آكواريوم
عليرضا ذيحق

دوشونمكدن قورخوردوم و هئچ نه يه فيكر ائتمه دن تكجه اؤزومو دانليرديم :

“باشيم كي منيم آكواريوم دئييل ايچينده نه وارسا گؤرونه پس نه دن قورخورام ؟ بيرده لاپ بئينيمي باشيمدان چيخاريب اَلكُل‌لي بير شوشه ايچره آتسالاردا، فيكيرلريمي و دويغولاريمي كي كيمسه گؤرمه‌يه‌جك، بو قورخونون نَدَني نه اولا بيلر؟ “

بو سؤزلره جواب وئرمك اوچون كي سورغو سوآلا چئوريليردي دوشونمك لازيم ايدي و من مقبره يه گئديب آند ايچميشديم كي هئچ واخت فيكيرلشمه‌يم. بير قويون كيمي ياشاماق نه ييمه گركمز دي؟ باشيمي آشاغي ساليب اوتلاماق و دُيدوق دا اوره‌كدن گه‌ييرمك دوغرودان دا كئف وئريجي بير زاد ايدي. آمما حئييف‌لر اولسون كي حئيوان دئييلديم و گرك اؤز يئمه‌ييمي و ياشاميمي، قافامي چاليشديرماق ايله اَله گتيررديم و بيلدي‌ييم بيلگي‌لري قوشا گيلاس لار تك  اؤيره نجي‌لريمين قولاغيندان آسارديم. اونلار ياشاييشا، تاريخه ، فلسفه‌يه و شعره يول آچان سوآل لارينان ايستر – ايسته‌مز منيم بئينيم ده كئچن‌لري اوزه چيخارديرديلار. بئله‌ليكله آكواريوم‌لارين نيسگيلي‌ايله ياشاييرديم و بيليرديم كي اونلارين ايچينده جومان خيرداجا و اويناق باليق‌لار هئچ واخت آكواريوم‌لاري سورغو سوآلا چكيب اونلارين سسيني ضبط ائديب اونا بونا سووغت يوللامازلار.

البته هئچ دوشونمه‌دن بونو دا بيلميشديم كي دونيا كلمه‌لرله دولو اولماسايدي شايد چوخ ايش لرده آدامين باشينا گلمزدي. البته لال اولماق بو ايشه كيفايت ائتمزدي كي لال لار دان چوخ دانيشان بيرده اؤزلري ايديلر . بئله بير زمانه ده كي آدام ، آدام لاردان قاچيردي عشقيم تكجه قوشلار ايله دانيشماق ايدي آمما قوشلار دا گيريپ توتموش قاناد لاري‌نان اؤلوم ويروسونو هر يئره يايماقلا ، داها قوشلاردان دا چكينيرديم . كيلاسا گئده نده ايسه داها سبد – سبد گيلاس يوخ بلكه قولتوق دولو كاغاذ آپاريرديم كي دانيشماق عوضي اونلارين اوزون دن اوخويوب اؤيره نجي لر يازماق ايله ،  واختي بير تَهَر اؤلدوروم . بئله ليك له ده سورغوسوآل سوروشماغا ايسه كيلاس دا واخت قالميردي.

بير گون بو دوروم دان سيخيلاركن تصميم توتدوم چؤل باييرا چيخيب مال حئيوانلارا باخماق ايله اوره ييم بير آز آچيلا . ناخير لار و سورولر كي ياشيل چمن لر اته يينده ياييلميشديلار باشلاريني آشاغي ساليب يئمك ده اولسالاردا ، گؤزه چارپان و حيس اولان بير سئوگي دالغاسيني دا اونلارين هر بير ترپه نيشينده گؤرمك چوخدا چتين دئييل دي.  بير بيرلرينين آياقيني آياقلامادان ، پاييني قاپمادان ، قارنيني بورنوزلامادان و غئيبتيني ائتمه دن چي‌يين- چي‌يينه ياشاماق دان ذوق آليرديلار . آنجاق اونلارين ساللاخ خانادا باشلاري نين كسيلمه سي ياديما دوشَركن اوره‌ييم داها سيخيلدي و ائوه قاييتديقدا ، واختيمي گول لره آييرماق قرارينا گليب باشلاديم پاساژلاري دولانيب سئوديييم گول لره هئچ پول وئرمه‌دن دويونجا باخماغا . اينترنت سيته لرين دن  ايسه دونيادا نه قَدَر بيه‌نيلن گول وار ايدي ييغديم بير فايلا . آنجاق گوللرين عطرين دويمايينجا سيّار ساتيجي لارين بويون لارينا آسديقي عطير تاباقچالاريندان ، بير شوشه عطير آليب ائوه سپمك ايله گول عطرينده غرق اولدوم .

قورخو حيسّي بالا- بالا دهشتلي كابوسلارلا ايسه يوخوما گيريب بيردن گؤروردوم اَليمي گؤزسوز جُمجُمه لرين ديشينه اوزاديرام و نه گوج وئريرسم ده او ديش‌لري چكنمه‌دن قوجاغيما آليب آپاريرام ديش دوكتورلارينا . دوكتورلاردا جمجمه يه باخمادان منه بير نوسخه ساكين ديريجي عصب حبّي يازيب يولا ساليرلار .  بو حب لر مني يوخلاداركن كيلاس دا ايسه گول دن آغير سؤزكيمسه يه دئميرديم . چوخ سئوينيرديم كي بئله ليك له مني آدام يئرينه قويوب آيليق معاشيمي كسمه دن ياغ و شكر كوپِني ده بيله‌مه وئريرلر.  دونيادان هئچ نه آنلاماسايديم دا بونو قانميشديم كي ياشاماق اوچون آدام ديلينه و دوشونجه سينه زنجير وورا بيلر آمما معده‌يه و بوغارسيغا بير ايش گؤزمك اولماز .

بير گون آنام دئدي :

” سن يوخودا هردن ائله اوجا دانيشيرسان كي منيم يوخومودا قاتيرسان .”

آناما ” نه ديل ده دانيشيرام ؟ ” دييه‌ركن او گولومسه ييب ” آنا ديلده بالادا ، نئجه بَيه ؟” دئمك له يئنه ياساق بير چرچيوه لرده گزدي‌ييمي آنلاديم .

بو دوروما سون وئرمك اوچون ، ايكي دانا 200 صحيفه ليك بوش و يازي سيز دفتري بير صحّافا وئريب اونلاري بير – بيرينه قاتيب قالينكور بير حيلد توتا . او بير كيتابا اوخشاركن اؤلكه نين رسمي ديلينده قورقوشوم حرفلرله بئله بير زرلي يازي دا اوستون ده يازديرديم : ” داش دئوري نين آكواريوم لاري”

سونرالار باشلاديم دوشونجه لريمي او كيتاب دا يازماقا و بئله ليك له ائله يه بيلديم آراميش تاپيپ گنجلي‌ييمي باشدان ساوماقا كي جوانليق  اؤزوده ائله بير جوره سوچ ايدي.

رحمتلي آنام اؤلمه دن اوّل مني ائولنديرركن ، بير زامان گؤردوم كي فيكريم اولوب اوشاقلاري  دوكتورا آپارماق ، مدرسه يه يئتيرمك و خانيمي گؤزل ليك سالن لارينا و درزي لره چكيشديرمك . بئله ليك له او كيتابي بوسبوتون اونوداراق اصناف لاردان نسيه آلماق و تقسيط له ائوي قيخ ليق فرش لر و نفيس اشيالارلا دولدورماق ،  بؤيوك آماليم اولدي.

ياشيم اؤتوب كئچسه ده گؤردوم اينسان حقوق لارينا فيكيرلشمه‌دن ده يئنه بير بؤيوك قورخو ايچينده يم . . حيسّ ائديرديم بير قويون‌لا داها هئچ فرقيم قالماييبدي و قصاب توكانلاري‌نين شاققالانميش اَت لري ده مني قورخودورلار. آمما خانيميمين منه گؤز آغارتمالاري و اوشاقلاريمين منه ديل قايتارمالاري ياديما دوشركن قورخومدان آزجا آزاليردي و گؤروردوم هله ده بير آدامام .

بيرگون داريخاركن خانيمين زئرزمي ده قازان ايچينه ييغديقي قيوير زيويرلارين سوراغينا گئتديم. اونلارا قاريشان كيتابلاري  گؤزدن كئچيره‌رك” داش دئوري نين آكواريوم لاري ” آدلي بير كيتاب گؤردوم . آزجا دوروخسام دا بيلديم كي اونوتدوغوم اَل يازي لاريم دير.  او كيتابي هوسله ورقلركن آنلاديم كي جوانليق دا نه قَدَر من مدنيت دن اوزاق ايديم و بوتون دوشونجه لريم داش دئورينه عاييد اولموش اينسانلارا مخصوص ايدي.