باغبان قیزی‌نین ماهنیسی باره‌ده
حسین واحدی

اوستاد علی نشانی 1305-نجی گونش ایلینده آذربایجان جمهوریتینین قازاق شهرینده دونیایا گؤز آچیبدیر. سونرالار 1312-ینجی ایلده اورمیه شهرینه گلیب بورادا یاشاما داوام ائدیبدیر. بو دَیرلی شاعیر ایندی اورمیه‌ده یاشاییر و اورمو بازاریندا پارچا ساتماق ایله مشغول دور…

دَیرلی اوستاد علی نشانی‌بی، 1332-ینجی گونش ایلینده بیر قالارقی شعر دئییبدیر. سونرالار بو شعر خالق ماهنیسی ایله دیللر ازبری اولوبدور. اوستاد اؤزو بو شعره گؤره بئله دئییبدیر:

باغبان قیزی منیم مایل اولدوغوم بیر قیزایدی. اونون آتاسی گول باغبانی اولدوغونا گؤره من شعریمده اونا «باغبان قیزی» آدی قویدوم. جاوانلیق و ان گوجلو و ایمانچی زامانلاریم ایدی. بزازلیق ایشینه مشغول ایدیم. نهایت همین قیز منه قسمت اولمادی. بو شعریم بسته كار اسماعیل شاكری وسیله‌سی ایله ماهنی‌یا تبدیل اولدو. اورمیه رادیوسوندا و خلق آراسیندا مجلسلرده بیر زامان اوخونوب, دوام ائتدی. تهران رادیوسوندان آذربایجان اوخویانی مرحوم مصطفی پایان وسیله سی ایله اوخوندو و بیر خالق ماهنیسی كیمی‌دیللره دوشدو.

 باغبان قیزی

ای خومار باخیشلی باغبان قیزی

چادراسی سورمه یی گولو قیرمیزی

گؤزون خومارلادیر گؤیده اولدوزو

آمان باغبان قیزی، جان باغبان قیزی

یاناغی قیرمیزی، جان باغبان قیزی

بازاردا ساتدیغیم شالدی قوماشدی

گؤردوم باغبان قیزین دیلیم دولاشدی

باخدیم گردنبنده گؤزوم قاماشدی

آمان باغبان قیزی، جان باغبان قیزی

یاناغی قیرمیزی، جان باغبان قیزی

من ده بیر اوغلانام صاف و صادقم

ثروت آختارمیرام حوسنه عاشیقم

جمالین گؤرمگه خیلی شایقم

آمان باغبان قیزی، جان باغبان قیزی

یاناغی قیرمیزی، جان باغبان قیزی

خوش بئجریب آتان گوللردن سنی

یاخشی ائشیتمیشدیم دیللردن سنی

ایسته سم آلاردیم اللردن سنی

آمان باغبان قیزی، جان باغبان قیزی

یاناغی قیرمیزی، جان باغبان قیزی

 باهار1332