوه جوشا بوشالدیب، اوجاغین شعله‌جیکینین اوستونه قویوب، شعله‌نین خودونو آشاغی چکه‌جکسن. روف سود قابینا گؤز عیاری بیراز سود بوشالدیب، اوجاغین اوچونجو شعله‌سینین اوستونه قویاجاقسان. توالته گئده‌جکسن. دیشلرینی فیرچالادیغیندا، اوجاغین اوزه‌رینده‌کی سودایله، قهوه‌نی دوشونه‌رک، تلم- تله‌سیک آغزینی لیلیخلاییب، آشپازخانایا دوغرو قاچاجاقسان. کؤپویو قالخمیش سودون شعله‌سینی سؤندورب، قهوه جوشو یوخلایاجاقسان. ‌قهوه، قایماق باغلایاجاق؛ قایماغین قیراقلاریندان یاواش- یاواش قایناماغا باشلادیغیندا، قاینامادان اوجاغی سؤندورمه‌لیسن. چایدانین لولویوندن بخار قالخاجاق چاینیکه بیر آتیملیق چای، بیر بارداق بویوندا قاینار سویو سوزوب، یئنی‌دن اوجاغین اوستونه قویاجاقسان. نئجه ده اولسا، یاشام یولداشین گیلاناری رنگینده چایی بینیر. قهوه‌نی فینجانلارا سوزمه‌دن آشپازخانادان بویلانیب، اوغلانلاری سسله‌یه‌جکسن« اوشاقلار دورون اَیاغا…بئواخ دی» قهوه‌نی فینجانلارا سوزوب میز اوستونه قویاجاقسان. اوشاقلارین اوتاغینا دوغرو گئده‌جکسن. یئددی یوخونون ایچینده‌دیلر. بیر داها سسله‌یه‌جکسن« آی بالا… دورون آخی بئواخ‌دی… یوبانارسیز‌هااااا…» اوغلانلار اؤزلرین ائشیتمه‌مزلییه ووراجاقلار. سنسه «واللاه  دا چاغیرمیاجام ‌هاااا…. دورون اَیاغا….ساعاتا بیر باخین….» اوغلانلار یئرلرینده گئرنه‌شنده سن اؤز اوتاغینا گئده‌جکسن. گوزگوسوز اوتاغیندا، گؤزلرینین آلمالیغینین آلتیندا، گونو- گوندن آرتان چیزگی‌لرینه کِرِم چکه- چکه کامپیوترینی یاندیراجاقسان. نارکوتیکه آلیشقانلیق کیمی، ایشه گئتمه‌دن ایمیل لرینی یوخلاماق، فیس بوکا گؤز دولاندیرماق دئییشیلمز عادت کیمی‌اولوب سنه. فیس بوکدان سورویله گلمیش ایمیل‌لری پوزاجاقسان. “وی کیو” و “پارس بوک” دان گلمیش ایمیل لرده، نئت کیتابلارینین آدینا باخاجاقسان. گون اولمور کی بیر نئچه نئت کیتابی بو سایتلاردان نئت ایشله‌ییجیلرینه گؤندریلمه‌سین. ایشینه گلن کیتابلاری دانلود ائده‌جکسن. سونرا گؤز اوجو فیس بوک پئیجینه باخاجاقسان. گؤزون یازیلمادیغی سؤزلری آختاراجاق. یازیلارا باخا- باخا، فیکیرین، سؤزو سؤزدن آییراجاق. کیم کیمه نه یازیب، کیم کیمین یازیسین اوخویوب دا، بیه‌نیب، کیم کیمین یازیسین اوخومامیش بیه‌نیب؛ کیم کیمین یازیسینی دئییل، شکیلینی بینیب….

کامپیوترین اؤنوندن قالخدیغیندا، فیس بوک آلیشقانلیغیندان زهلن گئده‌جک. دونیانین ال چاتیلماز بیر نوقطه‌سینه گئدیب، یالنیزلیغینی اؤزون و اؤزلویونله یاشاماق ایسته‌یه‌جکسن.

اوشاقلار گئیینیب، ائودن چیخدیقلاریندا، سن یئنی‌دن ساعاتا باخاجاقسان. اوغلانلارین اوتاغینین گوزگوسونه گؤز اوجو باخیب، ساچلارینین آغینا، قاراسینا باخمادان، ساچلارینی  دارایاجاقسان. ایللردی قاین‌آنان دونیادان کؤچوب. اونون گئدیشی‌ایله سنین سورمه قایناغین دا قورویوب. گؤزلرینی سورمه یئرینه قارا میدادلا  قارالاماسان، یاتالیغا دوشموش ناخوشلارا اوخشایارسان.

اداره‌نین سرویسینین گلیشینه آزجا زامان قالاجاق. آرتروز آغریلارین  شدتلنمه‌سین دئیه، سودایله، بال قاریشیمینی ایچه‌جکسن. گئیینیب، قاپیدان چیخمادان چایدانین آلتینداکی شعله‌نی سؤندوره‌جکسن. سحرین شیرن یوخوسونا دالمیش، فیس- فیس فیسلدایان یاشام یولداشینی سسله‌یه‌جکسن« من گئتدیم. یوبانارسان‌هااااا»

قاپیدان ائشییه چیخدیغینندا دؤرد قات آپارتمانین ائولرینیدن قالخان قوخولار بورنونا دولاجاق. دیوار بیر قونشونوز نئجه هر گون یئدییی املت دن چییریمیر دئیه، دوشونه‌جکسن. پیلله‌‌لری آشاغی ائندیینده، یئنی بیر ایش گونونون سحری اوزونه آچیلاجاق. عینالی گئنه گؤزونده قیزاراجاق. هر گونکو کیمی‌عینالی یا سلام دئیه‌جکسن. اویسا، سایماز- سایماز سنه باخاجاق. سنسه هر گونکو کیمی‌اوره‌یین داریناجاق. داریخماغین باشلاناجاق…

یاتاغینداسان. گؤزون گوندوزه آچیلیب. سولونا دؤنورسن. باغیرنا باسدیغین یورقان، یاتاغیندان یئره دوشور. گؤیولسوز ساعاتا باخیرسان. گؤزون عقربه‌لره توخوندوغوندا، هؤله‌سک یئریندن قالخیرسان. گئج قالیبسان دئیه دوشوندویونده، یاددایشیندا آیین دؤردونجو گونو اولدوغو، یادینا دوشور. نه ده اولسا، سحرینه گؤز آچدیغین گونون تعطیلینی 1400 ایل اؤنجه‌کی تاریخه بورجلوسان. هله اؤنونده بیر باشقا تعطیل گونو وار دئیه، دینجلیکله یاتاغینین قیراغیندا اوتورورسان. ایسته‌مه‌دن تاریخین دوزاغینا دوشورسن. صاباح ثقه‌الاسلام یئددی کیشی‌ایله بیرلیکده، تبریزده دارا چکیله‌جک. روسیه‌ 1917ینجی ایللرینه گئری دؤنمه‌یه‌جک. داها اکتبر انقلابی اؤز وئریب، هئچ بیر هئیت تقه‌الاسلامین مزارینا گول چلنگی دئییل، بیر یارپاق چیچک  بئله گتیرمیه‌جک.

تاریخین دوزاغیدان قورتولماق ایسته‌ییرسن. 1300 ایللریندن اوزاقلاشیب، 1324نجو ایله یئتیشدیینده، آنان سؤیله‌دیی خاطیره‌لر یادداشیندا دیریلیر. 81 یاشی اولسادا، او ایللرده مدرسه‌ده  اوخودوغو شعرلر، درس‌لر، آیدین- آشکار یادداشیندا قالیب:

ای بیزی یوخدان یارادان تانریمیز

سن بیزه لطف ائیله، عنایت ائله

بیزلری دوزگون یولا، دوز ایشلره

قدرت ذاتین‌لا هدایت ائله

سن آتامیزلا، آنا، اوستادیمیز

راضیلیغین بیزلره قیسمت ائله

تاریخین دوزاغینا دوشَرسن، قورتولاجاغین اولماز. قوی 1325ینجی ایلین آذر آیینین آغری- آجیسینی تبریزین بئلی سینمیش ارگی چکسین، دئییرسن. یاتاغیندان قالخیرسان. آشپازخانایا دوغرو گئدیرسن. اوجاغین بیر شعله‌سین یاندیریرسان…

91.9.4

About ایشیق

One comment

  1. هئچ بیر هئیت ثقه‌الاسلامین مزارینا گول چلنگی دئییل، بیر یارپاق چیچک بئله گتیرمیه‌جک

    .
    ثقه الاسلامی ـ حسنی ـ غدیری ـ دار آغاجیندان آسان زامان شاخسئی گئن آداملارا، یئنه دورب باخاجاقلار. بابی لاری آسیب، دئییب آستاجا کئچه جکلر. دونن، بوگون، صاباح فرق ائتمز، ساده جه آدلار و آدلار! دئییشیلیر.
    بلی، تاریخین دوزاغینا دوشَرسن قورتولاجاغین اولماز.
    تشککورلر خانیم کبیری

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *